Read Koonzime Matthieu 18 Bible Online

Matthieu 18 - Koonzime bible

Matthieu 18

¹Tyé e tyé yaá, ompʉ́n bé nzě tóŋɔɔ̌ gúmó Yésʉs á be yɨ́, lɨ́ etó díŋɔɔ nyé tíá. Bé ó: «Nzé buú bwaʼ ósʉ́sʉ́ ɨ́ Mpóʼo mé Dâ Nzyɛ̌m?»

²Yésʉs nzě jébe mâ ntwǒm, tyêl nyé ɨ́ mpǒm nyɔ́ɔ́. Nye ó:

³«Mě lɛ́ɛ́ bɨ́n lɨ́ otyeetye ó, bɨ́n bé adwira, báʼǎ dǐ mpʉ bwá ó ntwǒm nó, bɨ̌n bé ákóʼó nî níʼée ɨ́ Mpóʼo mé Dâ Nzyɛ̌m.

⁴Mʉr nyɨnyɛ̂h ójɔr nyʉ̂l nyé, dǐ mpʉ mwân nyâʼ nyá ó ngá buú bě sʉ́sʉ́ mʉ̂r ɨ́ Mpóʼo mé Dâ Nzyɛ̌m.

⁵Mʉr nyɨnyɛ̂h ngá nʉǎ mbi mâ ntwǒm wɨ̂ʼ mbɨ̂mbɨá ɨ́ díé lâm nyá, nyě nʉá ó me mʉr tɨ̂.

⁶«Ɨ́ nkǒ páʼ bwán ó dí edyɛ̂ʼwo e me bá, mʉr nyɨnyɛ̂h ngá gbâ ébɔ̌ʼ lé óbɨma ngwár tɨ̂ʼ ɨ́ léme nyá, yé bá bě mbɨ̂mbɨá ɨ́ páʼ wé ó, bé tyéelaa nye nkǒʼ nɨ́nɨ́ɨ́ ɨ́ twíí, ntɔ̂ʼ guho nyé lɨ́ etǒʼ e mâŋ, ó nye jɨ́blaa, dwe.

⁷Nkoó, nyé e bʉr ó sí yɨ̂ʼ dí egbâ mébɔ̌ʼ mé óbɨma bʉ́ʉ́ bʉ̂r ɨ́ miléme ó, bé sâʼ misyóm má bá! Yê tyeetye ó, mebɔ̌ʼ me dí ebɨma bʉ̂r ɨ́ miléme má, mé abe e nkul edi, abe. Sâ gwár, nkoó nye ó e mbi mʉ̂r dí egbâ bʉ́ʉ́ bʉ̂r mǎ wɨ́!

⁸«Yé bé mbó gô ngwár, nkʉ̂ kʉ̌ gô, wé ó dí etíne gó ó, go sâʼ misyóm nó, tíʼáá wê. Go e gúhó wé lɨ́ ejaa, ebě, yé mbɨa ɨ́ páʼ gô ó, go díʼee le bidyɛ̂m nkʉ̂ e tîʼlǎ kʉ̌ tyé twiʼ, ntɔ̂ʼ dwe, kǎ tó beě twiʼ mpâ, laa ó, go díʼee e mebó mébá le mekʉ̌ mebá mô, go gúhɔɔ ɨ́ siʼe dí edúǒ kɔ́m ti e kɔ́m yɨ́.

⁹Yé bé díh lô ó dí etíne gó ó, go sâʼ misyóm nó, pɛʼɛɛ lê. Go e myáh lé ká ká lɨ́ ejaa, ebě, yé mbɨa ɨ́ páʼ gô ó, go díʼee le dîh egwár, tó beě twiʼ mpâ, laa ó, go díʼee e míh mébá mô, kǎ tó guhɔɔ ɨ́ bɨ́ siʼe.

¹⁰«Gwá di gá le ocwóó ó, bɨ̌n ayɨ́ pyêh mwân ngwár lɨ́ bwán bâ, ebě, mě lɛ́ɛ́ bɨ́n ó: beéngeles bɔ́ɔ́ dí kʉ́ bá, bé lɨ́ ebee ɨ́ tooobó mpǒm me Sɔ́ŋ wǎm dí ɨ́ jʉ́o kʉ́ nyá ɨ́ jɔʼ yɨ́yɛ̂h.»

¹²«Bɨ̌n bé lɨ́ epahlě sá yɨ̂ʼ nyá? Yé bé mʉr, nyě e binteme nter, nteme gwár ntɔ̂ʼ dîm nó, nye ólíʼe bínteme mekám ebǔ le ebǔ lɨ́ ecwɨ̂ʼ kʉ́, ntɔ̂ʼ tó sáa yaá yé á dîm yɨ́. Yé abe nó?

¹³Mě lɛ́ɛ́ bɨ́n lɨ́ otyeetye ó, nyé óbe, nye mû sí bee yé nó, nye óbuú soho ɨ́ lɔ̌b nteme yaá, laǎ mpʉ nyé sóhaa ɨ́ lɔ̌b bínteme mekám ebǔ le ebǔ byé á be adîm bí yɨ́.

¹⁴Nó ntémé, gwɨ́má mé Sɔ́ŋ wɨ́n dí ɨ́ jʉ́o kʉ́ nyá, yé abe ó, nye dímlaa mwân ngwár ɨ́ bwán bé.»

¹⁵Yésʉs, nye e bé ó: «Mɨ́ɔɔ́ gǒ sí sâ syóm nó, tóʼ, tó sáa nyê. Go e lɛ́ʼlé nyé syóm waá, bɨ̌n e nɔ́ɔ́ obá. Nyé sí jóʼo gó nó, gʉ́ŋáá ó, gʉ́ pɛʼ mɨ́ɔɔ́ gǒ ɨ́ syóm.

¹⁶Nó nyé bé akǎ jóʼo gó nɛ́ɛ: go e nʉ́á mʉ̂r ngwár, nkʉ̂ obá, ebě, Lɔ̌b wɨ́wɛ̂h kʉ́ gwá gʉ́ŋɔɔ ó le oboʼlo obá, nkʉ̂ ntɔ̂ʼ olɛ̂l.

¹⁷Nyé sí bene lɨ́ ejóʼo bɨ́n le onɔ́ɔ́ nó, gó otô e né ɨ́ Mbɛ̌r-Nzyɛ̌m. Nyé sí báʼǎ bene lɨ́ ejóʼo bʉ̂r ó Mbɛ̌r-Nzyɛ̌m nó, nye sûʼlaa di ɨ́ míh mɨ́n mpʉ mʉ̂r bikûl, nkʉ̂ ó mpʉ nwɨ́a mɔnɨ́ tœ́a.

¹⁸«Mě lɛ́ɛ́ bɨ́n lɨ́ otyeetye ó, sá bɨ́n ngá kamle ɨ́ sí yɨ̂ʼ yɨ́, yé díʼee sâ gwár yé á pa kamlɔɔ kʉ́ yɨ́. Yaá bɨ́n ngá kam ɨ́ sí yɨ̂ʼ yɨ́, yé díʼee ntémé yaá Nzyɛ̌m á boo kam ɨ́ jʉ́o kʉ́ yɨ́.

¹⁹«Me lɨ́ ebáʼǎ lɛ́ɛ bɨ́n ó: bʉ̂r obá ɨ́ sɔ́má yɨ́n sí syɛŋa lɨ́ edî Sɔ́ŋ wǎm dí ɨ́ jʉ́o kʉ́ nyá sɔ̂ʼ nó, nye ósâ bé yǎ.

²⁰Ebě, gúmó bʉ̂r obá, nkʉ̂ olɛ̂l, dí esyɛŋa ɨ́ díé lâm yɨ́, mɛm mʉr tɨ̂, me óbe ó tɨ̂, páʼ nyɔ́ɔ́.»

²¹Pétrus nzě sîhlě nkǒ Yésʉs á be yɨ́, nzě dî e né ó: «Dâ ɛ̌, nzɔʼ ntíá mé jálá le epɛʼ bíbaa mé á pa láa mɨ́ɔɔ́ wǎm bí, ɨ́ jɔʼ nyé dí ebáʼǎ sâ mbǐ syóm ngwár ɨ́ páʼ wâm yɨ́? Nzê tó pyâl nzɔ̂ʼ nzaangbá ɛ̌?» Yésʉs, nye e né ó:

²²«Mé alɛ́ɛ gó ó, tó pyâl nzɔ̂ʼ nzaangbá, njɨ tó pyâl mékám nzaangbá nzɔʼ nzaangbá.»

²³«Nó, Mpóʼo mé Dâ Nzyɛ̌m nwɨɨla ó e nyʉ́ʉ́ njwɨ́ɨ á be lɨ́ egwɨ̂m éláa ósyɛ̂l o mésá bé sitɔ̂ʼ nyá.

²⁴Mpʉ nyé á be, nye mû lɨ́ etáare éláa mémpʉ́lá maá yɨ́, nó ó bé á nze kwá nyé e nyʉ́ʉ́ syɛ̂l mesâ á be nye e mpʉ́lá, mebɨ́ʼ bímɔnɨ́ bí gʉ̂l otɔ́ɔ́sin kám nyá.

²⁵Mpʉ nyé á be abe e sá nyé jánaa yɨ́, sɔ́ŋ wé ntɔ̂ʼ dwe twíí ó, bé bɛ́maa nye, le mʉmá wé, le bwán bé ti e bisá bíbyɛ̂h nyé á be e byé bí, ó nye jánaa mpʉ́lá nyé.

²⁶Nó ó syɛ̂l mesâ nɨ̌ á bɨʼ mebóó sí ɨ́ mpǒm nyé, nzě táare éjɨʼla e né. Nye e né ó: “Júhwáá mê! Me ójána gó sá yɨ́yɛ̂h mé dí go e yǎ yɨ́!”

²⁷Mpʉ nyé á jɨ̂ʼ nye nkoó yɨ́, nye ntɔ̂ʼ pɛʼ nyé mpʉ́lá nyaá nyɨnyɛ̂h. Nye nzě bîr ó, nye tôʼ.

²⁸«Tœ́á syɛ̂l mesâ nɨ̌ á tô kʉ̌l wɨ́, nzě bɔma e mʉr njoo yé, á be nye e mpʉ́lá minzaŋ mí mɔnɨ́ nter nyá. Nó nyé á nze mɛ̂r nye, nzě syɛ̂ʼ nyé etám ɨ́ twíí. Nye e né ó: “Jɛ́náá mé bím gó dí me e yǎ yɨ́!”

²⁹Nó só wé á nze bɨʼ mebóó sí, táare éjɨʼla e né. Nye e né ó: “Júhwáá mê. Me ójána gó sá mé dí go e yǎ yɨ́!”

³⁰Sâ gwár, nyɨɛ á bé akpɛl éjɨ̂ʼ só wé nkoó. Nye nzě mɔa, gbâ nyé ɨ́ mbʉʼ, tó bónǒ jɔʼ nyé ngá jána nyé mpʉ́lá nyaá yɨ́.

³¹Tó kœb ó, bʉ́ʉ́ bʉ̂r ó njoo yé, jɔʼ bé á bee syɛ́ɛla yaá yɨ́, nyʉ̂l ntɔ̂ʼ tyɛʼ bê. Bê nzě tó bee sɔ́ŋ wɔ́ɔ́ le onɔ́ɔ́, lɛ́ɔɔ nyé sá yɨ́yɛ̂h laá yɨ́.

³²Nó ó sɔ́ŋ á nze jébe syɛ̂l mesâ waá. Nye e né ó: “Bɨ́bla syɛ̂l mesâ nyâ! Me bé ó sí pɛʼ bíbaa bí ébébe bíbyɛ̂h mê láá gó bí, le ebîr mpʉ́lá nyǒ nyɨnyɛ̂h ɨ́ lɔ̌b mínjɨʼla gô jɨʼlá e me mí.

³³Nzê yê bé ajala ntémé ó, go jɨ́ʼɨɨ mʉr njoo yô nkoó, ɨ́ mpʉ mɛ̂m pa jɨ́ʼ gó nkoó yɨ́ ɛ́?”

³⁴Lémé wé, wé ntɔ̂ʼ lóno ɨ́ nkpaa, nye nzě gbâ nyé ɨ́ nkul bʉr o cére ó mbɛ̌r mímbʉʼ, tó bónǒ jɔʼ nyé ngá sîl éjána mpʉ́lá nyé nyɨnyɛ̂h yɨ́.»

³⁵Yésʉs nzě kɛl tɨ̂ʼ ó: «Bɨ́n óbe, apɛʼ e milémé mín mímyɛ̂h, bibaa bí ébébe bɨ̂n pa niʼé bɨ́ɔɔ́ bɨ́n bí nó, Sɔ́ŋ wǎm dí ɨ́ jʉ́o kʉ́ nyá, nye ákam épɛʼ bíbaa nyé á niʼe mʉr nyɨnyɛ̂h ɨ́ sɔ́má yɨ́n bí.»