Read Koonzime Matthieu 11 Bible Online

Matthieu 11 - Koonzime bible

Matthieu 11

¹Nó ó, píhe Yésʉs á dwe ompʉ́n bé kám le obá metié, nye nzě duhǒ gúmo yaá, tô le elɛ̂ʼle le elɛ́ɛ mílɔ̌b mé Nzyɛ̌m ɨ́ binkana bí sí yaá.

²Jɔ̌ʼ Yʉánɛs Ndubʉr á be ɨ́ mbɛ̌r mímbʉʼ yɨ́, nye á si jóʼo lɔ́ɔ wé á dumo e bisyɛ́ɛla mé Krîst wɨ́. Nó nyé á lómo bʉ́ʉ́ ómpʉ́n, bé tôʼ nkǒ Yésʉs á be yɨ́, ó bé tôʼ dî e né ó:

³«Nzê go ó mʉr bɨ́h dí ebóno ó, nye ónze nyá ɛ́? Nzê bɨ̌h bónaa mʉr swîh ɛ̌?»

⁴Yésʉs nzě yala e bé ó: «Tó lɛ́ɛ gá Yʉánɛs sá bɨ́n dí ejóʼo le ebee yɨ́:

⁵Baántím, bé mû ó lɨ́ ebáʼǎ bee. Bʉr o b'á tɨtɨ́a bá, bé lɨ́ etye mbɨ̂mbɨá. Minzɨ̂nzǎm, sí tiʼe. Mingʉʼ, myé mû ó lɨ́ ejóʼo; odwe lɨ́ epah ɨ́ mesoo. Mbɨambɨa Lɔ́ɔ, wé mû ó lɨ́ elɛ́ɔɔ kwá baántéʼenteʼe o bʉ̂r le baá o dí ɨ́ kpaa nkóó bá.

⁶Metyɛʼ me mpóm, mé díʼee e mʉr bísyɛ́ɛla byâm ngá be, abe ébɔ̌ʼ lé óbɨma nyé ɨ́ léme lɨ́ nyá.»

⁷Jɔʼ ómpʉ́n mé Yʉánɛs, bé á be, bé mû sí tô yɨ́, Yésʉs nzě táare élɛ́ɛ éntumo e bʉ̂r laá dumo e Yʉánɛs ó: «Yé bɨ́n á to bee ɨ́ lʉá yɨ́? Nzê ká dí epɨ̂ʼla ɨ́ pubó yɨ́ ɛ́?

⁸Á nó? Bɨ̌n bé á to bee yé? Nzê mʉr mbɔ́rá e bidimé míkán mí ójɔɔ́ ɛ̌? Bʉr o dí ebwâr bídimé míkán mí ójɔɔ́ bá, bé di ó ɨ́ mimbɛ̌r mí ójwɨ́ɨ.

⁹Á nó, bɨ̌n bé á to bee yé? Nzê ngwíha milɔ̌b mé Nzyɛ̌m ɛ̌? Eee, mě lɛ́ɛ́ bɨ́n ó: laa ngwíha milɔ̌b mé Nzyɛ̌m.

¹⁰Ebě, yé ó waá bé á cɛma ɨ́ lɔ̌b wé nyá. Yê cɛmá ɨ́ Mekaná mé Nzyɛ̌m ó: Bɛɛngɛ́ɛ! Mɛm, me múo nzě lómo mʉ̂r milʉ́mlʉ́ wǎm nzɨ́ nyǒ dóló ó, nye tôʼ le esyɛŋle gó nzɨ̌ lɨ́ esôʼ lô. »

¹¹Yésʉs, nye e bé ó: «Mě lɛ́ɛ́ bɨ́n lɨ́ otyeetye ó, ɨ́ páʼ bʉ̂r bɨ́bɛ̂h mû sí byɛ̂l ɨ́ sí yɨ̂ʼ bá, ngwár mʉr dí entaǎ Yʉánɛs nyá ntʉ́ʼ. Damá jóʼo nó, ɨ́ Mpóʼo mé Dâ Nzyɛ̌m, mʉr dí agbáŋɔɔ ɨ́ nkɔb nyá, nyě e kûm, laa nyê. Mě lɛ́ɛ́ bɨ́n lɨ́ otyeetye ó, ɨ́ sá yɨ́yɛ̂h yé á byɛ̂l ɨ́ mo mʉ́má yɨ́, abe e mʉr ngwár dí ɨ́ bwaʼ le buo kûm mpʉ mé Yʉánɛs Ndubʉr. Tó kœb ó, mʉr dí ɨ́ buú twâʼwo ɨ́ Mpóʼo mé Dâ nyá, nye ɨ́ buú bwaʼ, laa nyê.

¹²Táare ɨ́ jɔ̌ʼ Yʉánɛs Ndubʉr á nyɛl edu bʉ̂r yɨ́, nzě kumo ɨ́ báánâ: Mpóʼo mé Dâ, nye lɨ́ esuŋɔɔ e nkul. Bʉr o cére, bé sáá ó, bé dɛ́nɨɨ nye e nkul.

¹³Táare ɨ́ jɔʼ mé Moyɨ̂z, tó kumo lɨ́ ogwíha o mílɔ̌b mé Nzyɛ̌m bɨ́bɛ̂h, bé á si boo gwîh milɔ̌b mé Nzyɛ̌m, nzě kumo ɨ́ jɔʼ mé Yʉánɛs mʉr tɨ̂.

¹⁴Bɨ́n kpɛ́l ékʉ́ gwá jóʼo mé nó, Yʉánɛs ó dí Elie, waá nzéá wé, wé á boo lɛ́ɔɔ wɨ́.

¹⁵Bɨ́n bé e megwǎl mé éjóʼo nó, bɨ̌n jóʼaa náǎ!

¹⁶«Me ójwɨ̌ʼ myǎ bʉ̂r wɨ̂ʼ e wáa? Wé kʉ́ nwɨɨla ó e bwá ó ntwǒm dí lɨ́ ebɛhɛɛ mindîndǐl bá, lɨ́ ejébla páʼ nyɔ́ɔ́. Bé ó:

¹⁷“Bɨ̌h bɨ́ lʉ́o bɨ́n mindie, bɨ̌n l'abwal! Bɨ̌h bɨ́ dyɛɛ méjémé mé éswie, bɨ̌n l'ajɨ médwê!”

¹⁸Tó kœb ó, Yʉánɛs, nyɨ́ nze: adɨ́na, ade ményoʼ. Bʉr ɨ́ buo buo ntɔ̂ʼ swêʼ nyé ó: “Nyě le eleme!”

¹⁹Jɔʼ yɨ̂, Mwân mé Mʉr nyɨɛ, nyɨ́ kǎ pyâl: nye lɨ́ ede méde le menyoʼ. Bʉr baá nzě lɛ́ɛ ó: “Paá bee gá sâ ángʉ̂ngʉ̌l nɨ̌, nyʉnyóʼ, só bʉr o dí enʉǎ mɔnɨ́ tœ́a bá, só osyɛ̂l o mísyóm!” Sâ gwár, ocwóó mé Nzyɛ̌m wɨ́ɛ, wɨ́ kebe ɨ́ bisyɛ́ɛla bi dí eduho tɨ̂ʼ bí.»

²⁰Nó ó Yésʉs á dwe binkana, súm nyé á bu sâ mesimá yɨ́, mebě, ebě, bé á bé atúmo míkoo myɔ́ɔ́ e mebébe mɔ́ɔ́, nkʉ̂ dwira míléme. Nye ó:

²¹«Nkoó, nye ó e bɨ̌n, bʉr ó Korazîn! Nkoó, nye ó e bɨ̌n, bʉr ó Bétsɛ́da! Yé bé mesimá mé á sâ kwá nyɨ́n má, mé á syɛ́ɛ ó, Tîr e Sidɔ̂n nó, lɛ́ɛ́, bʉr o tɨ̂, bɨ́ kʉ́ba mínkura le elɔma méswií lɨ́ elɛ̂ʼle ó, bɨ́ túmo míkoo e mebébe mɔ́ɔ́, le edwira míléme.

²²Sâ yaá ó mé dí egwá kʉ́ lɛ́ɛ bɨ́n ó, dʉ́ó Nzyɛ̌m ngá tíʼe bʉ̂r milɔ̌b yɨ́, Tîr e Sidɔ̂n, bé ábuú dweŋɔɔ bíntɨ́ʼá mpʉ bɨ́n.

²³Á gua, Kapernáʉm, nzê go óbɨ́nɔɔ, tó pyâl ɨ́ jʉ́o kʉ́ ɛ́? Tʉ̂toʼó! Go ósulɔɔ sí, tó pyâl ɨ́ bɨ́ siʼe. Yé bé mesimá mé á syɛ́ɛ kwá nyɨ́n má, mé á syɛ́ɛ ó, Sodôm nó, mpa nkana yaá, yé dína ó tɨ̂, kumo mûh.

²⁴Sá tɨ̂ʼ ó mé dí elɛ́ɛ bɨ́n ó, ɨ́ dʉ́ó Nzyɛ̌m ngá tíʼe bʉ̂r milɔ̌b yɨ́, Sidɔ̂n, yé ábuú dweŋɔɔ bíntɨ́ʼá mpʉ gô, Kapernáʉm.»

²⁵Jɔʼ yaá ó Yésʉs á nze lɛ́ɛ ó: «Dâ, me lɨ́ edwe gó kûm, gua Njwɨ́ɨ kʉ́ e sí, ebě, go á si lɛ̂ʼle bʉr o dí mpʉ bwá ó ntwǒm bá bisá gó á sol ocwóó le ogwɨ́a ó sí yɨ̂ʼ bí.

²⁶Dâ, yé ó nó. Me lɨ́ egúmlo gô, ebě, go á komlo ó, yé syɛ́yɨɨ nó.

²⁷Sɔ́ŋ wǎm á si dwe me bisá bíbyɛ̂h. Abe e mʉr dí egwá gʉ́a Mwân, pɛ̌ʼ njɨ Nzyɛ̌m Sɔ́ŋ nye omér. Abe e mʉr dí egwá gʉ́ǎ Nzyɛ̌m Sɔ́ŋ, pɛ̌ʼ njɨ Mwân ndu e waá Mwân kpɛ́l élɛ̂ʼle nyá.

²⁸«Ntáʼ gá kwá nyǎm, bʉr bɨ́bɛ̂h mû sí tyɛʼ lɨ́ enkɛ́ɛ ódiledile o mímbeʼ bá. Me ódwe bɨ́n egbalá.

²⁹Níʼéé gá ɨ́ jwɨ́ɨ́ yâm. Bɨ̌n a jóʼló métwɨ́ɨ́ mâm, ebě, me ɨ́ talǎ njwɨr le embɨa é léme. Bɨ̌n nkʉ̂ bi égbalá.

³⁰Ebě, jwɨ́ɨ́ yâm, yé anyan. Mbeʼ wâm, wé adile.»