Read Koonzime Matthieu 12 Bible Online

Matthieu 12 - Koonzime bible

Matthieu 12

¹Ɨ́ tíl mélû yaá, Yésʉs bé le ompʉ́n bé, bé á be lɨ́ ecɨcɨɨ ɨ́ bipemé méde ɨ́ mimóhó mí sábat. Ádwií ɨ́ gúú móhó nɛ́ɛ: nza nzě mɛ̂r ómpʉ́n bé, bê nzě gɔ́na le enʉnʉa méde ɨ́ bipemé byaá, nzě deŋɔɔ.

²Jɔʼ óFarizyɛ̂n, bé á bee syɛ́ɛla yaá yɨ́, bê nzě lɛ́ɛ e Yésʉs ó: «Paá beě mpʉ ómpʉ́n bô dí esâ sá dí ajala le esyɛ́ɛ ɨ́ móhó sábat yɨ́!»

³Yésʉs nzě yala e bé ó: «Nzê bɨ̌n bé á bé aláǎ sá David á sâ ɨ́ jɔʼ nzâ á mɛ̂r bé e sɔ́má yé yɨ́ ɛ́?

⁴Nzê bɨ̌n bé agʉ́a ó, bé á si nî mpáh Nzyɛ̌m ɛ̌? Biblêr byé á nɛŋɔɔ lɨ́ edwě Nzyɛ̌m kûm bí, bé e boo David, bé á si bana nʉa byê, de. Mʉr ngwár ɨ́ sɔ́má yaá á bé ajala le ede byê, njɨ opara mé Nzyɛ̌m bé omér.

⁵Nkʉ̂ ntɔ̂ʼ, nzê bɨ̌n bé á bé aláa ɨ́ metié gá mɨ́ná ó, ɨ́ móhó sábat wɨ́wɛ̂h, opara o dí eséa ɨ́ mpáh Nzyɛ̌m bá, bé lɨ́ entaa étié é sábat, abánǎ dweŋɔɔ mébě ɛ̌?

⁶Nó mě lɛ́ɛ́ bɨ́n ó nɛ́ɛ: súm mɨ́ná dí gá yɨ̂, sɔ̂ʼ, yé ó wâ, dí ɨ́ buú bwaʼ, laǎ mpáh Nzyɛ̌m bɨ́n dí esêʼlě nɨ̌!

⁷Yé bé bɨ̌n bé á si gʉ́a mekǎn mé Nzyɛ̌m mâ: “Me lɨ́ ebuú gwɨ̂m ó, mpam, laa ótír bɨ́n dí edwe mé bá” nó, lɛ́ɛ́, bɨ̌n bé á bé adwe bʉ̂r o b'á be akúnwo e mpɨŋ bá mebě.

⁸Ebě, Mwân mé Mʉr ó dí njwɨ́ɨ sábat.»

⁹Nó, jɔ̌ʼ Yésʉs á duho tɨ̂ʼ yɨ́, nye nzě tó nî ɨ́ nyʉ́ʉ́ mpáh minjɨʼla nyɔ́ɔ́.

¹⁰Tɨ̂ʼ ó nyé á bee nyʉ́ʉ́ mʉ̂r á be e mbô ɨ́ swâm swâm nyá. Nó bʉr o b'á be tɨ̂ʼ bá, bé á be ó lɨ́ esáǎ sá épur nyé e tɨ̂, bé nkʉ̂ dwe nyé mebě. Sâ yaá ó bé á dî e né ó: «Nzê metié gá mɨ́ná, mé kam ó, mʉr óbɛ̌m sáŋɔɔ dʉ̂m ɨ́ móhó sábat ɛ̌?»

¹¹Yésʉs nzě yala e bé ó: «Mɨná páa jwɨʼ gá ó, mʉr ngwár ɨ́ sɔ́má yɨ́n, nyě e nteme gwár ɨ́ kpɔ́ŋ, nteme yaá tó lʉ́ŋa ɨ́ bɨ́ ɨ́ móhó sábat. Nzê mʉr waá óbe, ató pɛʼ yé ɨ́ bɨ́ yaá ɛ̌? Tʉ̂toʼó!

¹²Tó kœb ó, mʉr, nyě le odimé, laǎ nteme! Nó, etié gá lɨ́ná, lé akamle mʉ̂r lɨ́ esâ syɛ́ɛla mpâm ɨ́ móhó sábat.»

¹³Nye nzě lɛ́ɛ e mʉr waá ó: «Syɛ́mɨ́ɨ́ mbô.» Mʉr waá ntɔ̂ʼ syɛ̂m mbô, wé ntɔ̂ʼ sâ mbɨ̂mbɨá mpʉ waá gúú wé á be yɨ́.

¹⁴Nó ó óFarizyɛ̂n, bé á nze tô kʉ̌l, tó sáa pɨ̂ʼ ó, bé jʉ́ʼoo Yésʉs.

¹⁵Mpʉ̌ Yésʉs á gʉ́a jwɨʼ yaá yɨ́, nye ntɔ̂ʼ duho ɨ́ sûm yaá. Bʉr ɨ́ buo buo nzě dû nyê. Nye nzě tiʼ mímbêl mímyɛ̂h myé á be tɨ̂ʼ mí.

¹⁶Nye ntɔ̂ʼ cɨ̂l bé le egbâ bé mpéné ó, bé l'anyamlě lɛ́ɛ mʉ̂r mbi mʉ̂r nyé dí wɨ́.

¹⁷Yé á syɛ́ɛ nó ó, lɨ́ edirǎ lɔ́ɔ́ ngwíha milɔ̌b Ésayie á boo cɛma wɨ́, ó:

¹⁸Syɛ̂l mesâ wǎm mé á pɛ̂h ó nyâ. Nye ó waá mé dí ɨ́ buú kpɛl le esoho nyá. Me á si gbâ Sísǐm wâm lɨ́ nye, lɨ́ esú ó, nye tôʼ le etúno ótîtyěl wâm lɨ́ bikúl bí bʉ̂r bíbyɛ̂h.

¹⁹Nye ápére mékǎn e mʉr; abʉ̂ tím. Abe e mʉr ngá jóʼo nyé lɨ́ elwib ɨ́ buo buo témé bʉr.

²⁰Nye ákóʼó búʼǒ sʉŋ mû sí gwarwo yɨ́. Nye ádímě njʉl mû lɨ́ esáa édíme wɨ́. Nye ósɨsâ nó ó, tó pyâl ɨ́ jɔʼ nyé ngá sâ ó, otîtyěl, wé ntáŋaa sá yɨ́yɛ̂h ɨ́ nkul yɨ́.

²¹Milémé mí bʉ̂r o dí abe óYúden bá, myé ólóno ɨ́ mpûʼla ó, ɨ́ lɔ̌b nkûl díé lé.

²²Bʉ́ʉ́ bʉ̂r, bê nzě tô e mʉr kwá mé Yésʉs. Mʉr waá á be ó ántím, nye ntémé ányâ-emúmó, duho lɨ́ eleme lé á nzamra nye lɨ́. Yésʉs ntɔ̂ʼ tiʼ mʉ̂r waá. Píe tɨ̂, mʉr waá ntɔ̂ʼ táare ébee le elwib.

²³Mentumo me bʉ̂r mɨ́mɛ̂h, mé ntɔ̂ʼ kâm lɔ̌b waá le edíŋɔɔ ó: «Mʉr nyâ: bɨ̌n lɛ́ɛ́, nyé abe Mwân mé David ɨ́?»

²⁴Jɔʼ óFarizyɛ̂n, bé á jóʼo nó yɨ́, bé ntɔ̂ʼ lɛ́ɔɔ ó: «Mʉr nyâʼ sʉso méleme ó, ebě, Béelzébul, njwɨ́ɨ meleme, nye lɨ́ edwe nyé nkul nyaá!»

²⁵Mpʉ̌ Yésʉs á gʉ́a bijwɨʼ bé á be e byé ɨ́ miléme bí yɨ́, nye e bé ó: «Kúl yɨ́yɛ̂h bʉ̂r o tɨ̂ʼ dí elwímla páʼ nyɔ́ɔ́ yɨ́, yé súʼlá ó ɨ́ twíilɨ̌, akǎ be e bʉr. Nkʉ̂ nkana, nkʉ̂ mbɛ̌r bʉ̂r, bʉ̂r o tɨ̂ʼ lwímlá páʼ nyɔ́ɔ́ nó, bé ákóʼó johlo.

²⁶Sátan bé lɨ́ edwih nyé mʉr tɨ̂ʼ ɨ́ bʉr nó, lɛ́ɛ́, nyɨ́ bɔ́ʼa ménkɔ̌m mebá. Nó mpóʼo nyé, nye ókǎ gwá byéa le ejah nyá?

²⁷Bɨ̌n lɛ́ɛ́ ó, mě sʉsǒ méleme ó, ebě, Béelzébul, nye lɨ́ edwe mé nkul nyaá. Á nzé nyɨɛ dí edwě dyɛɛ́ yɨ́n nyɔ́ɔ́ nkûl eso mê? Bé bʉr o tɨ̂, bé ó dí elɛ̂ʼle ɨ́ kpɛŋlɛm ó, bɨ̌n bé e mebě!

²⁸Yé bé mě sǒ méleme ó e nkul Sísǐm mé Nzyɛ̌m nó, lɛ́ɛ́, Nzyɛ̌m mû ó kúno etyêl Mpóʼo nyé ɨ́ sɔ́má yɨ́n.

²⁹«Mʉr, nyé abe e nkul nî mbɛ̌r mé njɨ́h mʉ̂r, dɛn nyé bisá byé, nye l'apǎ kâʼ nyé nkará mebó mé nʉ̌n. Píe tɨ̂ʼ ó nyé ngá sǎ mbɛ̌r wé yɨ́.

³⁰«Mʉr nyɨnyɛ̂h dí abe ɨ́ nkɔ̌m nyǎm nyá, nye me ó ɨ́ nkɔ̌m kɔ́m nkɛ́ɛ́. Nó ntémé ó, waá dí akœb mé lɨ́ esyɛŋ nyá, nye lɨ́ egbah ó gbaháa.

³¹Nó ó mé dí egwá kʉ́ lɛ́ɛ bɨ́n ó, Nzyɛ̌m óbɛ̌m pɛʼ bʉ̂r bibaa nyé á niʼe ɨ́ misyóm le melwɨ́ɨ́ mɔ́ɔ́ mɨ́mɛ̂h bí. Sâ gwár, mʉ̂r lwɨ́ɨ́ Sísǐm mé Nzyɛ̌m nó, baa ébébe laá, yé ákóʼó pɛʼɔɔ.

³²Mʉr nyɨnyɛ̂h dí elwib e Mwân mé Mʉr ebébe nyá, baa ébébe laá, yé óbɛ̌m pɛʼɔɔ. Sâ gwár, mʉr ngá lwib e Sísǐm mé Nzyɛ̌m ebébe nyá, baa ébébe laá, yé ákóʼó pɛʼɔɔ, damá jóʼo ɨ́ jɔʼ yɨ̂, damá jóʼo ɨ́ jɔʼ ésúʼlá é sí yɨ̂.»

³³«Bɨ́n sí lɛ́ɛ ó, lɨ́, yé ɨ́ mbɨa nó, lɛ́yɨ́ɨ́ gá ntémé ó, mpumó nyé, nye ɨ́ mbɨa. Bɨ́n sí lɛ́ɛ ó: “Bǒl lɨ́ ó yɨ̂ʼ” nó, kamaa gá ntémé ó, mpumó nyé, nye ó bibol e bibol. Bé gʉ́gʉ́á nyɔ̌m lɨ́ ó, sí pǎ bee mpúmó nyé.

³⁴Bɨ̌n bwá ó méjwɨ̂l bâ! Bɨ̌n bé e nkul elɛ́ɛ bísá bímpâ nyá? Ebě, bɨ̌n bé ɨ́ bébe. Sá mʉ̂r dí e yé lwɨ́ŋlá ɨ́ léme yɨ́, yé ó num wé dí epyêl kʉ̌l.

³⁵Mʉr dí ɨ́ mbɨa nyá, nʉnʉa bísá bí émbɨa byé ó, lɨ́ ekʉ̌m empâ lé tʉ́ŋlʉ̌, ntɔ̂ʼ pyêl byé kʉ̌l. Mʉr dí ɨ́ bébe nyá, nʉnʉa bísá bí ébébe byé ó ɨ́ bébebébe ekʉ̌m lé, pyêl byé kʉ̌l.

³⁶Me lɨ́ egwá kʉ́ nwâhle bɨ́n ó, ɨ́ móhó étíʼ é mílɔ̌b, bʉr, bé ótó kar lɨ́ esú lé ékǎn lɨ́lɛ̂h bé á lwilwib, abe e nyɔm lɨ́.

³⁷Nzyɛ̌m ódwe gó mekebe nkʉ̂ mebě ó, ɨ́ mekǎn mô.»

³⁸Nó bʉ́ʉ́ ólɛ̂ʼla o métié, bé le oFarizyɛ̂n, bé á nze lɛ́ɛ e Yésʉs ó: «Lɛ̂ʼla, bɨ̌h bé lɨ́ edǐ bee ésimá.»

³⁹Nye nzě yala e bé ó: «Á bébe bʉ̂r ó myǎ bʉ̂r wɨ̂ʼ ɛ̌! Odûl bé ónzyɛ̌m oswîh! Bé lɨ́ edǐ beě dweʼle dí elɛ̂ʼlě mbi mʉ̂r mé dí wɨ́, duho ɨ́ lʉ́ʉ́ ésimá. Bé ákóʼó bee ésimá egwár, alaa ó laá lé á syɛ́ɛ ɨ́ twiʼ mé Yʉ́nas lɨ́.

⁴⁰Ebě, mbi ngwár Yʉ́nas á di ɨ́ mo sû ɨ́ bwaʼ bwaʼ mimóhó mílɛ̂l, mipum milɛ̂l yɨ́, mbi ngwár e ngwár waá ntémé ó Mwân mé Mʉr ngá di ɨ́ soo mimóhó mílɛ̂l, mipum milɛ̂l wɨ́.

⁴¹Ɨ́ dʉ́ó lé étíʼ é mílɔ̌b, bʉrʉ̂m ó Ninevâ, bé ógbɔlwa, nwâhle bʉ̂r ó myǎ bʉ̂r wɨ̂, ebě, bé á si túmo mikoo le edwira míléme lɨ́ ejóʼǒ lɔ́ɔ́ Yʉ́nas á lɛ́ɛ bé wɨ́. Nó, paá bee gâ: sá láá Yʉ́nas yɨ́, yé ó wâ!

⁴²Ɨ́ dʉ́ó lé étíʼ é mílɔ̌b, njwɨ́ɨ mʉmá á duhǒ díbé tie nyá, ótyɛ̂b, nwâhle bʉ̂r ó myǎ wɨ̂, ebě, nye á si duho médumo me ntwíʼ, lɨ́ enzě jóʼo métwɨ́ɨ́ mé ócwóó mé Salomɔ̂ŋ. Paá bee gâ: sá láá Salomɔ̂ŋ yɨ́, yé ó wâ!»

⁴³«Jɔ̌ʼ mbɨ́ǎ sísǐm mû sí duho mʉ̂r ɨ́ nyʉ̂l yɨ́, wé sɨ́sá ó, tô le epómo, lɨ́ esáǎ gúmó égbala. Tó kœb ó, gúmó yɨ́yɛ̂h, yé ó ɨ́ swáh swáh, abe e medíbé. Wé abeě gúmó égbala.

⁴⁴Wé ntɔ̂ʼ lɛ́ɛ ɨ́ wé mʉr tɨ̂ʼ ó: “Mě búlá ó, tô mbɛ̌r wâm, gúmó mé á duho tɨ̂ʼ yɨ́.” Wé ntɔ̂ʼ búla, tó kœ̌b gumǒ mbɛ̌r yaá, yé mû ngwámlá, sá yɨ́yɛ̂h kʉmsá ɨ́ tyé yé.

⁴⁵Nó wé ntɔ̂ʼ báʼǎ nkɛ́ɛ, tó nʉa myúú mímbɨ́a mísísǐm nzaangbá myé á be ɨ́ buú buo cére, laa wé mí. Mímyɛ̂h ntɔ̂ʼ nzeŋɔɔ, nzě komlɔɔ ódiá wɔ́ɔ́ ɨ́ mʉr waá tʉ́ŋlʉ̌. Nó ó twiʼ mʉ̂r waá á suʼla bu bébe, laǎ jɔʼ ésôʼ yɨ́. Mbi ngwár e ngwár waá ntémé ó ngá be lɨ́ esú é bíbɨ́bla bi bʉ̂r ó myǎ wɨ̂ʼ wɨ́.»

⁴⁶Yésʉs dína lɨ́ elwib e mentumo me bʉ̂r nɛ́ɛ: nyɔ̌ŋ wé, bé e bɨ́ɔɔ́ bé le okɛ́l bé ntɔ̂ʼ pyâl, tyɛ́bɔɔ̌ kʉ̌l, lɨ́ esáa ménzɨ̌ mé élɛ́ɛla e né.

⁴⁷

⁴⁸Yésʉs nzě yala e mʉr á nze nye e mpáŋla nyá ó: «Nzé dí nyɔ̌ŋ wǎm? Onzé dí bɨ́ɔɔ́ bâm le okɛ́l bâm?»

⁴⁹Nye ntɔ̂ʼ syɛ̂m mbô, lɛ̂ʼlě nko ómpʉ́n bé, bé á be yɨ́. Nye e né ó: «Jwɛ́ʼɛ́ɛ! Nyɔ̌ŋ wǎm, bɨ́ɔɔ́ bâm le okɛ́l bâm ó bâ.

⁵⁰Waá nyɨnyɛ̂h dí esâ gwɨ́má mé Sɔ́ŋ wǎm dí ɨ́ jʉ́o kʉ́ nyá ó dí mɨ́ɔɔ́ wǎm, kɛ́lâm le nyɔ̌ŋ wǎm.»