Read Koonzime Matthieu 3 Bible Online

Matthieu 3 - Koonzime bible

Matthieu 3

¹Ɨ́ melû maá, Yʉánɛs Ndubʉr nzě pyâl le elɛ́ɛ̌ lɔ́ɔ́ mé Nzyɛ̌m ɨ́ lʉá dí ɨ́ sí Yʉ́da wɨ́.

²Nye á lɨlɛ́ɛ ó: «Túmáá gá mikoo e mebébe mɨ́n. Bɨ̌n a dwírá míléme, ebě, Dâ mû ó kúno etyêl Mpóʼo nyé ɨ́ sɔ́má gá yɨ́ná.

³Mʉr á lwibɔɔ ɨ́ lɔ̌b wé ɨ́ mekaná me ngwíha milɔ̌b mé Nzyɛ̌m Ésayie nyá, á be ó Yʉánɛs waá. Ésayie á boo cɛma ó: “Twíí, nye lɨ́ etúno ɨ́ tʉ́ŋlʉ̌ lʉá ó: «Komlaá gá nzɨ̌ mé Dâ Nzyɛ̌m. Jyɛŋlaá gá nzɨ̌ nyé lɨ́ epélé.»”»

⁴Kán Yʉánɛs á bubwâr wɨ́, wé á be ó tiá e myě mé chameau. Kaná nyé á tityeele lɨ́ odyɛ́m nyá, á be ó sɛ́á e kʉ́r tír. Nye á dɨde ó, océmebiká le egbɔ́ʼ.

⁵Nó ó bʉ̂r ó Yerʉ́zalɛm, le baá ó sí Yʉ́da ti e baá ó sí díbé Yɔrdên, bɨ́bɛ̂h, bé á nzě gúmó nyé á be yɨ́,

⁶bé ntɔ̂ʼ gwîh mísyóm myɔ́ɔ́, Yʉánɛs nzě du bé ɨ́ díbé Yɔrdên.

⁷Nó ó óFarizyɛ̂n le oSadwisyɛ̂n ɨ́ buo buo bé á nze, ó Yʉánɛs dúʼoo bé ɨ́ díbé yɨ́. Nye nzě lɛ́ɛ e bé ó: «Bɨ̌n bwá ó méjwɨ̂l bâ, nzé á pʉgʉ cɨ̂l bɨ̌n ó, bɨ̌n bé e nkul ekɨ̂ŋ nkpáa mé Nzyɛ̌m ɨ́ jɔʼ nyé ngá lɛ̂ʼle bɨ́n nyǎ yɨ́ ɛ́?

⁸Gúmáá gá mimpaŋ mi mpúmó mi dí ejala e miléme mû sí dwira mí.

⁹Ayɨ́ jwɨʼ gá ɨ́ milémé mín ó: “Ɨ́ páʼ gá wɨ́ná, mɨná gá bɨɛ, bé e sɔ́ŋ ó, Abraham,” ebě, mě lɛ́ɛ́ bɨ́n ó, Nzyɛ̌m óbɛ̌m liŋ mékóʼ mâʼ bwá mé Abraham!

¹⁰Num nzwɨ́ɨ, wé mû ó ɨ́ cǎr lɨ́ etíʼe míkaalé bílɨ́ nko ménzuʼ. Nye ócwɛ̌l lɨ́ yɨ́yɛ̂h dí agúmo mímpǎŋ mi mpúmó yɨ́, guho yé lɨ́ ebéʼé é siʼe.

¹¹Mɛ̌m du bɨ́n ó e medíbé, lɨ́ elɛ̂ʼle ó, bɨ̌n bɨ́ túmo míkoo e misyóm mín, le edwira míléme. Sâ gwár, mʉr dí ebɔma mé píe koo nyá, nyě e jwɨ́ɨ, laa mê. Mɛm, mé abě tyé mʉ̂r dí ó, me pɛ́ʼɛɛ nye osípah ɨ́ mekʉ̌ nyá. Nyɨɛ, nye ódu bɨ́n ó e Sísǐm mé Nzyɛ̌m le siʼe.

¹²Nyě e pyɛba ɨ́ mebô. Nyɨ́ gwámle ébɛhɛɛ lé, lwâl mpúmó. Nye ókomo mílɔ́lá ɨ́ nkuna. Sâ gwár, nye ódîʼ mpʉ́n ɨ́ siʼe dí adímedime yɨ́.»

¹³Nó ó Yésʉs á nkɛ́ɛ ɨ́ sí Galilê, tô díbé Yɔrdên kwá mé Yʉánɛs, lɨ́ esáa ó, Yʉánɛs dúʼoo nye.

¹⁴Sâ gwár, Yʉánɛs á si nyɛɛ bene. Nye e né ó: «Yé jala ó, gua dúʼoo me, abe ó, gua ntâʼ ó me dúʼoo go.»

¹⁵Yésʉs nzě yala e né ó: «Bírɨ́ɨ, yé syɛ́yɨɨ nó, ebě, yé jala ó, mɨná lóŋlaa bisyɛ́ɛla bi dí ejala le esyɛ́ɛ bí, bíbyɛ̂h.» Yʉánɛs ntɔ̂ʼ kam.

¹⁶Mpʉ̌ Yésʉs á sil eduŋɔɔ yɨ́, le nyé á pʉʼa ɨ́ medíbé, lě jʉ́o á bɔ́a. Nye ntɔ̂ʼ beě Sísǐm mé Nzyɛ̌m lɨ́ esulo ɨ́ báaa mpʉ épɨbaa, nzě berwo nyé ɨ́ nyʉ̂l.

¹⁷Píe tɨ̂, nyě kǎ jóʼo ó, etyêl nzě duho ɨ́ jʉ́o kʉ́, lɨ́ elɛ́ɛ ó: «Nyâ, nye ó mwân wǎm mé dí ɨ́ buú kpɛl nyá. Sʉhʉʉ yâm yɨ́yɛ̂h, yé e né.»