Read Konyak Naga 1 SAMUEL 4 Bible Online

1 SAMUEL 4 - Konyak Naga bible

1 SAMUEL 4

¹Sha-a Philistia lanphei hoklak jingne Israellan wehokte tai, hüyange Ebenezer me lak; hüyange Philistialan Aphek me lak.

²Hüyange Philistialan iman nying nyingke Israel phei tüi-e khünglenge yonge ngoh hüyange aope iman wehok shapju me hüo, Philistialan sheshao me Israel ye-okpu nge; hüyange Philistia lan-e shapju kahjee me Israellan kahta haja peli nanjing toi.

³Hüyange aope wetaipalan lakjing te leihye, Israel lwngmei lan-e “Philistialan sheshao me tenyih hangne Youngwanpawe teman khaine tampu? Youngwanpa phei jiengjeppu ghonu teman phei kemlak ne, hüyange wepalan yak mepu teman yintamlak ne Shiloh mepu teman-e yahpei hah.”

⁴Tüokhei kahtalan-e Shiloh te shon hüyange tüo mepu ngangpupa Youngwanpa jiengjeppu ghonu hanghe Cherubim tangme shotnang, iman-e yahpei; hüyange Eli üha ni-o Hophni hei Phinehas, Kahwangpa jiengjeppu ghonu phei jam-e pei yangki.

⁵Aope Youngwanpa jiengjeppu ghonu-a lakjing te ngoi pei, Israel khongkümpuwe ngaowüng üyong phei kahtok-o mokh mokh she üngwün.

⁶Aope Philistia lan-e üngwünpu ngaowüng jai, iman-e i, “Hebrewlan lakjing me üngwünpu ngaowüng üyongte leppu hangshi?” Hüyange aope Youngwanpa jiengjeppu ghonu lakjing me peiye ngohnang she iman-e shing;

⁷Philistialan nyam, hangjingne iman-e i, “Lakjing me Kahwang peiteki.” Hüyange iman-e i, “Teman onyukei, hangjingne üshongwante hükih-e aope-o jeman ngoh?

⁸Teman onyukei! Tüolan wong üyong kahwanglan yak mepu aowe teman yinlak? Shaoshi yateng ülam maapuwe Egypt te phaonyu jong me ngoine tampu hatüo tüolan Kahwang ngohnang!

⁹Hebrewlan sheshao me numan rha ne yemenglak wongnang yah, hüyange numan nying nyingke netanke ngohyah, O numan Philistia lan, numan nying nying netanke yongyah, hüyange hoktüoh!”

¹⁰Tüokhei Philistia lan-e wongnangpu phei hok, hüyange Israel-e ye-ok, hüyange iman kahta lili yoi nyenok yam-e yan hüyange toine tampuwa jamloi she ngoh yangki; hangjingne Israel haja delüm ya me hokpalan mah.

¹¹Hüyange Kahwangpa jiengjeppu ghonu yah tai; hüyange Eli üha ni Hophni hei Phinehas moini toitam.

¹²Shapju mepu Benjamin nokphong kahta ja phette ngai tai, hüyange tüonyih muh yoi inkhek hityange I shangme kahmak phoyange Shilohte phette ngoi.

¹³Aope I ngoi, leihuyah, peten shongme Eli yoi shotjing me shotyange jiengjeppu ghonu jingne yoonge ngoh yangki. Hangjingne Kahwang jiengjeppu ghonu jingne I mongjang ninne ngoh yangki. Hüyange aope kahta-a chingnyu te ong, hüyange hatüo jeng i, chingnyu nopu üngwünne shap.

¹⁴Aope Eliye üngwünne shappu ngaowüng jai, Iye i, “Tüopa moppu ngaowüngte leppu-a hangshi?” Hüwante kahtapawe mamshe phette pei hüyange Elite i.

¹⁵Sha-a Eli wangpeng detu me tet ngoh yangki; hüyange I mük lanshe pomteiye ngohyangki, tüokhei Iye ye-nge okpe ngoh yangki.

¹⁶Hüyange kahtapawe Elite i, “Wehok shapju mepu peipuwa tao ngohnang, hüyange tao tenyihpu shapju mepu phette peinang.” Hüyange Iye i, “Hangke tai nang ei, Ü-ha?”

¹⁷Hüyange aowe pongjai yah peiyapeih Iye jan, hüyange i, “Philistialan sheshao me Israellan phette yanteki, hüyange üne-o kahtalan yo me mahpu üngang ngoh yangki, hüyange üne-o nangha ni Hophni hei Phinehas, mahteki; hüyange Kahwangpa jiengjeppu ghonu yah teiteki.”

¹⁸Aope Iye Kahwang jiengjeppu ghonu jeng i, Eli peten shongme I shotjing mepu tokphei yeme toita, hüyange I üng phak, hüyange I li; hangjingne I wupa kahta hüyange püm yeshangpe ngohyangki. Hüyange Iye wangpeng deli Israel kahpane meng.

¹⁹Sha-a yoi nyemnyanyu, Iha Phinehas sheko püm yekengpe nao wangngai ngene oteiye ngoh. Hüyange aope yhawe Kahwang jiengjeppu ghonu yahteki she hüyange netanpa üpa hüyange yha netanpa liteki she ngaolan jai, yhawe yoi nying nyingke tümme shot hüyange nao pai; hangjingne yhate shaoshi-e yha tangte pei.

²⁰Hüke yha li ne oteiye yhate paowetükpu shekolan-e yhate i, “Tahnyam, hangjingne nange netanha ja puhtam teki.” Hüpoi yhawe yejan, yejema-a yhawe hatüo yeteih tüo.

²¹Hüyange yhawe nahate Ichabod she min, tüote leppu, “Israel mepu müktishiwa yanteki!” Hangjingne Kahwangpa jiengjeppu ghonu yahtei, hüyange yha netanpa üpa hüyange yha netanpa mah.

²²Yhawe i, “Youngwanpa müktishiwa Israel mepu yanteki, hangjingne Kahwangpa jiengjeppu ghonu yahtei teki.”