Read Konyak Naga 1 SAMUEL 3 Bible Online

1 SAMUEL 3 - Konyak Naga bible

1 SAMUEL 3

¹Sha-a naha Samuel-e Eli phang me Youngwanpa shaoshan. Hüyange tüolan nyih hipak me Youngwanpa ngao toinyu ne ngoh; himang meiyange yenangpe ngoh yangki.

²Mük lanshe pomte phei Eli, yaja I yoijing tüpsa me shi ngoh;

³hüyange Kahwang vüntük üne-o man meipe ngoh; hüyange Youngwanpa khümjing ümeken me Kahwang üjao ghonu ngoh, tüoken me Samuel shilak jingne lamyange ngoh.

⁴Hüwante Youngwanpawe nyik, “Samuel! Samuel!” hüyange Iye jan, “Tao tüome ngoh nang.”

⁵Hüyange I Eli tangte phette wen, hüyange i, “Tao tüome ngoh nang; hangjingne nange üte nyikpu!” Hüpoi Iye i, “Taowe yenyik,” yetüoh shiye ngohtüoh. Tüokhei I ye hüyange shiye ngoh.

⁶Youngwanpawe üne-o nishe nyik, “Samuel!” Hüyange Samuel lüo hüyange Eli tangte wen, hüyange i, “Tao, tüome ngoh nang, hangjingne nange üte nyikpu!” Hüpoi Iye i, “Taowe yenyik, ü-ha; nishe shiye ngohtüoh.”

⁷Sha-a Samuel-e üne-o Youngwanpa manshingpe ngoh, yejema-a Youngwanpa ngao üne-o I tangte ütahte manngaipe ngoh yangki.

⁸Youngwanpawe lüm shepupa Samuelte nyik. Hüyange I lüo hüyange Eli tangte wen, hüyange i, “Tao tüome ngoh nang; hangjingne nange üte nyikpu.” Hüyange Youngwanpawe nahate nyik nang she Eliwe shinge ok.

⁹Tüokhei Eliye Samuel te i, “Yetüoh, shiye ngoh tüoh; hüyange hüke lingtüoh, Iye nangte nyikma-a, nange ilak, ‘Ngaotüoh, Youngwanpa, hangjingne nang shaoshanpawe jainang.’ ” Tüokhei Samuel leihye hüyange I yoi nyoi me shiye ngoh,

¹⁰Youngwanpa pei, hüyange yong, hüyange ülao hipak kih-e muh, “Samuel, Samuel she nyik.” Hüwante Samuel-e i, “Ngaotüoh, hangjingne nang shaoshanpawe jainang.”

¹¹Hüyange Youngwanpawe Samuelte i, “Leihuyah, Taowe Israel me toilam ja linglak, hanghe me tüopa jaipalan lili nasa me moplak.

¹²Tüopa nyih me Eli noksa jeng Taowe ngaopu khongkümpu, üwang mepu hüke üküm ngoiye Taowe Eli phei tüi-e linglak.

¹³Hangjingne Iye shinge ngohpu ünu jingne Taowe Inok jintepu jingne ngao phünlak hangjingne I halan-e phoiwümpu iman nying nyingke yahpei, hüyange Iye imante lakne yetam.

¹⁴Tüokhei Eli noksa ünu ümeng ompu-a toiye dopu yejema-a dopu phapuwe jintepu jingne tanne tampu ye-oklak Taowe Eli nokphong phei jieng jepteki.”

¹⁵Wang manngai manngai Samuel shiye ngoh; tüophei me Iye Youngwanpa nok taküplan ep. Hüyange Samuel-e Elite himang ilak nyam.

¹⁶Hüpoi Eliye Samuelte nyik, hüyange I, “Ü-ha Samuel.” Hüyange Iye jan, “Tao tüome ngohnang.”

¹⁷Hüyange Eliye i, “Youngwanpawe nangte ngaopuwa hangshi? Taowe nangte tongnang, hatüo ü-mepu hango tahlo. Nang te Iye ngaopu khongkümpu nange ütam ü-mepu lowe angma-a, hüke nangte hüyange ünyei nehoi, Kahwange lingtam phalak.”

¹⁸Tüokhei Samuel-e Ite khongkümpu i, hüyange I mepu hango lowe ye-ang. Hüyange lye i, “Hatüowa Youngwanpa ngohnang. Ite hanghe mei hatüo Iye lingne tamtüoh.”

¹⁹Samuel jong, hüyange Youngwanpa I phei ngoh, hüyange I ngao ja nehoi kahtokte yeyeitam.

²⁰Hüyange Dan mepu Beersheba ngoiye Israel khongküm puwe Samuel Youngwanpa jingne hipa ne menglak le she shing.

²¹Hüyange Youngwanpawe nishe Shiloh me ütahte ngai; hangjingne Youngwanpawe yoi nying nyingke Samuelte Shiloh me Youngwanpa ngaowe ütahte ngai. Hüyange Samuel ngao Israel khongkümpute pei.