Read Koonzime Matthieu 8 Bible Online

Matthieu 8 - Koonzime bible

Matthieu 8

¹Yésʉs nzě sulo lɨ́ ecwɨ̂ʼ, bé e bʉr, entúúnó-é-nkáá.

²Nó ó, nyʉ́ʉ́ mʉ̂r á be e nzǎm nyá, á sîhlě bǎʼ e né, bɨʼ mébóó sí, lɨ́ edwe nyé kûm. Nye e Yésʉs ó: «Dâ ɛ̌, gó kpɛ̂l nó, go óbɛ̌m tiʼ mê. Nyʉ̂l díʼee me ɨ́ deŋé.»

³Yésʉs ntɔ̂ʼ syɛ̂m mbô, nzě kúna e né. Nye e né ó: «Mɨ́ kam. Nyʉ̂l díʼee go ɨ́ deŋé!» Tyé e tyé yaá, nzǎm síe nyé ɨ́ nyʉ̂l!

⁴Yésʉs nzě lɛ́ɛ e né ó: «Alɛ́ɛ mʉ̂r lɔ̌b wɨ̂. Sâ gwár, tóʼ kwá opara. Tó lɛ̂ʼle bé nyʉ̂l. Go e dwé míndwéá Moyɨ̂z á boo cɛma tɨ̂ʼ ɨ́ metié mé mí, ndwéá gô nkʉ̂ lɛ̂ʼle bʉ̂r ó, gʉ́ tiʼe.»

⁵Jɔ̌ʼ Yésʉs á be lɨ́ enî Kapernáʉm yɨ́, nyʉ́ʉ́ kapitɛ̂n bisója bí Rôm nzě sîhlě bǎʼ e né. Nye ntɔ̂ʼ jɨʼla e né ó:

⁶«Dâ ɛ̌, syɛ̂l mesâ dí me mpʉ mwân nyá, nye ó mbʉ́mbʉ́ʼ, njáʼ sí ɨ́ mbɛ̌r. Ekpaa, lɨ́ ntaa nyé ɨ́ nkul.»

⁷Yésʉs nzě lɛ́ɛ e né ó: «Me ótó tiʼ nyê.»

⁸Kapitɛ̂n, nye e Yésʉs ó: «Dâ ɛ̌, mbǐ bébebébe mʉr mé dí wɨ́, yé ajala ó, go níʼeě mbɛ̌r wâm. Cɨʼeě njɨ ekǎn egwár, syɛ̂l mesâ wǎm tíʼaa.

⁹Mɛm, mé e bʉr o dí ejwɨ́ɨ mé bá. Mɛm ntémé, mé e bisója ɨ́ jwɨ́ɨ́ yâm. Mě jaá lɛ́ɛ e yɨ̂ʼ ó, njɨ: “Tóʼ!” yê tô. Me e yʉ́ʉ́ ó: “Ntáʼ!” yɨ́haá nze. Me kǎ lɛ́ɛ e syɛ̂l mesâ wǎm ó: “Sáʼ sɨ̂ʼ yɨ̂!” nye sâ.»

¹⁰Ejóʼǒ Yésʉs á jóʼo mekǎn maá yɨ́, nye ntɔ̂ʼ kâm. Nye e bʉr o b'á dû nye bá ó: «Mě lɛ́ɛ́ bɨ́n lɨ́ otyeetye ó, abe e nyʉ́ʉ́ mʉ̂r ngwár, damá jóʼo ɨ́ kúl bʉ̂r o b'Ɨ́zraɛ̂l, dí e mbǐ búʼó wɨ̂.

¹¹Mě lɛ́ɛ́ bɨ́n lɨ́ otyeetye ó, bʉr ɨ́ buo buo, bé óduhǒ nko dʉ́o dí ejɨma le nko dʉ́o dí ejâ yɨ́. Bé onî ɨ́ Mpóʼo mé Dâ Nzyɛ̌m, ntɔ̂ʼ nʉa bídiá byɔ́ɔ́ ɨ́ dína, bé le Abraham, Isaac le Yákɔb.

¹²Minyɛ̂r mí Mpóʼo nyaá míɛ, myé ónzéŋlɔɔ̌ kʉ̌l lɨ́ edúrʉ́ʉ́, súm bé ójóno le epûʼlo médye yɨ́.»

¹³Yésʉs ntɔ̂ʼ lɛ́ɛ e kapitɛ̂n waá ó: «Tóʼ kwár nyǒ. Yé syɛ́yɨɨ mpʉ̌ búʼó yô pa kpɛl yɨ́.» Tyé e tyé yaá, syɛ̂l mesâ wé ntɔ̂ʼ tiʼe!

¹⁴Píe tɨ̂, Yésʉs nzě tô mbɛ̌r mé Pétrus, tó kœb ó, tǐ mʉmá mé Pétrus á be ó njáʼ sí lɨ́ ejóʼo ékpaa, nyʉ̂l lɨ́ edúo ɨ́ bɨl bɨl.

¹⁵Nye nzě kúna e né ɨ́ mbô, medúo me nyʉ̂l ntɔ̂ʼ síe. Mʉmá waá ntɔ̂ʼ gbɔlwa sí, táare éséa e né.

¹⁶Ɨ́ bíí kʉ̌ʼ yaá, bʉr ntɔ̂ʼ nze e bʉr ɨ́ buo buo, baá méleme, mé á nzɨnzamra bá. Yésʉs nzě so méleme maá ndu e l'etiʼ ntémé mimbél mímyɛ̂h e lwǐb num.

¹⁷Nye á sâ nó ó, sá ngwíha milɔ̌b Ésayie á boo lɛ́ɛ yɨ́, yé díraa. Nye á cɛma ó: “Nye á si tiʼ bʉr o bídyɛ̂m gá bíná, pɛʼ mɨ́ná gá mitúú mékpaa ɨ́ menyʉ̂l.”

¹⁸Mbeá Yésʉs á bee entumo e bʉ̂r lɨ́ ebɔma nyé ɨ́ nká yɨ́, nye nzě lɛ́ɛ ó, bé ntáŋaa mâŋ, tô ɨ́ lʉ́ʉ́ ébʉ̂m.

¹⁹Nó ó, nyʉ́ʉ́ lɛ̂ʼla metié á nze sîhlě gúmó nyé á be yɨ́. Nye e né ó: «Lɛ̂ʼla, me ódû gó gúmó yɨ́yɛ̂h gó ótô yɨ́.»

²⁰Yésʉs nzě yala e né ó: «Ompɔ̌ʼ, bé ó e mekul. Binʉ̌n e mɔʼ. Sâ gwár, Mwân mé Mʉr, nyé abe e gúmó nyé kɛ́lɨɨ lʉ̂.»

²¹Nó nyʉ́ʉ́ mʉ̂r á be ntémé mpʉ́n wé nyá, á nze lɛ́ɛ e né ó: «Dâ ɛ̌, paá bîr ó, mɛm páa nyɛɛ́ tó dɨl sɔ́ŋ wǎm.»

²²Yésʉs nzě yala e né ó: «Dúʼóó mê. Bírɨ́ɨ́ ódwe, bé dɨ́lɨɨ mimúú myɔ́ɔ́.»

²³Yésʉs ntɔ̂ʼ kalwo ɨ́ byɛ̂l, ompʉ́n bé, bê nzě dû nyê.

²⁴Abea nɛ́ɛ: nkúo nzě kwoolo ɨ́ mâŋ ɨ́ buo buo. Obóʼó ó mâŋ, wê nzě bére, byɛ̂l akǎ nyɨ̂n. Náǎ yé ó, Yésʉs ɨ́ jô.

²⁵Ompʉ́n nzě sîhlě súm nyé á be yɨ́, ntɔ̂ʼ jɨmɔɔ nyé ɨ́ jô. Bé e né ó: «Dâ ɛ̌, tiʼɨɨ mɨ́ná gâ! Mɨná múo nzě dwe gá ó yɨ̂!»

²⁶Jɔʼ yaá ó nyé á nze lɛ́ɛ e bé ó: «Bɨ̌n jóʼó bʉ́á mpʉ́nʉ̌ ɨ́ yé? Á twâʼwǒ búʼó yɨ́n ɛ̂!» Nye nzě mɔa sí, nkáŋla e nkúo le mâŋ. Sá yɨ́yɛ̂h nzě di ɨ́ puuu.

²⁷Bʉr baá, bê nzě jóʼo ékɛ̂n ɨ́ buo buo. Bé ó: «Mʉr nyâ, nye wáǎ mbi, dí, nkúo e mâŋ, byé lɨ́ ebánǎ sâ nyé mejóʼo nyâʼ ɛ̌?»

²⁸Jɔ̌ʼ Yésʉs á sulo lɨ́ ebʉ́m é kɔ́m nkɛ́ɛ́ ɨ́ sí Gadarɛ̂n yɨ́, bʉr obá nzě duhǒ pemé mésoo, tó bɔma e Yésʉs. Bé á be ó e meleme, mé á nzɨnzamra bé má. Mé á be ɨ́ buú nyan. Bʉr, bé á bé akǎ dûhwo écɨɨ̌ súm bé á be yɨ́.

²⁹Bé ntɔ̂ʼ táare ébʉ̂ bítím. Bé e Yésʉs ó: «Gǒ sáá yé e bɨ̌h, Mwân mé Nzyɛ̌m? Gǒ nzě dwe bɨ́h bintɨ́ʼá ó, jɔʼ apǎ pyâl ɨ́?»

³⁰Bá ncɛ́rá e sûm yaá, daa lé ónkʉ̌ ɨ́ buo buo, lé á be ó lɨ́ ede.

³¹Nó méleme maá, mé á jɨʼla e Yésʉs ó: «Yé bé gǒ sǒ ó bɨ̌h nó, tyenɨɨ bɨ́h yɨ́ɛ ɨ́ daa lé ónkʉ̌ lɨ̂.»

³²Nó nyé á lɛ́ɛ e mé ó: «Tóʼ gâ!» Mé ntɔ̂ʼ duho ɨ́ menyʉ́l mé bʉ̂r obá baá, tó níŋɔɔ ɨ́ menyʉ́l mé ónkʉ̌. Mesaʼ metwɨrâ, daa lé ónkʉ̌ nzě buma e mikám, ntɔ̂ʼ tulwa ɨ́ mbéʼé écwɨ̂ʼ kʉ́, ntɔ̂ʼ lʉ́ŋa ɨ́ mâŋ, jɨ́bla, dwe.

³³Opála bé ónkʉ̌ nzě kpɛ́ɛ, tóŋɔɔ̌ nkana, tó lɛ́ɛ̌ sá yɨ́yɛ̂h bé á bee yɨ́, le lɔ́ɔ ɨ́ lɔ̌b bʉ̂r o méleme mé á nzɨnzamra bá.

³⁴Nó ó bʉ̂r ó nkana bɨ́bɛ̂h bé á nze dua, tó bɔma e Yésʉs yɨ́. Jɔʼ bé á bee nye yɨ́, bê nzě jɨʼla e né ó, nye pʉ́ʼaa ɨ́ sí yɔ́ɔ́, tô lɨ́ ejaa.