Read Koonzime Matthieu 15 Bible Online

Matthieu 15 - Koonzime bible

Matthieu 15

¹Jɔʼ yaá, oFarizyɛ̂n le olɛ̂ʼla o métié bé á duhǒ Yerʉ́zalɛm bá, bê nzě pyâl gúmó Yésʉs á be yɨ́, díŋɔɔ e né ó:

²«Ompʉ́n bô, bé lɨ́ ebene ébaʼle métum bímpám gá bíná, byé á líʼe má ɨ́ yé? Ebě, bé abe lɨ́ ejwɨɨ mébô ɨ́ jɔʼ bé dí ede yɨ́.»

³Yésʉs nzě yala e bé ó: «Bɨ̌n bɨɛ bé lɨ́ ebene ébaʼle métié mé Nzyɛ̌m ɨ́ yé? Bɨ̌n jaá bɨbaʼlě sɔ̂ʼ ó, njɨ metum mɨ́n.

⁴Ebě, Nzyɛ̌m á lɛ́ɛ ó: “Dwéʼ sʉ́ŋ e nyʉ̌ŋ dúu.” Nye ntémé, nye ó: “Mʉr ngá syɛm sɔ́ŋ nkʉ̂ nyɔ̌ŋ nyá, jala ó jʉ́ŋɔɔ.”

⁵Tó kœb ó, bɨ̌n bɨɛ̌ lɛ́ɛ́ ó, mʉr nyɨnyɛ̂h óbɛ̌m lɛ́ɛ e sɔ́ŋ e nyɔ̌ŋ ó: “Sá bɨ̂n gwa dí ó, me súʼaa bɨ̌n e yǎ yɨ́, mɨ́ kɛʼ yé Nzyɛ̌m!” Ɨ́ mbeá wɨ́n, waâ sá nó nyá, nyé abe e nkul le ebáʼǎ súʼo sɔ́ŋ e nyɔ̌ŋ e tɨ̂.

⁶Ɨ́ jɔʼ bɨ́n sá mbi waá yɨ́, bɨ̌n kʉ́ gbah náǎ ó, etié mé Nzyɛ̌m lɨ́ esú lé édû mín mílɛ́ʼlá ó tɨ̂ʼ yɨ́!

⁷Bɨ̌n baányâ-mikóo bâ! Gʉ́ŋáá gá ó, Ésayie á si kʉ gwa gwîh milɔ̌b mín ɨ́ jɔʼ nyé á lɛ́ɛ ó:

⁸“Nzyɛ̌m lɛ́ɛ́ ó: Kúl yɨ̂, yé jaá dwé mé kûm ó, njɨ ɨ́ bikonó bí nǔm kʉ̌l. Tó kœb ó, milémé myɔ́ɔ́, myé ɨ́ buú cɛra e me.

⁹Júú bé dí edwe mé yɨ́, yé ó kwahaá tʉ̂toʼó, ebě, milɛ́ʼlá bé dí edwe bʉ̂r mí, myé jaá duho ó, njɨ ɨ́ metié me bʉ̂r.”»

¹⁰Nó ó Yésʉs á jébe entumo e bʉ̂r, nzě lɛ́ɛ e bé ó: «Jóʼláá gâ! Bɨ̌n a kʉ́ gwá mɛ̂r ékǎn lɨ̂ʼ ɨ́ milémé mín.

¹¹Ntʉ̌ sá dí enî mʉ̂r ɨ́ num yɨ́, dí ebɛ̂ʼ páʼ mʉr, bé e Nzyɛ̌m. Mʉr bɔ́ʼá e Nzyɛ̌m ó, ɨ́ lɔ̌b ékǎn e dí eduho nyé ɨ́ num lɨ́.»

¹²Ompʉ́n mé Yésʉs, bê nzě sîhlě súm nyé á be yɨ́. Bé e né ó: «Nzê gʉ́ gʉ́a ó, sá gô lɛ́ɛ́ nɨ̌, yê bé ó ebɔ̌ʼ ɨ́ nkǒ páʼ óFarizyɛ̂n ɛ̌? Lê bé sí bɨma bé ɨ́ miléme.»

¹³Nye ntɔ̂ʼ yala e bé ó: «Mpeʼ yɨ́yɛ̂h Sɔ́ŋ wǎm dí ɨ́ jʉ́o kʉ́ nyá, á be abe yɨ́, yé ómunɔɔ ti e mikaalé myé mímyɛ̂h.

¹⁴Bírɨ́ɨ́ gá bê: bé ó baántím dí elɛ̂ʼle bʉ́ʉ́ báántím nzɨ̌ bá! Ántím ólɛ̂ʼle nyʉ́ʉ́ ántím nzɨ̌ nó, bɨ́bɛ̂h obá, bé ólʉ́ŋa ɨ́ bɨ́.»

¹⁵Nó ó Pétrus á nze lwib. Nye e né ó: «Páʼláá bɨ́h kɨkɛnǎ nɨ̌.»

¹⁶Yésʉs ntɔ̂ʼ lɛ́ɛ ó: «Nzê bɨ̌n dína ó bigʉʼlʉgʉ́ ɛ̌?

¹⁷Nzê bɨ̌n dína wâʼ ó, apǎ gʉ́a, sá mʉ̂r gbá ɨ́ num yɨ́, yé laa ó ɨ́ mo tʉ́ŋlʉ̌, pyâl kʉ̌l, ntɔ̂ʼ kur ɨ́ dih ɛ̌?

¹⁸Nó sá dí eduho ɨ́ num yɨ́, duho ó ɨ́ lémé mʉ̂r tʉ́ŋlʉ̌. Sâ yaá ó dí esâ ó, mʉr bɔ́ʼaa e Nzyɛ̌m yɨ́.

¹⁹Ebě, bibɨ́bla bíjwɨʼ bíbyɛ̂h, byé duho ó ɨ́ léme. Byé ó dí: ejwɨ́ɨ́ é bʉ̂r, medyɛ̂n, bimolá, díbe, eyalǎ lɔ̌b mɨ́ɔɔ́ gǒ mʉr lɨ́ onzyɛ́h ónzyɛ́h, le melwɨ́ɨ.

²⁰Bisá bîʼ ó dí ebɛ̂ʼ páʼ mʉr, bé e Nzyɛ̌m! Ntʉ̌ lɔ̌b éde apǎ jwɨɨ mébô dí esâ ó, mʉr bɔ́ʼaa e Nzyɛ̌m.»

²¹Nó ó Yésʉs á duhǒ sûm yaá, nzě tô ɨ́ mesí mé Tîr e Sidɔ̂n.

²²Á dwií tɨ̂ʼ nɛ́ɛ: mʉmá Kanân nzě duho kwár nyaá, nzě bʉ̂ bítím, le elɛ́ɛ e né ó: «Dâ ɔ́, Mwâ mé David ɔ́, jɨ́ʼɨ́ɨ́ mé ekpaa nkóó ɔ̌! Sile wâm, wé ɨ́ bébebébe tyé. Eleme, lé lɨ́ ebuú nzamra wê!»

²³Yésʉs á bé ayala e né. Ompʉ́n bé ntɔ̂ʼ sîhlě bǎʼ e Yésʉs. Bé e né ó: «Lɛ́yɨ́ɨ́ nyé ó, nye tôʼ, ebě, nye lɨ́ edû mɨ́ná gá le tím ɨ́ num.»

²⁴Yésʉs nzě yala e bé ó: «Me á jaa lómɔɔ ó, njɨ lɨ́ esú é bínteme bí Ɨ́zraɛ̂l mû sí dîm bí.»

²⁵Mʉmá waá, nye ntɔ̂ʼ bɨʼ mébóó sí lɨ́ edwě Yésʉs kûm. Nye e né ó: «Dâ ɛ̌, kɛmɨɨ mê!»

²⁶Yésʉs ntɔ̂ʼ yala e né ó: «Yé ambɨa ó, mede me jálá le edweŋɔɔ bwân má, mé dwéŋɔɔ bwá bé ómpyê.»

²⁷Mʉmá, nye e né ó: «Dâ ɛ̌, yé ó nó. Damá jóʼo nó, bwá bé ómpyê, bé sá ó de bítwǐʼ méde bi dí ekur sí téble ɨ́ mbɛ̌r me sɔ́ŋ wɔ́ɔ́ bí.»

²⁸Yésʉs ntɔ̂ʼ lɛ́ɛ e mʉmá waá ó: «Mʉmá nyâ, búʼó yô, yé ɨ́ buú bwaʼ! Yé syɛ́yɨɨ go mpʉ gô pa kpɛl yɨ́!» Ɨ́ tyé gwár yaá, sile wé, wé ntɔ̂ʼ tiʼe.

²⁹Yésʉs ntɔ̂ʼ duhǒ sûm yaá, nzě tô ɨ́ nkpâh máŋ mé Galilê. Nye ntɔ̂ʼ bére lɨ́ ecwɨ̂ʼ kʉ́, di sí.

³⁰Mentumo me bʉ̂r ɨ́ buo buo, mé ntɔ̂ʼ nzě súm nyé á be yɨ́ le mimbêl ɨ́ buo buo: baá bé á tɨtɨ́a bá, baántím, baá bé á be e bidyɛ̂m, baányâ-emúmó, le myúú mímbêl ɨ́ buo buo. Bʉr, bé á nze le mimbêl myaá bá, bé á susul myé ó, sí mekʉ̌ mé, nye nzě tiʼ myê.

³¹Bʉr nzě buú kâm lɨ́ ebee báányâ-emúmó mû lɨ́ elwib; baá bé á be e bidyɛ̂m bá, mû mbɨ̂mbɨá; baá bé á be lɨ́ etɨ́a bá, mû lɨ́ etye mbɨ̂mbɨá ntémé; baántím mû lɨ́ ebee. Nó ó bʉ̂r baá bé á nze gúmlo Nzyɛ̌m kúl bʉ̂r o b'Ɨ́zraɛ̂l yɨ́.

³²Yésʉs nzě jébe ómpʉ́n bé, ntɔ̂ʼ lɛ́ɛ e bé ó: «Me lɨ́ ejɨ̂ʼ bʉ̂r bâʼ nkoó, ebě, mɨná gá le onɔ́ɔ́, bɨ́ di mélú mélɛ̂l, bé akǎ be e sá éde. Nó mé akpɛl ó, bé swíʼɨɨ l'ade. Bé ámû jaá tó nkaŋa sí nzɨ́ e nzɨ̌ lɨ́ eguú e nzâ.»

³³Ompʉ́n bé, bê nzě dî e né ó: «Á mɨná gá bɨɛ bé ópʉgʉ́ kœ̌b bím méde dwé éntumo e bʉ̂r lɨ̂ʼ wó? Ɨ́ lʉá míná dí wɨ̂?»

³⁴Yésʉs, nye e bé ó: «Bɨ̌n bé e biblêr yáǎ bím?» Bé ntɔ̂ʼ yala ó: «Nzaangbá, kǎ kɛl bwá bé ósû.»

³⁵Nye ntɔ̂ʼ lɛ́ɛ le entumo e bʉ̂r ó, bé díʼee sí lɨ́ bibwǎh.

³⁶Nye ntɔ̂ʼ nʉa bíblêr nzaangbá byaá le bwá bé ósû baá, dwě Nzyɛ̌m nzyǒo, ntɔ̂ʼ pɛ̂ʼ byê, dwe ómpʉ́n, bé ntɔ̂ʼ kab méntumo me bʉ̂r.

³⁷Bʉr bɨ́bɛ̂h, bê nzě de, díle, kâr méde. Bimpubuʼó méde ómpʉ́n bé á kaale bí, lóŋlo mékwám nzaangbá.

³⁸Bʉr, bé á de bá, bé á be ó: bʉrʉ̂m e bʉrʉ̂m, otɔ́ɔ́sin onâ, aláa bʉ́bá le ontwǒm.

³⁹Jɔʼ nyé á sil ebwóolo éntumo e bʉ̂r laá yɨ́, Yésʉs nzě kalwo ɨ́ byɛ̂l, tô sí Magadân.