Read Koonzime Marc 13 Bible Online

Marc 13 - Koonzime bible

Marc 13

¹Á dwií Yésʉs mû lɨ́ eduho mpáh Nzyɛ̌m nɛ́ɛ: nyʉ́ʉ́ mpʉ́n wé nzě lɛ́ɛ e né ó: «Lɛ̂ʼla, paá beě mbi mékóʼ wɨ̂, le mbi súmó wɨ̂!»

²Nó ó Yésʉs á nze yala e né ó: «Jwɛ́ʼɛ́ɛ, ɨ́ nzumó nɨ́nɨ́ɨ́ nyɨ̂, ekóʼ, lé ákóʼó lîʼ kʉ́ lʉ́ʉ́ ékóʼ wâ. Mɨ́mɛ̂h, mé ólôʼlɔɔ sí.»

³Nó ó Yésʉs á nze di sí lɨ́ Ecwɨ́ʼ lé ólivier siesíe e mpáh Nzyɛ̌m. Pétrus, Jacques, Yʉánɛs, le André, bé ntɔ̂ʼ jébe nyé ɨ́ bʉm. Bé e né ó:

⁴«Lɛ́yɨ́ɨ́ bɨ́h jɔʼ bísá bîʼ ngá syɛ́ɛ yɨ́, le dweʼle ngá lɛ̂ʼle ó, byé múo nzě pyâl, bíbyɛ̂h yɨ́.»

⁵Nó ó Yésʉs á lɛ́ɛ e bé ó: «Diʼee gá mekʉá ɨ́ binyâ. Bɨ̌n ámû jaá dímlɔɔ.

⁶Ebě, bʉr ɨ́ buo buo, bé ónzɨnze e díé lâm, lɨ́ elɨlɛ́ɛ ó: “Mɛm ó dí nye.” Bé ókʉ́a bʉ̂r ɨ́ buo buo.

⁷Bɨ́n ójóʼo bʉ̂r lɨ́ elwilwib mílɔ̌b mi mɔ̂m le elɛ́ɛ mílɔ́ɔ́ mí dɔ̂m nó, bisɨ́ǎ byaá atɨ̂l bɨ́n mekʉ̌ sí, ebě, yé jala ó, byé nyɛ́ɛ pyâl. Damá jóʼo nó, ntʉ bísɨ́ǎ byaá ngá lɛ̂ʼle ésúʼlá é sí yɨ̂.

⁸Yɨ̂ʼ kúl bʉ̂r, yé ólwímla e yʉ́ʉ́. Nyâʼ njwɨ́ɨ lwímla e nyʉ́ʉ́. Sí, yé ókubla; nza, nye ónyaŋla bígúmo bígúmo. Bisá bî, byé ónyɛɛ́ syɛ́ɛ. Náǎ yé óbe ó enyɛ̌l e mékpaa, nwɨɨla e mekpaa me mín.

⁹«Nó, pɨrɨɨ gá mekʉ̌ sí. Bé ótô e bɨ̌n ɨ́ bʉ̌m nɨ́nɨ́ɨ́. Bé óŋmɛ̂h bɨ́n mingáhá ɨ́ mempáh mínjɨʼla. Bé ótô e bɨ̌n ɨ́ mempǒm me bʉ̂r onɨ́nɨ́ɨ́, le maá mé ójwɨ́ɨ ɨ́ lɔ̌b wâm, bɨ̌n nkʉ̂ boʼlǒ sá bɨ́n dí egʉ́a ɨ́ páʼ wâm yɨ́.

¹⁰Sá ésôʼ, yé jala ó, Mbɨambɨa Lɔ́ɔ nyɛ́ɛ túnɔɔ kwá bikúl bíbyɛ̂h.

¹¹Bé ótô e bɨ̌n ɨ́ mempáh mílɔ̌b nó, asyɛl gá bá ɨ́ sá bɨ́n ngá lwib dʉ́o laá yɨ́. Bɨ̌n bé ólwib ó, lwǐb ngá pyâl bɨ́n ó, bɨ̌n lwíbɨɨ ɨ́ tyé yaá yɨ́, ebě, ntʉ bɨ́n ngá lwib. Sísǐm mé Nzyɛ̌m ó ngá lwib.

¹²Mɨ́ɔɔ́ óbɛ́ma mɨ́ɔɔ́ wé ó, bé jʉ́ʼoo nye; sɔ́ŋ bɛ́ma mwân wé. Bwân, bé ógbɔba le obyɛ́l bɔ́ɔ́, jʉ̂ bê.

¹³Bʉr ó sí bɨ́bɛ̂h, bé óbene bɨ́n ɨ́ lɔ̌b díé lâm. Sâ gwár, mʉr ngá dûhwo, tó pyâl ɨ́ mesíé nyá, ótiʼe.»

¹⁴Nó ó Yésʉs á nze lɛ́ɛ e bé ó: «Bɨ̌n bé óbee mʉ̂r bé jɨ́jébé ó, “Mentuhlobʉr” nyá. Nye ódilɔɔ̌ gúmó nyé dí ajala le edi yɨ́. (Mʉr dí eláǎ lɔ̌b wɨ̂ʼ nyá, nye gwâ kʉ́ jóʼo wê.) Nó ɨ́ jɔʼ yaá, bʉr o ngá bě sí Yʉ́da bá, bé kpɛ́yɨɨ, tô nko mécwɨ̂ʼ!

¹⁵Mʉr ngá be kʉ́ mié nyá, nye ákǎ sulo, nî mbɛ̌r, lɨ́ etó nʉa yʉ́ʉ́ sɔ̂ʼ dí ɨ́ mbɛ̌r yɨ́.

¹⁶Waá ngá bě pemé nyá, akǎ búlǎ píhe lɨ́ etó nʉa kʉ̂r wé.

¹⁷Nkoó e baábubúm le baábyɛɛ́ ɨ́ melû maá!

¹⁸Jɨʼlaa gá e Nzyɛ̌m ó, bisɨ́nɨ̌ bínɨ̌, byé ayɨ́ pyâl ɨ́ jɔ̌ʼ kóló.

¹⁹Ebě, ɨ́ melû maá, mitúú e mindɛ̌l, myé óbuú buo. Táare ɨ́ jɔ̌ʼ Nzyɛ̌m á kuho kʉ́ e sí, nzě kumo ɨ́ báánâ, bʉr, bé apǎ sia e mitúú mbi waá. Gúú túú swîh, wé ákǎ báʼǎ laa míhaá.

²⁰Yé bé Dâ Nzyɛ̌m bé, atuŋlo mélû maá nó, lɛ́ɛ́, mʉr ákóʼó tiʼe. Sâ gwár, nyɨ́ tuŋlo mé ɨ́ lɔ̌b bʉ̂r o nyé á twâr bá.

²¹Mʉ̂r lɛ́ɛ́ e bɨ̌n ó: “Beyɨɨ gá, Mʉ̌r Nzyɛ̌m á lœm múló mé jwɨ́ɨ nyá ó dí wâʼ nyâ!” nkʉ̂ ntɔ̂ʼ ó: “Nye ó kâʼ!” nó, abûʼla gá mʉr waá.

²²Ebě, okrîst o bíbɛr, bé ópipyâl, bé le ogwíha o mílɔ̌b o bíbɛr. Bé ósâ mésimá le bisá bí ékâm, lɨ́ esáa ékʉ́a bʉ̂r ó Nzyɛ̌m á twâr bá, yé óbána bé nó.

²³Pɨrɨɨ gá mekʉ̌ sí. Me múo sí gwîh bɨ́n syɛ́ɛla yaá yɨ́yɛ̂h!»

²⁴«Sâ gwár, ɨ́ melû maá, mítúú mínɨ̌, myé óbe, sí laa nó, dʉ́o, lé odíme, álomó akǎ pan.

²⁵Ocwícwén, bé óduma, duho ɨ́ jʉ́o kʉ́. Bisá bí nkûl bínɨ́nɨ́ɨ́ bi dí ɨ́ jʉ́o kʉ́ bí, byé ólwɨ̂ʼlɨ.

²⁶Jɔʼ yaá ó bé ngá bee Mwân mé Mʉr mû lɨ́ enze ɨ́ bidwiné, témé nkǔl nɨ́nɨ́ɨ́ le mentyɛnwa mé Nzyɛ̌m.

²⁷Jɔʼ yaá ó nyé ngá lómo bééngeles ɨ́ medumo mé sí mɨ́mɛ̂h menâ, lɨ́ etó syɛŋ baá nyé á twâr bá, táare ɨ́ wɨ̂ʼ ódumo ó sí, tó pyâl ɨ́ gúú.»

²⁸«Jóʼláá gá lɛ́ʼlá figyê yé mʉr tɨ̂ʼ dí edwe wɨ́: jɔʼ mílɔ́ɔ́ mû sí dwánwo, biká mû lɨ́ enyɛl épâh yɨ́, bɨ̌n bé lɨ́ eboó gʉ́a ɨ́ jɔʼ yaá ó, nkóno, yé mû ó kúno epyâl.

²⁹Mpʉ yaá ntémé ó, jɔʼ bɨ́n óbee bísyɛ́ɛla byaá lɨ́ esyɛ́ɛ yɨ́, gʉ́ŋáá gá ó, Mwân mé Mʉr mû ó kúno epyâl, kwahaá lɨ́ ebê.

³⁰Mě lɛ́ɛ́ bɨ́n lɨ́ otyeetye ó, mpeʼ bʉ̂r yɨ̂ʼ l'asíe, bisyɛ́ɛla bî, byé ópyâl, bíbyɛ̂h.

³¹Kʉ́ e sí, byé ólaa. Milɔ̌b myâm míɛ, myé ákóʼó síe.

³²«Sâ gwár, mʉr, nyé agʉ́ǎ móhó nkʉ̂ ewala laá. Damá jóʼo bééngeles ɨ́ jʉ́o kʉ́, damá jóʼo Mwân mé Mʉr, njɨ Nzyɛ̌m Sɔ́ŋ nye omér.

³³Bɨ̌n a bâʼ! Atô gá ɨ́ jô, ebě, bɨ̌n bé agʉ́ǎ jɔʼ yaá.

³⁴Ebě, yé ónwɨɨla ó mpʉ mʉ̂r dí etô ɨ́ tyen, líʼě mbɛ̌r wé, kab ósyɛ̂l o mésá bé bisyɛ́ɛ́ byɔ́ɔ́, mʉr nyɨnyɛ̂h e yé sá ésâ, nzě lɛ́ɛ ndwéela ebê ó, nye díʼee ɨ́ doho yɨ́.

³⁵Nó, diʼee gá ɨ́ mpʉ̂n, ebě, bɨ̌n bé agʉ́ǎ jɔʼ mʉ̂r mbɛ̌r ngá pyâl yɨ́, nkʉ̂ ɨ́ bíí kʉ̌ʼ, nkʉ̂ témé pum, nkʉ̂ ɨ́ kúo esôʼ, nkʉ̂ ɨ́ melɔ́ma mé mɛ́n.

³⁶Baʼaa gâ! Nye ámû jaá pyâl bɨ́n metwɨrâ, kœb bɨ́n ɨ́ bijô.

³⁷Sá mé dí elɛ́ɛ bɨ́n yɨ̂, mě lɛ́ɛ́ yé ó, lɨ́ esú é mʉ̂r nyɨnyɛ̂h: diʼee gá ɨ́ mpʉ̂n.»