Read Konyak Naga 1 SAMUEL 28 Bible Online

1 SAMUEL 28 - Konyak Naga bible

1 SAMUEL 28

¹Tüopa nyih hei hipak me Philistialan Israel phei hoklak jingne wetaipalan ükhong jem, hüyange Achishwe David te i, “Nange mei mei-e shingyah, nang hüyange nang kahtalan ü-phei, wetaipalan ükhong phei jam-e tailak.”

²David-e Achish te i, “Meiteki, nang shaoshanpawe hanghe linglakei hatüo nange shinglak.” Hüyange Achishwe David te i, “Meiteki, jinte ü-shang yompa ne taowe nang menge tamlak.”

³Sha-a Samuel li, hüyange Israel khongkümpuwe I jingne mangshap, hüyange hüke I yoi chingnyu me Ramah me mu. Hüyange Saul-e kahmük mepu shao-itpalan hüyange phongyengpalan jange teiyange ngoh yangki.

⁴Philistia wetaipalan jamshe jem, hüyange peiye Shunem me lak; hüyange Saul-e Israel khongkümpu jamshe jemne tam, hüyange Gilboa me lak.

⁵Aope Saul-e Philistia wetaipalan ükhong nge, I nyam, hüyange I mongjang yeonge nin.

⁶Aope Saul-e Youngwanpate tong, Youngwanpawe mangme jeyah, Urim kaiye jeyah, Thummim kaiye jeyah, yejema-a hipalan kaiye jeyah Ite yejan.

⁷Hüwante Saul-e I shaoshanpalante i, “Meilingnyu sheko ja, tao yha shongte taiye tongpu oklakne üte yam-e tampha.” Hüyange I shaoshanpalan-e Ite i, “Leihuyah, Endor me yaha pheipu meilingnyu ja ngoh nang.”

⁸Hüyange Saul-e yoi nying nyingke leijeiyange ülao nyemo yahyange, I hüyange Iphei kahta ni woiyange tai, hüyange yaning me iman shekonyu tangte ngoi. Hüyange Iye i, “Taowe nangte yoppe tongnang, nang üngan yaha kaiye taowe nangte aohipa min ilakei ngaine tamkei.”

⁹Shekonyuwe Ite jan-e i, “Ütingme, Saul-e hanghe ling nange shingnang, hangke Iye meilingpalan hüyange phongyengpalan kahmük mepu lange win! Hüma-a tao li ne tamlak jingne hangne nange ü-üyin jingne tüntün-e angpu?”

¹⁰Hüpoi Saul-e yha te Youngwanpa min me jiengjep-e i, “Youngwanpa üyin me ngohtepuwe, taowe tüopa toishao jingne nangte hango shaoshi tampu yengohlak.”

¹¹Hüwante shekowe i, “Taowe nang jingne ao ngaine tamlak?” Hüyange Iye jan-e i, “Ü-tangte Samuel ngaine tampha.”

¹²Aope shekowe Samuel nge, yhawe yeonge üngwün; hüyange shekowe Saulte ngaowe i, “Hangne nange tao lowe tampu? Hangjingne nanga Saul ahngpa ngohnang.”

¹³Ahngpawe yhate i, “Nyam-e tahteih; nange hanghe ngenangki?” Hüyange shekowe Saul te i, “Taowe kahtok mepu yaha ja (Kahwang) ngaiye ngenang.”

¹⁴Iye yhate i, “I leilak hangke nangki?” Hüyange yhawe i, “Wupa kahta ja ngainangki; hüyange Iye ngeng-ahng phakshaoh shaohyange ngohnang.” Hüyange hatüowa Samuel she Saul-e shinge pei, hüyange I sheta kahtok yete meyange khuhta, hüyange wangshüm hüopu pha.

¹⁵Samuel-e Saulte i, “Hangne nange tao pok-e no-e woiye peine tampu?” Saul-e jan, “Tao yeonge mongmengpu phei ngohnang, hangjingne Philistia lan-e ü-phei tüi-e hoknang, hüyange Kahwang ü-mepu yan-e taiteki; hüyange shaaji üte hipa kaiye jeyah, mangme jeyah yejan; tüokhei taowe hanghe linglak hatüo üte shingne tamlak taowe nangte nyik.”

¹⁶Samuel-e i, “Youngwanpa nang mepu yanteki she hüyange nang phei tüi-e we ne mengteki she shingyange hangne üte tongpu shi?

¹⁷Ü-kaiye ngaowe tampu kih-e Youngwanpawe nangte lingteki, hangjingne nang yak mepu Youngwanpawe ahngchinga hitteki hüyange hatüo nang yupipa hüke David te phateki.

¹⁸Hangjingne nange Youngwanpa ngaowüng yejai, hüyange I nyamlakpa ne mongshih ngaipu Amalek phei tüi-e nange yeling; tüojingne Youngwanpawe tüopa toishao nangte tenyih ling.

¹⁹Üne-o Youngwanpawe Israel phei nango omme Philistialan yakme phateki, hüyange ngainyih nang hüyange nanghalan ü-phei omlak; üne-o Youngwanpawe Israel wetaipalan ükhong Philistialan yakme phalak.”

²⁰Mokhshe Saul kahtokte wekewa-e lam-e ta, hüyange Samuel ngaowe yeonge nyam-e ngoh; üne-o Ime wong yenangpe ngoh, hangjingne nyih ja wanghe nyip-e hüyange tüoya phapan Iye hahying yehah.

²¹Hüyange shekonyu Saul shongte pei, hüyange I yeonge shange ponge ngohnang she nge, hüyange Ite i, “Leihuyah, nang shaoshannyuwe nang ngao jaiyangki, hüyange taowe ü-üyin ü-yak me yahyangki hüyange nange üte ngaopu ngao taowe jaiyangki.

²²Tüokhei sha-a taowe nangte yoppe tongnang, nange-o nang shaoshannyu ngaowüng jaikei, hüyange nang sheshao me an ü-oun ja taowe angtamlak ne tamkhu; hüyange nang yoi lamnyute taiwante nang wong nanglak jingne hahtüoh.”

²³Hüpoi Iye lan, hüyange i, “Taowe minhah.” Hüpoi I shaoshanpa lan-e hüyange shekonyu jamyange Ite yoh, hüyange Iye iman ngao jai. Tüokhei kahtok mepu I lüo, hüyange shinleng me shot.

²⁴Sha-a shekonyu nokme mahu üha panne angpu ja ngoh; hüyange yhawe mam mamshe tüopa toi hüyange yhawe anhüng yahpuwe nyütyange tüophei do yenyütpu an ling;

²⁵yhawe tüopa Saul sheshao me hüyange I shaoshanpalan tangte yah yüo; hüyange iman-e hah. Hüyange iman yayong, hüyange tüoya muh taimah.