Read Koonzime Matthieu 2 Bible Online

Matthieu 2 - Koonzime bible

Matthieu 2

¹Yésʉs á byɛ̂l ó, Bétɛlɛhɛm, nkanǎ Yʉ́da. Yé á be ó ɨ́ jɔ̌ʼ Erôd á be njwɨ́ɨ yɨ́. Yésʉs, nyé osí byɛ̂l nɛ́ɛ: ocwóó ó bʉ̂r, bê nzě pyâl ɨ́ Yerʉ́zalɛm, duhǒ nko dʉ́o dí ejɨma yɨ́.

²Nó ó bé á to le edî bʉ̂r ó: «Mwân byɛ́l nyá, nye wó? Nye ó dí Njwɨ́ɨbʉr óYúden ebě, bɨ̌h bé á si bee twítwén wé kwá nyɨ́h, nko dʉ́o dí ejɨma yɨ́. Bɨ̌h nzé ó, lɨ́ enzě dwe nyé kûm.»

³Ɨ́ jɔ̌ʼ ngóvina Erôd á jʉ̂ʼra mpyɔ́m nyaá yɨ́, nye nzě syɛ̌l bá tɨ̂, bé e bʉr ó Yerʉ́zalɛm bɨ́bɛ̂h.

⁴Nó nyé á gôhlo ojwɨ́ɨ o mpáh Nzyɛ̌m bɨ́bɛ̂h le olɛ̂ʼla o métié ó kûl bʉ̂r o b'Ɨ́zraɛ̂l. Nye ntɔ̂ʼ dî métwɨ́ɨ́ ɨ́ lɔ̌b Mʉ̂r Nzyɛ̌m á lœm múló mé jwɨ́ɨ nyá, ó nye gʉ́ŋaa gúmó yé á jala ó, nye byɛ́lɨɨ yɨ́.

⁵Bé e né ó: «Yé óbe ó Bétɛlɛhɛm, nkanǎ Yʉ́da. Lɔ̌b tɨ̂ʼ ó ngwíha milɔ̌b á cɛma yɨ́. Nye á cɛma ó:

⁶“Gua, Bétɛlɛhɛm, nkanǎ Yʉ́da, gó abuú twâʼwo ɨ́ bím bínkana bí dí ejwɨ́ɨ ɨ́ Yʉ́da bí, ebě, ɨ́ mbɛ̌r bʉ̂r gô ó ngá pyâl njwɨ́ɨbʉr ngá pála bínteme byâm, Ɨ́zraɛ̂l nyá.”»

⁷Nó ó Erôd á nze jébe ocwóó baá ɨ́ mesǒ, bé nkʉ̂ gʉ́a lɛ́ɛ nyé jɔʼ twítwén waá á taare enyɨ̂n ɨ́ jʉ́o yɨ́.

⁸Nó nyé á nze lómo bé Bétɛlɛhɛm. Nye ó: «Tóʼ gâ. Bɨ̌n e tó le egwá byamlě súm mwân waá dí yɨ́. Jɔʼ bɨ́n ókœb nyé yɨ́, bɨ̌n e nzé lɛ́ɛ mê. Jáŋá mɛm ntémé ótó dwe nyé kûm.»

⁹Jɔʼ bé á sil ejóʼo lwǐb mé njwɨ́ɨ yɨ́, bê nzě tô. Bé kǎ bee ó, twítwén bé á pa bee nko dʉ́o dí ejɨma yɨ́ nyá, mû lɨ́ esámle, nʉa ésóʼ é nzɨ́, tó tyɛ̂b kʉ́ gúmó mwân á be yɨ́.

¹⁰Jɔʼ bé á bee twítwén yɨ́, bé ntɔ̂ʼ buú soho.

¹¹Bé ntɔ̂ʼ nî tʉ́ŋlʉ̌ mbɛ̌r, beɔɔ mwân, bé e nyɔ̌ŋ wé Maria, bê nzě bɨʼɔɔ mébóó mɔ́ɔ́ sí, lɨ́ edweŋɔɔ nyé kûm. Píe tɨ̂, bê nzě kɛɛ métʉ́m mɔ́ɔ́, ntɔ̂ʼ dweŋɔɔ nyé bisá bé á nze e byé bí: gʉ̂l, otú ó dúu le lɔbína.

¹²Píe tɨ̂, Nzyɛ̌m nzě cɨ̂l bé ɨ́ nzɨ̌ bilíma ó, bé ayɨ́ báʼǎ búla, tô kwá mé Erôd. Bé á to kumo kwár nyɔ́ɔ́ ó, kǎ cɨɔɔ ɨ́ nzɨ̌ swîh.

¹³Jɔʼ ócwóó ó bʉ̂r baá, bé á be, bé mû sí tô yɨ́, nyʉ́ʉ́ éngeles mé Dâ Nzyɛ̌m ntɔ̂ʼ pyâl Yóseb ɨ́ líma. Nye e né ó: «Gbɔlwaa sí, nʉaa mwân, bé e nyɔ̌ŋ. Kpɛ́yɨ́ɨ, tóʼ sí Egɨ̂ptɛn, go e dí gʉ̂, tó pyâl ɨ́ jɔʼ mé ólɛ́ɛ e go ó, go búlaa yɨ́, ebě, Erôd mû ɨ́ cǎr ó, nyě jʉ́ ó mwán nyâ.»

¹⁴Nó ó Yóseb á nze gbɔlwa sí, nʉa mwân, bé e nyɔ̌ŋ ɨ́ pum, sɔlwa, tô sí Egɨ̂ptɛn.

¹⁵Nye ntɔ̂ʼ di gʉ̂, tó pyâl ɨ́ jɔ̌ʼ Erôd á dwe yɨ́. Bisâ byaá bíbyɛ̂h, byé á syɛ́ɛ nó ó, lɨ́ elóŋlo ékǎn Dâ Nzyɛ̌m á boo lɛ́ɛ ɨ́ nzɨ̌ mé ngwíha milɔ̌b wé, ó: Me á si jébe mwân wǎm lɨ́ enzě pɛʼ nyé sí Egɨ̂ptɛn.

¹⁶Jɔ̌ʼ Erôd á gʉ́a ó, ocwóó ó bʉ̂r baá, bé á si sâ nye mikóo yɨ́, nye ntɔ̂ʼ buú kpaa ébúʼ. Nye ntɔ̂ʼ lómo bʉ̂r ó, bé tôʼ le ejʉ̂ bwá ó bʉrʉ̂m ó Bétɛlɛhɛm le baá sí yaá bɨ́bɛ̂h, táare e bityéé, kala e duo yé á be, yé mû e mimbú mímbá yɨ́. Nye á sâ nó ó, lɨ́ edû sá ócwóó ó bʉ̂r, bé á lɛ́ɛ nye yɨ́.

¹⁷Nó ó sá ngwíha milɔ̌b Jérémie á boo lɛ́ɛ yɨ́, yé á nze syɛ́ɛ. Nye á lɛ́ɛ ó:

¹⁸“Tím, yé á si jwɨ̂ʼ, duhǒ Ramâ, le medwê e mimbɨhla ɨ́ buo buo. Yé ó Rakɛ̂l ó dí ejɨ bwán bé. Nye á bé akpɛl ó, mʉr léʼaa nye, ebě, bé akǎ be.”

¹⁹Píe l'eswie mé Erôd, Yóseb dínǎ sí Egɨ̂ptɛn, nye nzě bee éngeles mé Dâ Nzyɛ̌m ɨ́ líma.

²⁰Éngeles, nye e né ó: «Gbɔlwaa sí, nʉaa mwân, bé e nyɔ̌ŋ wé; go e swíʼ, tô sí Ɨ́zraɛ̂l, ebě, bʉr o b'á sɨsáa ó, bé jʉ́ ó mwân bá, bɨ́ dwe.»

²¹Yóseb nzě gbɔlwa sí, nʉa mwân, bé e nyɔ̌ŋ, ntɔ̂ʼ swîʼ, tô sí Ɨ́zraɛ̂l.

²²Sâ gwár, ɨ́ jɔʼ nyé á ka jóʼo ó, Arkélaos ó b'á nʉa jwɨ́ɨ ɨ́ sí Yʉ́da píe koo sɔ́ŋ wé, Erôd yɨ́, nye ntɔ̂ʼ bil bʉ́á, nye l'akǎ kpɛl ébúla gʉ̂. Jɔʼ yaá ó Nzyɛ̌m á nze cɨ̂l nye ɨ́ nzɨ̌ bilíma ó, nye tôʼ ɨ́ sí Galilê.

²³Bé ntɔ̂ʼ tô, tó di ɨ́ kwár dí ejébɔɔ ó, “Nazarɛ̂t” nyɨ́. Yé á pyâl nó ó, ebě, sá ógwíha o mílɔ̌b bé á boo cɛma yɨ́, yé nkʉ̂ syɛ́ɛ. Yê cɛmá ɨ́ Mekaná mé Nzyɛ̌m ó: “Nye ódi ó, mʉr Nazarɛ̂t.”