Read Konyak Naga 1 SAMUEL 6 Bible Online

1 SAMUEL 6 - Konyak Naga bible

1 SAMUEL 6

¹Youngwanpa jiengjeppu ghonu Philistia lan kahtok me lekeng nyit ngohyang phei me,

²hüyange Philistia lan-e ngengpalan hüyange phong yengpalan nyik-e i, “Youngwanpa jiengjeppu ghonu jeng teman-e hangke linghah? Tüopa ngohjing nyoite hanghe phei hatüo toman-e shonlak tomante hüotamkei.”

³Iman-e i, “Israel Kahwang Jiengjeppu ghonu numan-e shonne yema-a, hatüo ükengme tahshon ye; ütingme Ite ünu dopu phapu phei yetamtüoh. Hüwante numan meiye ngohlak, hüyange I yak numan mepu hangne yahyetei hatüo numan-e shinge peilak.”

⁴Hüwante iman-e tonge i, “Toman-e Ite leih phalak jingne ünu dopuwa hanghe hünghao phalak?” Iman-e i, “Philistialan nokpulan shangtoi ityange, honne lingpu tanti maa nga, hüyange honne lingpu ching yuh nga; hangjingne shanghah shaoshi ja numan khongkümpu te hüyange numan wanglam lampalan tangme ngoh yangki.

⁵Tüokhei numan-e numan tanti maa noksa hüyange kahmük menglakpa numan ching yuh noksa linglak, hüyange numan Israel Kahwangte müktishiwa phalak; aoweshing Iye numan mepu, numan kahwanglan mepu, hüyange numan kahmük mepu I yak tanne tamlak.

⁶Hüma-a hangne numan-e yoi mongjang Egyptlan hüyange Pharaoh iman mongjang wanpu kih-e wanpu? Aope lye numan yo me yashanyalipu ja ling, iman-e kahtalan taine yetam hüyange iman yanne yetai a?

⁷Sha-a tüokhei tongtoi üla ja, hüyange han jeman paipu, düam pheipu mahu ü-ha ni yahtüoh hüyange tümtüoh, hüyange mahu ni-a tongtoi me shintüoh, hüyange tüolan ühalan-a iman mepu nokte leih yetüoh.

⁸Hüyange Youngwanpa jiengjeppu ghonu yahtüoh; hüyange hatüo tongtoi tangme angtüoh; hüyange hon toinyu long hanghe numan-e Ite ünu dopu leih phanang, pakos ja me tüopa phin me tüotüoh, hüyange hatüo yoi lamnyute tai oklakne hatüo shonne teitüoh.

⁹Hüyange hatüo yoi lamnyu yoi yikeng yekaote Beth Shemeshte ongma-a, leiyah, temante ümeng üyong lingpuwa hatüo muh ngohnang. Hüpoi hüke yengaima-a hüwante temante popu hatüowa I yak-e yeje she teman-e shinge oklak; hüke wengtuh ja teman-e hüopu ne hei menglak.”

¹⁰Hüyange kahtalan-e hüke ling; hüyange düamyeng phitpu mahu ni yah, hüyange tongtoi me iman shin, hüyange iman ühalan nokme küppe ang.

¹¹Hüyange iman-e Youngwanpa jiengjeppu ghonu-a iman tongtoi me hüyange hon ching yuh hüyange tanti maa ngohpu pakos angtam.

¹²Hüyange mahulan-e tingkhakpu lamnyute taiye Beth Shemesh lamnyute tai; iman taiwante üphangpa te lai, hüyange yakjah ye yejema-a yaknya yete yelüp hüyange Philistialan nokpulan iman pheite Beth Shemesh yikeng pong ngoiye tai.

¹³Sha-a Beth Shemesh kahtalan-e kahjee me wheat tah yah-e ngoh yangki; hüyange aope iman-e yoi mük weamme leiye tei, hüyange Jiengjeppu ghonu nge, tüo ngewante iman yeonge mongmei.

¹⁴Hüyange tongtoi-a Beth Shemeshlan Joshua nok kahte tingkhak-e ngoi, hüyange ümeken me longnyu üyongja ngoh tüoken me lak; hüyange iman-e tongtoi hanne meng; hüyange mahu-a toiyange Youngwanpate mahulan-a toidopu pha.

¹⁵Hüyange Levi lan-e Youngwanpa jiengjeppu ghonu, hüyange tüopa phei ngohpu pakos hanghe me hon toinyulong ngoh yangki hatüo yah, hüyange tüolan-a longnyu üyong tangme ang; hüyange Beth Shemesh kahtalan-e tüopa nyih memuh Youngwanpate jakke dopu hüyange toidopu pha;

¹⁶Aope Philistialan nokpulan naoshe nga-e hatüo nge, tüopa nyih memuh iman Ekronte leihye mah.

¹⁷Hüyange Philistia lan-e Youngwanpate püohpinpu dopu jingne leih phapu hon ne lingpu tanti maa tüolan ngohnang; Ashdod jingne ja, Gaza jingne ja, Ashkelon jingne ja, Gath jingne ja, Ekron jingne ja,

¹⁸hüyange honne lingpu ching yuh lan-a wanglam lampalan nga jing Philistialan chingnyu khongküm shangtoi phei phinne, chingtuk penyuwe peyange ngohpu chingnyu hüyange chingshao moini jingne ngoh yangki; hüyange tenyih ngoiye üne-o longnyu üyong hanghepa tangme iman-e Youngwanpa jiengjeppu ghonu ange tüoh hatüo Beth Shemeshlan Joshua nok kah me ngoh nang.

¹⁹Youngwanpawe Beth Shemesh kahtalan denyit ngoiye toi, hangjingne iman-e jiengjeppu ghonu te lei. Hüyange kahta lan-e shappe yoong hangjingne ima-a Youngwanpawe hüke iman yo me toilangpu üyong ngaine tam.

²⁰Hüwante Beth Shemesh kahtalan-e i, “Tüopa Üjao Kahwang Youngwanpa sheshao me ao yongpu oklak? Hüyange teman mepu aoyin tangte I teman-e taine tamlak?”

²¹Tüokhei iman-e Kiriath Jearim me ngohpalan tangte pongjaipalan shon, hüyange i, “Philistia lan-e nishe jiengjeppu ghonu yah peiteki, numan laikei, hüyange numan tangte hatüo yah ongtüoh.”