Read Konyak Naga 1 SAMUEL 26 Bible Online

1 SAMUEL 26 - Konyak Naga bible

1 SAMUEL 26

¹Ziphlan ütam Saul tangte Gibeahte peiye i, “Jeshimon sheshao me Hakilah kahtang me David I nying nyingke lowe yengohpu a?”

²Hüwante Saul yayong, hüyange shemeipu Israel nyahponglan haja lüm woiyange Ziph wanwüng jeng me David yamlak jingne Ziph phaote lai.

³Hüyange Jeshimon ü-o me Hakilah kahtang me Saul-e lakjing ling. Hüpoi David phaonyu jong me ngoh, hüyange Saul I pheite phaome peinang she Iye shing.

⁴Tüokhei David-e kuhshükpalan shon, hüyange ütingme Saul pei she shing.

⁵Hüyange David yayong, hüyange Saul lakjing te pei; hüyange Saul hei I wetaipalan woipa Ner üha Abner ümeken me ngoh, hatüo meimei-e ngetüoh; Saul I jing nyahponglan ne neikonyange lakjing nyoi hotan me lamyange ngoh.

⁶Hüwante Hitlan Ahimelech te, hüyange Joab jeiheinao Zeruiah üha Abishai te David-e tonge i, “Nangni yo me ü-phei Saul lakjingte aohipa tailak?” Hüyange Abishai i, “Tao nang phei lailak.”

⁷Tüokhei David hei Abishai ni Saul lakjingte kahtalan tangte wangnyak me lai; hüyange leihuyah, Saul-e yoi ngou I shangtang me kahtok me yonge tüohyange I lüpshüppu okjang pu nyoi me shi-e ngoh; hüyange Abner hüyange wetaipalan I neikon-e ngohyangki.

⁸Hüwante Abishai David te i, “Teya Kahwange nang wepa nang yak me phünne phateki; tüokhei sha-a nangte yoppe tongnang, ngou-e kahtok me phuk lüowe taowe Ite ja me hei lütküning, hüyange taowe nishepa-a Ite yelüklak!”

⁹Hüpoi David-e Abishai te i, “I tahtoi; hangjingne Youngwanpawe minnga phowe lepupa phei tüi-e yoi yak nopu me ünu yenangpe ngohlak a?”

¹⁰David-e i, “Youngwanpa üyin me ngohtepuwe Youngwanpawe Ite shütlak yejema-a I lilak nyih ngoilak; yejema-a I shapjute yulak, hüyange mahlak.

¹¹Youngwanpawe minnga phowe lepupa phei tüi-e taowe ü-yak yehünglak tientam pha! Hüpoi sha-a taowe nangte yoppe tongnang, I shangtang me ngohpu ngou hei yengtükpa-a yah hah hüyange tümni taihah.”

¹²Tüokhei David-e Saul shangtang mepu ngou hüyange yengtük yah, hüyange imni taimah. Hüyange kahta aowe-o ye-nge, yejema-a hatüo yeshing; ye-i-ma-a ao-o yelüo; hangjingne iman khongkümpu nyai-e shi-e ngohyangki, hangjingne Youngwanpa mepu iman tangte lipukih shi ne tampu pei.

¹³Tüophei me David jaye kahtang yekao me tai, hüyange üjai me kahtang me yong; imanpa me nangjange jai-e ngoh.

¹⁴Hüyange David-e wetaipalante hüyange Ner üha Abnerte üngwün-e nyik, “Abner, nange yejanpu a?” Hüwante Abnerwe jan hüyange i, “Ahngpate üngwün-e shinloi tampu nang ao shi?”

¹⁵David-e Abnerte i, “Nanga wongnangpu kahta ja yeje pu a? Nang kihpu Israel me ao ngohnang shi? Hüma-a nange nang nokpu ahngpa yom-e yengoh a? Hangjingne jam-e ngohpu yo mepu shejawe nang nokpu mahtamlak jingne ong.

¹⁶Nange lingpu tüolan toi-a meipu yeje. Youngwanpa üyin me ngohtepuwe numan lilak wangnang; hangjingne Youngwanpawe minnga phowe lepu ahngpa numan-e yom-e yengoh. Hüyange sha-a leihu, ahngpa ngou hüyange I shangtang me ngohpu yengtük ngohpu-a ümeken me ngoh nangki?”

¹⁷Saul-e David ngaowüng shingeok, hüyange i, “Ü-ha David, hatüowa nang ngaowüng a?” Hüyange David-e i, “Hatüowa ü-ngao ngohnang, ü-nokpu, O ahngpa.”

¹⁸Hüyange Iye i, “Hangjingne ü-nokpuwe yoi shaoshanpate jangpu? Taowe hanghe lingyangpu jingne! Yejema-a hanghe ümeng ü-yak me ngohpu shi?

¹⁹Tüokhei sha-a taowe nangte yoppe tongnang, ü-nokpu ahngpawe yoi shaoshanpa ngao jaikei; Youngwanpawe ü-phei tüi-e nang hengetam she ima-a, Iye dopu yahtüoh, hüpoi tüopa-a kahta ühalan-e mengma-a, Youngwanpa sheshao me iman phoiwümpu shahtüoh; hangjingne Youngwanpa moth me tao ye-omlak ne taitüoh, ‘Ülao kahwanglan khümtüoh’ she tenyih tao jange teipu ne menglak.

²⁰Sha-a Youngwanpa sheshao mepu yan-e taiye ü-iy yinjing kahtok me tahyeitam; hangjingne ütam-e kahtang me phao awha toine yampu kih-e, Israel ahngpawe ü-üyin yamlak jingne peiye ngohnang.”

²¹Hüwante Saul-e i, “Taowe ünu omyangki; leihyekei, üha David; hangjingne shaaji taowe nangte ümeng yelinglak, hangjingne teya nang mükshaome ü-üyin toinyu ne menge yinyangki; leihuyah, taowe ngapa konkon, hüyange yeonge püohyangki.”

²²David-e jan hüyange i, “O ahngpa, hatüome nangjing ngoute leihuyah! Tüokhei naoshelan yo me ja pei-e hatüo yahtaitüoh.

²³Youngwanpawe kahta lilite I üjaopa hüyange monghümpu phakülak; hangjingne teya Youngwanpawe nang ü-yak me phünne pha, hüpoi Youngwanpawe minnga phowe lepupa phei tüi-e taowe ü-yak yelan.

²⁴Leihuyah, tenyih ü-sheshao me nang üyin toinyu ne mengpu kih-e, hüke ü-üyin-o ü-Youngwanpa sheshao me toinyu ne mengtam pha; hüyange Iye mongshang mongmeng üshei mepu tao yintam pha.”

²⁵Hüwante Saul-e David te i, “Nang moimanpa ne mengtüoh, ü-ha David! Nange ülam maa linglak, hüyange tüolan me okpu ngelak.” Tüokhei David yoi lamte tai, hüyange Saul yoi ngohpu nyoite leihye.