Read Koonzime Marc 12 Bible Online

Marc 12 - Koonzime bible

Marc 12

¹Nó ó Yésʉs á nze lwib e bé ɨ́ nzɨ̌ bikɨkɛna. Nye ó: «Mʉr á be ó, nzě lî pemé óraisin, ntɔ̂ʼ sumǒ kôʼ lɨ́ ekɛ̌b pemé yaá ɨ́ nká, pû bɨ́, súm émân mpúmó tɨ̂, sumǒ tólóm mbɛ̌r édwéelě pemé yaá. Píe tɨ̂, nzě líʼe bílóbila e yê, ó byé jɨjana nye yǎ ɨ swɨɨ ekpɛm. Pie tɨ, nye nzě ja nzɨ́, tô ɨ́ tyen.

²Jɔ̌ʼ swɨɨ ékpɛm, yé á pyâl yɨ́, nye nzě jébe syɛ̂l mesâ wé, nzě lómo nyé kwá bilóbila byaa, ó nye tôʼ nʉa nyé nyé nkɔ̂b mpumó á gúmo ɨ́ pemé yé nyɨ́.

³Bilóbila byaá mɛ̂r mʉ̂r milʉ́mlʉ́ waá, bíŋɔɔ nyê, nzě bwóolɔɔ nyé mebô e mebô.

⁴Nó ó mʉ̂r pemé á baʼa lómo nyʉ́ʉ́ syɛ̂l mesâ wé. Byê nzě bʉ̂ nyɨ́haá pɨ́ɨ́ ɨ́ lʉ̂, le esáŋɔɔ nyé bisá bí ésɔ́m.

⁵Nó ó mʉ̂r pemé á baʼa lómo mʉr lɛ̂l. Nyɨ́haá nzě jʉ́ŋɔɔ̌ jʉ́ʼóo. Mbǐ syɛ́ɛla gwár yaá ó byé á sâ bʉ́ʉ́ bʉ̂r oswîh bɨ́bɛ̂h mʉ̂r pemé á lʉlómo bá yɨ́. Bíŋɔɔ bâ; jʉ́ŋɔɔ bʉ́ʉ́.

⁶Nó mʉr ngwár e ngwár mʉ̂r pemé á ka lîʼ e né nyá, á be ó njɨ mwân wé, nyé á be ɨ́ buú kpɛl nyá. Nó nyé á suʼla ka lómo mwân wé waá kwá bilóbila byaá. Nye ó: “Bilóbila byâm, byé ódwáawo yɨ́ɛ mwân wǎm.”

⁷Nó bílóbila byaá, byé á nze lɛ́ɛla páʼ nyɔ́ɔ́ ó: “Beyɨɨ gá, medilá me kúm pemé ó mâ! Ntáʼ gâ, mɨná jʉ́ʼoo gá nye. Bilíʼé byé, byé nkʉ̂ sûʼla byaá gá bíná.”

⁸Nó ó byé á nze mɛ̂r nye, jʉ́ŋɔɔ nyê, ntɔ̂ʼ guhɔɔ̌ múú wé mpómo pemé.

⁹«Á nó bɨ̌n bɨɛ̌ bee ó, kúm pemé ósâ nyá? Mɛ̌m bee ó, nye ónzě jʉ̂ bílóbila byaá, nzě pɛ̂h bʉ̂r oswîh, nzě kǎ tímle bé pemé yaá.

¹⁰Bɨ̌n bé á bé así láǎ sá dí cɛmá yɨ́, ó: “Ekóʼ óswim ó mbɛ̌r bé á bene lɨ́, lé ó b'á ka sûʼla ekóʼ e dí esúʼo médwii me sɔ́ŋ lɨ́.

¹¹Yé á syɛ́ɛ nó ó ɨ́ nkul mé Nzyɛ̌m. Yé ó sá mɨ́ná dí ekâm gá yɨ́!”?»

¹²Nó ó bé ntɔ̂ʼ táare ésáa ménzɨ̌ mé émɛ̂r Yésʉs, ebě, bé á si kʉ gʉ́a ó, nye á lwib ɨ́ nzɨ̌ bikɨkɛna byaá ó, dumo e bê. Sâ gwár, bé á be ó lɨ́ ekpɛ́ɛ éntumo e bʉ̂r. Bê nzě líʼe nyê, ntɔ̂ʼ tô.

¹³Nó ó bé á nze lómo bʉ́ʉ́ óFarizyɛ̂n le bʉ́ʉ́ bʉ̂r ó sɔ́má mé Erôd kwá mé Yésʉs, lɨ́ esâ ó, bé tôʼ lâm nyé lâm dí ó, bé nkʉ̂ mɛ̂r nyé ɨ́ lɔ̌b yalá yé.

¹⁴Nó ó bé á nze lɛ́ɛ e né ó: «Lɛ̂ʼla, bɨ̌h bé lɨ́ egʉ́a ó, gǒ lɛ́ɛ́ ó otyeetye. Go ntémé, gó akpɛ́ɛ mʉ̂r, ebě, gó abe lɨ́ edwáawo bʉ̂r mempǒm. Go lɨ́ elɛ̂ʼlě kʉ̌ tyěn Nzyɛ̌m dí ekpɛl ó, bʉr dúʼoo wɨ́. Nó, lɛ́yɨ́ɨ́ bɨ́h: nzê metié gá mɨ́ná, mé kam ó, mɨná jánaa gá Kɛ́ɛza tœ́a ɛ̌? Nzê yê mpéné ó, mʉ̌r sá ajána nyé yǎ ɛ̌? Nzê yé jɨ ó, mɨná jánaa gá? Nzê mɨná bé ajala le ejána ɛ̌?»

¹⁵Yésʉs á be ó lɨ́ egʉ́ǎ njɔ́ŋ wɔ́ɔ́. Nó nyé á lɛ́ɛ e bé ó: «Bɨ̌n bá bóblo mé mpʉ́nʉ̌ ɨ́ yé? Ntáʼ gá me e nzǎŋ mɔnɨ́, me béyɨɨ wê!»

¹⁶Nó ó bé á nze e nzǎŋ mɔnɨ́ ngwár. Yésʉs ntɔ̂ʼ dî e bé ó: «Mveʼle mpóm mé nzé le díé mé nzé dí lúlá ɨ́ nzaŋ wɨ̂?» Bé e né ó: «Byaá mé Kɛ́ɛza.»

¹⁷Nó ó Yésʉs á nze lɛ́ɛ e bé ó: «Bwóóláá gá bé Kɛ́ɛza bisá mé Kɛ́ɛza, le Nzyɛ̌m, bisá mé Nzyɛ̌m.» Nó bé á be ɨ́ buú kâm yalá yé yaá.

¹⁸Nó oSadwisyɛ̂n, (bʉr o dí elɛ́ɛ ó, odwe, bé ákóʼó pah ɨ́ mesoo bá), bé á si nze kwá mé Yésʉs. Bé á nze dî nye metíá ó, mbi wɨ̂:

¹⁹«Lɛ̂ʼla, Moyɨ̂z á si tyêl mɨná gá etié lɨ̂. Yê cɛmá ó: “Mbɛ́á mʉ̂r óbe, sí dwe, alíʼe mwân nó, yé jala ó, mɨ́ɔɔ́ wé, nye bâʼ mʉmá wé, bé e mʉmá waá nkʉ̂ byâ bwân lɨ́ esú é mɨ́ɔɔ́.”

²⁰Tó kœb ó, bʉ́ʉ́ bʉ̂r, bé á byɛ̂l ó, nzaangbá, bʉrʉ̂m e bʉrʉ̂m. Medwéʼe nzě bâ mʉ́má. Di ɨ́ di di di, nye nzě dwe, alíʼe mwân sí.

²¹Waá á bɔma nye nyá, nzě bâ kúhó tʉ́l á líʼe wɨ́, nye ntémé dwe, alíʼe mwân sí. Waá lɛ̂l ntémé sâ nó.

²²Tó pyâl ó, bɨ́bɛ̂h, nzaangbá, bé á si dwe, alíʼe mwân. Jɔʼ bé á be, bé mû sí dwe yɨ́, mʉmá waá ntémé nzě dwe.

²³Nó dʉ́ó bʉ̂r ngá pah ɨ́ mesoo yɨ́, nzé ósûʼla e mʉmá waá ɛ̌? Ebě, bɨ́bɛ̂h nzaangbá á si bâ nye.»

²⁴Yésʉs nzě yala e bé ó: «Bɨ̌n bê sí bɔ́ʼa le otyeetye, ebě, bɨ̌n bé agʉ́a Mékaná mé Nzyɛ̌m. Bɨ̌n ntémé, bé agʉ́a nkûl nyé.

²⁵Sá bɨ́n jálá le egʉ́a yɨ́, yé ó, ɨ́ jɔʼ bʉ̂r, bé óbe, sí pah ɨ́ mesoo yɨ́, bʉbá e bʉrʉ̂m, bé ákóʼó kǎ bɛ́a. Bé ójaá di ó mpʉ bééngeles dí ɨ́ jʉ́o kʉ́ yɨ́.

²⁶Bɨ́n dí mé tíá ɨ́ nkǒ páʼ ódwe, le mpʉ bé ópah yɨ́ nó, bɨ̌n e gʉ́á ó, ntʉ ódwe dí edwě Nzyɛ̌m kûm. Nzê bɨ̌n á bé aláa sá Moyɨ̂z á cɛma ɨ́ lɔ̌b njʉl nyé á kœb lɨ́ edúo ɨ́ kpâʼ tʉ́ŋlʉ̌ wɨ́? Yê cɛmá ɨ́ Mekaná mé Nzyɛ̌m ó: Me ó Nzyɛ̌m, waá Abraham, Isaac, ndu e Yákɔb dí edwe kûm nyɔ́ɔ́ nyá.

²⁷Nzyɛ̌m, nyé abe waá odwe. Nye ó Nzyɛ̌m mikublakúbla mi bʉ̂r. Bɨ̌n bê sí buú bɔ́ʼa le otyeetye ɨ́ buo buo!»

²⁸Nyʉ́ʉ́ lɛ̂ʼla metié á be ó náǎ lɨ́ ejóʼǒ mpʉ bé á be lɨ́ epére mekǎn, bé e boo nɔ́ɔ́ yɨ́. Nye ntɔ̂ʼ bee ó, Yésʉs á si gʉ́a eyala. Nye ntɔ̂ʼ dî e né ó: «Ɨ́ sɔ́má métié gá mɨ́ná mɨ́mɛ̂h, láa étié dí elaa mʉ́ʉ́ mɨ́mɛ̂h ɨ́ medile?»

²⁹Nó ó Yésʉs á nze yala e né ó: «Etié e dí elaa métié mɨ́mɛ̂h ɨ́ medile lɨ́, lé ó: “Bʉr o b'Ɨ́zraɛ̂l, gwá jôʼlo! Dâ, dí Nzyɛ̌m gá wɨ́ná nyá, nye ó njɨ ngwár.

³⁰Kpɛlɨ́ɨ́ Dâ, dí Nzyɛ̌m gǒ nyá, le lémé gó wɨ́wɛ̂h, le sísǐm gô wɨ́wɛ̂h, le nkul nyǒ nyɨnyɛ̂h.”»

³¹Yésʉs ntɔ̂ʼ lɛ́ɛ ó: «Etié embá, lé ó: “Kpɛlɨɨ mɨ́ɔɔ́ gǒ mʉr mpʉ gó kpɛ́l gó mʉr tɨ̂ʼ yɨ́.” Yé abe e lʉ́ʉ́ étié e dí entaa mɨ́nɨ̌.»

³²Nó lɛ̂ʼla metié á lɛ́ɛ e né ó: «Yé ɨ́ mbɨa! Sá gó dí elɛ́ɛ yɨ́, yé kʉ́ be ó tyeetye. Dâ Nzyɛ̌m gá wɨ́ná ó dí Nzyɛ̌m nye omér. Yé abe e nyʉ́ʉ́ Nzyɛ̌m swîh píe nye.

³³Mʉr, nye ɨ́ jala le ekpɛl nyé e lémé wé wɨ́wɛ̂h, e pɨʼ nyé nyɨnyɛ̂h, le nkul nyé nyɨnyɛ̂h. Nye ɨ́ jala le ekpɛl ntémé mɨ́ɔɔ́ wé mʉr mpʉ nyé kpɛ́l nyé mʉr tɨ̂ʼ yɨ́. Syɛ́ɛla yaá, yé ɨ́ mbɨa, laǎ bím ótír le bisá bíbyɛ̂h bʉ̂r dí e nkul edîʼ, lɨ́ edwě Nzyɛ̌m kûm e tɨ̂ʼ bí.»

³⁴Mpʉ̌ Yésʉs á bee ó, nye á si kʉ gʉ́a eyala tíá nyé yɨ́, nye ntɔ̂ʼ lɛ́ɛ ó: «Yé akǎ buú cɛra e go ó, go níʼee ɨ́ Mpóʼo mé Nzyɛ̌m.» Píe tɨ̂, mʉr á bé akǎ dûhwo édî nyé tíá.

³⁵Nó jɔ̌ʼ Yésʉs á be lɨ́ edwe bʉ̂r milɛ́ʼlá ɨ́ mpáh Nzyɛ̌m yɨ́, nye nzě dî tíá nyɨ̂: «Wáǎ mbi ólɛ̂ʼla o métié dí e nkul elɛ́ɛ ó: “Mʉ̌r Nzyɛ̌m á lœm múló mé jwɨ́ɨ nyá, nye ó Mwân mé David” yɨ́ ɛ́?

³⁶Ebě, David mʉr tɨ̂, e nzɨ̌ Sísǐm mé Nzyɛ̌m, á si kʉ lɛ́ɛ ó: ‘Dâ Nzyɛ̌m á lɛ́ɛ e Tî wǎm ó: Diʼee sí wâ, ɨ́ páʼ mbó éjʉ́m wâm. Go e bónó ɨ́ puuu náǎ, tó pyâl ɨ́ jɔʼ mé ósâ óntɨ̂m le obɨn bô ó, bé díʼee sí mebo mô yɨ́.’”

³⁷«David nyɨɛ á jébe nye ó: “Tî wǎm”. Á bɨ̌n bɨɛ̌ kǎ lɛ́ɛ ó, Mʉ̌r Nzyɛm á lœm múlo nyá, nye ó “Mwân mé David”[2] e nyáa nzɨ́?» Entumo e bʉ̂r, lé á be ó lɨ́ esoho lɨ́ ejóʼǒ lwǐb mé Yésʉs.

³⁸Nye á lɨlɛ́ɛ le bʉr o nyé á lɨlɛ̂ʼle bá ó: «Gwá baʼ gá olɛ̂ʼla o métié. Bé kpɛl étô le ejɨ́ǎ kʉ̌l ó, bé osí bwâr bídur ɨ́ jaa jaa, bʉr nkʉ̂ soho bé, le edwe bé kûm ɨ́ gúmó bʉ̂r dí eswâl yɨ́.

³⁹Bé kpɛl édi ntémé ó ɨ́ bidiá bí ésôʼ ɨ́ mempáh mínjɨʼla. Ɨ́ jɔʼ bé tó ɨ́ menzɔɔ yɨ́, bé kpɛl édi ó ɨ́ bidiá bi dí ɨ́ buú mbɨa bí.

⁴⁰Bé ó dí edɛn míkúho sá yɨ́yɛ̂h myé dí e yé yɨ́, le esâ mínjɨʼla ɨ́ jaa jaa, yé nkʉ̂ lɛ́ɔɔ ó, bé ɨ́ buú mbɨa bʉ̂r. Bé ó ngá bɔma e tíʼá mílɔ̌b dí ɨ́ buú nyan wɨ́.»

⁴¹Nó ó Yésʉs á to di ndîndǐl siesíe súm bʉ̂r, bé á gbɨgbâ tœ́a ɨ́ mpáh Nzyɛ̌m yɨ́. Nye á be ó lɨ́ ebeě mpʉ bʉ̂r, bé á gbɨgbâ mɔnɨ́ yɔ́ɔ́ ɨ́ mpɔra mindwéá yɨ́. Okúmá ó bʉ̂r, bé á be ó lɨ́ egbâ byé ɨ́ buo buo.

⁴²Nó ó gúú kúhó mʉ́má ndyêbndyéb, wé á nze, ntɔ̂ʼ gbâ mínzaŋ mimbá, tâŋ pára gwár.

⁴³Nó ó Yésʉs á nze jébe ompʉ́n bé. Nye ó: «Mě lɛ́ɛ́ bɨ́n lɨ́ otyeetye ó, ndyêbndyéb kúhó wɨ̂ʼ ô gbá mɔnɨ́ ɨ́ kǎr, laa bʉ̂r bɨ́bɛ̂h.

⁴⁴Ebě, bʉ́ʉ́ bʉ̂r bɨ́bɛ̂h, bê gbá ó, páʼ mɔnɨ́ dí abe e mpíh lɨ́ ekʉ̌m lɔ́ɔ́ yɨ́. Nyɨɛ, lɨ́ edyêb lé, nye gbá ó, bím yɨ́yɛ̂h nyê bé e yé yɨ́, bîm bé ó, nye tíʼaa e yé yɨ́.»