Read Konyak Naga 1 SAMUEL 25 Bible Online

1 SAMUEL 25 - Konyak Naga bible

1 SAMUEL 25

¹Sha-a Samuel li; hüyange Israel khongkümpu jamshe jem, hüyange I jingne mang shap, hüyange I yoi nok Ramah me mu. Tüophei me David yayong hüyange Paran phaonyu jongte lai.

²Maon me kahta ja ngoh, I toishao-a Carmel me ngoh. Tüopa kahta-a yeonge hak-e ngoh; hüyange Ime nyee haja lüm hüyange youn haja ja ngoh. I-a Carmel me nyee-min khüppa ne ngohyangki.

³Sha-a tüopa kahta min-a Nabal, hüyange I sheko min-a Abigail ngohyangki. Shekonyu-a deitahpu hüyange naoyha mei-e ngohyangki; hüpoi netanpa-a lüppelopu hüyange Iye lingpu-a yemeipe ngohyangki. Hüyange I-a Caleb nokphong mepu ne ngohyangki.

⁴David-e wanwüng jeng me ngohyange Nabal-e yoijing nyee ümin khüpnang she jai.

⁵Tüokhei David-e naoshelan kahta pen shon, hüyange David-e naoshelan te i, “Numan Carmel te ongtüoh, hüyange ü-min me Ite salam phatüoh.

⁶Hüke numan-e Ite salam phatüoh she nyüoweleiye tam!” “Nangme chingmei ngohtüoh, hüyange nenok noksa me chingmei ngohtüoh, hüyange nangme nangpu khongkümpu phei chingmei ngohtüoh.

⁷Taowe nanga nyee-min khüppalan she jainang; nang nyee yompalan sha-a toman phei ngohyangki, hüyange toman-e iman wüotüone yetam, hüyange Carmel me iman ngohpu hipak khongkümpu me iman jing hango mahne yetam.

⁸Nenok naoshelante tongtüoh, iman-e nangte ikülak. Tüokhei nang mükshao me nang naoshelan shüpshe tüonetampha; hangjingne toman mo nyih me peiye ngohnang; chingmei lamlinge nang yak me hanghe yin peilakeih nang shaoshanpalan hüyange nang shümpa David te phatam shih.”

⁹Aope David mepu naoshelan pei, iman-e Nabalte David min me tüolan ngao khongkümpu ngao, hüyange jünge tanne ngoh.

¹⁰Hüpoi Nabal-e David shaoshanpalante jan, hüyange i, “David ao shi? Hüyange Jesse üha ao shi? Tenyih ngainyih rhapalan üngang yoi nokpu mepu phette taipalan ngohnang.

¹¹Hüma-a taowe ü-an hüyange ü-yeng hüyange ümin khüppalan jingne toipu ümeilam yahpuwe taowe yeshingpu kahta iman ü-mepu pei, imante phalak a?”

¹²Tüokhei David mepu naoshelan iman lamte lüp hüyange leihye, hüyange peiye Ite tüolan khongkümpu i.

¹³Hüyange David-e yoi kahtalante i, “Numan kahta lili-e yoi yanglow leapyah.” Hüyange iman kahta lili-e yanglow leap; hüyange David-o yoi yanglow leap; hüyange David pheite kahta gho peli nanjing ong; hüyange gho ni nanjinga toinan phei ngoh.

¹⁴Hüpoi Nabal shaoshanpalan naoshelan yo me sheja-e Nabal sheko Abigail te hatüo hüke i, “Leihuyah, David-e phaonyu jong mepu teman nokpute salam ngaolan phei ngaolan kipalan shon; hüpoi Iye imante teetampu, nange jaiya ei?

¹⁵Tüoyangpoi iman-a tomante yeonge mei-e ngohyangki, hüyange toman phao me ngohwante hangshin me iman phei toman-e jam-e ngoh toman wüotüone yetam yejema-a toman jing hango yemahtam.

¹⁶Nyee yom-e toman iman phei ngohpu hipak khongkümpu me toman jingne wangnyak wangngai iman toman jingne jant kih-e ngohyangki.

¹⁷Sha-a tüokhei nange hanghe linglak shingyah hüyange teih nyüoyah; hangjingne toman nokpu phei tüi-e hüyange Inok noksa khongküm phei tüi-e ümeng linglak monge ngohnang; hangjingne Ite aowe-o ngao ja nehoi yengao oklak ne I mongshih yemeipe ngai ngohnang!”

¹⁸Hüwante Abigail-e yeonge mam-e anbung gho ni, wuwüngti meisho tük üyong ni hüyange ngüwyang phei nyee üpüm nga, hüyange ngüwyang phei wong kilogram pen me nyit hüyange wuwünglick üjüp gho ja, hüyange phuklick awkek antoi gho ni, hüyange tüolan-a gado me tüm-e tam.

¹⁹Hüyange yhawe inok naoshelante i, “Ü-sheshaote taitüoh; leihuyah, tao numan pheite woinang.” Hüpoi yhawe yoi netanpa Nabalte hango ye-i.

²⁰Hüke yha gado me shotyange kahtang yashong neiye kem-e ngohwante, leihuyah, David hüyange I kahtalan yha sheshao me lai; hüyange mokh she yhawe iman hüo.

²¹Sha-a David-e yoi mongme hüke teih ngoh, “Ütingme jajang jawe taowe tüopa kahta me nangpu khongküm phaonyu jongme yom-e ngohyangki, tüokaiye Ime nangpu hango yemah; tüoyangpoi Iye pa-a ümei nanleiye ümeng leih phanang!

²²Wangngai shaome tüome ngohpu kahtalan ükümpate ngoiye yetoitam ma-a Kahwange üte hüke shütte li ne tamshih!”

²³Aope Abigail-e David nge, yha mamtam-e hüyange gado tok mepu yu, hüyange yha nying nyingke kahtokte lamta.

²⁴Hüyange yhawe David yashongme lammeta hüyange i, “Ü-nokpu, ümenga taowe kilakei, hüyange nang shaoshannyuwe chingmei lamlinge, nang nasa me ngaone tampha, hüyange nang shaoshannyu ngao jaipha!

²⁵Taowe nangte yoppe tongnang, Ü-nokpuwe tüopa ühak yekohpu kahta hüke Nabal yihtahteih; hangjingne I min kih-e I ngohnang, I min-a Nabal ngohnang, hüyange Ime üwüoh yetüopu ngohnang; hüpoi tao, nang shaoshan nyuwe nange shonpu ü-nokpu naoshelan ye-nge.

²⁶“Tüokhei sha-a Youngwanpa üyin me ngohtepuwe, hüyange nang üyin me ngohtepuwe, iy shailak mepu hüyange nang yak-e phuh hahlak Youngwanpawe tük-e ngohtepuwe, sha-a tüojingne nang wepalan hüyange aoyinne ü-nokpu te ümeng yamnang, Nabal kih-e nang tamtüoh.

²⁷Hüyange sha-a tüopa hünghao hanghepa nang shaoshannyuwe yahyange ü-nokpu tangte peinang; hatüo ü-nokpu pheite woipu naoshelan jingne yahtepha.

²⁸Chingmei lamlinge nang shaoshannyuwe ngaokhüm mengpu ümeng winpha; hangjingne Youngwanpawe ü-nokpu noksa wongnangpu ja ne linge tamlak hangjingne ü-nokpuwe Youngwanpa wehok hoknang, hüyange nangme nang üyin jin küm-e ümeng ye-ngelak.

²⁹Hüyange kahtawe nangte jangyapoi hüyange nang üyin yamlak jingne ngaiyapoi, tüoyangpoi ü-nokpu üyin-a Youngwanpa nang Kahwangpa üyin lungshap me shayange ngohlak. Hüyange nang wepalan üyin-a nyeilah lahhan mepu long keppuke Iye yeiye tamlak.

³⁰Aope Youngwanpawe ü-nokpute ümei khongkümpu nang jeng ngaowe tampuke linglakei, hüyange Israel tangme nang ahngpane lelakei,

³¹hüke hangne-o yejepute nange iy shaipu, yejema-a ü-nokpuwe yoi nying nyingke yoi yak-e phuh hahshe hüwante ü-nokpu jingne mongmengpu, yejema-a mongjang me yashah hüolak yenanglak. Hüyange aope Youngwanpawe nangte mei-e jonlakei, hüwante nang shaoshan nyu teih tüoyah.”

³²David-e Abigail te i, “Youngwanpa, Israel Kahwang aowe tenyih nang ü-pongte shon, moimanpa ne mengtüoh,

³³hanghepawe tenyih tao iy shailak ünu mepu hüyange ü-nying nyingke ü-yak-e phuh hahpu mepu tao tük-e ang!

³⁴Hangjingne ütingme Youngwanpa Israel Kahwang üyin ngohtepuwe, nang mam-e tam-e yepei shihma-a, nangte ümeng lingne ngohpu mepu aowe tao tük, napning wangngai shaoma-a Nabal jingne netan naha ja nehoi towe yengoh hah shepu!”

³⁵Tüophei me Ite yhawe yahpeipu yha yak mepu David-e yah, hüyange Iye yha te i, “Nenokte chingmei me ongtüoh, leihuyah, taowe nang ngao jaiteki, hüyange nang tongpu yahteki.”

³⁶Aope Abigail Nabal tangte leihye; hüyange leihuyah, Iye Inok me mo ja, ahngpa mo ja le-e lingyange ngoh. Hüyange Nabal mongjang mongmei-e ngoh, hangjingne I yeonge jokteiye ngoh; tüokhei napning wang manngai manngai yhawe Ite hango yengaotampe ngoh;

³⁷Hüyange napning, aope Nabal mepu wuwüngti taiteiye ngoh, I shekonyuwe Ite tüolan khongkümpu i, hüyange I mongjang limah, hüyange I long kih-e wanne mah.

³⁸Tüophei me nyih pen nanjing ngohyange Youngwanpawe Nabalte shüt, hüyange I li.

³⁹Aope David-e Nabal liteki she jai, Iye i, “Youngwanpa aowe ü-wüotüopu Nabalte phuh hah, hüyange yoi shaoshanpa ümengpa mepu tük-e ang, moimanpa ne mengtüoh, hüyange Nabal ümengpa lingpu Iye yoi shangtang me leih-e Youngwanpawe phateki.” Tüophei me David-e I sheko ne menglak jingne teingaone shon-e Abigail jeng teingao.

⁴⁰Aope David shaoshanpalan Carmelte Abigail tangte peiye ngoh, iman-e yhate ngaowe i, “David-e nanga yoi shekonyu ne menglak jingne nang I tangte woiye peilak toman nang tangte shon.”

⁴¹Hüwante Abigail yha nying nyingke yha sheta kahtokte khuhta, hüyange i, “Leihuyah, nang shaoshannyu nang nokpu shaoshanpalan ya poitamlak shaoshannyu ja hei ngohnang.”

⁴²Hüyange Abigail mamshe tüm, hüyange yayong, hüyange yha jing naoyhalan nga yha pheite woi, hüyange David ngaolan kipalan pheite tai, hüyange I sheko ne meng.

⁴³David-e Jezreellan Ahinoam-o yah; hüyange imni moini I sheko ne meng.

⁴⁴Tüowante muh üne-o Saul-e yoi yhala Michal David sheko ne ngohyangpu Gallimlan Laish üha Palti te phayange ngoh.