Read Koonzime Matthieu 28 Bible Online

Matthieu 28 - Koonzime bible

Matthieu 28

¹Píe móhó sábat, ɨ́ dwiné mɛ́n, dʉ́ó lé ésôʼ é sóno waá, Maria, silě Magdalâ, bé e yʉ́ʉ́ Maria, bê nzě tó bee sóo.

²Nó ó éngeles mé Dâ á nze sulo, duho ɨ́ jʉ́o kʉ́. Sí ntɔ̂ʼ kʉ́ nzě kubla ɨ́ buo buo. Éngeles waá nzě sîhle lɨ́ ekóʼ lé á be ɨ́ num sóo lɨ́, nzě bíŋle lé, tyen lé lɨ́ empah é num sóo. Píe tɨ̂, nye nzě di sí tɨ̂ʼ kʉ́.

³Mbi nyé á nyɨ̂n wɨ́, wé á be ó mpʉ̌ ndweh. Nó ntémé, mikán nyé á be e myé ɨ́ nyʉ̂l mí, myé á be ó ɨ́ bɛmɨ̂ mpʉ épɛ́m.

⁴Odwéela o sóo, bé ntɔ̂ʼ sâʼ ɨ́ nzɔm nzɔm nzɔm ɨ́ bʉ́á, nkaŋa sí ɨ́ bibwǎh mpʉ mímúu.

⁵Nó ó éngeles á lɛ́ɛ e bʉbá baá ó: «Bɨ̌n bɨɛ, ayɨ́ jóʼo gá bʉ́á, ebě, me lɨ́ egʉ́a ó, bɨ̌n sáá ó, Yésʉs bé á bomlo ɨ́ kolôs nyá.

⁶Nó ó, nyé akǎ be wâ. Nyɨ́ pah mpʉ nyé á pa lɨlɛ́ɛ yɨ́. Ntaá nzě bee gá gúmó nyé á be njáʼ sí yɨ́!

⁷Kpáhwá tô gâ. Tó lɛ́ɛ ómpʉ́n bé ó: “Nyɨ́ pah lɨ́ odwe! Beyɨɨ gá, nyɨ́ sámle, lɨ́ etó bóno bɨ́n ɨ́ sí Galilê! Gʉ̂ʼ ó bɨ́n ngá bee nyé yɨ́!” Bɨ̌n bɨ́ jóʼǒ mpʉ mê lɛ́ɛ́ yɨ́.»

⁸Bé ntɔ̂ʼ kpâhwǎ duhǒ gúmo yaá, bʉ́á ti e bisʉhʉʉ, byé mû bé ɨ́ miléme lwɨ́ŋlá. Bé ntémé ntɔ̂ʼ kpâhwǎ tô, lɨ́ etó lɛ́ɛ ómpʉ́n mé Yésʉs mpáŋla nyaá.

⁹Tyé e tyé yaá, bé ká twɨra nɛ́ɛ: beɔɔ ó, Yésʉs lɨ́ enzě bɔma e bê. Nye ó: «Me lɨ́ esoho bɨ́n!» Bê nzě tô, tó mɛ̂r Yésʉs mekʉ̌, búrwɔɔ sí, lɨ́ edwe nyé kûm.

¹⁰Nó ó Yésʉs á lɛ́ɛ e bʉbá baá ó: «Akpɛ́ɛ gâ. Tó lɛ́ɛ gá bɨ́ɔɔ́ bâm ó, bé tôʼ bóno ɨ́ sí Galilê, ebě, gʉ̂ʼ ó bé ngá bee mé yɨ́.»

¹¹Jɔʼ bʉ́bá bé á tʉtô nzɨ́ e nzɨ̌ yɨ́, bʉ́ʉ́ ódwéela o sóo, bê nzě tô nkana, lɨ́ etó lɛ́ɔɔ ójwɨ́ɨ o mpáh Nzyɛ̌m sá yɨ́yɛ̂h yé á laa yɨ́.

¹²Ojwɨ́ɨ baá le otɔ́má bʉ̂r, bê nzě gwɨ̂hla, sáŋɔɔ pɨ̂ʼ, ntɔ̂ʼ dweŋɔɔ bísója bíbyɛ̂h mɔnɨ́.

¹³Bé e byé ó: «Lɛ́yɨ́ɨ́ gá bʉr ó, ompʉ́n bé, bê bé ó sí nzě díbe nyé ɨ́ pum, bɨ̌n bɨɛ ɨ́ bijô.

¹⁴Nó ngóvina jóʼó lɔ́ɔ waá nó, bɨ̌h bé ɨ́ gʉ́ǎ mpʉ bɨ́h ngá lwib e né, bɨ̌n nkʉ̂ di, adweŋɔɔ bíntɨ́ʼá tɨ̂ʼ yɨ́.»

¹⁵Nó ó bé á nze nʉa mɔnɨ́ yaá, nzě sâ mpʉ bé á lɛ́ɛ e bé ó, bé sâʼ yɨ́. Nó ó, lɔ́ɔ waá, wé á si myaŋla lɨ́ oYúden bɨ́bɛ̂h, nzě kumo ɨ́ dʉ́ó lɨ̂ʼ mûh.

¹⁶Ompʉ́n kám e ngwár mé Yésʉs baá, bê nzě tô sí Galilê, tó pyâl lɨ́ ecwɨ̂ʼ Yésʉs á boo tɨ́e bé lɨ́.

¹⁷Nó ó, mbeá bé á bee nye yɨ́, bê nzě bɨʼ mébóó sí, lɨ́ edwe nyé kûm. Sâ gwár, bʉ́ʉ́ bʉ̂r ó sɔ́má yɔ́ɔ́, bé á be lɨ́ esóŋlo.

¹⁸Yésʉs ntɔ̂ʼ sîhlě nko bé á be yɨ́. Nye ó: «Sɔ́ŋ wǎm, nyɨ́ dwe mé nkul jwɨ́ɨ nyɨnyɛ̂h ɨ́ kʉ́ ti e sí.

¹⁹Nó ó, tóʼ gá ɨ́ sí yɨ́yɛ̂h. Bɨ̌n a sá bíkúl bíbyɛ̂h ompʉ́n bâm. Bɨ̌n bé odu bé ɨ́ díé é Sɔ́ŋ, le Mwân le Sísǐm mé Nzyɛ̌m.

²⁰Bɨ̌n a lɛ́ʼlé bê, ó bé bâʼlaa bisá bíbyɛ̂h mé á boo lɛ́ɛ bɨ̌n bí. Gʉ́ŋáá gá ó: me ódi e bɨ̌n melú mɨ́mɛ̂h, tó pyâl pyáláa ɨ́ jɔʼ mpóʼo sí yɨ̂ʼ ósíe yɨ́.»