Read Koonzime Matthieu 23 Bible Online

Matthieu 23 - Koonzime bible

Matthieu 23

¹Nó ó Yésʉs á nze lwib e mentumo me bʉ̂r, bé le ompʉ́n bé ó:

²«Olɛ̂ʼla o métié, bé le oFarizyɛ̂n, bé ó dí elɛ̂ʼle, píe koo mé Moyɨ̂z.

³Sáʼ gá mpʉ bé dí elɛ́ɛ bɨ́n yɨ́. Baʼlaa gá milɛ́ʼlá myaá. Sâ gwár, adû gá bisyɛ́ɛla byɔ́ɔ́, ebě, bé lɨ́ elɛ́ɛ ó, lɛ́yɨ́ɨ, asâ.

⁴Bé lɨ́ ekâʼ mímbeʼ médile, gbáŋɔɔ bʉ̂r myǎ ɨ́ mikoo. Sâ gwár, bé bʉr o tɨ̂, bé agwɨ̂m ékúna e myê, damá jóʼo ó e diné gwár.

⁵Bé lɨ́ esâ bísyɛ́ɛla byɔ́ɔ́ bíbyɛ̂h ó, bʉr béyɨɨ byê. Nó ntémé ó bé dí eběʼ pɔ̌b métié mé Nzyɛ̌m yɔ́ɔ́ yɨ́, le edyɛɛ médumo míkán myɔ́ɔ́.

⁶Bé buú kpɛl ó, bidiá bí ésôʼ ɨ́ bidína le bidiá bí ésôʼ bi dí ɨ́ mempáh mínjɨʼla bí.

⁷Bé kpɨkpɛl ntémé ó, bʉr bɨ́baraa e bé le dúu ɨ́ buo buo ɨ́ bipátele le ejɨjébe bé ó: “Lɛ̂ʼlǎ nɨ́nɨ́ɨ́”.

⁸Mʉr ngwár ɨ́ sɔ́má yɨ́n sá abá bîr ó, bé jébaa nye “Rabbi”, ebě, lɛ̂ʼla wɨ́n, nye ó ngwár. Bɨ̌n bɨ́bɛ̂h, bé ó bɨ́ɔɔ́ e bɨ́ɔɔ́.

⁹Ajébe gá ntémé nyʉ́ʉ́ mʉ̂r ó: “Sɔ́ŋ wǎm”, ebě, sɔ́ŋ wɨ́n, nye ó ngwár, njɨ waá dí ɨ́ jʉ́o kʉ́ nyá.

¹⁰Abîr gá ó, bé jébaa bɨ̌n “Ojwɨ́ɨ”, ebě, njwɨ́ɨ wɨ́n, nye ó njɨ ngwár: Mʉ̌r Nzyɛ̌m á lœm múló mé jwɨ́ɨ nyá.

¹¹Mʉr dí elaa bʉ́ʉ́ ɨ́ mpwaʼ dǐ nyá, nye ɨ́ jala le ebe bɨ́n ó, syɛ̂l mesâ.

¹²Mʉr nkɛ́ɛ́ nyʉ̂l nyá, ósulɔɔ sí. Waá súl nyʉ̂l sí nyá, óbɨ́rɔɔ kʉ́.

¹³«Nkoó, nye ó e bɨ̌n, olɛ̂ʼla o métié le oFarizyɛ̂n! Bɨ̌n baányâ-mikóo, bɨ̌n bé lɨ́ ela bʉ̂r nzɨ̌ dí etô ɨ́ Mpóʼo mé Dâ nyɨ́. Bɨ̌n bʉr o tɨ̂, bɨ̌n bé adyɛ̂l tɨ̂. Bɨ̌n bé abîr ntémé ó, baá o dí esuo édyɛ̂l tɨ̂ʼ bá, bé dyɛ́lɨɨ.

¹⁵«Nkoó, nye ó e bɨ̌n, olɛ̂ʼla o métié le oFarizyɛ̂n! Bɨ̌n baányâ-mikóo, bɨ̌n bé lɨ́ entaa mâŋ, laa ɨ́ sí yɨ́yɛ̂h, bɨ̌n nkʉ̂ dulǒ damá jóʼo mʉ̂r ngwár. Tó kœb ó, ɨ́ jɔʼ mʉ̂r waá mû sí nî ɨ́ búʼó yɨ́n yɨ́, bɨ̌n bɨ́ dwir nyé mʉr dí ejala le etô ɨ́ bɨ́ siʼe nyá, ntaa bɨ́n bʉr o tɨ̂ʼ nzɔʼ bá.

¹⁶«Nkoó, nye ó e bɨ̌n, baántím dí etɨ́e bʉ́ʉ́ báántím bá! Bɨ̌n bɨɛ lɨ́lɛ́ɛ́ ó: mʉ̂r gbá díé é mpáh Nzyɛ̌m ɨ́ minkâl nó, minkâl myaá, myé abe e lɔ̌b. Nyé ká gbâ díé é gʉ̂l dí ɨ́ mpáh Nzyɛ̌m yɨ́ ɨ́ minkâl nɛ́ɛ: minkâl myaá, myé ó myaá nyé jálá le elóŋlo mí.

¹⁷Bɨ̌n bigʉ̌ bi dí baántím bá! Yé yɨ́ɛ dí entaa yɨ́? Nzê gʉ̂l ɛ̌? Nzê mpáh Nzyɛ̌m dí esâ ó, gʉ̂l yaá, yé díʼee sá dí ti yɨ́ ɛ́?

¹⁸Bɨ̌n bé lɨ́ elɛ́ɛ ntémé ó: “Mʉ̂r gbá díé lé alatâr ɨ́ minkâl nó, minkâl myaá, myé abe e lɔ̌b. Nyé ká gbâ díé é ndwéá dí kɛlá tɨ̂ʼ kʉ́ wɨ́ ɨ́ minkâl nɛ́ɛ: minkâl myaá, myé ó myaá nyé jálá le elóŋlo mí.”

¹⁹Bɨ̌n baántím bâ! Yê yé ɛ́? Yé yɨ́ɛ dí entaa yɨ́? Nzê ndwéá ɛ̌? Nzê alatâr dí esâ ó, ndwéá waá díʼee sá dí ti yɨ́ ɛ́?

²⁰Mʉr nyɨnyɛ̂h dí ekáale le alatâr nyá, nyě káálé ó, le alatâr waá ndu e sá yɨ́yɛ̂h dí kɛlá tɨ̂ʼ kʉ́ yɨ́.

²¹Mʉr nyɨnyɛ̂h dí egbâ díé é mpáh Nzyɛ̌m ɨ́ minkâl nyá, nyě gbá ɨ́ minkâl ntémé ó díé mé Nzyɛ̌m, mʉr pá di tɨ̂ʼ tʉ́ŋlʉ̌ nyá.

²²Mʉr nyɨnyɛ̂h dí egbâ díé é jʉ́o ɨ́ minkâl nyá, nyě gbá ɨ́ minkâl ntémé ó díé é mécwɨ́ɨ́ mé jwɨ́ɨ dí gʉ̂ʼ má, bé e Nzyɛ̌m, mʉr pá di tɨ̂ʼ nyá.

²³«Nkoó, nye ó e bɨ̌n, olɛ̂ʼla o métié le oFarizyɛ̂n! Bɨ̌n baányâ-mikóo, bɨ̌n bé lɨ́ edwě Nzyɛ̌m nkɔb kám: ká étyéelé, mpumó ájɨ́mɨ́ le ntáma. Tyé yaá yɨ́yɛ̂h, bɨ̌n bé lɨ́ epyêh métié me dí ɨ́ bwaʼ má. Mé ó dí: edû kʉ̌ tyen dí tîtyěl wɨ́, ecwɨ́a e bʉr, le edira ménkɛ̌ʼ mɨ́n. Yé á gwa jala ɨ́ páʼ wɨ́n ó, bɨ̌n lóŋlaa bisyɛ́ɛla bíbyɛ̂h: le byaá bɨ́n dí asâ, le byaá bɨ́n dí esɨsâ bí.

²⁴Baántím o dí etɨ́e bʉ́ʉ́ báántím nzɨ̌ bâ! Bɨ̌n bé lɨ́ esyɛ̂l óncwii ɨ́ menyoʼ ó, bɨ̌n bé ámû jaá mine bê. Sâ gwár, bɨ̌n bɨɛ lɨ́ emine óchameau ontinɨ̂ ɨ́ jɔʼ bɨ́n dí ebɛble yɨ́!

²⁵«Nkoó, nye ó e bɨ̌n, olɛ̂ʼla o métié le oFarizyɛ̂n! Bɨ̌n baányâ-mikóo, bɨ̌n bé lɨ́ esohlo bísʉ́á le bikɔ̂b nko míkoo. Tó kœb ó, bɨ̌n bí kaale bísʉ́á byaá e bisá bɨ́n á pa dɛn bí, mpʉ bɨ́n dí, agʉ́a émâr míléme yɨ́.

²⁶Baántím bé óFarizyɛ̂n! Tááráá ényɛɛ́ sohlo gá sá ésôʼ ó, mǒ béle, tó pyâl ɨ́ jɔ̌ʼ kʉ̌l ngá di, yé mû ɨ́ púúm yɨ́.

²⁷«Nkoó, nye ó e bɨ̌n, olɛ̂ʼla o métié le oFarizyɛ̂n! Bɨ̌n baányâ-mikóo, bɨ̌n nwɨɨla ó e mesoo me dí kɔ́ná, mindubá le epɛ́m má. Mé lɨ́ enyɨ̂n ɨ́ mbɨa mbɨa ɨ́ páʼ kʉ̌l. Tó kœb ó, mé e bidwehé bi bʉ̂r tɨ̂ʼ tʉ́ŋlʉ̌ ndu e mimbi bílœ̌ʼ mímyɛ̂h.

²⁸Bɨ̌n bʉr o tɨ̂ʼ, ɨ́ míh mé bʉ̂r, bɨ̌n nyɨ́n ó mpʉ ótîtyěl o bʉ̂r. Tó kœb ó, milémé mín, myê njɨ ó, bɨ̌n sâʼ mikóo le entaa métié mé Nzyɛ̌m.

²⁹«Nkoó, nye ó e bɨ̌n, olɛ̂ʼla o métié le oFarizyɛ̂n! Bɨ̌n baányâ-mikóo, bɨ̌n bé lɨ́ ekɔ̂n mésoo ógwíha o mílɔ̌b bé á debe tɨ̂ʼ má, le egbâ ójɔɔ́ ɨ́ mesoo mé ótîtyěl o bʉ̂r.

³⁰Bɨ̌n lɛ́ɛ́ ntémé ó: “Yé bé bɨ̌h bé á be ó ɨ́ jɔʼ bímpám bíh, byé á be yɨ́ nó, mpa bɨ̌h bé á bé anʉa ntœ́b ɨ́ bisyɛ́ɛla byɔ́ɔ́, ɨ́ jɔʼ bé á jʉ̂jʉ ogwíha o mílɔ̌b mé Nzyɛ̌m yɨ́.”

³¹Nó bɨ̌n bɨɛ mû ó lɨ́ eboʼlo bɨ́n bʉr o tɨ̂ʼ ó, bɨ̌n ó dí bwán bʉ̂r o b'á jʉ̂ ogwíha o mílɔ̌b mé Nzyɛ̌m bá.

³²Yé bé nó wá, tóʼ gá dóló le elóŋlo mísyóm bímpám bín, byé á boo sɨ̂sa mí!

³³Bɨ̌n, kúl ónyʉ́a! Bɨ̌n, bigúrokɔɔ bî! Nzê yé óbána bɨ́n ó, bɨ̌n kɨ́ŋɨɨ tíʼá mílɔ̌b ngá tyen bʉ̂r ɨ́ bɨ́ siʼe wɨ́ ɛ́?

³⁴Sá tɨ̂ʼ ó mé dí elómlo bɨ́n ogwíha o mílɔ̌b, ndu e mipɨpɨ́ʼ mí bʉ̂r le olɛ̂ʼla yɨ́. Bâʼ bʉ̂r, bɨ̌n bé ójʉ̂ ó jʉ́ʼóo. Bʉ́ʉ́, bɨ̌n bé óbomlo ɨ́ bikolôs. Bʉ́ʉ́ ntémé, bɨ̌n bé óŋmɛ̂h míngáhá ɨ́ mempáh mínjɨʼla mɨ́n. Bɨ̌n bé ótíble bé bínkana e bínkana byɛ̂h.

³⁵Bɨ̌n bé ótô le esâ nó, tó pyâl ɨ́ jɔʼ métié mɨ́mɛ̂h me bʉ̂r o b'á dwe, akúnwo e mpɨŋ bá, mé óswɨɨ ɨ́ milʉ́ mín, táare ɨ́ metié mé Ábɛl, tó pyâl ɨ́ maá mé Zacharie, mwân mé Barákia, waá bɨ́n á jʉ̂ páʼ mpáh Nzyɛ̌m le alatâr nyá.

³⁶Mě lɛ́ɛ́ bɨ́n lɨ́ otyeetye ó, sâ yaá yɨ́yɛ̂h, yé óswɨɨ ó, ɨ́ milʉ́ mí bʉ̂r ó myǎ wɨ̂!

³⁷«Yerʉ́zalɛm, Yerʉ́zalɛm, gua mʉr dí ejʉ̂ ógwíha o mílɔ̌b le elúmo baá Nzyɛ̌m dí elómlo gó bá mekóʼ nyá! Nzɔʼ ntíá mé á be lɨ́ egwɨ̂m ésyɛŋ bwán bô mpʉ ábyɛɛ́-kúo dí esyɛŋ bwán bé sí mempabaá mé yɨ́? Bɨ̌n bɨɛ bɨbené benáa!

³⁸Jwɛ́ʼɛ́ɛ́ gâ, mbɛ̌r wɨ́n, wé ólîʼ gumo.

³⁹Ebě, me lɨ́ elɛ́ɛ bɨ́n ó: bɨ̌n bé ákóʼó kǎ báʼǎ bee mê, tó pyâl ɨ́ jɔʼ bɨ́n ngá lɛ́ɛ ó: “Mɨná gúmlaa gá waá dí enze e díé mé Dâ nyá!”»