Read Konyak Naga 1 SAMUEL 5 Bible Online

1 SAMUEL 5 - Konyak Naga bible

1 SAMUEL 5

¹Aope Philistia lan-e jiengjeppu ghonu yah, iman-e hatüo Ebenezer mepu Ashdodte yah in.

²Hüyange Philistia lan-e Kahwang jiengjeppu ghonu yah, hüyange hatüo Dagon khümjing te yah in, hüyange hatüo Dagon phinme ang.

³Ünenap aope Ashdodlan shonge lüo, leihuyah, Youngwanpa jiengjeppu ghonu sheshao me Dagon yoi sheta khuh tayange toitawe ngoh. Hüyange iman-e Dagon loiyah hüyange nishe I ngohpu nyoi me ang.

⁴Hüpoi aope iman ünenap shonge lüowe lei, Youngwanpa jiengjeppu ghonu sheshao me Dagon yoi sheta khuhta-e kahtok me toitawe ngoh; hüyange Dagon üshang hüyange I yak moini khüw-e kahtok me shüppe ngoh, püm shaha towe ngoh yangki.

⁵Tüojingne tenyih te ngoiye Dagon ngengpalan yejema-a Dagon nokte peipalan aowe-o Ashodod me Dagon angpu nyoi kahtokte ya-e yelok.

⁶Ashododlan tangme Youngwanpa yak loishe yih ngoh yangki hüyange Iye iman mahne tam, hüyange tanti leam-e Ashdod hüyange tüopa yikengpong mepulante pah.

⁷Hüyange aope Ashdodlan ne hatüo nge iman-e i, “Israel Kahwang jiengjeppu ghonu teman phei ye-anglak; hangjingne teman tangme hüyange Dagon teman kahwang tangme I yak loishe ngohnang.”

⁸Tüokhei iman-e shon hüyange Philistia nokpulan khongküm iman tangte woijem; hüyange i, “Israel Kahwang jiengjeppu ghonu teman-e hangheke linglak? Hüyange iman-e jan, Israel Kahwang jiengjeppu ghonu Gath tangte teine tamtüoh.” Tüokhei Israel Kahwang jiengjeppu ghonu iman-e tüo yete yahtei.

⁹Hüpoi iman-e hüke neikon-e yah peiyang phei me Youngwanpa yak chingnyu phei tüi-e ngoh hüyange chingnyuwa yeonge mop-e ngoh yangki, hüyange Iye chingnyu kahtalan, üyong hüyange üjoite po, hüyange tanti maa imante ngaine tam.

¹⁰Tüokhei iman-e Kahwangpa jiengjeppu ghonu-a Ekronte shon. Hüpoi aope Kahwangpa jiengjeppu ghonu Ekronte pei, Ekron lan-e üngwün-e i, “Teman hüyange teman kahtalan toitamlak jingne iman-e Israel Kahwangpa jiengjeppu ghonu teman tangte yahpeiye ngoh nang!”

¹¹Tüokhei iman-e shonne tei, hüyange Philistia nokpulan khongkümpu woijem hüyange iman-e i, “Israel Kahwang jiengjeppu ghonu yetam tüoh, hüyange tüo kaiye teman hüyange teman kahta toine yetamlak. Israel Kahwang jiengjeppu ghonu-a nishe I ngohjing nyoite yetamtüoh,” hangjingne chingnyu khongkümpu me lanshe yeonge mop-e ngoh yangki. Kahwang yak tüome loishe wongnange ngoh yangki.

¹²Hüyange yelipe ngohpu kahtalante-o tanti pah, hüyange chingnyu wao eapuwe wangdang ngoiye ong.