Read Koonzime Marc 16 Bible Online

Marc 16 - Koonzime bible

Marc 16

¹Jɔ̌ʼ móhó sábat, wé á sil elaa yɨ́, Maria, silě Magdalâ, le Maria nyɔ̌ŋ mé Jacques ti e Salóme, bé ntɔ̂ʼ tó bwâm lɔbína ó, bé ótó lœ̌m múú mé Yésʉs.

²Ɨ́ mɛ́n sóno, ɨ́ megbɔa me dʉ́o, bê nzě tô nko sóo.

³Bé á tʉtô le edíila páʼ nyɔ́ɔ́ ó: «Nzé nyɨɛ ngá bíŋle gá mɨná ekóʼ e dí ɨ́ num sóo lɨ́?»

⁴Bé ká dwɛ̂ʼ nɛ́ɛ: bee ó, ánɨ̂nɨ̂n ekóʼ laá, lé osí bíŋlɔɔ, lé mû lɨ́ empah.

⁵Bê nzě nî ɨ́ soo, tó kœb yʉ́ʉ́ loʼo ndîndǐl ɨ́ páʼ mbó éjʉ̂m le kán ɨ́ pumo pumo ɨ́ nyʉ̂l. Bé ntɔ̂ʼ buú jóʼo bʉ́á.

⁶Nó ó yé á lɛ́ɛ e bé ó: «Ayɨ́ jóʼo gá bʉ́á. Bɨ̌n sáá ó, Yésʉs, mʉr Nazarɛ̂t, waá bé á bomlo ɨ́ kolôs kʉ́ nyá. Nyɨ́ pah. Nyé akǎ be wâ. Paá bee gâ: súm bé á dɨl múú wé yɨ́ ó yɨ̂!

⁷Tóʼ gâ. Tó lɛ́ɛ gá ompʉ́n bé ndu e Pétrus ó: “Nyɨ́ sámle, lɨ́ etô bóno bɨ́n ɨ́ sí Galilê! Gʉ̂ʼ ó bɨ́n ngá bee nyê mpʉ nyé á boo lɛ́ɛ bɨ̌n yɨ́.”»

⁸Nó ó bé á duho ɨ́ soo, ntɔ̂ʼ kpɛ́ɛ e mikám, ebě, bé á be ó lɨ́ ejóʼo bʉ́á le ekɛ̂n. Bé á be yɨ́ɛ ó, alɛ́ɛ mʉ̂r sɔ̂ʼ, ebě, bé á be ó lɨ́ ejóʼo bʉ́á.

⁹[Ɨ́ mpʉ̌ Yésʉs á be, nye mû sí pah ɨ́ soo ɨ́ mɛ́n móhó sóno yɨ́, nye á nyɛɛ nyɨ̂n ó, kwá mé Maria, silě Magdalâ, mʉmá nyé á so meleme nzaangbá ɨ́ nyʉ̂l nyá.

¹⁰Nye ntɔ̂ʼ tô e mpáŋla, tó lɛ́ɛ bʉ̂r o bé e boo Yésʉs bé á bɨbe sɔ́má bá. Bé á be ó, bé dína lɨ́ ekúhó lé, le ejɨŋɔɔ médwê.

¹¹Jɔʼ bé á jóʼo mpʉ mʉ́má waá á lɛ́ɛ bé ó, Yésʉs, nyɨ́ pah, nyɨ́ bee ntémé nye yɨ́, bé á bé abûʼla.]

¹²[Píe tɨ̂, Yésʉs nzě pyâl kwá bʉ́ʉ́ ómpʉ́n bé obá, nzě lɛ̂ʼle bé nyʉ̂l nyé, nye mû gúú mbi swîh. Bé á be ó nzɨ́ e nzɨ̌, lɨ́ etô kwár nyɔ́ɔ́.

¹³Bɨ́ɛ ntémé ntɔ̂ʼ tô e lɔ́ɔ waá, tó lɛ́ɛ bʉ́ʉ́ ómpʉ́n, bɨ́ɛ njɨ lɨ́ esóŋlo.]

¹⁴[Píe tɨ̂, ɨ́ mesíé, Yésʉs ntɔ̂ʼ lɛ̂ʼle ómpʉ́n kám e ngwár nyʉ̂l nyé, ɨ́ jɔʼ bé á be lɨ́ ede yɨ́. Nye á si dwe bé mebě, ebě, bé á bé abûʼla nyê. Ebě, ntémé, bé á be ó e miléme ɨ́ lele lele. Bé á bé abûʼla bʉ̂r o b'á to lɛ́ɛ bé ó, bé á si bee Yésʉs, nye lɨ́ ekubla bá.

¹⁵Nó nyé á lɛ́ɛ e bé ó: «Tóʼ gá ɨ́ sí yɨ́yɛ̂h, lɨ́ etô le etúnǒ Mbɨambɨa Lɔ́ɔ ɨ́ mesí mɨ́mɛ̂h Nzyɛ̌m á kuho má.

¹⁶Waá ngá dyɛ̂ʼwo e me, ntɔ̂ʼ duŋɔɔ nyá, ótiʼe. Waá ngá be, adyɛ̂ʼwo e me nyá, nyɨ́haá ó ngá dweŋɔɔ bíntɨ́ʼá bi dí ɨ́ buú bébe bí.

¹⁷Nó bʉr o ngá dyɛ̂ʼwo e me bá, bé ósâ mésimá mâ: Bé óso méleme ɨ́ bʉr e nzɨ̌ díé lâm. Bé ólwib báayogoyogo.

¹⁸Bé ómɛ̂r ónyʉ́a e mebô. Bé ódě joʼo nó, adwe. Sɔ̂ʼ, yé ákóʼó sâ bé ebébe. Bé ókɛl mímbêl mebô, mimbêl myaá ntɔ̂ʼ tiʼe.»]

¹⁹[Jɔ̌ʼ Tî Yésʉs á sil elwib e bé nó yɨ́, Nzyɛ̌m nzě nʉa nyé, tô e né ɨ́ jʉ́o kʉ́, tó dil nyé ɨ́ mbó éjʉ́m wé.

²⁰Nó ó ómpʉ́n bé, bé á to le etúno Mbɨambɨa Lɔ́ɔ ɨ́ gúmó yɨ́yɛ̂h yɨ́. Píe lɔ́ɔ́ bé á túno wɨ́, Tî Yésʉs á ntɨntɨh mesimá ó, maá me dí eboʼlo ó, lɔ́ɔ́ wɔ́ɔ́, wé á kʉ be ó tyeetye má.]