Read Koonzime Matthieu 27 Bible Online

Matthieu 27 - Koonzime bible

Matthieu 27

¹Ɨ́ dwiné mɛ́n, ojwɨ́ɨ o mpáh Nzyɛ̌m bɨ́bɛ̂h le otɔ́má bʉ̂r o b'Ɨ́zraɛ̂l, bê nzě sáa pɨ̂ʼ ó, bé jʉ́ʼoo Yésʉs.

²Jɔʼ bé á be, bé mû sí kâʼ nyé menkara yɨ́, bê nzě tô e né, tó tímlɔɔ nyé Pilátos, á be ngóvina nyá.

³Yʉ́das, mʉr á bɛ́ma Yésʉs nyá, ɨ́ jɔʼ nyé á bee ó, bɨ́ tíʼě lɔ̌b wé ó, nye dwêʼ yɨ́, nye á si jʉba. Nye ntɔ̂ʼ tô ó, nyě bwóóló ó minzaŋ mí nkóhó mɔnɨ́ myaá mekám mélɛ̂l, dwe ójwɨ́ɨ o mpáh Nzyɛ̌m le otɔ́má bʉ̂r o b'Ɨ́zraɛ̂l.

⁴Nye ó: «Mɨ́ sâ syóm, ebě, me sí bɛ́ma métié me mʉ̂r á be akúnwo e mpɨŋ nyá!» Nó ó bé á yala e né ó: «Á bɨ̌h bɨɛ, bé e wáǎ lɔ̌b tɨ̂? Lɔ̌b gô ó nɨ̌!»

⁵Nye nzě guho bé minzaŋ mí mɔnɨ́ myaá ɨ́ mpáh Nzyɛ̌m tʉ́ŋlʉ̌, ntɔ̂ʼ tô kʉ̌l, tó tyeelě kǒl ɨ́ twíí, dwe.

⁶Ojwɨ́ɨ o mpáh Nzyɛ̌m, bê nzě tœ̂ʼ mínzaŋ mí nkóhó mɔnɨ́ myaá. Bé ó: «Yê mpéné ó, mʉ̌r sá akomǒ mbǐ mɔnɨ́ wɨ̂ʼ ɨ́ mpɔra míndwéá mí mpáh Nzyɛ̌m, ebě, yé ó tâŋ metié.»

⁷Nó ó bé á nze sáa pɨʼ, bê nzě nʉa bímɔnɨ́ byaá, ntɔ̂ʼ bwámɔɔ̌ péh sí mé mêl mempɨ̌. Bé á ka to dɨl mimúú mí ójwóó ó bʉ̂r tɨ̂.

⁸Sá tɨ̂ʼ ó bé á jwɨr pemé yaá: «Pemé-métié» yɨ́. Yé e díe laá ó, kumo ɨ́ dʉ́ó lɨ̂ʼ mûh.

⁹Nó yaá ó lɔ́ɔ́ mé Jérémie ngwíha milɔ̌b á boo cɛma wɨ́, wé á dira yɨ́. Nye á lɛ́ɛ ó: «Bé á si nʉa minzaŋ mí nkóhó mɔnɨ́ myaá mekám mélɛ̂l tâŋ mɔnɨ́ bʉ̂r o b'Ɨ́zraɛ̂l bé á kpɛl ebwâm nye e tɨ̂ʼ nyɨ́.

¹⁰Nó ó bé á nʉa byê, bwámɔɔ̌ péh sí mé mêl mempɨ̌, lɨ́ edû mpʉ̌ Dâ Nzyɛ̌m á tɨ́e me yɨ́.»

¹¹Nó ó Yésʉs á nze tô ɨ́ mpǒm mé ngóvina. Ngóvina nzě dî e né ó: «Go ó dí njwɨ́ɨ oYúden ɨ́?» Yésʉs nzě yala e né ó: «Yé ó gó dí sí lɛ́ɛ̌ nɨ̌.»

¹²Ojwɨ́ɨ o mpáh Nzyɛ̌m le otɔ́má bʉ̂r nzě laʼ nyé milɔ̌b ɨ́ buo buo. Sâ gwár, nye á bé ayalǎ sɔ̂ʼ.

¹³Nó ó Pilátos á nze dî e né ó: «Nzê gó ajóʼǒ bím mílɔ̌b bé dí epur gó mîʼ ɛ̌?»

¹⁴Yésʉs á bé akǎ yala ékǎn. Ngóvina nzě kâm syɛ́ɛla yaá ɨ́ buo buo.

¹⁵Nó ó, yé á bɨbe ó, ɨ́ jɔʼ nzɔ́ɔ nyaá, nyé á pipyâl yɨ́, ngóvina á bɨbe ó lɨ́ ebîr bé mbʉʼ ngwár, waá bʉ̂r, bé á gwɨgwɨ̂m ó, nye bírɨɨ wɨ́.

¹⁶Nó ó, gúú mbʉʼ, wé á bu gʉ́ŋɔɔ wɨ́, wé á be ó tɨ̂, díé lé Barábas.

¹⁷Mpʉ bɨ́bɛ̂h, bé á be tɨ̂ʼ yɨ́, Pilátos ntɔ̂ʼ dî e bé ó: «Nzê bɨ̌n gwɨ́m ó, me bírɨɨ bɨ̌n Barábas ɛ̌? Nzê Yésʉs bé dí elɛ́ɛ ó, nye ó Mʉ̌r Nzyɛ̌m á lœm múló mé jwɨ́ɨ nyá ɛ́?»

¹⁸Nye á lwib nó ó, ebě, nye á bee ó, bé á pur Yésʉs ó ɨ́ lɔ̌b nzwíí.

¹⁹Jɔʼ nyé á be, nye dína lɨ́ elwǐb lɔ̌b waá ɨ́ diá tîʼ milɔ̌b yɨ́, mʉmá wé ntɔ̂ʼ lómlo nyé twíí ó: «Anʉa ntœ́b ɨ́ lɔ̌b wɨ̂, ebě, mûh ɨ́ pum wɨ̂, me bé ó sí buú sia e túú ɨ́ líma mê jɨ̌m, dumo e tîtyěl mʉ̌r nɨ̌ yɨ́.»

²⁰Nó ó ójwɨ́ɨ o mpáh Nzyɛ̌m, bé e l'otɔ́má bʉ̂r, bé á bɨbêhle entumo e bʉ̂r ó, nye bírɨɨ bé Barábas, bé jʉ́ʼoo Yésʉs.

²¹Nó ó ngóvina á nze dî e bé ó: «Nzé, ɨ́ bʉr obá bâ, bɨ́n dí egwɨ̂m ó, me bírɨɨ nyá?» Bé ntɔ̂ʼ yala ó: «Barábas!»

²²Pilátos, nye e bé ó: «Á nó, waá bɨ́n dí elɛ́ɛ ó, nye ó Mʉ̌r Nzyɛ̌m á lœm múló mé jwɨ́ɨ nyá, me sâʼ nye nyá?» Bʉr bɨ́bɛ̂h ntɔ̂ʼ yala ó: «Nye tyélɔɔ ɨ́ kolôs kʉ́!»

²³Ngóvina, nye e bé ó: «Nye sá yáǎ sɔ̂ʼ dí ɨ́ bébe?» Bé ntɔ̂ʼ nzě bʉ́ŋɔɔ bítím, lɛ́ɔɔ kʉ́kʉ́ ó: «Nye tyélɔɔ ɨ́ kolôs kʉ́!»

²⁴Mpʉ̌ Pilátos á bee ó, bé á bé akpɛl éjóʼo nyé yɨ́, le ebee ntémé ó, entumo e bʉ̂r, lé ámû sâ bíntʉ̌ yɨ́, nó ó nyé á nze nʉa medíbé, nzě jwɨɨ mébó mé ɨ́ mpǒm entumo e bʉ̂r laá. Nye ó: «Mé anʉa ntœ́b ɨ́ metié me mʉ̂r nyâ! Lɔ̌b wɨ́n ó nɨ̌!»

²⁵Bɨ́bɛ̂h ntɔ̂ʼ yala kʉ́kʉ́, ó: «Metié mé, mé swɨ́yɨɨ ɨ́ milʉ́ míh ndu e myaá mi bwán bɨ́h!»

²⁶Nó ó Pilátos á nze bîr bé Barábas. Jɔʼ nyé á lómo bʉr ó, bé ŋmɛ́hɛɛ Yésʉs mingáhá yɨ́, nye nzě líʼe ntémé num ó, bé tôʼ bomlo nyé e binzâŋ, bɨ̂n nyé ɨ́ kolôs kʉ́.

²⁷Bisója mé ngóvina, byé ntɔ̂ʼ tóŋɔɔ e Yésʉs lɨ́ ebɛhɛɛ mé Pilátos, ntɔ̂ʼ jébě sɔ́má bísója yɨ́yɛ̂h. Bê nzě kɛb nyé ɨ́ nká.

²⁸Bé ntɔ̂ʼ pɛʼ nyé mikán myé, nzě bórɔɔ nyé kán swîh, kán waá wɨ́ɛ e nyʉ̂l ɨ́ cʉʼ.

²⁹Bê nzě peně káráá le mindwínɨ́nɨ́, nʉa yê, dilɔɔ nyé yǎ ɨ́ lʉ̂. Bê nzě dwe nyé péh sʉŋ ɨ́ mbó éjʉ̂m. Bé ntɔ̂ʼ bɨbɨʼ mébóó mɔ́ɔ́ sí tɨ̂ʼ ɨ́ mpǒm nyé le epyaŋɔɔ nyê. Bé ó: «Njwɨ́ɨ oYúden, bɨ̌h bé lɨ́ ebâʼ e go!»

³⁰Bê nzě sisyɛɛ nyé metyéelé ɨ́ mîh, le enʉŋɔɔ̌ péh sʉŋ yaá, ŋmɨ̂ŋmɛhɔɔ nyé yǎ ɨ́ lʉ̂.

³¹Jɔʼ bé á be, bé mû sí pya nyé yɨ́, bê nzě pɛʼ nyé kán wé á be e nyʉ̂l ɨ́ cʉʼ wɨ́, nzě bórɔɔ nyé mikán myé, ntɔ̂ʼ tóŋɔɔ e né ó, nye tó bomlɔɔ ɨ́ kolôs kʉ́.

³²Bé mû lɨ́ eduhǒ nkana nɛ́ɛ: bé ntɔ̂ʼ bee mʉ̂r Sirénia á be e díe ó «Simon» nyá. Bê nzě sâ nyé mpêl ó, nye nkɛ́yɨɨ kolôs mé Yésʉs.

³³Nó ó bé á tô e Yésʉs ɨ́ gúmó dí ejébɔɔ ó, «Golgotâ» yɨ́. Díe laá, lé páʼlɔ́ɔ́ ó, «Gúmó Bʉ̌n Lʉ̂.»

³⁴Bê nzě dwe nyé menyoʼ mpúhlá e mǐr ádwiedwíe, ó nye dêʼ. Jɔʼ nyé á bóblo mé yɨ́, nye ntɔ̂ʼ bene éde mê.

³⁵Jɔʼ bé á be, bé mû sí bomlo nyé ɨ́ kolôs kʉ́ yɨ́, bê nzě kabla míkán myé, doŋɔɔ myé ebya.

³⁶Píe tɨ̂, bê nzě diŋɔɔ sí lɨ́ edwéele nyê.

³⁷Bé ntɔ̂ʼ pɛn ɨ́ lʉ́ wé kʉ́ micɛmá myé á lɛ̂ʼle mebě nyé á búra e mé má. Myé á be ó: Yésʉs, Njwɨ́ɨ oYúden ó nyâ.

³⁸Bé ntɔ̂ʼ bomlo nyé e binzâŋ, bɨ́nɔɔ nyé ɨ́ kolôs kʉ́. Binzilngǎn bibá nzě bomlɔɔ ntémé ɨ́ bikolôs: yɨ̂ʼ, ɨ́ páʼ mbó éjʉ́m mé Yésʉs; yʉ́ʉ́, ɨ́ páʼ mbó émyɛ̌l.

³⁹Bʉr o b'á lɨlaa tɨ̂ʼ bá, bé á be ó lɨ́ elwɨ́ɨ nyê, le esiʼre mílʉ̂.

⁴⁰Bé ntémé, bé á lɨ̂lɛɛ e né ó: «Gua, mʉr á lɛ́ɛ ó, go ógbɛ́ɛ mpáh Nzyɛ̌m, ntɔ̂ʼ báʼǎ sumo nyé tâŋ melú mélɛ̂l nyá, kaá tiʼ gó mʉr tɨ̂! Gó bé Mwân mé Nzyɛ̌m nó, go e pʉ́gʉ́ pǎ sulo ɨ́ kolôs nɨ̌ sí!»

⁴¹Ojwɨ́ɨ o mpáh Nzyɛ̌m, olɛ̂ʼla o métié le otɔ́má bʉ̂r, bé á be ntémé ó, lɨ́ epya nyê. Bé ó:

⁴²«Nye á si tiʼ bʉr oswîh. Nó ó, nyé akǎ koʼo étiʼ nyé mʉr tɨ̂! Yé bé nyé pʉgʉ́ be ó tyeetye Njwɨ́ɨ Ɨ́zraɛ̂l nó, nye pʉ́gʉ kǎ sulo sí ɨ́ báánâ, mɨná nkʉ̂ dyɛ̂ʼwo gá e né.

⁴³Nye á be ó sí dyɛ̂ʼwo e Nzyɛ̌m. Yé bé Nzyɛ̌m dína ó lɨ́ ekpɛl nyé nó, nye káa tiʼ nyé ɨ́ báánâ, ebě, nye á lɨlɛ́ɛ ntémé ó, nye ó Mwân mé Nzyɛ̌m!»

⁴⁴Binzilngǎn bibá bé le onɔ́ɔ́ bé á bomlɔɔ ɨ́ bikolôs bí, byé ntémé ntɔ̂ʼ táare épyaŋɔɔ nyé jwɨʼ gwár yaá.

⁴⁵Jɔ̌ʼ témé móhó, yé á pyâl yɨ́, edúrʉ́ʉ́ ntɔ̂ʼ sula ɨ́ sí yɨ́yɛ̂h, tó pyâl ɨ́ mewala melɛ̂l mé bíí kʉ̌ʼ.

⁴⁶Nó ó, jɔʼ méwala melɛ̂l mé á pyâl yɨ́, Yésʉs nzě bʉ̂ tím. Nye ó: «Eli, Eli, lama sabaktáni?» (Nó yé lɨ́ elɛ́ɛ ó: «Nzyɛ̌m wǎm, Nzyɛ̌m wǎm, go ka myah mé mpʉ́nʉ̌ ɨ́ yé ɛ́?»)

⁴⁷Bʉ́ʉ́ bʉ̂r o b'á be tɨ̂ʼ bá, ɨ́ mpʉ bé á jóʼo mpʉ nyé á tíme yɨ́, bé ó: «Jóʼáá gá, nyâ, nye mû ó lɨ́ ejébě Elie!»

⁴⁸Píe tɨ̂, nyʉ́ʉ́ mʉ̂r ɨ́ sɔ́má bʉ̂r baá nzě tô kám, tó dubo éponge ɨ́ kɛ̌ʼla ményoʼ, nzě pɛn lé ɨ́ péh sʉŋ, ntɔ̂ʼ tyen nyé lǎ ó, nye dúʼoo.

⁴⁹Nó ó, bʉ́ʉ́, bé á lɛ́ɛ e né ó: «Bónáa. Mɨná páa bee gá yɨ́nɨ̌, nkʉ̂ Elie ónzě tiʼ nyê!»

⁵⁰Nó ó Yésʉs á nze baʼa tíme kʉ́kʉ́, ntɔ̂ʼ sulǎ swɨ̂h.

⁵¹Jɔʼ yaá, kǎ saʼ nɛ́ɛ: kán ébê, wé á bɨbe tyelá ɨ́ mpáh Nzyɛ̌m wɨ́, ntɔ̂ʼ nyɛɛ ɨ́ kwiií bipéh bíbá, táare kʉ́, kumo sí. Sí nzě kubla, mekóʼ bʉ̂l.

⁵²Mesoo diba. Bʉr o dí e gúmo e Nzyɛ̌m, baá bé á dwe bá, bé ntɔ̂ʼ pah ɨ́ buo buo.

⁵³Bé ntɔ̂ʼ duho ɨ́ mesoo mɔ́ɔ́. Jɔ̌ʼ Yésʉs á pah ɨ́ soo yɨ́, bɨ́ɛ ntémé nzě tóŋɔɔ̌ Yerʉ́zalɛm, gúmo bʉ̂r ɨ́ buo buo, bé á bee bé yɨ́.

⁵⁴Kapitɛ̂n, bé e bʉ́ʉ́ ódwéela o sóo mé Yésʉs, mbeá bé á bee mpʉ̌ sí yé á kubla yɨ́ le bisá bíbyɛ̂h biswîh, bê kʉ́ nzě jóʼo ékɛ̂n. Bé ó: “Mʉr nyâʼ á kʉ be ó Mwân mé Nzyɛ̌m!”

⁵⁵Yé á be ntémé ó e bʉ́ʉ́ bʉ́bá ɨ́ buo buo, bɨ́ɛ lɨ́ edwidwɛ̂ʼ sá yé á syɛ́ɛ yɨ́, tîtyɛbɔɔ lɨ́ ejaa. Bé ó b'á tô ɨ́ sɔ́má tyen yé, táare ɨ́ sí Galilê, tó kumǒ Yerʉ́zalɛm, le etô le eséɔɔ e né.

⁵⁶Ɨ́ sɔ́má bʉ́bá yaá tʉ́ŋlʉ̌, yé á be ó e Maria, silě Magdalâ, le Maria, nyɔ̌ŋ mé Jacques, bé e Yóseb ti e nyɔ̌ŋ bwán mé Zebedê.

⁵⁷Jɔ̌ʼ bíí kʉ̌ʼ yé á pyâl yɨ́, gúú njwɨ́ʼ mʉ̂r Arimatê, díé lé Yóseb, nzě pyâl. Nye ntémé á be ó mpʉ́n mé Yésʉs.

⁵⁸Nye nzě tô kwá mé Pilátos, lɨ́ etó dî nyé múú mé Yésʉs. Pilátos nzě lómo bʉ̂r ó, bé dwêʼ nye wǎ.

⁵⁹Yóseb ntɔ̂ʼ nʉǎ múu, nzě díble wé lɨ́ edwán é ndɔ́má.

⁶⁰Nye ntɔ̂ʼ tó dɨ̌l múu lɨ́ edwán é sóo lé, túbá ngʉ̌ʼ lɨ́ ekóʼ. Píe tɨ̂, nye ntɔ̂ʼ nʉa lʉ́ʉ́ ékóʼ, búblǒ num sóo e tɨ̂, nyɨɛ ntɔ̂ʼ laa, tô.

⁶¹Maria, silě Magdalâ, ndu e yʉ́ʉ́ Maria, bé á be ó tɨ̂ʼ mindîndǐl, siesíe num sóo.

⁶²Ɨ́ mɛ́n ɨ́ sábat, móhó bé á kʉkomlo bisá bí sábat wɨ́, wé osí laa, ojwɨ́ɨ o mpáh Nzyɛ̌m le oFarizyɛ̂n, bê nzě tó beě Pilátos.

⁶³Bé e né ó: «Dâ ɛ̌, bɨ̌h bé lɨ́ esímsa ó, ányâ-mikóǒ nɨ̌, ɨ́ jɔʼ nyé á be, nye dína ɨ́ twiʼ yɨ́, nye á kʉ bana lɛ́ɛ ó: “Lɨ́ elú élɛ̂l, me ópah.”

⁶⁴Nó, lɛ́yɨ́ɨ́ bʉ̂r ó, bé gwâ tó baʼle sóo, tâŋ melú mélɛ̂l. Ompʉ́n bé, bé ámû jaá tô mésǒ, tó díbě múú wé. Bé olɛ́ɛ ó, nyɨ́ pah ɨ́ soo. Nó ó, lɔ́ɔ́ bíbɛr epíhe wé, wé ámû jaá laa waá ésôʼ lɨ́ ebébe.»

⁶⁵Pilátos nzě lɛ́ɛ e bé ó: «Beyɨɨ gá bisója? Tóʼ gá e byê. Jáŋá bɨ̌n bé ótó baʼle sóo mbɨ̂mbɨá mpʉ bɨ́n bʉr o tɨ̂ʼ ngá kpɛl yɨ́!»

⁶⁶Bê nzě tô, lɨ́ egwá tó dwéele sóo. Bê nzě gbâ sitâm lɨ́ ekóʼ lé á bûbublo num sóo lɨ́, ntɔ̂ʼ tyélɔɔ ódwéela tɨ̂.