Read Koonzime Matthieu 17 Bible Online

Matthieu 17 - Koonzime bible

Matthieu 17

¹Melú mésaman, mé osí laa nɛ́ɛ: Yésʉs nzě nʉǎ Pétrus, nʉǎ Jacques bé e mɨ́ɔɔ́ wé, Yʉánɛs. Bê nzě bére écwɨ̂ʼ ɨ́ jaa jaa kʉ́. Bé á be gʉ̂ʼ ó, bé omér.

²Nye nzě dwira nyʉ̂l ɨ́ míh mɔ́ɔ́. Nye mû kǎ nyɨ̂n ó, mbi swîh. Mpǒm nyé á be ó, nye mû pǎn mpʉ dʉ́o. Mikán myé pan ɨ́ pumo pumo mpʉ mímbah mi dʉ́o.

³Kǎ saʼ nɛ́ɛ: bé kǎ bee ó, Moyɨ̂z, bé le Elie, gúmó Yésʉs á be yɨ́. Bé e boo nɔ́ɔ́ lɨ́ elɛ́ɛla.

⁴Pétrus nzě lɛ́ɛ e Yésʉs ó: «Dâ ɛ̌! Yé mbɨa ó, mɨná díʼee gá wâ. Gó kpɛ̂l nó, me súmaa gá mɨná mpálá, bisaʼ bilɛ̂l: le yô, le yaá mé Moyɨ̂z le yaá mé Elie.»

⁵Mpʉ nyé á be, nye dína lɨ́ elwib yɨ́, dwiné ɨ́ ngé ngɨ ngé nzě búblo bê. Ompʉ́n, bé kǎ jóʼo ó, lʉ́ʉ́ étyêl lɨ́ eduho ɨ́ dwiné tʉ́ŋlʉ̌, lɨ́ elɛ́ɛ ó: «Nyâ, nye ó mwân wǎm mé dí ɨ́ buú kpɛl nyá. Me lɨ́ ekʉ́ mɛɛla e né. Jʉ́jóʼáá gá nye!»

⁶Njóʼá ómpʉ́n bé, bé á jóʼo lwǐb yaá yɨ́, bé ntɔ̂ʼ kúrwo sí, píʼe mémpǒm ɨ́ bibwǎh ɨ́ mpǒm mé Yésʉs, ebě, bé á be ó sí buú bil bʉ́á.

⁷Píe tɨ̂, Yésʉs ntɔ̂ʼ sîhlě nko bé á be yɨ́, nzě nzêʼre bê. Nye ó: «Gbɔlwaa gá sí! Ayɨ́ jóʼo gá bʉ́á!»

⁸Tyé e tyé yaá, ómpʉ́n ká dwɛ̂ʼ ɨ́ mempah mɨ́mɛ̂h nɛ́ɛ: bé jaá kǎ bee ó, njɨ Yésʉs nye omér.

⁹Jɔʼ bé á be, bé mû ó lɨ́ esulo écwɨ̂ʼ yɨ́, Yésʉs nzě gbâ bé mpéné ó: «Anyamlě lɛ́ɛ gá mʉr sá bɨ̂n beě yɨ́, tó pyâl ɨ́ jɔʼ Mwân mé Mʉr óbe, nye mû sí pah ɨ́ soo yɨ́.»

¹⁰Nó ó ómpʉ́n bé, bé á nze dî e né ó: «Yé bé nó wá, olɛ̂ʼla o métié, bé lɨ́ elɛ́ɛ ó, yé jala ó, Elie táaraa epyâl ɨ́ yé?»

¹¹Nye ntɔ̂ʼ yala e bé ó: «Yê tyeetye ó, Elie, nye ɨ́ jala le enze lɨ́ esú ó, nye báʼa tyêl bísɔ̂ʼ ɨ́ bityé byɔ́ɔ́.

¹²Nó mě lɛ́ɛ́ bɨ́n ó: Elie, nyɨ́ boó nze. Sâ gwár, bé á bé adweʼe nyê. Bé á sâ nye ó, mbi cére wɨ́wɛ̂h bé á kpɛl esâ nye wɨ́. Mpʉ yaá ntémé ó Mwân mé Mʉr ngá sia e túú ɨ́ mebó mɔ́ɔ́ yɨ́.»

¹³Ompʉ́n bé ntɔ̂ʼ jóʼo ó, nye á lwib e bé nó ó, dumo e Yʉánɛs Ndubʉr.

¹⁴Jɔ̌ʼ Yésʉs, bé le ompʉ́n bé, bé á be, bé mû lɨ́ ekúnwo e gúmó éntumo e bʉ̂r lé á be yɨ́, nyʉ́ʉ́ mʉ̂r ntɔ̂ʼ nze, bɨʼ mébóó sí ɨ́ mpǒm mé Yésʉs.

¹⁵Nye e né ó: «Dâ ɛ̌, jɨ́ʼɨ́ɨ́ mwân wǎm nkoó, ebě, nye ó nzwoó, lɨ́ esílě bʉ̂ʼ. Nyě sɨ́sá ó, duma ɨ́ muró, nkʉ̂ ntémé ɨ́ medíbé.

¹⁶Me á si tô e né kwá ompʉ́n bô. Sâ gwár, bé á bé akoʼo étiʼ nyê.»

¹⁷Yésʉs ntɔ̂ʼ lɛ́ɛ e bé ó: «Bɨ̌n myǎ bʉ̂r o dí abûʼla wɨ́! Bɨ̌n bé ó njɨ e mesónó. Me káa báʼǎ di ɨ́ sɔ́má yɨ́n, tó pyâl ɨ́ yáǎ jɔʼ ɛ̌? Me ódûhwo bɨ́n, tó swîʼ yáǎ sûm ɛ̌? Ntáʼ gá me e mwân nɨ̌ wâ.»

¹⁸Bê nzě nze e mwân. Yésʉs ntɔ̂ʼ nkáŋla le eleme, lé ntɔ̂ʼ duho. Táare lɨ́ ewala egwár laá, tô dóló, loʼo yaá ntɔ̂ʼ tiʼe.

¹⁹Píe tɨ̂, ompʉ́n bé, bê nzě sîhlě nkǒ Yésʉs á be yɨ́, bé mû bé omér. Bé ó: «Bɨ̌h bɨɛ, bé akoʼo épɛʼ lé ɨ́ yé?»

²⁰Nye nzě yala e bé ó: «Yé ó ɨ́ lɔ̌b búʼó yɨ́n dí ɨ́ twâʼwo yɨ́. Mě lɛ́ɛ́ bɨ́n lɨ́ otyeetye ó, bɨ́n óbe e mâ búʼó mpʉ díh é nyʉ́ó nó, bɨ̌n bé óbe e nkul elɛ́ɛ le ecwɨ́ʼ lɨ̂ʼ ó: “Nkɛ́yɨ́ɨ́ gó mʉr tɨ̂ʼ wâ. Tó tyɛ̂b kâ,” yé óbánǎ sâ nó. Abe e sá yé ógbâ bɨ́n mekɔbla tɨ̂.»

²²Jɔʼ bé á be, bé dína lɨ́ etye ɨ́ sí Galilê yɨ́, Yésʉs, nye e bé ó: «Mwân mé Mʉr mû ó kúno ebɛ́mɔɔ kwá bʉr o ngá jʉ̂ nyé bá.

²³Bé ójʉ̂ nyê. Sâ gwár, ɨ́ móhó lɛ̂l, nye ópah. Nyʉ̂l ntɔ̂ʼ tyɛʼ bé lɨ́ ejóʼo ékǎn laá.»

²⁴Jɔ̌ʼ Yésʉs, bé le ompʉ́n bé, bé á pyâl ɨ́ Kapernáʉm yɨ́, bʉr o b'á nʉnʉa bimɔnɨ́ bítœ́a lɨ́ esú é mpáh Nzyɛ̌m bá, bé á si nze nkǒ Pétrus á be yɨ́. Bé e né ó: «Nzê lɛ̂ʼla wɨ́n nyɨɛ, nye ájɨ́jáná tœ́a ɛ̌?»

²⁵Pétrus, nye e bé ó: «Yé ó nó. Nyě sɨ́sá ó, jána.» Jɔ̌ʼ Pétrus á nî mbɛ̌r yɨ́, Yésʉs nzě nyɛɛ́ nʉǎ lwǐb. Nye e né ó: «Simon, guǎ pahlě sɨ̂ʼ nyá ɛ́? Ojwɨ́ɨ́ ó sí yɨ̂, bé nʉnʉǎ mɔnɨ́ tœ́a kwá onzé? Nzê kwá bwán bɔ́ɔ́? Nzê kwá bʉr oswîh?»

²⁶Nye nzě yala e né ó: «Yé ó kwá ojwóo.» Yésʉs nzě lɛ́ɛ e né ó: «Ɨ́ tɨ̂, yé lɛ́ʼlé ó, yê mpéné ó, mʉ̌r sá adî bwán mé njwɨ́ɨ mɔnɨ́ tœ́a.

²⁷Damá be nó, mɨná bé agwɨ̂m egbâ gá bé ebɔ̌ʼ lé óbɨma bé ɨ́ miléme lɨ́. Nó, tóʼ, tó guho ésyɛb ɨ́ mâŋ. Sû esôʼ gó ójʉ̂ nyá, go e bɛ́ɛ́ nyé num. Go ókœ̌b nzǎŋ mɔnɨ́ tɨ̂. Nzaŋ waá, wé lɨ́ ejala e mɔnɨ́ tœ́a lɨ́ esú é bʉ̂r obá. Go e nʉ́á wê, gó otó jána mɨ́ná bitœ́a e tɨ̂.»