Read Koonzime Matthieu 20 Bible Online

Matthieu 20 - Koonzime bible

Matthieu 20

¹«Mpóʼo mé Dâ Nzyɛ̌m nwɨɨla ó e mʉr bipemé á tô kʉ̌l ɨ́ dwiné mɛ́n kúnó, lɨ́ etó sáa bilóbila nyá. Nye á sáa ó bʉr o tó séa nyé syɛ́ɛ́ ɨ́ pemé óraisin bá.

²Nó ó bé e bilóbila byaá, bé á di twíí ó, byé ónʉa ó, mʉr ngwár nzǎŋ mɔnɨ́ ngwár ɨ́ móhó ntinɨ̂. Nye ntɔ̂ʼ lómo byê, byé tôʼ séa ɨ́ pemé yé.

³Nó yé mû kúnókúno e mewala ebǔ nɛ́ɛ: nye nzě báʼǎ tô kʉ̌l, bee bʉ̂r oswîh lɨ́ etyɛ̂b lɨ́ ebɨ̌m é pátele, asâ sɔ̂ʼ.

⁴Nye ó: “Bɨ̌n nyɨɛ ntémé, laŋaa gâ. Tó séa gá pemé yâm. Me ójána bɨ́n myɛ́na ngá jala e bɨ̌n má.”

⁵Bɨ́ɛ ntémé nzě tô. Jɔ̌ʼ témé móhó, yé á pyâl yɨ́, nye nzě báʼǎ tô kʉ̌l, sâ mpʉ nyé á pa sɨ̂sa yɨ́. Ɨ́ mewala melɛ̂l mé bíí kʉ̌ʼ, nye nzě sâ ntémé jwɨʼ gwár e gwár yaá.

⁶Yé mû kúnókúno e mewala metɛ́n mé bíí kʉ̌ʼ nɛ́ɛ: nye nzě báʼǎ tô kʉ̌l, kœb bʉ́ʉ́ bʉ̂r mitîtyěl ɨ́ jwɨ́h, abe e sá ésâ. Nye nzě lɛ́ɛ e bé ó: “Bɨ̌n bé lɨ́ edi náǎ, asâ sɔ̂ʼ, móhó lɨ́ elaa bɨ́n dwêh ɨ́ yé?”

⁷Bê nzě yala e né ó: “Ebě, mʉr bé ajébe bɨ́h bɨɛ ó, bɨ̌h tô séa nyé syɛ́ɛ́.” Nye e bé ó: “Bɨ̌n nyɨɛ ntémé, laŋaa gâ. Tó séa gá ɨ́ pemé yâm.”

⁸«Nó ɨ́ jɔ̌ʼ pum, wé á dwíne yɨ́, mʉr pemé ntɔ̂ʼ jébe mʉ̂r á bɨbaʼle nye bisɔ̂ʼ nyá. Nye e né ó: “Jébáá bílóbila. Go jánaa e byé tâŋ nyɔ́ɔ́. Go ónyɛɛ́ jána ó, mʉr nzé épíhe nyá. Gó okǎ tó swâhle e waâ nzé ésôʼ nyá.”

⁹Baá bé á nʉŋɔɔ ɨ́ mewala metɛ̂n bá, bê nzě pyâl ésôʼ. Bé á jána e bé ó, mʉr ngwár, nzǎŋ mɔnɨ́ ngwár.

¹⁰Nó ɨ́ jɔʼ bʉ̂r o b'á nyɛɛ nʉŋɔɔ bá, bé á ka nze yɨ́, bé á bûʼla ó, bé ókɛlɔɔ gúú nzaŋ swîh kʉ́ wɨ́haá. Sâ gwár, bé ntémé, bé á jaa bibi ó, njɨ mʉr, nzǎŋ mɔnɨ́ ngwár e ngwár.

¹¹Jɔʼ bé á sil enʉa, mʉr wé nzaŋ yɨ́, bê nzě lwib ɨ́ bébe bébe dumo e mʉr pemé.

¹²Bé e né ó: “Baá bé épíhé bâ, bê jaa nze séá ó njɨ ewala egwár. Go bánǎ kʉ́ jána bɨ́h bɨ́bɛ̂h njɨ jwɨʼ gwár e gwár. Bɨ̌h bɨɛ sí sia e mitúú mí syɛ́ɛ́ móhó ntinɨ̂ le ejaʼra e dwéhé yaá yɨ́yɛ̂h!”

¹³Nye nzě yala e mʉr ngwár ɨ́ sɔ́má bʉ̂r baá ó: “Wɛɛ, ntʉ ébébe mê sá gó. Mɨná e go bê komlo ó, me ójána gó nzǎŋ mɔnɨ́ ngwár ɨ́ móhó. Yê bé abe nó?

¹⁴Nʉaa myɛ́na mô, go e swîʼ. Mě kpɛl éjána e mʉr epíhé nyâʼ ó, bím mê jáná e go ntémé yɨ́.

¹⁵Nzê yé ambɨa ó, me sâʼ e bisá byâm ɨ́ mpʉ mé kpɛ̂l yɨ́ ɛ́? Go lɨ́ ebene mé ɨ́ lɔ̌b mpâm nyǎm ɨ́ yé?”

¹⁶Mbi waá ó ngá sáŋɔɔ bʉr o dí mepíhe bá. Bé ótyɛ̂b mésôʼ. Nó baá o dí mesôʼ bá, bé ótyɛ̂b mépíhe.»

¹⁷Nó bé á be ó lɨ́ ebére, tô Yerʉ́zalɛm. Yésʉs nzě tô le ompʉ́n bé kám le obá lɨ́ empah. Nye e bé téme-nzɨ̌ ó:

¹⁸«Paá bee gâ: mɨná mû ó lɨ́ ebére gá Yerʉ́zalɛm. Mwân mé Mʉr óbɛ́mɔɔ kwá ojwɨ́ɨ o mpáh Nzyɛ̌m, bé le olɛ̂ʼla o métié. Bé ótíʼě lɔ̌b wé ó, nye dwêʼ.

¹⁹Bé óntɛŋ nyé ɨ́ mebó mé bʉ̂r o bíkûl lɨ́ esú ó, bé pyâʼ nye, le eŋmɛ̂h nyé mingáhá le ebomlo nyé ɨ́ kolôs kʉ́. Nó ɨ́ móhó lɛ̂l, nye ópah.»

²⁰Nó ó nyɔ́ŋ bwán mé Zebedê á nze tô nkǒ Yésʉs á be yɨ́, e bwán bé, nzě tó bɨʼ mébóó sí le etó dî nyé sɔ̂ʼ.

²¹Yésʉs, nye e né ó: «Gǒ kpɛl yé?» Mʉmá, nye e Yésʉs ó: «Dwéʼ nkûl ó, ɨ́ jɔʼ gó óbe, go mû ɨ́ diá jwɨ́ɨ́ yô yɨ́, bwán bâm obá bâ, bé díʼee bǎʼ e go: nyâ, ɨ́ mbó éjʉ̂m; nyʉ́ʉ́, ɨ́ mbó émyɛ̌l.»

²²Yésʉs nzě lɛ́ɛ e bé ó: «Bɨ̌n bé agʉ́ǎ sá bɨ́n dí yɨ́. Nzê bɨ̌n bé e nkul enkɛ́ɛ mítúú mé mû kúno enkɛ́ɛ mí ɛ́?» Bé e né ó: «Bɨ̌h bé e nkul enkɛ́ɛ.»

²³Yésʉs, nye e bé ó: «Yé ó nó: mɨná bé ókʉ́ nkɛ́ɛ gá mitúú jwɨʼ gwár. Sâ gwár, ɨ́ páʼ édi ɨ́ mbó éjʉ́m wâm, nkʉ̂ ɨ́ mbó émyɛ̌l wâm, ntʉ mɛ̂m tíʼé wɨ́haá lɔ̌b. Bidiá byaá, byé bónó ó, baá Sɔ́ŋ wǎm á boo komlo byé lɨ́ esú lɔ́ɔ́ bá.»

²⁴Nó ɨ́ jɔʼ bʉ́ʉ́ ómpʉ́n kám, bé á jóʼo lɔ̌b waá yɨ́, bê nzě jóʼo bɨ́ɔɔ́ obá baá ebébe, nzě dweŋɔɔ bé mebě.

²⁵Yésʉs nzě jébe bɨ́bɛ̂h. Nye ó: «Bɨ̌n bɨ́ gʉ́a ó, ojwɨ́ɨ, bé jwɨ́ɨ́ ó e cére ɨ́? Bʉr onɨ́nɨ́ɨ́, bé kpɛl ó, bé lɛ̂ʼlaa bʉr mpél yɔ́ɔ́.

²⁶Sâ gwár, ɨ́ páʼ nyɨ́n, mbǐ syɛ́ɛla waá, wé ajala le esyɛ́ɛlɨ. Mʉ̂r ngwár ɨ́ sɔ́má yɨ́n sí kpɛl édi njwɨ́ɨ nó, nye díʼee syɛ̂l mesâ wɨ́n.

²⁷Ntémé, mʉ̂r ngwár ɨ́ sɔ́má yɨ́n ókpɛl édi ésôʼ nó, nye díʼee túʼǎ yɨ́n.

²⁸Ebě, Mwân mé Mʉr nye mʉr tɨ̂ʼ á bé anze ó, bʉr séaa e né. Nye á nze ó, nyɨɛ séaa e bʉr, le edwě twiʼ yé, lɨ́ enzě lɨ́ etáǎ góo, le edwih bʉ̂r ɨ́ buo buo ɨ́ mpila mísyóm, pɛʼ bé ɨ́ fá.»

²⁹Nó jɔʼ ómpʉ́n bé e boo Yésʉs, bé á duhǒ Yerikô yɨ́, bé e bʉr, entúúnó-é-nkáá.

³⁰Tó kœb ó, baántím óbá, bé á be ó mindîndǐl ɨ́ nkpâh nkpǎʼ. Jɔʼ bé á jóʼo ó, Yésʉs ó nɨ̌ yɨ́, bê nzě bʉ̂ bítím: «Mwâ mé David ɔ́, jɨ́ʼɨ́ɨ́ bɨ́h nkoó ɔ̌!»

³¹Entumo e bʉ̂r nzě nkáŋla e bê. Bé ó, bé díblaa minum. Bɨ́ɛ kʉ́ kǎ bʉ́lwǎ bʉ́lwáa. Bé ó: «Dâ ɔ́, Mwâ mé David ɔ́, jɨ́ʼɨ́ɨ́ bɨ́h ekpaa nkóó ɔ̌!»

³²Yésʉs nzě tyɛ̂b, ntɔ̂ʼ jébe bê. Nye e bé ó: «Bɨ̌n gwɨ́m ó, me sâʼ bɨ̌n yé?»

³³Bé e né ó: «Dâ ɛ̌, pʉgʉ́ sâ ó, míh mɨ́h, mé béyɨɨ ʉ!»

³⁴Yésʉs ntɔ̂ʼ kúna bé mîh ɨ́ lémé nkóó wé. Tyé e tyé yaá, bé ntɔ̂ʼ táare ébee, bê nzě nî ɨ́ sɔ́má mé Yésʉs.