Read Koonzime Marc 4 Bible Online

Marc 4 - Koonzime bible

Marc 4

¹Yésʉs á be ó ɨ́ pɨ̌n mâŋ. Nye nzě báʼǎ táare édwe bʉ̂r milɛ́ʼlá. Entumo e bʉ̂r nzě swâl bǎʼ e né, ɨ́ swâl swâl, nye ntɔ̂ʼ kalwo sá yé ɨ́ byɛ̂l, di sí, entumo e bʉ̂r lɨ́ɛ lîʼ náǎ tín, lɨ́ ebʉ́m é mâŋ.

²Nye nzě dwe bé milɛ́ʼlá ɨ́ buo buo ɨ́ nzɨ̌ bikɨkɛna. Nó, nye á dwe bé milɛ́ʼlá ó, mbi wɨ̂:

³«Jóʼláá gâ: yé á be ó e nyʉ́ʉ́ mbêl mempeʼ á to le emyam mémpeʼ ɨ́ pemé yé nyá.

⁴Jɔʼ nyé á be lɨ́ etô le emyam mémpeʼ maá pemé e pemé yɨ́, wɨ̂ʼ pâʼ mpeʼ nzě gɔ́na le ekur nzɨ́ e nzɨ̌. Binʉ̌n ntɔ̂ʼ sulo, nzě tor mémpeʼ maá mɨ́mɛ̂h.

⁵Gúú pâʼ mpeʼ kur ɨ́ sí mékóʼ, bwǎh mpâ l'abuo tɨ̂. Mempeʼ ntɔ̂ʼ kpâhwǎ pâh, ebě, bwǎh yé á be tɨ̂ʼ yɨ́, yé á bé abuo.

⁶Jɔʼ dʉ́o, lé á kah yɨ́, dwéhé nzě ŋmɛ́ha tɨ̂, nzě dîʼ mípáhá mémpeʼ myaá mímyɛ̂h, myé ntɔ̂ʼ swâh, ebě, myé á bé abe e mikaalé mimpâ.

⁷Gúú pâʼ mémpeʼ ntémé nzě kur ɨ́ mindwínɨ́nɨ́. Mindwínɨ́nɨ́ nzě gwɨ́e, ntɔ̂ʼ kâʼ mípáhá mémpeʼ myaá, myé ntɔ̂ʼ líre, akǎ gúmo mpúmó.

⁸Damá jóʼo nó, gúú pâʼ mémpeʼ tɨ̂ʼ wɨ́ɛ, wé á kur ó ɨ́ sí métyɛʼ. Mɨ́haá mɨ́ɛ ó b'á gwɨ́e, le ebwaʼ. Mê nzě gúmo mpúmó. Lɨ́ʼ étíne gúmo mpúmó mekám mélɛ̂l. Lʉ́ʉ́, mpumó mekám mésaman. Lʉ́ʉ́ ntémé, mpumó nter.»

⁹Yésʉs nzě lɛ́ɛ ó: «Mʉr dí e megwǎl mé éjóʼo nyá, nye jóʼaa náǎ!»

¹⁰Jɔʼ bé á be, bé mû bé omér yɨ́, bʉ́ʉ́ bʉ̂r o b'á be ɨ́ sɔ́má yé bá, bâʼra e sɔ́má bʉ̂r kám le obá bá, bê nzě dî e né, sá bíkɨkɛna byaá dí elɛ́ɛ yɨ́.

¹¹Yésʉs ntɔ̂ʼ lɛ́ɛ ó: «Bɨ̌n ó Nzyɛ̌m á gwîh bisá mésǒ bí Mpóʼo nyé. Sâ gwár, ɨ́ páʼ bʉ̂r oswîh bɨ́ɛ, bé kʉ́ gwá jóʼo ó, njɨ ɨ́ nzɨ̌ bikɨkɛna, lɨ́ esú ó,

¹²mekǎn me ngwíha o mílɔ̌b mé Nzyɛ̌m, mé díraa. Nye á cɛma ó: “Bé lɨ́ edwɛ̂ʼ e mîh mimběʼ, abee. Bé lɨ́ ejôʼlo e megwǎl, ajóʼo, agʉ́a ntémé, lɨ́ ebene ó, bé ámû jaá dwira míléme, Nzyɛ̌m ntɔ̂ʼ pɛʼ bé bibaa bí ébébe lɔ́ɔ́.”»

¹³Nye ntɔ̂ʼ dî e bé ó: «Bɨ̌n apǎ nyɛɛ́ jóʼo yɨ̂ʼ kɨkɛna. Bɨ̌n bé ójóʼo byaá byúú nyá?

¹⁴Mʉr pemé, nyě myǎm ó, lɔ́ɔ́ mé Nzyɛ̌m.

¹⁵Bâʼ bʉ̂r, bé ó mpʉ émpah e nzɨ́, gúmó lɔ́ɔ waá, wé á kur yɨ́. Bé lɨ́ ejóʼo wê. Píe tɨ̂, Sátan nzě kpâhwǎ pyâl, pɛʼ bé wǎ ɨ́ gúmó wé á kur yɨ́.

¹⁶Bâʼ nwɨɨla e sí mékóʼ, gúmó mpeʼ, yé á kur yɨ́. Bʉr baá, bé lɨ́ ejóʼǒ Mbɨambɨa Lɔ́ɔ, ntɔ̂ʼ nʉa wé e bisʉhʉʉ.

¹⁷Sâ gwár, Mbɨambɨa Lɔ́ɔ waá l'anî bé ɨ́ miléme tʉ́ŋlʉ̌. Bé jaá baʼle wé ó, njɨ ɨ́ mâ péh jɔʼ. Jɔ̌ʼ túú le tíblá mû sí pyâl ɨ́ lɔ̌b lɔ́ɔ waá yɨ́, wé ntɔ̂ʼ bɨma bé ebɔ̌ʼ ɨ́ léme, bé ntɔ̂ʼ gwâʼ.

¹⁸Bʉ́ʉ́ nwɨɨla ó e mpeʼ yé á kur lɨ́ mindwínɨ́nɨ́ yɨ́. Bé á si jóʼo Mbɨambɨa Lɔ́ɔ.

¹⁹Sâ gwár, mitúú mí sí le gwɨ́má ókúm le ogbaa, byé á si dímle bé ɨ́ nzɨ̌ mikóo myɔ́ɔ́. Bé lɨ́ ebuú tyel mílémé kʉ́ lɨ́ ebi e bísá bí sí yɨ̂. Bisâ byaá, byé ntɔ̂ʼ kâʼ Mbɨambɨa Lɔ́ɔ, wé l'akǎ gúm tô dóló.

²⁰Bʉ́ʉ́ ntémé, bé nwɨɨla ó e mpeʼ yé á kur ɨ́ mpǎŋ sí métyɛʼ yɨ́. Bɨ́ jóʼǒ Mbɨambɨa Lɔ́ɔ, nʉa wé mbɨ̂mbɨá. Sá tɨ̂ʼ ó bé dí egúmo mpúmó ɨ́ bicwiʼ byɔ́ɔ́ yɨ́. Mâʼ métín gúmo mpúmó mekám mélɛ̂l. Mʉ́ʉ́, mpumó mekám mésaman. Mʉ́ʉ́ ntémé, mpumó nter.»

²¹Yésʉs ntɔ̂ʼ lɛ́ɛ bé ó: «Bé abe lɨ́ enze le eláma ó, bé óbûr lé ɨ́ mpɨ̌, nkʉ̂ tó lâʼ lé sí joó. Yé jala ó, bé tyélɨɨ lé ɨ́ tyélátyéla éláma kʉ́.

²²Sá yɨ́yɛ̂h dí solá yɨ́, yé ógwíhǎ kʉ̌l. Sá dí lɨ́ esǒ yɨ́, yé ónyɨ̂n ɨ́ kpɛŋlɛm.

²³Mʉr dí e megwǎl mé éjóʼo nyá, nye jóʼaa náǎ!»

²⁴Nye ntɔ̂ʼ lɛ́ɛ bé ó: «Bɨ̌n a báʼ ɨ́ sá bɨ́n dí ejóʼo yɨ́. Nzyɛ̌m ójwɨʼ míndwéá nyé ngá dwe bɨ́n mí ó e jwɨʼa bɨ́n dí ejwɨʼ bʉ̂r oswîh yɨ́. Nyé okǎ báʼǎ kɛl bɨ́n myúú míndwéá tɨ̂.

²⁵Ebě, mʉr dí e sâ gwár nyá, óbáʼǎ dweŋɔɔ byúú. Sâ gwár, waá dí tʉ̂toʼó, abe e sɔ̂ʼ nyá, ódɛ́ʼɔɔ̌ damá jóʼo mâ sâ gwár nyé dí e né nyá.»

²⁶Yésʉs nzě báʼǎ lɛ́ɛ ó: «Mpóʼǒ Nzyɛ̌m dí etyêl nyɨ́, nyě nwɨɨlá ó e nyʉ́ʉ́ mʉ̂r á to myam mempeʼ ɨ́ pemé yé nyá.

²⁷Mʉr waá damá tô ɨ́ jô, nkʉ̂ ntémé jɨma, mempeʼ mé, mé lɨ́ epâh, le egwɨ́e, nyɨɛ l'apʉgʉ́ gʉ́ǎ sá yé dí esyɛ́ɛ nó yɨ́.

²⁸Bwǎh yé mʉr tɨ̂ʼ ó dí esâ ó, mpeʼ, yé páhaa, gúmo mpúmó, mpumó lɨl.

²⁹Mpúmó óbe, nye mû sí lɨl nó, mʉr pemé, nyé okpɛm, ebě, swɨɨ ékpɛm, yɨ́ pyâl!»

³⁰Yésʉs nzě dî ó: «Mɨná bé e nkul ejwɨʼ gá Mpóʼo mé Nzyɛ̌m e wáǎ mbǐ sɔ̂ʼ? Yáǎ kɨkɛna mé ókǎ báʼǎ sâ bɨ́n lɨ́ elɛ̂ʼle bɨ́n mpʉ nyé dí yɨ́?

³¹Nyě nwɨɨlá ó e díh é nzɔ́m lé á be ɨ́ buú twâʼwo ɨ́ mempeʼ mɨ́mɛ̂h lɨ́.

³²Nó ɨ́ jɔʼ lé dí emyamɔɔ yɨ́, lé lɨ́ epâh, bánǎ sâ mpěʼ nɨ́nɨ́ɨ́, lɨ́ elaa mémpeʼ mɨ́mɛ̂h ɨ́ mpwaʼ. Lé lɨ́ entwoowo, pâh mílɔ́ɔ́ mínɨ́nɨ́ɨ́. Binʉ̌n bíbyɛ̂h nzě lʉ́o mɔ̂ʼ mɔ́ɔ́ ɨ́ dúʼwó lé.»

³³Yésʉs á dwidwe bé milɛ́ʼlá ɨ́ milɔ̌b mé Nzyɛ̌m ó, ɨ́ nzɨ̌ bikɨkɛna ɨ́ buo buo mpʉ byaá nyé á nyɛɛ sâ bí. Nye á dwidwe bé myǎ ó, bím tyé bé á be e nkul ejóʼo yɨ́.

³⁴Jɔʼ bé e bʉr bɨ́bɛ̂h, bé á bɨbe yɨ́, nye á lwilwib ó, ɨ́ nzɨ̌ bikɨkɛna. Nó ɨ́ jɔʼ bé le ompʉ́n bé, bé á bɨbe bé omér yɨ́, nye á lwilwib ó, pâʼla mékǎn.

³⁵Ɨ́ móhó ngwár waá, ɨ́ jɔʼ dʉ́ó lé á léŋa yɨ́, Yésʉs, nye le ompʉ́n bé ó: «Ncʉ̂ʼ gâ. Mɨná ntáŋaa gá mâŋ, tô lɨ́ ebʉ́m é kɔ́m-nkɛ́ɛ́.»

³⁶Jɔʼ bé á be, bé mû sí líʼe éntumo e bʉ̂r laá yɨ́, bé ntɔ̂ʼ tó kœ̌b Yésʉs ɨ́ súm nyé á be ɨ́ byɛ̂l tʉ́ŋlʉ̌ yɨ́. Bé le onɔ́ɔ́ ntɔ̂ʼ tô. Mʉ́ʉ́ mɛ̂l ntémé, mé á be ó súm byɛ̂l waá á be yɨ́.

³⁷Nó nkúo á nyɛl ekwoolo ɨ́ buo buo. Obóʼó ó mâŋ, wê nzě swɨɨ ɨ́ byɛ̂l, byɛ̂l ntɔ̂ʼ táare élóno ɨ́ medíbé.

³⁸Nyɨɛ á be ó ɨ́ byɛ̂l nkǒ píhe, lɨ́ ejâ jô, lʉ̂ kɛlá kʉ́ ebwóóló. Bé ntɔ̂ʼ jɨm nyê. Bé e né ó: «Lɛ̂ʼla, mɨná múo nzě dwe gâ! Nzê yé alɛ́ɛ gúa sɔ̂ʼ ɛ̌?»

³⁹Yésʉs nzě mɔa, ntɔ̂ʼ nkáŋla e nkúo. Nye e mâŋ ó: «Diʼee ɨ́ puuu. Diʼee títîl.» Nkúo ntɔ̂ʼ tyɛ̂b. Sá yɨ́yɛ̂h mû ɨ́ puuu.

⁴⁰Nye le ompʉ́n bé ó: «Bɨ̌n jóʼó bʉ́á ɨ́ yé? Bɨ̌n bé adyɛ̂ʼwo e Nzyɛ̌m ɨ́?»

⁴¹Bê nzě bil bʉ́á, ntɔ̂ʼ lɛ́ɛla páʼ nyɔ́ɔ́ ó: «Wɨ̂ʼ mbi mʉ̂r, wê nzé, dí, nkúo e mâŋ, bánǎ sâ nyé mejóʼo wɨ́?»