Read Koonzime Marc 11 Bible Online

Marc 11 - Koonzime bible

Marc 11

¹Jɔʼ bé á be, bé mû bǎʼ e Yerʉ́zalɛm, bǎʼ e Bɛtfagée le Bétanî, lɨ́ Ecwɨ́ʼ lé ólivier yɨ́, Yésʉs nzě lómo ómpʉ́n bé obá.

²Nye ó: «Tóʼ gá kwár dí bɨ̌n lɨ́ empǒm nɨ̌. Bɨ́n ónî tɨ̂ʼ nó, bɨ̌n bé ókœb mâ kamntʉl tyeelá, yé dína, mʉr apǎ kalwo ɨ́ yê. Tiyɨɨ gá yê. Bɨ̌n a nzé mé e yé wâ.

³Mʉ̂r sí dî e bɨ̌n ó: “Bɨ̌n sá mpʉ́nʉ̌ ɨ́ yé ɛ́?” nó, bɨ̌n e yálá e né ó: “Ebě, Dâ, nye lɨ́ egwɨ̂m yê.” Nyé okpâhwǎ lómlo yé kâʼ báánâ.»

⁴Nó ó bé á tô, nzě tó kœbɔɔ mâ kamntʉl tyeelá kʉ̌l lɨ́ ebê ɨ́ nkpâh nkpǎʼ. Bé ntɔ̂ʼ tii yê.

⁵Bʉ́ʉ́ bʉ̂r o bé á kœb tɨ̂ʼ bá, bê nzě dî bé metíá ó: «Bɨ̌n bé lɨ́ esâ yé? Bɨ̌n bé lɨ́ etii mâ kamntʉ̌l nɨ̌ ɨ́ yé?»

⁶Bé ntɔ̂ʼ yala e bé mpʉ̌ Yésʉs á lɛ́ɛ bé yɨ́, bʉr baá ntɔ̂ʼ bîr bé ó, bé tôʼ e yê.

⁷Bé ntɔ̂ʼ tô e mâ kamntʉl kwá mé Yésʉs. Bê nzě kɛl yé mikán myɔ́ɔ́ ɨ́ koo, Yésʉs ntɔ̂ʼ di kʉ́ tɨ̂.

⁸Bʉr ɨ́ buo buo nzě jan míkán myɔ́ɔ́ nkpǎʼ e nkpǎʼ. Bâʼ janɔɔ mémpúho bílɨ́ bé á to le ebúʼo ɨ́ bipemé má.

⁹Bʉr o b'á be nye dóló, le baá bé á dû nye píhe bá, bé á be lɨ́ ebʉ̂ bítím. Bé á lɨlɛ́ɛ ó: «Dwéʼ gá nye kûm. Mɨná gúmlaa gá waá dí enze ɨ́ díé mé Dâ nyá.

¹⁰Mɨná gúmlaa gá Mpóʼo ngá tyélɔɔ, nyaá Sɔ́ŋ mpám gá wɨ́ná, David á boo bono nyɨ́. Bʉr o dí ɨ́ jʉ́o kʉ́ bá, bé dwêʼ nye kûm.»

¹¹Yésʉs nzě pyâl ɨ́ Yerʉ́zalɛm, ntɔ̂ʼ tó nî mpáh Nzyɛ̌m. Jɔʼ nyé á sil edwɛ̂ʼ ɨ́ mempah mɨ́mɛ̂h yɨ́, nye ntɔ̂ʼ tô kʉ̌l, tô Bétanî, bé le ompʉ́n bé kám le obá, ebě, yé á be ó, yé mû páʼ bíí kʉ̌ʼ.

¹²Ɨ́ mɛ́n tɨ̂, ɨ́ jɔʼ bé á nkɛ́ɛ Bétanî yɨ́, Yésʉs á be ó, nye mû lɨ́ ejóʼo nzâ.

¹³Mpʉ nyé á tyɛ̂b lɨ́ ejaa, beě lɨ́ figyê e biká yɨ́, nye nzě tó dwɛ̂ʼ nkʉ̂ nye óbɛ̌m kœb mpúmó tɨ̂. Jɔʼ nyé á ka kumo lɨ́ enzuʼ é lɨ́ yɨ́, nye á jaa kœb ó, njɨ biká e biká, ebě, yé á bé abě jɔ̌ʼ nkónó ófigyê.

¹⁴Nó ó Yésʉs á nze lɛ́ɛ e lɨ́ figyê ó: «Mʉr, nye ákǎ báʼǎ de mpúmó nyǒ lʉ́ʉ́ dʉ́o.» Ompʉ́n bé, bé á si jóʼo sá nyé á lɛ́ɛ yɨ́.

¹⁵Nó bé á pyâl ɨ́ Yerʉ́zalɛm, nzě nî mpáh Nzyɛ̌m. Yésʉs ntɔ̂ʼ so bʉ̂r o b'á be lɨ́ ebɛ́ma, le baá bé á be lɨ́ ebwâm bá. Nye ntɔ̂ʼ nkɛŋ ótéble o bʉ̂r o b'á sisyɛ́ɛla bimɔnɨ́ bá sí, lôʼlo bídiá bi bʉ̂r o b'á bɨbɛ́ma mepɨbaa bá.

¹⁶Nye á bé abá bîr ó, mʉr ntáŋaa epɛn e mpáh Nzyɛ̌m lɨ́ enkɛ́ɛ mímbeʼ.

¹⁷Nye ntɔ̂ʼ dwe bé milɛ́ʼlá. Nye ntɔ̂ʼ dî e bé ó: «Bé á bé así cɛma ó: “Mbɛ̌r wâm, wé óbe ó mbɛ̌r mínjɨʼla lɨ́ esú é bíkúl bíbyɛ̂h” ɛ̌? Nó bɨ̌n bɨɛ̌ dwir wé ó, ekul e bínzilngǎn.»

¹⁸Ojwɨ́ɨ o mpáh Nzyɛ̌m le olɛ̂ʼla o métié, ɨ́ mpʉ bé á jóʼo sá nyé á lɛ́ɛ yɨ́, bé ntɔ̂ʼ sáa ménzɨ̌ ó, bé jʉ́ ó nye. Bé á be yɨ́ɛ ó lɨ́ ekpɛ́ɛ nyê, ebě, entumo e bʉ̂r lɨ́lɛ̂h, lé á be ó lɨ́ ebuú kâm mbi mílɛ́ʼlá nyé á dwe mí.

¹⁹Jɔʼ dʉ́ó lé á léŋa yɨ́, Yésʉs le ompʉ́n bé nzě duhǒ nkana.

²⁰Ɨ́ dwiné mɛ́n ntuʼkolo, ɨ́ jɔʼ bé á laǎ gúmo yaá yɨ́, bé á ka kœb ó, lɨ́ figyê yaá, yé mû sí dwɛ̂hla, táare ɨ́ mikaalé, tó pyâl ɨ́ biká.

²¹Pétrus nzě símsǎ sá Yésʉs á lɛ́ɛ yɨ́. Nye e Yésʉs ó: «Lɛ̂ʼla, paá bee: lɨ́ figyê gó á syɛm yɨ́, yɨ́ bánǎ dwɛ̂hla!»

²²Yésʉs ntɔ̂ʼ lɛ́ɛ e bé ó: «Dyɛ́ʼwáá gá e Nzyɛ̌m!

²³Mě lɛ́ɛ́ bɨ́n lɨ́ otyeetye ó, mʉ̂r ólɛ́ɛ le ecwɨ́ʼ lɨ̂ʼ ó: “Mɔaa náǎ. Tó nkaŋa ɨ́ mâŋ” nó, lé ósâ nó, ɨ́ lɔ̌b búʼó yé. Mʉ̂r waá óbe, asóŋlo ɨ́ nye mʉr tɨ̂, jaá bûʼlǎ sɔ̂ʼ ó, njɨ lɔ́ɔ́ wé, wé ódira nó, wé ókʉ́ bánǎ dirǎ tyeetye.

²⁴Sâ yaá ó mé dí elɛ́ɛ bɨ́n ó, sá yɨ́yɛ̂h bɨ́n dí edî le minjɨʼla mín bûʼláá gá ó, bɨ̌n bɨ́ bi yê. Yé ódweŋɔɔ bɨ́n.

²⁵Bɨ́n ótyɛ̂b mítîtyěl lɨ́ esâ mínjɨʼla, bɨ́n e bʉr dína e lɔ̌b nó, sáʼ gá ó, bɨ̌n nyɛ́ɛ pɛʼ bíbaa bí ébébe bɨ́n á niʼe bé bí. Nó ó Sɔ́ŋ wɨ́n dí ɨ́ jʉ́o kʉ́ nyá ngá pɛʼ ntémé bibaa bí ébébe nyé á niʼe bɨ̌n bí. [

²⁶Bɨ́n sí kʉ́ láa bíbaa bí ébébe bɨ́n bé á niʼe bʉr nɛ́ʼɛ, Sɔ́ŋ wɨ́n dí ɨ́ jʉ́o kʉ́ nyá, nye ntémé óláa bíbaa nyé á niʼe bɨ̌n ɨ́ misyóm mín bí.]»

²⁷Bé ntɔ̂ʼ báʼǎ tô Yerʉ́zalɛm. Jɔʼ nyé á to le etye tʉ́ŋlʉ̌ mpáh Nzyɛ̌m yɨ́, ojwɨ́ɨ o tɨ̂, le olɛ̂ʼla o métié, le otɔ́má bʉ̂r o b'Ɨ́zraɛ̂l, bê nzě tô gúmó nyé á be yɨ́.

²⁸Bé e né ó: «Nzé á lómo go ó, go sâʼ mbi bísyɛ́ɛla gó dí esâ bî? Go ntémé pʉgʉ́ sâ byé e nkul jwɨ́ɨ mé nzé?»

²⁹Nó ó Yésʉs á yala e bé ó: «Me múo nzě dî bɨ́n njɨ tíá mpwár. Bɨ́n sí kʉ́ gwá yala nó, ɨ́ jɔʼ yaá ó mé ngá twóolo bɨ́n díé é mʉ̂r dí edwe mé nkul ó, me sâʼ bisyɛ́ɛla bínɨ̌ nyá yɨ́.

³⁰Nzé á pʉgʉ dwe Yʉánɛs nkul ó, nye tôʼ le edu bʉ̂r: nzê Nzyɛ̌m, nzê bʉr? Yalaa gá me!»

³¹Nó ó bé á nze timle tíá nyé páʼ nyɔ́ɔ́. Bé ó: «Mɨ́ná yálá gá ó: “Nzyɛ̌m ó b'á lómo nye” nó, nye óbáʼǎ dî ó: “Á bɨ̌n bɨɛ bé á bé abûʼla nyé ɨ́ yé ɛ́?”

³²Mɨ́ná yálá gá ó: “Bʉr ó b'á lómo nye” nó,...» (Bé á be ó lɨ́ ekpɛ́ɛ mínzɨnzɨ mi bʉ̂r, ebě, bʉr bɨ́bɛ̂h, bé á be ɨ́ kʉ́ gʉ́a ó, Yʉánɛs á be ó ngwíha milɔ̌b mé Nzyɛ̌m.)

³³Bé ntɔ̂ʼ yala e Yésʉs, lɨ́ elɛ́ɛ e né ó: «Bɨ̌h bé agʉ́a.» Yésʉs, nye e bé ó: «Yé bé nó wá, me ntémé, me ákóʼó lɛ́ɛ bɨ́n mʉr dí edwe mé nkul ó, me sâʼ bisyɛ́ɛla bínɨ̌ nyá.»