Read Konyak Naga 1 SAMUEL 27 Bible Online

1 SAMUEL 27 - Konyak Naga bible

1 SAMUEL 27

¹David-e yoi mongjang me ngaowe i, “Sha-a nyih ja pa-a Saul yak me tao mah phalak yang; Philistialan kahmükte phette tailak tokte kaiye üjingne hango meipu yenang; hüyange Israel yikeng khongküm pume üjingne yamlak Saul mongshih ngailak; hüwante I yak mepu tao yinpu oklak.”

²Tüokhei David yayonge Iphei ngohpu kahta gho wok woiyange, Gath ahngpa Maoch üha Achish tangte khok-e tai.

³David Gath me Achish phei ngoh, hüyange I kahtalan kahta lili yoi noksalan phei, hüke David-o I sheko ni, Jezreellan Ahinoam, hüyange Carmel yha Abigail, Nabal-e tüohpu wamnyu phei ngoh.

⁴Aope Saulte David Gathte phette taiteki she shingne tam, hüyange Iye shaaji I yeyam.

⁵Hüyange David-e Achishte i, “Sha-a tao nang sheshao me, shüpshe tüoma-a, chingnyulan yo me, tüome ngohlak ne nyoijing ja üte iman-e pha ne tamshih; hangjingne nang shaoshanpa hangne ahngpa nok me nang phei ngohlak?”

⁶Hüwante tüopa nyih me Achishwe Ite Ziglag ching pha; tüojingne tenyih ngoiye Ziglag Judah ahngpa jingne ngohnang.

⁷Philistia kahmük me David ngohpu nyih itpu-a wangpeng ja lekeng peli ngoiye ngohyangki.

⁸Sha-a David hüyange I kahtalan ong, hüyange Geshurlan, Girzlan, hüyange Amaleklan chinghah; hangjingne tüolan-a Shur ngoiye hüyange Egypt kahtok ngoiye kahtok ülangne nyoiye ngoh yangki.

⁹David-e kahmük-a lanshe chinghah; hüyange netan jeyah sheko jeyah towe üyin me yetüoh, hüyange nyeelan hei mahu hüyange gadolan, hüyange udhlan hüyange nyemo yahtai; hüyange I leihye hüyange Achish tangte yahpei.

¹⁰Aope Achishwe tong, “Numan-e tenyih aoyin ching hah ei?” David-e hüke i, “Judah apye mepulan phei tüi-e,” yejema-a “Jerahmeelan apye mepulan phei tüi-e,” yejema-a “Kenlan apye mepulan phei tüi-e.”

¹¹Hüyange David-e netan jeyah sheko jeyah Gathte iman yahpeine üyin yetüoh. “Hüke yelingma-a, David-e hüke ling she iman-e teman jeng ngaolan phakülak she teih.” Hüyange Philistia kahmük me ngohpu hipak khongkümpume hüke Iye tüopa wanglam jon.

¹²Hüpoi Achishwe David te ütinglak-e i, “Iye yoi kahta Israel te meimei-e Ite nulakne linge tamteki, tüokhei I jinte ü-shaoshanpa ne ngohlak.”