Read Konyak Naga 1 SAMUEL 31 Bible Online

1 SAMUEL 31 - Konyak Naga bible

1 SAMUEL 31

¹Sha-a Philistialan-e Israel phei tüi-e Gilboa kahtang me shapju ünyak hok. Hüyange Israel kahtalan üngang tüoken me mah; hüyange topulan Saul hei Ihalan-o om-e phette tai.

²Hüyangpoi Philistialan-e Saul hüyange Ihalante jange kemyüowe woi; hüyange Philistialan-e Saul ühalan, Jonathan, Abinadab hüyange Malchishua toi.

³Hüyange shapjuwa Saul phei tüi-e I neikon-e loishe ngai, hüyange weanglah pheipu lan-e I kemyüo; hüyange Ite weanglah jonpalan-e mayahtam.

⁴Hüwante Saul-e I jing ngouyang jonpa te i, “Nang yang yahtüoh, hüyange tüophei tao toipha; aoweshing tüolan shoyekhüppalan peiye üte mette toi phalak, hüyange tao mahtamlak.” Hüpoi I ngouyang jonpawe yeling ok, hangjingne I yeonge nyam-e ngoh. Tüokhei Saul-e I yoi yanglow teak-e yahpuwe tüowe yoi nying nyingke mette li.

⁵Aope I ngouyang jonpawe Saul liteki she nge, Iye-o hüke I yanglow-e yoite met, hüyange I phei li.

⁶Hüke tüopa nyih memuh Saul hüyange Ihalan lüm hüyange I ngouyang jonpa, hüyange iman kahta khongküm mah.

⁷Aope Israel kahta jayekao kahjee me ngohpalan hüyange Jordan kaiye taiye ngohpalan-e Israel kahtalan yanteki hüyange Saul hei Ihalan liteki she nge, iman-e chingnyulan tüoh, hüyange chingyan-e mah. Hüwante Philistialan pei hüyange tüolan me nyoi.

⁸Üne nyih aope Philistialan iman-e toiye shünge tüohpu manglan mepu nyemo khoklak jingne pei, iman-e Gilboa kahtangme Saul hüyange Ihalan lüm litei-e tüo.

⁹Iman-e Saul ünglange yah, hüyange I ngouyang yah, hüyange kahyakte hüyange kahtalan tangte ngaolan ümei kilak jingne, neikon-e ngohpu Philistia kahmükte shon.

¹⁰Hüyange iman-e I ngouyang Ashtaroth nok me ang; hüyange iman-e I mang Bethshan chingtuk penyu me jhotyange ang.

¹¹Hüpoi aope Philistialan-e I jeng hüke Saulte lingpu jeng Jabesh-Gilead me ngohpalan-e jai,

¹²wong shenangpu kahta khongkümpu yayong, hüyange wangnyak phapan kem, hüyange Saul mang hei Ihalan mang Bethshan chingtuk penyu me jhotyange angpu yah; hüyange iman Jabeshte ye, hüyange tüome iman mang jak.

¹³Hüyange iman-e iman waan yahye-e tüolan-a Tamarisk pephang me muwe tüoh, hüyange nyih nyit nyaoweleye ngoh.