Read Koonzime Marc 2 Bible Online

Marc 2 - Koonzime bible

Marc 2

¹Píe bwá mélû, Yésʉs ntɔ̂ʼ báʼǎ tô Kapernáʉm. Bʉr nzě jóʼo ó, nyɨ́ búla, nye mû ó mbɛ̌r,

²bʉr ɨ́ buo buo nzě mâʼla tɨ̂ʼ ɨ́ mbɛ̌r wé. Bê nzě kœb ó, yé á bé akǎ be e gúmó étyɛ̂b, damá jóʼo ó, lɨ́ ebê. Nó nyé á nze dwe bé milɛ́ʼlá ɨ́ milɔ̌b mé Nzyɛ̌m.

³Di ɨ dididi, bʉ́ʉ́ bʉ̂r onâ nzě pyâl épíhe kwá mé Yésʉs, lɨ́ enze le enkɛ́ɛ̌ mbʉ́mbʉ́ʼ ɨ́ myɛɛla.

⁴Nó mpʉ bé á be abee gúmó bé cɨ́yɨɨ yɨ́, bê nzě jʉ kʉ́ ɨ́ mié mbɛ̌r Yésʉs á be tɨ̂ʼ wɨ́, túbɔɔ égʉ́á ɨ́ mié, ntɔ̂ʼ sulɔɔ̌ myɛɛlǎ mbʉ́mbʉ́ʼ wɔ́ɔ́ tɨ̂ʼ lɨ́ egʉ́á.

⁵Mbeá nyé á bee mpʉ bé á dyɛ̂ʼwo e né yɨ́, nye ntɔ̂ʼ lɛ́ɛ e mbʉ́mbʉ́ʼ ó: «Mwân wǎm, bibaa bí ébébe lô, bí pɛʼɔɔ!»

⁶Nó ó, ɨ́ sɔ́má ólɛ̂ʼla o métié le oFarizyɛ̂n bé á be tɨ̂ʼ mindîndǐl bá, bʉ́ʉ́ nzě táare ésóŋlo nyê, le elɛ́ɛ ɨ́ milémé myɔ́ɔ́ ó:

⁷«Nyě lwilwǐb nó ɨ́ yé ɛ́? Nye lɨ́ esâ Nzyɛ̌m nkěh. Nzé dí e nkul epɛʼ bíbaa bí ébébě Nzyɛ̌m dí eniʼe ebe misyóm mí mʉ̂r waa mí, píe nye mʉr tɨ̂?»

⁸Yésʉs nzě kpâhwǎ gʉ́a ɨ́ sísǐm wé tʉ́ŋlʉ̌, sá bé á lwib ɨ́ milémé myɔ́ɔ́ yɨ́. Nó nyé á lɛ́ɛ e bé ó: «Bɨ̌n bé lɨ́ esóŋlo ɨ́ milémé mín ɨ́ yé?

⁹Yé dí ɨ́ kpâhwa lɨ́ esâ? Le elɛ́ɛ̌ mbʉ́mbʉ́ʼ mʉ̂r ó: “Bibaa bí ébébe lô, bí pɛʼɔɔ”, nkʉ̂ lɛ́ɛ e wé ó: “Gbɔlwaa sí. Nkɛ́yɨ́ɨ́ myɛɛla gô. Bʉŋláa”?

¹⁰Sâ gwár, mě gwɨ́m ó, bɨ̌n gʉ́ŋaa ó, Mwân mé Mʉr, nyě e nkul jwɨ́ɨ ɨ́ sí yɨ̂ʼ ó, nye pɛ́ʼɛɛ bʉr bibaa bí ébébě Nzyɛ̌m dí eniʼe bé bí.» Nye nzě lɛ́ɛ e mbʉ́mbʉ́ʼ ó:

¹¹«Mě lɛ́ɛ́ gó ó: Gbɔlwáa. Go e nkɛ́ɛ́ myɛɛla gô. Go e tó kwár nyǒ.»

¹²Tyé e tyé, mʉr waá ntɔ̂ʼ gbɔlwa sí, nkɛ́ɛ̌ myɛɛla wé, ntɔ̂ʼ tye, bʉr bɨ́bɛ̂h lɨ́ ebee! Bʉr bɨ́bɛ̂h, bé á si kâm syɛ́ɛla yaá, ntɔ̂ʼ dwě Nzyɛ̌m kûm. Bé ó: «Mɨná bé apǎ bee gá yʉ́ʉ́ sɔ̂ʼ nwɨɨla e yɨ̂!»

¹³Píe tɨ̂, Yésʉs nzě báʼǎ tô ɨ́ nkpâh mâŋ.

¹⁴Ɨ́ nzɨ̌ nyé á cɨɨ nyɨ́, nye nzě beě Levî, mwân mé Alfê, ndîndǐl ɨ́ gúmó nyé á nʉnʉa mɔnɨ́ tœ́a yɨ́. Yésʉs, nye e né ó: «Dúʼóó mê.» Nye ntɔ̂ʼ mɔa sí, dû Yésʉs.

¹⁵Jɔʼ bé á be lɨ́ ede ɨ́ mbɛ̌r mé Levî yɨ́, bʉ́ʉ́ ónwɨa ó mɔnɨ́ tœ́a, le bʉ́ʉ́ ósyɛ̂l o mísyóm, bé á be ntémé ó lɨ́ ede, bé e boo nɔ́ɔ́, le ompʉ́n mé Yésʉs, ebě, bʉr o b'á dudû nye bá, bé á be ɨ́ buo.

¹⁶Olɛ̂ʼla o métié, bé á be ɨ́ nkɔ̌m oFarizyɛ̂n bá, mpʉ bé á bee nye lɨ́ epûhla mébô lɨ́ ebánǎ de le osyɛ̂l o mísyóm le onwɨa ó mɔnɨ́ tœ́a yɨ́, bé ntɔ̂ʼ dî le ompʉ́n bé ó: «Nyě púhlá mébô lɨ́ ebánǎ de le onwɨa ó mɔnɨ́ tœ́a, le osyɛ̂l o mísyóm ɨ́ yé?»

¹⁷Yésʉs ntɔ̂ʼ jóʼo bé lɨ́ elwib nó. Nye ó: «Minjɨ̂h, myé ajɨ ójomo o bʉ̂r. Mimbêl myé omér ó dí ejɨ bê. Me á bé anzě jébe ótîtyěl o bʉ̂r. Me á nze jébe ó, osyɛ̂l o mísyóm.»

¹⁸Ompʉ́n mé Yʉánɛs, bé le oFarizyɛ̂n, bé á bɨbe ó lɨ́ ebaʼle métié mé éti méde ɨ́ bijɔʼ mínjɨʼla. Nó ó bʉ̂r, bé á nze lɛ́ɛ e Yésʉs ó: «Ompʉ́n mé Yʉánɛs, le baá bé óFarizyɛ̂n bɨ́ɛ, bé lɨ́ etiti méde. Nó baá bô, bé dí ati mé ɨ́ yé ɛ́?»

¹⁹Yésʉs, nye e bé ó: «Jɔʼ mʉ̂r bém mʉ́má yɨ́, nyě sá ó tyêl nzɔ́ɔ, báŋle ósó bé, bé e boo nɔ́ɔ́ ntɔ̂ʼ de méde le bisʉhʉʉ. Nzê bɨ̌n bûʼlá ó, osó mé mbêm mʉmá, bé e nkul eti méde, nyɨɛ dína témé nzɔɔ ɛ̌? Tyé yɨ́yɛ̂h nyé dína tɨ̂ʼ ɨ́ nzɔɔ yɨ́, bé abe e nkul eti méde.

²⁰Jɔʼ, yé ópyâl. Jɔʼ yaá ó bé ngá kǎ ti méde yɨ́, jɔʼ mbɛ̂l mʉmá ngá pɛʼɔɔ ɨ́ sɔ́má yɔ́ɔ́ yɨ́.»

²¹«Péh kán dwân dí apǎ dubɔɔ ɨ́ medíbé, l'apǎ dulo yɨ́, yé abe lɨ́ elarɔɔ lɨ́ egʉ́á é njʉ̌m kán, ebě, péh kán dwân yaá bé adubɔɔ ɨ́ medíbé nó, ɨ́ jɔʼ mʉ̂r ókǎ jwɨɨ̌ njʉ̌m kán waá yɨ́, ebágá é kán dwân laá, lé ópʉʼa, ntɔ̂ʼ báʼǎ beʼ égʉ́á é njʉ̌m kán.

²²Nó ntémé, bé abe lɨ́ elwan ményoʼ medwân ɨ́ minjʉ̌m bíntaʼ bi dí misɛ́á e bikʉ́r bí ótír bí. Bé sá nó wá, ɨ́ jɔʼ ményoʼ mé ógʉ́lwa yɨ́, mé óbʉ̂ mínjʉ̌m bíntaʼ byaá, menyoʼ kʉ́ma sí, bintaʼ dwě ntuʼ. Bé lulwan ményoʼ medwân ó ɨ́ bintaʼ bidwân.»

²³Gúú móhó sábat, Yésʉs á be ó lɨ́ entaa bípemé méde, mede maá mpʉ mpíha. Ompʉ́n bé, bé á be lɨ́ edû nyé píhe. Bê nzě táare émwâʼ méde maá, deŋɔɔ.

²⁴Bʉ́ʉ́ óFarizyɛ̂n ntɔ̂ʼ bee, bê nzě dî e Yésʉs ó: «Paá bee: ompʉ́n bô, bé lɨ́ esâ ɨ́ móhó sábat syɛ́ɛlǎ Moyɨ̂z á kamle yɨ́ ɨ́ yé?»

²⁵Yésʉs ntɔ̂ʼ yala e bé ó: «Nzê bɨ̌n dína apǎ láǎ sá David á sâ ɨ́ jɔʼ nyé mʉr tɨ̂, bé e bʉr bé, bé á be ɨ́ sɔ́ɔlʉ méde le ejóʼo nzâ yɨ́ ɛ́?

²⁶Nzê bɨ̌n bé agʉ́a ó, bé á si nî mbɛ̌r mé Nzyɛ̌m ɨ́ jɔ̌ʼ Abiatâr á be njwɨ́ɨ opara yɨ́ ɛ́? Biblêr byé á nɛŋɔɔ lɨ́ edwě Nzyɛ̌m kûm bí, David á si bana nʉa byê, de. Jɔʼ nyé mʉr tɨ̂ʼ á de yɨ́, nye ntɔ̂ʼ kab bʉ̂r ó sɔ́má yé bɨ́bɛ̂h. Mʉr ngwár ɨ́ sɔ́má yaá á bé ajala le ede méde maá, njɨ opara bé omér.»

²⁷Nye ó: «Móhó sábat, wé á tyélɔɔ ó, lɨ́ esú é mʉ̂r. Mʉr á bé akomlɔɔ lɨ́ esú é móhó waá.

²⁸Sá tɨ̂ʼ ó Mwân mé Mʉr dí Njwɨ́ɨ bisá bíbyɛ̂h, damá bě sábat yɨ́.»