Read Koonzime Marc 15 Bible Online

Marc 15 - Koonzime bible

Marc 15

¹Ɨ́ dwiné mɛ́n, ojwɨ́ɨ o mpáh Nzyɛ̌m, otɔ́má bʉ̂r o b'Ɨ́zraɛ̂l, olɛ̂ʼla o métié, le bʉ́ʉ́ bʉ̂r ó bʉ̌m nɨ́nɨ́ɨ́, bê nzě sáŋɔɔ pɨ̂ʼ, dumo e Yésʉs. Jɔʼ bé á be, bé mû sí kâʼ Yésʉs menkara yɨ́, bê nzě tô e né, tó tímlɔɔ nyé Pilátos.

²Nó ó Pilátos á dî e né ó: «Go ó dí njwɨ́ɨ oYúden ɨ́?» Yésʉs nzě yala e né ó: «Yé ó gó dí sí lɛ́ɛ̌ nɨ̌.»

³Ojwɨ́ɨ o mpáh Nzyɛ̌m nzě laʼ nyé milɔ̌b ɨ́ buo buo.

⁴Nó ó Pilátos á nze baʼa dî e né ó: «Nzê gó abá yala ɛ̌? Paá beě bím mílɔ̌b bé dí epur gó mí?»

⁵Yésʉs á bé akǎ yala ékǎn. Pilátos nzě buú kâm sâ yaá.

⁶Nó yé á bɨbe ó, ɨ́ jɔʼ yɨ́yɛ̂h nzɔ́ɔ nyaá, nyé á pipyâl yɨ́, Pilátos á bɨbe ó lɨ́ ebibîr bé mbʉʼ ngwár, waá bʉ̂r, bé á gwɨgwɨ̂m ó, nye bírɨɨ wɨ́.

⁷Gúú mbʉʼ, wé á be e díe ó, Barábas. Bé e bʉr o b'á sâ bintʉ̌ bá, bé á be ó mimbʉʼ. Bé á si jʉ̂ mʉr ɨ́ jɔʼ bé á gbɔba e bʉr ó Rôm yɨ́.

⁸Nó ó éntumo e bʉ̂r, lé á to dî e Pilátos ó, nye dwêʼ bé sá nyé á boo dwidwe bé ɨ́ mbi nzɔ́ɔ nyaá yɨ́.

⁹Pilátos nzě yala e bé ó: «Nzê bɨ̌n gwɨ́m ó, me bírɨɨ bɨ̌n njwɨ́ɨ oYúden ɛ̌?»

¹⁰Nye á lwib nó ó, ebě, nye á si bee ó, ojwɨ́ɨ o mpáh Nzyɛ̌m, bé á jaa pur Yésʉs ó, njɨ ɨ́ lɔ̌b nzwíí.

¹¹Nó ójwɨ́ɨ o mpáh Nzyɛ̌m á bêhle entumo e bʉ̂r ó, lé díʼee ó, nye bírɨɨ bé mʉr, njɨ Barábas.

¹²Pilátos ntɔ̂ʼ báʼǎ dî. Nye ó: «Á nó, waá bɨ́n jɨ́jébé ó, “Njwɨ́ɨ oYúden” nyá, me sâʼ nye nyá?»

¹³Bé ntɔ̂ʼ báʼǎ bʉ̂ bítím, lɛ́ɔɔ kʉ́kʉ́ ó: «Tyelɨɨ nyé ɨ́ kolôs kʉ́!»

¹⁴Pilátos ntɔ̂ʼ dî e bé ó: «Nye sá yáǎ sá ébébe?» Bé ntɔ̂ʼ báʼǎ kʉ́ bʉ́ŋɔɔ bítím kʉ́kʉ́, lɛ́ɔɔ ó: «Tyelɨɨ nyé ɨ́ kolôs kʉ́!»

¹⁵Mpʉ̌ Pilátos á tíʼe ɨ́ lémé wé ó, nyě koló ó entumo e bʉ̂r yɨ́, nye nzě bîr bé Barábas le elómo bʉ̂r ó, bé ŋmɛ́hɛɛ Yésʉs mingáhá. Nye ntɔ̂ʼ tímle bé nyǎ, ó bé tôʼ bomlo nyé ɨ́ kolôs kʉ́.

¹⁶Bisója nzě tóŋɔɔ e Yésʉs témé ebɛhɛɛ mé Pilátos, ntɔ̂ʼ jébě sɔ́má bísója yɨ́yɛ̂h.

¹⁷Nó ó bé á nze bôr nye kán kaá e kaá, bê nzě dil nyé káráá dúu, pená le mindwínɨ́nɨ́, ɨ́ lʉ̂.

¹⁸Bê nzě táare ésoho nyê. Bé e né ó: «Njwɨ́ɨ oYúden, bɨ̌h bé lɨ́ ebâʼ e go.»

¹⁹Bé ntɔ̂ʼ ŋmɛ̂h nyé e péh sʉŋ ɨ́ lʉ̂, syɛɛ nyé metyéelé ɨ́ mîh, le ebɨʼ mébóó sí mpʉ̌ sá lɛ́ɛ́, bé dwé ó nye kûm.

²⁰Jɔʼ bé á be, bé mû sí pya nyé yɨ́, bê nzě pɛʼ nyé kán kaá e kaá, nzě bôr nyé mikán myé, nzě tô e né ó, nye tó bomlɔɔ ɨ́ kolôs kʉ́.

²¹Bé ntɔ̂ʼ mɛ̂r nyʉ́ʉ́ mʉ̂r e nkul ó, nye nkɛ́yɨɨ kolôs mé Yésʉs. Mʉr waá á be ó lɨ́ ebúlǎ pemé. Díé lé, lé á be ó, Simon, mʉr Sirénia, sɔ́ŋ mé Alexandre, bé e Rufûs.

²²Nó ó bé á tô e Yésʉs ɨ́ gúmó dí ejébɔɔ ó, “Golgotâ” yɨ́. Díe laá, lé páʼlɔ́ɔ́ ó, “Gúmó Bʉ̌n Lʉ̂.”

²³Bé á be ɨ́ gwá dwe nyé menyoʼ púhlá e mǐr lɨ́ esul mékpaa, ó nye dêʼ. Sâ gwár, nye á bé ade.

²⁴Bé ntɔ̂ʼ bomlo nyé e binzâŋ, bɨ́nɔɔ nyé ɨ́ kolôs kʉ́, nzě kabla míkán myé, doŋɔɔ myé ebya, bé nkʉ̂ gʉ́a nkɔ̂b mʉ̂r nyɨnyɛ̂h ɨ́ sɔ́má yɔ́ɔ́ ngá nʉa nyɨ́.

²⁵Yé á be ó, yé mû mewala ebǔ mé mɛ́n ɨ́ jɔʼ bé á bomlo nye ɨ́ kolôs kʉ́ yɨ́.

²⁶Ebɔ́m lé á be e micɛmá lɨ́, lé á si elɛ̂ʼle mebě nyé á búra e mé má. Lé á be cɛmá ó: Njwɨ́ɨ oYúden.

²⁷Bé á bomlo nye ɨ́ kolôs kʉ́ ó e binzilngǎn bibá, yɨ̂ʼ ɨ́ páʼ mbó éjʉ́m wé; yʉ́ʉ́ ɨ́ páʼ mbó émyɛ̌l.

²⁸

²⁹Bʉr o b'á lɨlaa tɨ̂ʼ bá, bé á be ó lɨ́ elwɨ́ɨ nyê, le esiʼre mílʉ̂, le elɛ́ɛ ó: «Á go náǎ e, wɛɛ! Gua mʉr á lɛ́ɛ ó, go ógbɛ́ɛ mpáh Nzyɛ̌m, ntɔ̂ʼ báʼǎ sumo nyé tâŋ melú mélɛ̂l nyá!

³⁰Tiʼɨɨ gó mʉr tɨ̂. Go e súló ɨ́ kolôs nɨ̌ sí!»

³¹Ojwɨ́ɨ o mpáh Nzyɛ̌m le olɛ̂ʼla o métié, bé á be ntémé ó, lɨ́ epya nyê, le elɛ́ɛla páʼ nyɔ́ɔ́ ó: «Nye á si kʉ tiʼ bʉ́ʉ́ bʉ̂r oswîh. Nó nyé akoʼo étiʼ nyé mʉr tɨ̂.

³²Krîst, Njwɨ́ɨ Ɨ́zraɛ̂l! Kaá sulo sí ɨ́ báánâ, bɨ̌h nkʉ̂ kǎ bee, le edyɛ̂ʼwo e go.» Bʉr o bé e boo nɔ́ɔ́ bé á be mimbwɨmlá ɨ́ bikolôs kʉ́ bá, bé á be ntémé ó, lɨ́ epya nyê.

³³Jɔ̌ʼ témé móhó á pyâl yɨ́, edúrʉ́ʉ́ ntɔ̂ʼ sula ɨ́ sí yɨ́yɛ̂h ntinɨ̂, tó pyâl ɨ́ mewala melɛ̂l mé bíí kʉ̌ʼ.

³⁴Lɨ́ mewala melɛ̂l maá, Yésʉs nzě bʉ̂ bítím, lɨ́ elɛ́ɛ ó: «Eloyɨ̂, Eloyɨ̂, lama sabaktáni?» (Nó yé lɨ́ elɛ́ɛ ó: «Nzyɛ̌m wǎm, Nzyɛ̌m wǎm, go ka myah mé ɨ́ yé ɛ́?»)

³⁵Bʉ́ʉ́ bʉ̂r o b'á be tɨ̂ʼ bá, ɨ́ mpʉ bé á jóʼo mpʉ nyé á tíme yɨ́, bé ó: «Jóʼáá gá, nye mû ó lɨ́ ejébě Elie.»

³⁶Nyʉ́ʉ́ mʉ̂r ɨ́ sɔ́má yɔ́ɔ́ nzě tô kám, tó dubo éponge ɨ́ kɛ̌ʼla ményoʼ, nzě pɛn lé ɨ́ péh sʉŋ, ntɔ̂ʼ tyen nyé lǎ ó, nye dúʼoo. Nye e né ó: «Bónáá gâ. Mɨná páa bee gá yɨ́nɨ̌, nkʉ̂ Elie ónzě sul nyé sí.»

³⁷Nó ó Yésʉs á nze tíme kʉ́kʉ́, ntɔ̂ʼ sulǎ swɨ̂h.

³⁸Jɔʼ yaá, kán ébê, wé á bɨbe tyelá ɨ́ mpáh Nzyɛ̌m wɨ́ ntɔ̂ʼ nyɛɛ ɨ́ kwiií bipéh bíbá, táare kʉ́, kumo sí.

³⁹Njwɨ́ɨ bisója á be tîtyěl ɨ́ mpǒm mé Yésʉs nyá, mbeá nyé á bee mpʉ̌ Yésʉs á dwe yɨ́, nye ó: «Mʉr nyâʼ á kʉ be ó Mwân mé Nzyɛ̌m.»

⁴⁰Yé á be ntémé ó e bʉ́ʉ́ bʉ́bá bé á be lɨ́ edwɛ̂ʼ sá yé á syɛ́ɛ yɨ́ bá, tyɛ́bɔɔ lɨ́ ejaa. Bé á be ó: Maria, silě Magdalâ, le Maria, nyɔ̌ŋ mé Jacques mâ ntwǒm, bé e Yóse ti e Salóme.

⁴¹Bé ó b'á dû Yésʉs le eséa e né ɨ́ jɔʼ nyé á bě sí Galilê yɨ́. Bʉ́ʉ́ bʉ́bá ɨ́ buo buo, bé e boo nɔ́ɔ́ bé á nzě Yerʉ́zalɛm bá, bé á be ntémé ó tɨ̂.

⁴²Jɔ̌ʼ bíí kʉ̌ʼ, yé á pyâl yɨ́, Yóseb mʉr Arimatê nzě pyâl. Nyɨɛ á be ó mʉ̌r nɨ́nɨ́ɨ́ ɨ́ mpáh milɔ̌b oYúden. Nye á be lɨ́ ejóʼǒ dwéh ébeě Nzyɛ̌m lɨ́ etyêl Mpóʼo nyé ɨ́ píʼi. Yé á be ó jwɨ́h sábat, móhó bé á jɨjâm mede mé sábat wɨ́. Sâ yaá ó Yóseb á be ajóʼo bʉ́á lɨ́ etó gwâm Pilátos múú mé Yésʉs yɨ́.

⁴³

⁴⁴Pilátos á be ɨ́ buú kâm lɨ́ ejóʼo ó, Yésʉs, nyɨ́ lɨ̌ dwe. Nó nyé á jébe njwɨ́ɨ bisója, lɨ́ edî nyé nkʉ̂ Yésʉs á si boo dwe.

⁴⁵Jɔʼ nyé á jóʼo yalá mé njwɨ́ɨ bisója yɨ́, nye ntɔ̂ʼ kam ó, Yóseb tô nʉǎ múu.

⁴⁶Yóseb nzě tó bwâm ndɔ́má, ntɔ̂ʼ tó sǔl múu sí, díble wé ɨ́ ndɔ́má waá. Nye ntɔ̂ʼ tó dɨ̌l múu ɨ́ soo, túbá ngʉ̌ʼ lɨ́ ekóʼ. Píe tɨ̂, nye ntɔ̂ʼ nʉa lʉ́ʉ́ ékóʼ, búblǒ num sóo e tɨ̂.

⁴⁷Maria, silě Magdalâ, le Maria nyɔ̌ŋ mé Yóse, bé á be ó lɨ́ egwá dwɛ̂ʼ súm bé á dɨl múú wé yɨ́.