Read Konyak Naga 1 SAMUEL 8 Bible Online

1 SAMUEL 8 - Konyak Naga bible

1 SAMUEL 8

¹Aope Samuel wupa ne meng, Iye Ihalan Israel tangme kahpalan ne menge tam.

²Sha-a I üwangne puhpupa min-a Joel ngoh yangki, hüyange nishepupa min-a Abijah; iman Beersheba me kahpa ne ngoh yangki.

³Hüpoi I halan-e I lamnyu me yekem, hüpoi moth yekaote monglüp, hüyange yakjai yah, hüyange ngaotingpa ngao yephün tam.

⁴Tüokhei Israel lwngmeilan khongküm iman nying nyingke jem hüyange Samuel tangte Ramahte pei.

⁵Hüyange iman-e Ite i, “Leihuyah, nang wupa ne mengnang, hüyange nangha lan-e nang lamnyu me yekem; sha-a ülao jatlan me ngohpu kih-e toman ngao phünlak tomante ahngpa ja yahkei.”

⁶Hüpoi iman-e “Tomante wanglam lamlak jingne ahng ja yahkei she” ipu jingne Samuel mongmeine yetam. Hüyange Samuel-e Youngwanpate yop.

⁷Hüyange Youngwanpawe Samuelte i, “Iman-e nangte ngaopu khongkümpu me iman ngao jaitüoh, hangjingne iman-e nang yeyahpu ne yeje, hüpoi Tao iman tangme ahngne yemengtam lak iman-e Tao yeyah.

⁸Iman Egypt kahtok mepu Taowe woiye ngaipu nyih mepu iman-e lingpu toi khongkümpu leye tenyih ngoiye iman-e Tao winne tüohnang hüyange ülao kahwang shaoshan; hüke üne-o iman-e nangte lingnang.

⁹Sha-a tüokhei iman ngao jaitüoh, tüoyangpoi nange wongnangpu phei imante kentinglak deingao ngaotüoh, hüyange iman tangme wanglam lamlak ahngpa toishaolan jeng imante hüotam tüoh.”

¹⁰Tüokhei Samuel-e Youngwanpa ngao khongküm Ite ahngpa yupu kahtalante ngaowe tam.

¹¹Iye i, “Numan tangme wanglam lamlakpa ahngpa toishao lan-a tüolanke ngohkülak. Iye numan hayimlan yahlak, hüyange iman I jingne, I tongtoi jingne hüyange I koipongpalan ne menglak jingne lelak; hüyange I tongtoi sheshao me iman phetlak.

¹²Iye iman yoi jingne haja woilak jingne hüyange denga woipa ne lelak, hüyange Iye ütam Inok kahhamne tamlak hüyange Inok kah yahne tamlak, hüyange Iye wehoklak toinan hüyange tongtoi toinanlan lingne tamlak.

¹³Iye numan yhalalan üpemeipu lingpane, heeiyangnyu ne, hüyange an lingpunyu ne menglak jingne yahlak.

¹⁴Iye numan kah hüyange numan wuwünglick pesha hüyange numan olive pelickjong hüke tüolan shemeipupa yahlak, hüyange tüolan-a I shaoshanpalante phalak.

¹⁵Hüyange numan tah penphong meitam, hüyange numan wuwünglick Iye yahlak hüyange hatüo I phangmepu üyonglante hüyange I shaoshanpalante phalak.

¹⁶Hüyange rhapalan hüyange numan rhanyulan, hüyange numan mahu ükhong shemeipupa hüyange numan gado, Iye I toishao me angtamlak.

¹⁷Numan nyee ükhong mepu meitam pen shepupa Iye yahlak; hüyange numan I rhapa ne menglak:

¹⁸Hüyange aohi numan-e numan jingne leye yah, tüopa ahngpa jengme tüopa nyih numan-e yemeipe üngwünlak; hüpoi tüopa nyih me Youngwanpawe numante yejanlak.”

¹⁹Hüpoi kahtalan-e Samuel ngao nying me yeyah, hüyange iman-e i, “Yeje! Tüoyangpoi toman tangme ahngpa ja ngohlak wongpong;

²⁰hüke tomane-o ülao jat khongkümpu kih-e nanglak; hüke toman ahngpawe toman tangme wanglam lamlak hüyange toman shaome kemlak, hüyange toman shapju jingne hoklak.”

²¹Hüyange Samuel-e kahtalan ngao khongkümpu jai, hüyange Iye Youngwanpa nasa me nishe jaine tam.

²²Hüyange Youngwanpawe Samuelte i, “Iman ngao jaitüoh, hüyange imante ahngpa ja ngaine tamtüoh.” Tüophei me Samuel-e kahtalante i, “Numan kahta lili yoi yoi chingte yantüoh.”