Read Koonzime Marc 7 Bible Online

Marc 7 - Koonzime bible

Marc 7

¹OFarizyɛ̂n le bʉ́ʉ́ ólɛ̂ʼla o métié bé á duhǒ Yerʉ́zalɛm bá, nzě swálɔɔ̌ gúmó Yésʉs á be yɨ́.

²Nó ó bé á nze bee bʉ́ʉ́ ómpʉ́n bé lɨ́ ede e mebô “e mpir”, ebě, bé á bé ajwɨɨ mé mpʉ métum mé yébé óYúden dí elɛ̂ʼle yɨ́.

³Tó kœb ó, oFarizyɛ̂n ndu e bʉ́ʉ́ óYúden bɨ́bɛ̂h, bé abe lɨ́ ede, apǎ nyɛɛ́ jwɨɨ mébô mbɨ̂mbɨá. Bé sá nó ó, lɨ́ okán bé dí ekánwo métum me myâ bímpám byɔ́ɔ́, byé á líʼe má.

⁴Jɔʼ bé búlá lɨ́ ebɨ̌m é pátele lɨ́ etó bwâm bísɔ̂ʼ yɨ́, bé abe e nkul ede, apǎ jwɨɨ mébô. OFarizyɛ̂n bɨɛ, bé lɨ́ ebaʼle mʉ́ʉ́ métum meswîh mpʉ maá me dí elɛ̂ʼlě mpʉ mʉ̂r jálá le esohlo mémpéle, mikâʼ, le mempɨ̌ bínkóho mbɨ̂mbɨá yɨ́.

⁵Nó óFarizyɛ̂n, le olɛ̂ʼla o métié bé á nze dî e Yésʉs ó: «Ompʉ́n bô, bé lɨ́ ebene ébaʼle bíti bímpám gá bíná, byé á líʼe bí ɨ́ yé? Bɨ́ɛ̌ kǎ de méde e mebô e mpir ɨ́ yé?»

⁶Nó ó Yésʉs á yala e bé ó: «Ngwíha milɔ̌b Ésayie á si gwa kʉ lwib ɨ́ jɔʼ nyé á lɛ́ɛ ó: bɨ̌n bé ó bʉr o míkóo yɨ́. Sâ yaá ó nyé á cɛma ɨ́ lɔ̌b wɨ́n yɨ́. Yê cɛmá ɨ́ Mekaná mé Nzyɛ̌m ó: “Kúl yɨ̂, yé jaá dwé mé kûm ó, njɨ ɨ́ bikonó bí nǔm kʉ̌l. Tó kœb ó, milémé myɔ́ɔ́, myé ɨ́ buú cɛra e me.

⁷Júú bé dí edwe mé yɨ́, yé ó kwahaá tʉ̂toʼó, ebě, milɛ́ʼlá bé dí edwe bʉ̂r mí, myé jaá duho ó, njɨ ɨ́ metié me bʉ̂r.”

⁸Bɨ̌n bé lɨ́ ebene métié mé Nzyɛ̌m, bɨbaʼlě sɔ̂ʼ njɨ metum me bʉ̂r.»

⁹Nó ó Yésʉs á baʼa lɛ́ɛ bé ó: «Bɨ̌n bé ɨ́ buú bene métié mé Nzyɛ̌m. Bɨ̌n jaá bɨbaʼlě sɔ̂ʼ ó, njɨ metum mɨ́n.

¹⁰Moyɨ̂z á lɛ́ɛ ó: “Dwéʼ sʉ́ŋ e nyʉ̌ŋ dúu.” Nye á lɛ́ɛ ntémé ó: “Mʉ̂r lwɨ́ɨ́ sɔ́ŋ, nkʉ̂ nyɔ̌ŋ nó, mʉr tɨ̂ʼ, nye ɨ́ jala le ejʉ́ŋɔɔ.”

¹¹Nó bɨ̌n bɨɛ̌ lɨ́lɛ́ʼlé ó, mʉ̂r ólɛ́ɛ e sɔ́ŋ e nyɔ̌ŋ wé ó: “Nkɔb bisá byâm mé á gwa súʼo bɨ̌n e né nyɨ́, nye mû ó kɔrbâŋ.” (Nó yé lɛ́ʼlé ó, “mindwéá mí mpáh Nzyɛ̌m.”)

¹²Nyé ólwǐb mbi waá nó, bɨ̌n bé akpɛl ó, nye súʼaa sɔ́ŋ e nyɔ̌ŋ ɨ́ nzɨ̌ mebi mé maá.

¹³Mbǐ lɛ́ʼlá nɨ̌ ó dí egbah métié mé Nzyɛ̌m. Bɨ̌n gbɨgbah mé ó, ɨ́ nzɨ̌ milɛ́ʼlá bɨ́n dí edweela mí. Bɨ̌n bé lɨ́ esâ myúú mísyóm mbi waá ɨ́ buo buo.»

¹⁴Nó ó Yésʉs á baʼa jébe entumo e bʉ̂r. Nye e lé ó: «Jóʼláá gá me, bɨ̌n óbɛ̂h. Bɨ̌n a jóʼló sá mé múo nzě lɛ́ɛ bɨ́n yɨ̂.

¹⁵Sá dí eduhǒ kʉ̌l, nî mʉ̂r ɨ́ nyʉ̂l yɨ́, yé abe e nkul ebɛ̂ʼ páʼ mʉr, bé e Nzyɛ̌m. Yaá dí esâ ó, mʉr, bé e Nzyɛ̌m bɔ́ʼaa yɨ́, yé ó sá dí eduho ɨ́ lémé mʉ̂r tʉ́ŋlʉ̌, pyâl kʉ̌l yɨ́.»

¹⁷Nó ɨ́ jɔ̌ʼ Yésʉs á duhǒ gúmó bʉ̂r, bé á be yɨ́, nye nzě tó nî mbɛ̌r. Nó ó ómpʉ́n bé, bé á nze dî e né ó, nye pâʼlaa bé kɨkɛna yaá yɨ́.

¹⁸Nó nyé á lɛ́ɛ e bé ó: «Nzê bɨ̌n dína ó bigʉʼlʉgʉ́ ɛ̌? Nzê bɨ̌n bé agʉ́a ó, ntʉ̌ sá dí eduhǒ kʉ̌l, nî ɨ́ nyʉ̂l mʉr yɨ́, dí elœʼ nyé ɨ́ míh mé Nzyɛ̌m ɛ̌?

¹⁹Ebě, yé anî nyé ɨ́ léme tʉ́ŋlʉ̌. Yé ní ó ɨ́ mo, kǎ pyâl kʉ̌l.» (Ɨ́ lɔ́ɔ waá, Yésʉs á kpɛl elɛ́ɛ ó, mede mɨ́mɛ̂h, mé mû ó, bɛ̌m deŋɔɔ.)

²⁰Nó nyé á baʼa lɛ́ɛ e bé ó: «Sá dí eduho ɨ́ nyʉ̂l mʉr yɨ́, yé ó dí ebɛ̂ʼ páʼ mʉr, bé e Nzyɛ̌m.

²¹Ebě, bibébebébe bíjwɨʼ, byé duho ó ɨ́ lémé mʉ̂r. Byé ó dí: bimolá, díbe, ejwɨ́ɨ́ é bʉ̂r,

²²medyɛ̂n, nzɔ́ɔ́ bísâ, ebébe é léme, mikóo, bimolá nzam le ekomo, nzwíí nkěh, nkɛ́á nyʉ̂l, sɔ́ɔlʉ pɨ̂ʼ.

²³Bisá bínɨ̌ bíbyɛ̂h, byê duho ó ɨ́ nyʉ̂l mʉr tʉ́ŋlʉ̌, ntɔ̂ʼ sâ ó, nye bɔ́ʼaa e Nzyɛ̌m.»

²⁴Nó ó Yésʉs á nze duhǒ gúmo yaá, nzě tô sí dí bǎʼ e Tîr yɨ́, nzě nî ɨ́ gúú mbɛ̌r. Nye á bé akpɛl ó, mʉr gʉ́ŋaa ó, nye á be ó tɨ̂ʼ tʉ́ŋlʉ̌. Sâ gwár, nye á bé abe e nkul eswab.

²⁵Nó ó, yé á be ó e mʉma á be e mâ eséhe lé nyá. Mwân wé waá á be ó lɨ́ ejaʼra e sísǐm mélwaʼwo. Nó ó, mʉmá waá ntémé á nze jóʼǒ lɔ́ɔ́ dí edumo e Yésʉs wɨ́. Njóʼá nyé á kʉ jóʼo wé yɨ́, nye ntɔ̂ʼ nzě pyâl gúmó Yésʉs á be yɨ́, nzě bɨʼ mébóó sí ɨ́ mpǒm nyé.

²⁶Nye á be ó mʉmá bikûl biswîh. Nye á duho ó, nkanǎ Fénikia, ɨ́ sí Sirî. Nye á nze ó, nzě jɨʼla e Yésʉs ó, nye sôʼ eleme lé á be ɨ́ mwân wé lɨ́ yɨ́.

²⁷Nó ó Yésʉs á nze lɛ́ɛ e né ó: «Bírɨ́ɨ́ bwá ó mbɛ̌r, bé páa nyɛɛ́ de, díle, ebě, yé asiŋa ó, mede me jálá le edweŋɔɔ bwân má, mé dwéŋɔɔ bwá bé ómpyê.»

²⁸Nó nyé á yala e né ó: «Dâ ɛ̌, yé ó nó. Damá jóʼo nó, ompyé dí ɨ́ téble sí bá, bé dé ó, bitwǐʼ méde bwân dí ekuhlo sí bí.»

²⁹Nó ó Yésʉs á lɛ́ɛ e né ó: «Ɨ́ yalá yô nɨ̌, búláa. Tóʼ kwár nyǒ. Eleme dí lɨ́ eséhe lô lɨ́, lɨ́ duho!»

³⁰Nó ó mʉ́má á búla, tô mbɛ̌r wé, tó kœb mwân wé, nye mu ó mbɨ́mbɨá, njáʼ sí ɨ́ joó, eleme lɨ́ɛ, lé osí duho.

³¹Nó ó Yésʉs á baʼa duhǒ sí Tîr, ntɔ̂ʼ tó cɨɨ yaá Sidɔ̂n, nzě báʼǎ sulo lɨ́ ebʉ́m é máŋ mé Galilê, lɨ́ etó ntaǎ sí Dekapôl.

³²Nó ó bé á nze nye e mʉr á be ngʉʼ, báʼǎ be le emúmó nyá. Bê nzě jɨʼla e Yésʉs ó, nye kɛ́lɨɨ nye mebó mé ɨ́ nyʉ̂l, lɨ́ etiʼ nyê.

³³Nó ó Yésʉs á nze tô e mbêl waá gúmó bʉ́ʉ́ bʉ̂r, bé á be abe yɨ́, ntɔ̂ʼ gbâ nyé mpiné tʉ́ŋlʉ̌ megwǎl, nzě nʉa métyéelé mé, swóolo ɨ́ jɨ́m yé.

³⁴Nye ntɔ̂ʼ dwɛ̂ʼ kʉ́, sulǎ swɨ̂h, nzě lɛ́ɛ e mʉr waá ó: «Effata.» (Díe laá, lé lɨ́ etyɛn ó: «Bɔ́áa.»)

³⁵Tyé e tyé yaá, megwǎl me mʉ̂r waá ntɔ̂ʼ bɔ́a. Jɨ̂m yé ntémé, nzě kɔa. Nye ntɔ̂ʼ táare élwǐb mbɨ̂mbɨá.

³⁶Yésʉs nzě gbâ bé mpéné ó, bé l'alɛ́ɛ mʉ̂r swîh lɔ́ɔ waá. Damá jóʼo nó, bím nyɨɛ á lɛ́ɛ ó, bé ayɨ́ lɛ́ɛ yɨ́, bím yaá ntémé ó bé á to le elɨ̂lɛɛ̌ lɔ́ɔ waá yɨ́.

³⁷Bé á be ɨ́ buú kâm bísyɛ́ɛla byaá ɨ́ buo buo. Bé ó: «Sá yɨ́yɛ̂h nyé dí esâ yɨ́, yé ɨ́ mbɨa. Damá jóʼo míngʉʼ, myé lɨ́ ebánǎ jóʼo. Bʉr o b'á be baányâ-emúmó bá, bé mû ó lɨ́ elwib.»