Read Konyak Naga 1 SAMUEL 7 Bible Online

1 SAMUEL 7 - Konyak Naga bible

1 SAMUEL 7

¹Tüokhei Kiriath Jearimlan lai ngoi, hüyange Youngwanpa jiengjeppu ghonu yahyange ong, hüyange kahtang me Abinadab nok me hatüo yahpei, hüyange Youngwanpa jiengjeppu ghonu anglak jingne Iha Eleazar jaowetam-e ang.

²Hüyange Kiriath Jearim me jiengjeppu ghonu ngohpu nyih mepu hipak nangjange tai, hüke wangpeng da nanjing; hüyange Israel nokphong khongküm puwe Youngwanpa tangte lüp.

³Hüwante Samuel-e Israel nokphong khongkümpute ngaowe i, “Numan-e Youngwanpa tangte numan mongjang üsheiye lüplakei she ima-a, hüma-a numan yo mepu hengjing kahwanglan hüyange Ashtaroth wintüoh, hüyange Youngwanpa tangte numan mongjang tümtüoh, hüyange Ite shaoshan tüoh, hüyange Iye numan Philistialan yak mepu yinphalak.”

⁴Tüokhei Israel lan-e Baal hüyange Ashtaroth win, hüyange Youngwanpa shaha shaoshan.

⁵Tüophei me Samuel-e i, “Israel khongkümpu Mizpah me jemtüoh, hüyange taowe numan jingne Youngwanpate yoplak.”

⁶Tüokhei iman Mizpah me jamshe jem, hüyange yeng shao, hüyange hatüo Youngwanpa sheshao me shok-e tam, hüyange tüonyih nyaowe lepu yah hüyange iman-e i, “Youngwanpa phei tüi-e toman-e ünu omyangki.” Hüyange Samuel-e Mizpah me Israellan kahpa ne meng.

⁷Sha-a aope Philistia lan-e Israellan Mizpah me jamshe jemme ngohnang she jai, Philistia nokpulan Israel phei tüi-e ong. Hüyange aope Israel lan-e hatüo jai, iman-e Philistia lante nyam-e ngoh.

⁸Hüyange Israellan-e Samuel te i, “Philistialan yak mepu teman yinlak jingne Youngwanpa teman Kahwangte yelakpe üngwüntüoh.”

⁹Tüokhei Samuel-e düam hahjang hahpu nyeeha ja yah, hüyange hatüo jakke dopu moilan jingne Youngwanpa te do hüyange Samuel-e Youngwanpate Israel jingne üngwün, hüyange Youngwanpawe Ite jan.

¹⁰Hüyange Samuel-e jakke dopu dowe ngohwante Philistia lan-e Israel chinghahlak jingne shongte owe pei; hüpoi tüopa nyih me Philistialan tangme Youngwanpawe ngaowüng üyong puphei wangmepu wenne tam, hüyange iman mopne tam; hüyange Israel sheshao me iman khaine tam.

¹¹Israel kahtalan Mizpah mepu ngai, hüyange Philistia lan jange tai, hüyange iman Bethcar ümaiyete manpei manpei iman toi.

¹²Tüophei me Samuel-e long ja yahpei, hüyange hatüo Mizpah hei Shen nipa me ang, hüyange tüopa min Ebenezer she nyik, hüyange i, “Sha-ate ngoiye Youngwanpawe temante jamyangki.”

¹³Hüke Philistialan naone tam, hüyange iman shaaji Israel yikeng pongte yepei. Hüyange Samuel nyih hipak khongkümpu me Youngwanpa Philistialan phei tüi-e ngoh yangki.

¹⁴Hüyange Philistia lan-e Israel mepu yahpu chingnyulan Ekron mepu Gath ngoiye Israelte nishe leih-e (yah) yenetam; hüyange Philistialan yak mepu Israel-e iman kahmük yinne ang. Hüyange Israel hei Amorlan nipa me chingmei ngoh.

¹⁵Samuel-e I jin hipak khongküm me Israel kahpane meng.

¹⁶Hüyange Iye wangpeng lep iye japhei me ja japhei me ja she Bethel, Gilgal, hüyange Mizpah te ngoiye pong; hüyange tüolan kahmük khongkümpu me Iye Israel kahpane meng.

¹⁷Hüpoi hipak phe me I Ramahte leihye, hangjingne tüoken me I nok ngoh yangki; hüyange tüome Iye Israel kahpane meng; hüyange Iye tüome Youngwanpa te wümjong ja ling.