Read Konyak Naga 1 SAMUEL 30 Bible Online

1 SAMUEL 30 - Konyak Naga bible

1 SAMUEL 30

¹Sha-a aope David hüyange I kahtalan nyih lüm shepupa me Ziklag te pei, Amaleklan-e apyekao hüyange Ziklag chinghah; hüyange Ziklag ok hüyange vün innetam.

²Hüyange shekolan hüyange tüome ngohpu khongkümpu üjoi hüyange üyonglan pho; iman-e ao-o yetoi hüyangpoi iman yahtai, hüyange iman lamte tai.

³Hüyange aope David hüyange I kahtalan chingnyute ye, leihuyah, hatüo vün-e jakyange ngoh; hüyange iman shekonyulan hüyange iman hayimlan, hüyange iman yhalalan, phowe teitei-e ngohyangki.

⁴Hüwante David hüyange Iphei ngohpu kahtalan-e iman towe nyai-e manlak manlak ngao ngaiye shap.

⁵David shekonyu ni Jezreellan Ahinoam, hüyange Carmellan Nabal-e tüohpu Abigail nehoi phowe teitei-e ngohyangki.

⁶David-a yeonge shaoshipu me ngoh; hangjingne kahtalan-e Ite longe shüplak jingne ngao; hangjingne kahta lili yaha khahtei-e, yoi shela hei yhala jingne kahta lili mongmenge ngoh. Hüpoi I Kahwang Youngwanpawe David te yoi nying nyingke wongnange ngailak tam.

⁷David-e Ahimelech üha Abiathar ngengpate i, “Taowe nangte yoppe tongnang, tüome ü-tangte ngengpa phakshaoh yah wenkei.” Hüyange Abiatharwe David tangte ngengpa phakshaoh yahpei.

⁸David-e Youngwanpa mepu tonge i, “Taowe tüopa wetaipalan ükhongte jange taihah heiya? Hüyange taima-a taowe iman yüolak jeya?” Iye Ite jan, “Imante jange taitüoh, hangjingne nange ütingme iman yüolak, hüyange okpu ngeye khongküm nishe tüolak.”

⁹Tüokhei David hüyange I phei ngohpu kahta gho wok I phei tai, hüyange Besor shaoyin ümeken me tokphei me tüohpalan ngoh tüokente pei.

¹⁰Hüpoi David, I hüyange gho peli-e jange tai; hangjingne gho ni-a iman towe nyaiye mah, hüyange Besor shaoyin kaiye yetai okpe tokphei me ngoh.

¹¹Iman-e Egypt naosheha ja kahko me tüo, hüyange iman-e David tangte I woiye pei, hüyange Ite an pha; hüyange Iye hah, hüyange iman-e Ite yinglak yeng pha.

¹²Hüyange iman-e Ite phuklick an ü-oun ja, hüyange wuwünglick üjüp ni pha; hüyange Iye hahyang phei me, I yaha I tangte nishe pei; hangjingne Iye nyihlüm hüyange phalüm ngoiye an yehah, yejema-a yeng yeyingpe ngoh.

¹³Hüyange David-e Ite tong, “Nanga ao ching shi? Hüyange nanga ümepuweih?” Hüyange Iye jan-e i, “Tao Egyptlan naoshe ja, Amaleklan ja shaoshanpa; hüyange ü-nokpuwe tao tüoh, hangjingne nyihlüm taiteki, tao dak-e ngoh yangki.

¹⁴Toman-e Chereth apyekao chinghah, hüyange hanghe Judah jingne ngoh tüopa tangme hüyange Caleb apyekao tangme chinghah; hüyange toman-e vün-e Ziklag jakke tam.”

¹⁵David-e Ite tonge i, “Nange tüopa wetaipalan ükhong tangte tao woiye laitampu oklak jeya?” Hüyange Iye i, “Nange tao yetoilak yejema-a ü-nokpu yak me phünne yephalak she Kahwang kaiye üte jiengjeppu phama-a taowe nang tüopa wetaipalan ükhong tangte woi lailak.”

¹⁶Aope Iye I woiye lai, leihuyah, iman kahtok khongkümpu me tee-shai-e, hahyinge hüyange teiyinge, polok-e, hüyange momowe ngoh yangki; hangjingne Philistialan kahmük hüyange Judah kahmük mepu iman-e toinan üngang nyieyeyahpu ngohyangki.

¹⁷David-e iman shom mepu ünepu nyih ünpong ngoiye shümyange toi; hüyange naoshelan kahta gho peli udh me shotyange taiye okpu tokte kaiye kahta ja nehoi yetai ok.

¹⁸Amaleklan-e yahpu khongküm David-e nishe tüo; hüyange David-e I sheko ni yin.

¹⁹Üjoi jeyah üyong jeyah, hala yhala jeyah, nyieyeyahpu toinan ne jeyah iman-e yahpu iman jingne yewang yengoipe yengoh; David-e khongküm leih yahye.

²⁰Hüyange David-e nyee hüyange mahu, üyin yinmok ükhong khongkümpu yah, hüyange kahtalan-e I sheshao me aiye shomjang shom-e üngwün; “Hatüowa David jing.”

²¹Hüyange David mokh ye-okpe tüohyangpu kahta gho ni tangte leihye, hüyange iman jamloi towe nyaipu jingne David pheite yewoi; iman Besor shaoyin me angetüohpu lan-e ngohyangki, hüyange iman-e David pongte yu; hüyange aope kahtalan I shongte owe pei, David-e imante salam pha.

²²Hüpoi David phei taipu kahta ümeng hüyange eihate mong nyengpalan-e jan-e i, “Iman teman phei yetaipu khei, kahta liliye woiye tailak nanjingne yoi sheko nyulan hüyange iman hayim tokte kaiye toman-e imante teman-e yah peipu nyieye yahpu toinan hango yephalak.”

²³Hüpoi David-e i, “Youngwanpawe hanghepa temante pha, aowe teman tük-e ang, hüyange teman kaiye peipu wetaipalan ükhong teman yak me phünne pha, tüokhei, ü-jeihei naolan, numan-e hüke yelinglak yang.

²⁴Tüopa jeng me aowe numan ngao jaihulak shi? Hangjingne aohipa shapjute tai I meitam kih-e ao ü-phei meiye ngoh tüopa kih-e muh I meitam ngohlak; iman jakih-e tam-e hanlak.”

²⁵David-e tüopa ngaokeng ja ne ling, hüyange tüopa nyih mepu wange tenyih ngoiye Israel me jonnang.

²⁶Aope David Ziklag te ye, Judah lwngmeilan, hüke I shümpalan tangte nyieyeyahpu toinan shonne i, “Youngwanpa wepalan mepu nyieyeyahpu hünghao numan jingne leihuyah!”

²⁷Bethel me ngohpulan jingne, apyekao Ramah me ngohpulan tangte, hüyange Jattir me ngohpulan tangte Iye tüolan-a shon.

²⁸Aroer me, Siphmoth me, Eshtemoa me,

²⁹Racal me, Jerahmeelan chingnyulan tangte, Kenlan chingnyulan tangte,

³⁰Hormah me, Borashan me, Athach me,

³¹Hebron me ngohpalan tangte, hüyange ümeken me David hüyange I kahtalan kem-e ngoh tüolan kahmük üshei yete shon.