Read Koonzime Matthieu 6 Bible Online

Matthieu 6 - Koonzime bible

Matthieu 6

¹«Baʼaa gá lɨ́ elɛ̂ʼle ɨ́ míh mé bʉ̂r mpʉ bɨ́n dí edwě Nzyɛ̌m kûm yɨ́, ó bɨ̌n nkʉ̂ beɔɔ. Bɨ́n sá nó wá, bɨ̌n bé ábǐ mpǎŋ myɛ́na kwá sɔ́ŋ wɨ́n dí ɨ́ jʉ́o kʉ́ nyá.

²«Yé bé gǒ dwé ó ndyêbndyéb mɔnɨ́ nó, ayɨ́ tô le elɛ́ɛ̌ sâ yaá kʉ́kʉ́ mpʉ báányâ-mikóo dí esâ ɨ́ mempáh mínjɨʼla le meman mínkpǎʼ yɨ́. Bé sá nó ó, bʉr nkʉ̂ gúmlo bê. Mě lɛ́ɛ́ bɨ́n lɨ́ otyeetye ó, bɨ́haá bʉ̂r, bɨ́ boó bi myɛ́na mɔ́ɔ́.

³Sâ gwár, gua, gó ódwě ndyêbndyéb mɔnɨ́ nó, mbó émyɛ̌l gô, wé ayɨ́ gʉ́ǎ sá mbó éjʉ̂m sá yɨ́,

⁴ebě, edwɛ́na lô, lé ɨ́ jala le esyɛ́ɛ ó ɨ́ mesǒ. Sɔ́ŋ gǒ dí ebeě sá yɨ́yɛ̂h dí solá yɨ́ nyá, ódwe gó mpǎŋ myɛ́na tɨ̂.»

⁵«Jɔʼ bɨ́n dí ejɨʼla e Nzyɛ̌m yɨ́, asâ gá mpʉ báányâ-mikóo dí esâ yɨ́. Bé jɨjɨʼla ó, mitîtyěl lɨ́ mempáh mínjɨʼla le meman mínkpǎʼ, ó bʉr, bé béyɨɨ bê. Mě lɛ́ɛ́ bɨ́n lɨ́ otyeetye ó, bɨ́ boó bi mɔ́ɔ́ myɛ́na.

⁶Sâ gwár, gua, ɨ́ jɔʼ gó dí ekpɛl éjɨʼla e Nzyɛ̌m yɨ́, níʼéé ɨ́ ntɔ́ɔ nyǒ, dible ébê, jɨʼla e Sɔ́ŋ gǒ dí náǎ lɨ́ esǒ nyá. Nó ó, Sɔ́ŋ gǒ dí ebeě sá gó dí esâ náǎ mesǒ yɨ́ nyá, ódwe gó mpǎŋ myɛ́na.

⁷«Ɨ́ minjɨʼla bɨ́n dí ejɨʼla e Nzyɛ̌m mí, abul gá mekǎn me dí adirǎ nyɔm má mpʉ bʉ̂r o dí apǎ gʉ́ǎ Nzyɛ̌m bá dí esâ yɨ́. Bé bûʼlá ó, Nzyɛ̌m ójóʼo bé ó, ebě, bé lɨ́ elwib ɨ́ buo buo.

⁸Nó, abaŋa gá bê, ebě, Sɔ́ŋ wɨ́n, nye lɨ́ eboó gʉ́ǎ sá dí esâ bɨ́n sɔ́ɔlʉ yɨ́, bɨ̌n dína apǎ gwâm nyé yǎ.

⁹Jɨjɨʼlaa gá e Nzyɛ̌m ɨ́ mbi wɨ̂: “Sɔ́ŋ wɨ́h dí ɨ́ jʉ́o kʉ́ nyá, lɛ́ʼláá bʉ̂r bɨ́bɛ̂h ó, go ó Nzyɛ̌m dí ti nyá.

¹⁰Jwɨ́ɨ́ yô, yé ntâʼ. Mitíʼá mí lémé gô, myé syɛ́yɨɨ ɨ́ sí yɨ̂, mpʉ ntémé myé dí esyɛ́ɛlɨ ɨ́ jʉ́o kʉ́ yɨ́.

¹¹Dwéʼ bɨ́h mûh mede gó dí eboó dwe bɨ́h dʉ́ó lɨ́lɛ̂h má.

¹²Pɛʼɛɛ bíbaa bí ébébe gó dí eniʼe lɨ́ misyóm míh bí, ɨ́ mpʉ bɨ́h ntémé mû sí pɛʼ bíbaa bí ébébe bɨ́h á niʼe bʉr o b'á sâ bɨ̌h ebébe bá yɨ́.

¹³Ayɨ́ bîr ó, bɨ̌h níʼee ɨ́ mebʉ́blá. Syɛbɨɨ bɨ́h ɨ́ mebó mé Sátan.”»

¹⁴«Bɨ́n ópɛʼ bíbaa bí ébébe bʉ̂r, bé á sâ bɨ̌n lɨ́ nó, Sɔ́ŋ wɨ́n dí ɨ́ jʉ́o kʉ́ nyá ntémé ópɛʼ bíbaa bí ébébe bín.

¹⁵Sâ gwár, bɨ́n ólɛ́ɛ ó, bɨ̌n bé apɛʼ bíbaa bɨ́n á niʼe bʉr bí nó, Sɔ́ŋ wɨ́n ntémé, nye ápɛʼ bíbaa nyé á niʼe ɨ́ lɔ̌b mísyóm mín bí.»

¹⁶«Nó ó, ɨ́ jɔʼ bɨ́n dí eti méde lɨ́ edwě Nzyɛ̌m kûm yɨ́, mʉr alwaare méncémé ɨ́ mpʉ báányâ-mikóo dí esɨsâ yɨ́. Bé lulwaare méncémé ó, lɨ́ ekpɛl élɛ̂ʼle bʉ̂r ó, bé mû ó lɨ́ eti méde. Mě lɛ́ɛ́ bɨ́n lɨ́ otyeetye ó, bɨ́ boó bi myɛ́na mɔ́ɔ́.

¹⁷Nó, gúa óti méde lɨ́ edwě Nzyɛ̌m kûm nó, jwɨyɨɨ mpóm nyǒ. Lɔmaa múlo.

¹⁸Go nkʉ̂ di, alɛ̂ʼle bʉ̂r ó, go lɨ́ eti méde lɨ́ edwě Nzyɛ̌m kûm. Sɔ́ŋ gǒ nye omér dí náǎ lɨ́ esǒ nyá ó gó lɛ̂ʼle. Sɔ́ŋ gǒ dí ebeě sá gó dí esâ náǎ mesǒ yɨ́ nyá, ójána e go mpǎŋ myɛ́na.

¹⁹«Amâʼ gá okúm le ogbaa wɨ́n ɨ́ sí yɨ̂, gúmó óswôʼ le myámnkɛ̂l dí endáma bísɔ̂ʼ, mindíblʉ̌ bʉ̂ mébê le edíbe yɨ́.

²⁰Máʼáá gá okúm le ogbaa wɨ́n ɨ́ jʉ́o kʉ́, gúmó óswôʼ le myámnkɛ̂l dí andáma bísɔ̂ʼ, mindíblʉ̌ abʉ̂ mébê, díbe yɨ́.

²¹Ebě, gúmó ókúm le ogbaa gô dí yɨ́, gúmo yaá ntémé ó lémé gô, wé óbe yɨ́.

²²«Dîh, lé ó mpʉ éláma ɨ́ nyʉ̂l mʉr. Yé bé díh lô, lé ó mbɨ̂mbɨá nó, lɛ́ɛ́, nyʉ̂l nyǒ nyɨnyɛ̂h óbe ó ɨ́ myɛ́n tʉ́ŋlʉ̌.

²³Díh lô, lé óbe, abě mbɨ̂mbɨá nó, nyʉ̂l nyǒ nyɨnyɛ̂h óbe ó lɨ́ edúrʉ́ʉ́. Yé sí kǎ be ó, dwé dí ɨ́ nyʉ̂l nyǒ yɨ́, sí liŋa édúrʉ́ʉ́ nó, edúrʉ́ʉ́ laá, lé óbe ó ɨ́ ntime ntime!»

²⁴«Kâr tɔʼ e mʉr ngwár dí e nkul eséa le ojwɨ́ɨ obá jɔʼ gwár, ebě, nye ónwim nyʉ́ʉ́, kpɛl nyʉ́ʉ́; nkʉ̂ ntɔ̂ʼ ó, nye ódwe nyʉ́ʉ́ dúu; pyêh nyʉ́ʉ́. Nó, bɨ̌n bé abe e nkul eséǎ Nzyɛ̌m syɛ́ɛ́, séa Ókúm-le-Ogbaa syɛ́ɛ́ ɨ́ jɔʼ gwár.

²⁵«Sâ yaá ó mé lɛ́ɛ́ bɨ́n ó: asyɛl gá bá ɨ́ lɔ̌b twiʼ yɨ́n, lɨ́ eyêʼwo méde bɨ́n ngá de yɨ́. Asyɛl gá ntémé bá ɨ́ lɔ̌b míkán bɨ́n óbwâr ɨ́ menyʉ́l mɨ́n mí. Nzê bɨ̌n bé agʉ́a ó, twiʼ, yé e nyɔm, laa méde, le ntémé ó, nyʉ̂l, nyě e nyɔm, laa míkán ɛ́?

²⁶Jwɛ́ʼɛ́ɛ́ gá binʉ̌n dí epiilɨ kʉ́ bí: Byé abe mémpeʼ, akpɛm, asyɛŋ méde lɨ́ bitáa. Sɔ́ŋ wɨ́n dí ɨ́ jʉ́o kʉ́ nyá ó dí edwe byé mede. Ntʉ bɨ́n dí elaa bínʉ̌n byaá lɨ́ odimé ɛ̌?

²⁷Nzé ɨ́ sɔ́má yɨ́n dí e nkul ekɛl élû egwár ɨ́ melú mé twiʼ yé ɨ́ lɔ̌b bá nyé dí esisyɛl ɨ́ léme yɨ́?

²⁸Bɨ̌n bé lɨ́ eyêʼwo míkán ɨ́ yé? Paá gwá dwɛ̂ʼ gá mpʉ ménzɔ̌m dí etô le ebuʼwa ɨ́ bipemé yɨ́. Menzɔ̌m, mé abe lɨ́ eséǎ syɛ́ɛ́, nkʉ̂ lar míkán.

²⁹Mě lɛ́ɛ́ bɨ́n ó, damá bě Salomɔ̂ŋ ɨ́ jɔʼ nyé á be le okúm le ogbaa wé yɨ́, á bé abwâr míkán mi dí ɨ́ nkaaá mí mpʉ nzɔ́m mpwár ɨ́ menzɔ̌m mâ.

³⁰Nzyɛ̌m pǎ nyɛɛ́ bôr mémpeʼ dí ɨ́ bipemé, ngá guhɔɔ ómɛ́n ɨ́ duró má, á dwɛʼra e bɨ̌n! E yé, yé ósâ ó, nye ayɨ́ bôr bɨ́n, laa náǎ? Á twâʼwǒ búʼó yɨ́n ɛ̂!

³¹Ayɨ́ syɛl gá bá, lɨ́ elɛ́ɛ ó: “Mɨná bé óde gá máa méde le máa ményoʼ? Mɨná bé óbwâr gá yé?”

³²Bisá bínɨ̌, minjéʼe-Nzyɛ̌m ó dí esáa byê. Tó kœb ó, Sɔ́ŋ wɨ́n dí ɨ́ jʉ́o kʉ́ nyá, nye lɨ́ eboó gʉ́a ó, bɨ̌n bé lɨ́ egwɨ̂m byê.

³³Sá ésôʼ, tááráá ésáa gá enî ɨ́ Mpóʼo nyé, le etiʼe lɨ́ otîtyěl wé. Byaá byúú bɨ́n ká jɨ̌ nɨ̌, Nzyɛ̌m ólóŋlo bɨ́n byǎ.

³⁴Nó, mʉr ayêʼwo gá sá ngá syɛ́ɛ ómɛ́n yɨ́, ebě, ómɛ́n ó yéʼwó nyé mʉr tɨ̂. Móhó jala ó e wé túú.»