Read Koonzime Matthieu 19 Bible Online

Matthieu 19 - Koonzime bible

Matthieu 19

¹Jɔ̌ʼ Yésʉs á sil elwib nó yɨ́, nye nzě duhǒ sí Galilê, nzě tô sí Yʉ́da, ntɔ̂ʼ ntaa, tô ɨ́ pɨ̌n díbé Yɔrdên kɔ́m nkɛ́ɛ́.

²Bé e bʉr, entúúnó-é-nkáá. Nye ntɔ̂ʼ tiʼ mímbêl myé á be ɨ́ sɔ́má yɔ́ɔ́ mí.

³Nó bʉ́ʉ́ óFarizyɛ̂n, bé á nzě súm nyé á be yɨ́, lɨ́ enzě bóblɔɔ nyê. Bé ntɔ̂ʼ dî e né ó: «Nzê metié gá mɨ́ná, mé kam ó, mʉr bírɨɨ mʉmá wé ɨ́ mbi ébébe wɨ́wɛ̂h nyé sá nyé wɨ́ ɛ́?»

⁴Nye nzě dî e bé ó: «Bɨ̌n bé á bé así láa ó: “Ɨ́ metááré, Kwihbʉr á sâ bé ó: nyâ, mʉrʉ̂m; nyâ, mʉmá” ɛ́?»

⁵Nye nzě báʼǎ lɛ́ɛ ó: «Sá tɨ̂ʼ ó mʉ́rʉ̂m óbɔ́ʼa e sɔ́ŋ e nyɔ̌ŋ, tó pûhla e mʉmá wé yɨ́. Bɨ́bɛ̂h obá, bé óbe ó, ebɔ̂b e nzyeŋle, pʉ́m le ebo.

⁶Bé akǎ be óbá, njɨ púnó gwár. Mʉ̌r sá abɛ̂ʼ sá Nzyɛ̌m mʉr tɨ̂ʼ dí ɨ́ pûhla yɨ́.»

⁷Bé ntɔ̂ʼ báʼǎ dî e né ó: «Á nó, Moyɨ̂z á tyêl etié ó, mʉ̂r sí kpɛl ébwóolo mʉ́má wé nó, nye cɛ́maa mekaná mé éjwɨ́ɨ́ lé ébâ, nye e dwé myɛ́l, nyé obîr nyê ɨ́ yé ɛ́?»

⁸Nye ó: «Moyɨ̂z á nzoo tyêl etié laá ó, bɨ̌n nkʉ̂ bîr bʉ́bá bɨ́n, ebě, bɨ̌n bé ɨ́ buú lele míléme. Tó kœb ó, ɨ́ metááré, etié laá, lé á bé abe tɨ̂.

⁹Mě lɛ́ɛ́ bɨ́n ó, mʉ̂r óbwóolo mʉ́má wé, nyɨɛ yɨ́ɛ l'asâ médyɛ̂n, ntɔ̂ʼ bâ waá swîh nó, nyɨ́ sâ médyɛ̂n ó tɨ̂ʼ yɨ́.»

¹⁰Nó ó ómpʉ́n bé, bé á nze lɛ́ɛ e né ó: «Twiʼ mʉ́rʉ̂m e mʉmá bé nó nɛ́ɛ: yé l'akʉ́ nzoó jala ó, mʉr bâʼ.»

¹¹Yésʉs nzě lɛ́ɛ e bé ó: «Ntʉ bʉ̂r bɨ́bɛ̂h dí e nkul enʉǎ lɔ́ɔ́ wɨ̂. Bʉr, bé á pa dweŋɔɔ nkul nyaá bá, bé omér ó dí e nkul enʉa wê.

¹²Ebě, ɨ́ sɔ́má bʉ̂r o dí abâ bá, yé e bʉr o dí mindwe-jǒm, duho ɨ́ mimo mí ónyɔ̌ŋ bɔ́ɔ́ bá. Nó ntémé, yé e baá o dí ecwɨhɔɔ ɨ́ lɔ̌b bʉ̂r oswîh o dí ecwɨh bé bá. Yé ntémé, yé e baá o dí etil bé bʉr o tɨ̂ʼ bʉbá ɨ́ lɔ̌b wɔ́ɔ́, bé bʉr o tɨ̂, ó bé nkʉ̂ nî ɨ́ Mpóʼo mé Dâ Nzyɛ̌m. Waá dí e nkul enʉǎ lɔ́ɔ́ wɨ̂ʼ nyá, nye nʉ́aa wê.»

¹³Bʉr ntɔ̂ʼ nze nyé e bwán bɔ́ɔ́, ó nye kɛ́lɨɨ bé mebô le ejɨʼla lɨ́ esú lɔ́ɔ́. Ompʉ́n bé bɨ́ɛ nzě beně sâ yaá, dwe óbyɛ̂l mebě.

¹⁴Jɔʼ yaá ó Yésʉs á nze lɛ́ɛ e bé ó: «Bírɨ́ɨ́ gá bwá ó ntwǒm, bé ntâʼ nko mé dí yɨ́. Ayɨ́ so gá bê, ebě, Mpóʼo mé Dâ Nzyɛ̌m, nye tyélá ó, lɨ́ esú é bʉ̂r o dí mpʉ bé bá.»

¹⁵Nye ntɔ̂ʼ kɛl bwân baá mebô, nzě laǎ gúmo yaá.

¹⁶Nyʉ́ʉ́ mʉ̂r nzě sîhlě nkǒ Yésʉs á be yɨ́, ntɔ̂ʼ dî e né ó: «Lɛ̂ʼla, me sâʼ yáǎ syɛ́ɛla mpâ dí ó, me nkʉ̂ bǐ twǐʼ njʉ̌m dǐ ɛ̌?»

¹⁷Yésʉs nzě yala e né ó: «Gǒ dí mé tíá ɨ́ sá dí ɨ́ mbɨa yɨ́ ɨ́ yé? Yé e mʉr ngwár dí ɨ́ mbɨa nyá. Yé bé go lɨ́ ekpɛl énî ɨ́ twǐʼ njʉ̌m dǐ nó, baʼlaa métié.»

¹⁸Loʼo yaá nzě dî e né ó: «Maá máa?» Yésʉs nzě yala e yé ó: «Yê cɛmá ɨ́ Mekaná mé Nzyɛ̌m ó: “Ajʉ̂ mʉ̂r. Asâ médyɛ̂n. Adíbe. Ayala ɨ́ lɔ̌b mɨ́ɔɔ́ gǒ mʉr lɨ́ onzyɛ́h ónzyɛ́h.

¹⁹Dwéʼ sʉ́ŋ e nyʉ̌ŋ dúu. Go kpɛ́lɨɨ mɨ́ɔɔ́ gǒ mʉr mpʉ gó dí ekpɛl gó mʉr tɨ̂ʼ yɨ́.”»

²⁰Nó ó loʼo yaá á nze yala e né ó: «Mɨ́ baʼle métié ménɨ̌ mɨ́mɛ̂h. Á yé yɨ́ɛ dí ekǎ lîʼ ó, me sâʼ ɛ̌?»

²¹Yésʉs nzě lɛ́ɛ e né ó: «Yé bé go lɨ́ egwɨ̂m édǐ mbɨ̂mbɨá ɨ́ mipáʼ mímyɛ̂h nó, pǎ nyɛɛ́ tó bɛ́ma bísá gó dí e byé bí, dwe báántéʼenteʼe o bʉ̂r mɔnɨ́ tɨ̂. Jɔʼ yaá ó gó ngá bi ókúm le ogbaa ɨ́ jʉ́o kʉ́ kwá mé Nzyɛ̌m yɨ́. Píe tɨ̂, go e nzé dû mê.»

²²Jɔ̌ʼ loʼo yaá, yé á jóʼo yalá yaá yɨ́, yé ntɔ̂ʼ búla ɨ́ twíaaa e metyɛʼ me nyʉ̂l, ebě, yé á bě e l'okúm le ogbaa le ombeʼ o nyʉ̂l.

²³Yésʉs nzě lɛ́ɛ le ompʉ́n bé ó: «Mě lɛ́ɛ́ bɨ́n lɨ́ otyeetye ó, yé ɨ́ kɔbla e mʉr dí kúmá nyá lɨ́ enî ɨ́ Mpóʼo mé Dâ Nzyɛ̌m.

²⁴Me lɨ́ ebáʼǎ lɛ́ɛ bɨ́n: mpʉ yé dí ɨ́ kɔbla ó, ntœœ láŋaa lɨ́ egʉ́á é ntʉ́á yɨ́, jwɨʼ gwár e gwár yaá ntémé ó dí ɨ́ buú kɔbla ó, kúmá mʉr níʼee ɨ́ Mpóʼo mé Nzyɛ̌m.»

²⁵Ɨ́ lwǐb nɨ̌, ompʉ́n bé ntɔ̂ʼ kâm nyé minum mimběʼ. Bê nzě lɛ́ɛ ó: «Yé bé nó wá, nzé nyɨɛ ngá koʼo lɨ́ enî ɨ́ twǐʼ njʉ̌m dǐ ɛ̌?»

²⁶Yésʉs nzě dwɛ̂ʼ bê, ntɔ̂ʼ lɛ́ɛ e bé ó: «Bʉr, bé ákóʼó nî tɨ̂ʼ ɨ́ nkul nyɔ́ɔ́, bé bʉr o tɨ̂. Sâ gwár, Nzyɛ̌m nyě e nkul esâ bísá bíbyɛ̂h.»

²⁷Pétrus nzě nʉǎ lwǐb. Nye e né ó: «Paá bee: bɨ̌h bɨ́ líʼe bísá bíh bíbyɛ̂h, njɨ lɨ́ edû gô. Á bɨ̌h bɨɛ, bé óbi yé ɛ́?»

²⁸Yésʉs nzě yala e bé ó: «Mě lɛ́ɛ́ bɨ́n lɨ́ otyeetye ó, bɨ̌n, baá o dí edû mé bá, ɨ́ jɔʼ Mwân mé Mʉr ngá di ɨ́ mecwɨ́ɨ́ mé kûm ɨ́ sí dwân yɨ́, bɨ̌n bé ódi ɨ́ mecwɨ́ɨ́ mé ójwɨ́ɨ mɨ́n kám e mebá. Bɨ̌n bé ótíʼe ménzweh mé Ɨ́zraɛ̂l kám e mebá milɔ̌b.

²⁹Yé abe e mʉr dí elíʼě mbɛ̌r wé, bɨ́ɔɔ́ bé, okɛ́l bé, sɔ́ŋ wé, nyɔ̌ŋ wé, bwán bé, nkʉ̂ bipemé byé ebe nyé dí edû mé, dí abáʼǎ bi byé nzɔʼ nter, nʉa ntémé twǐʼ njʉ̌m dǐ, jala e nkɔb líʼe nyé.

³⁰Sâ gwár, bʉr ɨ́ buo buo o dí esôʼ bá, bé ódi épíhe. Baá dí epíhe bá, bé ódi ésôʼ.»