Read Koonzime Matthieu 14 Bible Online

Matthieu 14 - Koonzime bible

Matthieu 14

¹Jɔʼ yaá ó ngóvina Erôd á ka nze jóʼo bé lɨ́ elwib, dumo e Yésʉs yɨ́.

²Nye le osyɛ̂l o mésá bé ó: «Yé ó Yʉánɛs Ndubʉr. Nyɨ́ pah ɨ́ soo! Sá tɨ̂ʼ ó nyé dí e nkul esâ mésimá yɨ́.»

³Náǎ yé ó, Erôd á be ó sí dɛ̌n Erodiâd, mʉmá me mɨ́ɔɔ́ wé, Philippe. Yʉánɛs nzě lɛ́ɛ e né ó: «Etié, lé akam ó, go bâʼ Erodiâd!» Erôd ntɔ̂ʼ tyen bʉ̂r, ó bé mɛ́rɨɨ Yʉánɛs. Bê nzě kâʼ nyé nkará mebó mé nʉ̌n, gbáŋɔɔ nyé ɨ́ mbʉʼ.

⁵Erôd á bɨbe e gwɨ́má ó, nyě jʉ́ ó Yʉánɛs. Sâ gwár, nye á be lɨ́ ekpɛ́ɛ éntumo e bʉ̂r, ebě, bé á lɨláa ó, Yʉánɛs á be ó ngwíha milɔ̌b mé Nzyɛ̌m.

⁶Damá jóʼo nó, ɨ́ jɔ̌ʼ móhó nzɔ́ɔ ebyɛ́l mé Erôd, wé á pyâl yɨ́, eséhé mé Erodiâd, lé ntɔ̂ʼ bwal ɨ́ duo nzɔ́ɔ, Erôd nzě buú kpɛl nzɔ́ɔ nyé á bwal nyɨ́.

⁷Erôd nzě kɛʼ nyê, le entaa mínkâl ó, sá yɨ́yɛ̂h nyé ngá gwâm yɨ́, nye ódwe nyé yǎ.

⁸Eséhe, lê nzě lɛ́ɛ̌ mpʉ nyɔ́ŋ wé á pa tɨ́e nye yɨ́. Nye e né ó: «Gbáʼ mé wâʼ ɨ́ mpyáa, lʉ́ mé Yʉánɛs Ndubʉr; go e dwé mê!»

⁹Nyʉ̂l mé ngóvina ntɔ̂ʼ tyɛʼ ɨ́ sá éséhé lé, lé á gwâm nye yɨ́. Sâ gwár, nye á ka nzoo lómo ó, bé dwêʼ sile wé waá lʉ́ mé Yʉánɛs. Nye á sâ nó ó, ɨ́ lɔ̌b mínkâl nyé á pa ntaa mí le mimbi mi bʉ̂r bé e boo nɔ́ɔ́, bé á pûhla mebô lɨ́ ede mí.

¹⁰Nye nzě lómo mʉ̂r ɨ́ mbɛ̌r mímbʉʼ lɨ́ etó tíʼě Yʉánɛs lʉ̂.

¹¹Bé ntɔ̂ʼ nze e lʉ̂ wé ɨ́ mpyáa, bê nzě dweŋɔɔ mâ mʉmá waá. Nye nzě tó dwe wé nyɔ̌ŋ wé.

¹²Ompʉ́n mé Yʉánɛs, bê nzě nkɛ́ɛ̌ múú wé, tó dɨlɔɔ wê. Píe tɨ̂, bé ntɔ̂ʼ tó lɛ́ɛ̌ Yésʉs sá yɨ́yɛ̂h yé á syɛ́ɛ yɨ́.

¹³Jɔ̌ʼ Yésʉs á jóʼo mpáŋla nyaá yɨ́, nye ntɔ̂ʼ mɔa tɨ̂, kalwo ɨ́ byɛ̂l, nzě tô ɨ́ mâ lʉ̌n, súm nyé á be nye omér yɨ́. Damá jóʼo nó, ɨ́ jɔʼ bísɔ́má bi bʉ̂r, byé á ka gʉ́a nó yɨ́, byê nzě dua ɨ́ binkana, nzě dúŋɔɔ̌ Yésʉs e mekʉ̌.

¹⁴Jɔ̌ʼ Yésʉs á sulo ɨ́ byɛ̂l, bee éntumo e bʉ̂r laá yɨ́, lémé wé kʉ́ nzě jɨ̂ʼ bé nkoó. Nye nzě tiʼ mímbél mímyɛ̂h.

¹⁵Mpʉ yé á be, yé mû bíí kʉ̌ʼ yɨ́, ompʉ́n bé ntɔ̂ʼ sîhlě súm nyé á be yɨ́. Bé e né ó: «Yé mû náǎ ó, medwíne mé pum. Wâʼ ntémé, yé ó lʉá. Bwóóláá sɔ́má bʉ̂r yɨ̂, bé nkʉ̂ tô ɨ́ mekwár, tó bwâm méde.»

¹⁶Yésʉs nzě lɛ́ɛ e bé ó: «Yé ajɨ ó, bé tôʼ gúmo mpoʼ. Bɨ̌n bʉr o tɨ̂, dwéʼ gá bé mede!»

¹⁷Bê nzě lɛ́ɛ e né ó: «Bɨ̌h bé abe e sɔ̂ʼ wâ. Bɨ̌h bé ó njɨ e biblêr bitɛ̂n le osú óbá.»

¹⁸Nye ó: «Ntáʼ gá me e byǎ wâ.»

¹⁹Píe tɨ̂, nye nzě lɛ́ɛ le entumo e bʉ̂r ó, lé díʼee sí ɨ́ dáá. Nye ntɔ̂ʼ nʉa bíblêr bitɛ̂n le osú óbá baá, nzě dwɛ̂ʼ kʉ́, dwě Nzyɛ̌m nzyǒo, nzě pɛ̂ʼ byé bipêh, nzě dwidwe ómpʉ́n bé byǎ. Bé ntɔ̂ʼ kab éntumo e bʉ̂r biblêr byaá.

²⁰Mʉr nyɨnyɛ̂h nzě de, díle, kâr méde. Ompʉ́n bé nzě kaale bímpubuʼó méde, tâŋ mekwám kám e mebá, mɨ́mɛ̂h milwɨ́ŋlá.

²¹Bʉrʉ̂m bé á de mede bá, bé á be ó, laa ótɔ́ɔ́sin otɛ̂n. Bé á bé aláa bʉ́bá e bwá ó ntwǒm.

²²Abea nɛ́ɛ: Yésʉs nzě tíne ómpʉ́n bé ó, bé kpâhwa kalwo ɨ́ byɛ̂l, bé e sámle, tô lɨ́ ebʉ́m é kɔ́m nkɛ́ɛ́. Jɔʼ yaá, nye ólîʼ lɨ́ ebwóolo éntumo e bʉ̂r.

²³Jɔʼ nyé á sil ebwóolo bé yɨ́, nye nzě bére lɨ́ ecwɨ̂ʼ kʉ́, lɨ́ etó jɨʼla e Nzyɛ̌m. Mpʉ dʉ́o, lé á be, lé mû sí léŋa yɨ́, nye á ka be gʉ̂ʼ ó, njɨ nye omér.

²⁴Byɛ̂l á be ó, nye mû sí bá buú cɛra le ebʉ̂m. Obóʼó ó mâŋ, wê nzě buú ntɨ̂ʼ byɛ̂l, ebě, pubó yé á duho ó, nko byɛ̂l á be lɨ́ etô yɨ́.

²⁵Á dwií ɨ́ melɔ́ma mé mɛ́n nɛ́ɛ: nye nzě dû bê, le etye ɨ́ medíbé kʉ́.

²⁶Mpʉ ómpʉ́n, bé á bee nye lɨ́ etye ɨ́ medíbé kʉ́ yɨ́, mepɨʼ nzě dîm bé ɨ́ milʉ̂. Bê nzě bil bʉ́á. Bé ó: «Ndîm ó wɨ̂!» Bʉ́ŋɔɔ bítím.

²⁷Tyé e tyé yaá, Yésʉs, nye e bé ó: «Talaa gá miléme. Yé ó me! Ayɨ́ jóʼo gá bʉ́á.»

²⁸Pétrus nzě lɛ́ɛ e né ó: «Dâ ɛ̌, yé bé yé ó go tyeetye nó, jébáá mé ó, me ntâʼ nko gó dí yɨ́, tye kʉ́ medíbé.»

²⁹Yésʉs ntɔ̂ʼ lɛ́ɛ e né ó: «Ntâʼ bé!» Pétrus ntɔ̂ʼ sulo ɨ́ byɛ̂l, nzě táarě tyen ɨ́ medíbé kʉ́, tô nkǒ Yésʉs á be yɨ́.

³⁰Ejʉ̂ʼra nyé á ba jʉ̂ʼra pubó yɨ́, nye ntɔ̂ʼ bil bʉ́á, nzě táare éjɨ́bla le ebʉ̂ bítím. Nye e né ó: «Dâ ɛ̌, tiʼɨɨ mê!»

³¹Tyé e tyé yaá, Yésʉs ntɔ̂ʼ syɛ̂m mbô, mɛ̂r nyê. Nye e né ó: «Á twâʼwǒ búʼó yô ɛ̌! Go pa sóŋló ɨ́ yé?»

³²Bʉr baá obá, bé ntɔ̂ʼ kalwo ɨ́ byɛ̂l, pubó nzě síe.

³³Bʉr o b'á be ɨ́ byɛ̂l bá, bê nzě bɨʼɔɔ mébóó mɔ́ɔ́ sí lɨ́ edwě Yésʉs kûm. Bé e né ó: «Go ó kwahaá Mwân mé Nzyɛ̌m tyeetye!»

³⁴Bé ntɔ̂ʼ sîl éntaa mâŋ, tó pyâl lɨ́ ebʉ́m é sí Genezarɛ̂t.

³⁵Bʉr ó sí yaá nzě dweʼě Yésʉs. Bê nzě tyen bʉ̂r ɨ́ sí yaá yɨ́yɛ̂h lɨ́ etúno ó, nyɨ́ pyâl. Bé ntɔ̂ʼ nze nyé e mimbél mímyɛ̂h.

³⁶Bê nzě jɨʼla e né ó, nye kámaa ó, bé jáa kúna njɨ le empah é kán wé. Mʉr nyɨnyɛ̂h á kúna e né nyá, á si tiʼe.