Read Koonzime Marc 9 Bible Online

Marc 9 - Koonzime bible

Marc 9

¹Nó ó Yésʉs á lɛ́ɛ e bé ó: «Mě lɛ́ɛ́ bɨ́n lɨ́ otyeetye ó, ɨ́ sɔ́má bʉ̂r o dí wâʼ báánâʼ bá, bʉ́ʉ́ bé ádwe, bé l'apǎ bee Mpóʼo mé Nzyɛ̌m lɨ́ esulo sí e nkul.»

²Melú mésaman mé osí laa nɛ́ɛ: Yésʉs nzě nʉǎ Pétrus, bé e Jacques ndu e Yʉánɛs, bé ntɔ̂ʼ bérɔɔ écwɨ̂ʼ ɨ́ jaa jaa kʉ́. Bé á be gʉ̂ʼ ó, bé omér. Nye nzě dwira nyʉ̂l ɨ́ míh mɔ́ɔ́. Nye á be ó, nye mû kǎ nyɨ̂n ó, mbi swîh.

³Mikán myé, myé á be lɨ́ ebuú pan, myé mû ɨ́ pumo pumo. Kâr mʉ̂r ɨ́ sí yɨ̂ʼ dí e nkul eliŋ míkán ɨ́ pumo pumo mbi waá.

⁴Nó Elie, bé e Moyɨ̂z, bé á nze nyɨ̂n gúmó bé á be yɨ́, Yésʉs, bé e boo nɔ́ɔ́ lɨ́ elɛ́ɛla.

⁵Nó ó Pétrus á nze lɛ́ɛ e Yésʉs ó: «Lɛ̂ʼla ɛ̌, yé mbɨa ɨ́ páʼ gá wɨ́ná ó, mɨná díʼee gá wâ. Mɨná súmaa gá mpálá, bisaʼ bilɛ̂l: le yô, le yaá mé Moyɨ̂z, le yaá mé Elie.»

⁶Pétrus á bé agʉ́a ékǎn nyé á jala le elwib e né lɨ́, ebě, bé e bʉ́ʉ́ ómpʉ́n, bé á be ɨ́ buú jóʼo bʉ́á.

⁷Jwiné nzě búblo bê. Ompʉ́n, bé kǎ jóʼo ó, lʉ́ʉ́ étyêl lɨ́ eduho ɨ́ dwiné tʉ́ŋlʉ̌ ó: «Nyâ, nye ó mwân wǎm mé dí ɨ́ buú kpɛl nyá. Jʉ́jóʼáá gá nye!»

⁸Tyé e tyé yaá, ómpʉ́n ká tyen mîh ɨ́ mempah mɨ́mɛ̂h nɛ́ɛ: bé jaá kǎ beě sɔ̂ʼ ó, njɨ Yésʉs nye omér.

⁹Jɔʼ bé á sulo ecwɨ̂ʼ yɨ́, nó ó Yésʉs á gbâ bé mpéné ó, bé l'anyamlě lɛ́ɛ mʉ̂r lɔ́ɔ, dumo e sá bê bee yɨ́, tó pyâl ɨ́ jɔʼ nyɨ́ɛ, Mwân mé Mʉr ngá pah ɨ́ soo yɨ́.

¹⁰Nó ó bé á nze baʼle sá nyé á lɛ́ɛ bé yɨ́, ntɔ̂ʼ tô le edíila páʼ nyɔ́ɔ́ ó: «Nyě kpɛ̌l élɛ́ɛ yé, dumo le “epah ɨ́ soo” wɨ̂ʼ ɛ̌?»

¹¹Nó ó bé á nze dî e né ó: «Olɛ̂ʼla o métié bɨ́ɛ bé lɨ́ elɛ́ɛ ó, Elie ónyɛɛ́ pyâl ɨ́ yé?»

¹²Nye ó: «Yé ó nó: Elie ó ngá nyɛɛ́ pyâl, lɨ́ enzě komlo bísá bíbyɛ̂h. Sâ gwár, paá pahle gâ: yê cɛmá ó, Mwân mé Mʉr ósia e mitúú ɨ́ buo buo, le epyéhɔɔ.

¹³Sâ gwár, mě lɛ́ɛ́ bɨ́n ó: Elie, nyɨ́ boó nze. Nó bé á si sâ nye mbi bɨ́ɛ á kpɛl wɨ́ mpʉ yé dí cɛmá, dumo e né yɨ́.»

¹⁴Nó ɨ́ jɔ̌ʼ Yésʉs bé le ompʉ́n baá, bé á búla, nzě kœb bʉ́ʉ́ yɨ́, bé ntɔ̂ʼ kœb ntémé entumo e bʉ̂r, le olɛ̂ʼla o métié lɨ́ epére mékǎn e bê.

¹⁵Nó ɨ́ jɔʼ éntumo e bʉ̂r laá, lé á bee Yésʉs yɨ́, lê nzě twɨra, nzě swimɔɔ míkám, lɨ́ etó sohɔɔ nyê.

¹⁶Nye nzě dî e bé ó: «Bɨ̌n le onɔ́ɔ́ lwib yé ɛ́?»

¹⁷Nyʉ́ʉ́ mʉ̂r lɨ́ entumo e bʉ̂r laá nzě nʉa lwib, lɛ́ɛ e né ó: «Lɛ̂ʼla, me bé ó sí nze e sohó wâm kwá nyǒ, ebě, nyě le eleme e dí esâ nyé ó, nye ayɨ́ lwib lɨ́.

¹⁸Nó gúmó yɨ́yɛ̂h éleme laá dí emɛ̂r nyé yɨ́, lé lɨ́ enkɨnkɛŋ nyé sí. Egûl pipyâl nyé ɨ́ num ɨ́ ntomo ntomo, nye pupûʼlo médye, nye mû ɨ́ sʉ́nʉ́nʉ́. Nó me bé ɨ́ jɨʼla le ompʉ́n bô ó, bé sôʼ eleme laá, bɨ́ɛ l'akoʼo.»

¹⁹Yésʉs ntɔ̂ʼ lɛ́ɛ e bé ó: «Myǎ bʉ̂r o dí abûʼla wɨ̂! Me ókǎ báʼǎ di ɨ́ sɔ́má yɨ́n, tó pyâl ɨ́ yáǎ jɔʼ? Me ódûhwo bɨ́n, tó swîʼ yáǎ sûm ɛ̌? Ntáʼ gá e mwân nɨ̌ kâ, nko mé dí yɨ́!»

²⁰Bé ntɔ̂ʼ tô nyé e nyǎ. Le éleme laá, lé á bee nye, le lé á ntyeŋ mwân waá ɨ́ luʼ luʼ luʼ, nkɛŋ nyé sí. Nye ntɔ̂ʼ tô le ebyɛ́ɛla sí e sí, egûl pipyâl nyé ɨ́ num ɨ́ ntomo ntomo.

²¹Yésʉs nzě dî e sɔ́ŋ mwân ó: «Yé mû mimbú míntíá nyé dí le ekpaa lɨ̂ʼ yɨ́ ɛ́?» Sɔ́ŋ nzě yala ó: «Táare ɨ́ ontwǒm wé.»

²²Bîʼ bíjɔʼ, lé lɨ́ enkɛŋ nyé ɨ́ duró. Byúú bíjɔʼ, lé lɨ́ enkɛŋ nyé ɨ́ medíbé ó, lé jʉ́ ó nye. Damá jóʼo nó, gua, jɨ́ʼɨ́ɨ́ bɨ́h nkoó. Kɛmɨɨ bɨ́h, gó bé e nkul ekoʼo nó!

²³Yésʉs, nye e né ó: «Guá lɛ́ɛ́ ó: “Gó bé e nkul nó”! Sâ gwár, mɛ̌m lɛ́ɛ́ ó, mʉr dí edyɛ̂ʼwo e Nzyɛ̌m nyá, nyě e nkul esâ sá yɨ́yɛ̂h.»

²⁴Tyé e tyé yaá, sɔ́ŋ mwân ntɔ̂ʼ lɛ́ɛ kʉ́kʉ́ ó: «Mɨ́ dyɛ̂ʼwo e Nzyɛ̌m! Sâ gwár, ntaá lɨ̌l búʼó yâm!»

²⁵Yésʉs ntɔ̂ʼ bee éntumo e bʉ̂r lɨ́ enzě mâʼlǎ gúmo yaá. Nye nzě nkáŋla e mbɨ́ǎ sísǐm. Nye ó: «Mbɨ́ǎ sísǐm dí esâ ó, mwán nyâʼ díʼee ngʉʼ le ányâ-emúmó wɨ́, mě lɛ́ɛ́ gó ó: duhaa nyé ɨ́ nyʉ̂l. Akǎ báʼǎ nzě nî nyé ɨ́ nyʉ̂l.»

²⁶Mbɨ́ǎ sísǐm, wé ntɔ̂ʼ bʉ̂ bítím, ntyeŋ mwân waá ɨ́ buo buo, nzě duho, líʼe nyé náǎ sí ɨ́ séhé. Bʉr ɨ́ buo buo bé á lɛ́ɛ ó: «Nyɨ́ dwe!»

²⁷Nó ó Yésʉs á nze mɛ̂r nye ɨ́ mbô, nzě gbɛl nyé sí, tyêl nyé tîtyěl.

²⁸Jɔ̌ʼ Yésʉs á búlǎ mbɛ̌r yɨ́, ompʉ́n bé nzě dî e né, bé mû bé omér ó: «Bɨ̌h bɨɛ, bɨ̂h bé akoʼo épɛʼ wé ɨ́ yé?»

²⁹Nye ó: «Wɨ́nɨ̌ mbǐ sísǐm, wé jaá duho ó, njɨ ɨ́ nzɨ̌ minjɨʼla.»

³⁰Bé ntɔ̂ʼ laǎ gúmo yaá, nzě ntaǎ sí Galilê. Yésʉs á bé akpɛl ó, bʉr gʉ́ŋaa súm nyé á be yɨ́,

³¹ebě, nye á be ó, nyě lɛ́ʼlé ó, ompʉ́n bé. Nye e bé ó: «Mwân mé Mʉr óbɛ́mɔɔ kwá bʉr o ngá jʉ̂ nyé bá. Bé ójʉ̂ nyê. Píe melú mélɛ̂l, nye ópah ɨ́ soo.»

³²Damá jóʼo nó, ompʉ́n bé, bé á bé agwá jóʼǒ sá nyé á lɛ́ɛ bé yɨ́. Bé ntémé á be lɨ́ ekpɛ́ɛ édî nyé tíá ɨ́ lɔ̌b waá.

³³Nó ó bé á nze pyâl Kapernáʉm. Jɔʼ bé á be, bé mû tʉ́ŋlʉ̌ mbɛ̌r yɨ́, Yésʉs nzě dî le ompʉ́n bé ó: «Yé bɨ̂n bé lɨ́ edo nzɨ́ e nzɨ̌ yɨ́ ɛ́?»

³⁴Jɔʼ bé á jóʼo tíá nyaá yɨ́, bé á jaa di ó, njɨ ɨ́ jwɨ́m, ebě, nzɨ́ e nzɨ̌ bé á be ó lɨ́ edo, lɨ́ ekpɛl égʉ́a mʉ̂r láá bʉ́ʉ́ ɨ́ mpwaʼ dǐ nyá.

³⁵Nó ó Yésʉs á nze di sí, ntɔ̂ʼ jébe ómpʉ́n bé kám le obá. Nye ó: «Mʉr kpɛ́l étyɛ̂b ésôʼ nyá, nye díʼee mʉr epíhe ɨ́ sɔ́má yɨ́n, bɨ̌n óbɛ̂h. Nye e dí syɛ̂l mesâ wɨ́n, bɨ̌n óbɛ̂h.»

³⁶Píe tɨ̂, Yésʉs nzě nʉa mâ ntwǒm, tyêl nyé ɨ́ mpǒm nyɔ́ɔ́, ntɔ̂ʼ beŋle nyê. Nye ó:

³⁷«Mʉr nyɨnyɛ̂h ngá nʉǎ mbi mâ ntwǒm wɨ̂ʼ mbɨ̂mbɨá ɨ́ díé lâm nyá, nyě nʉá ó me mʉr tɨ̂. Mʉr nʉ́á mé nyá, nyé anʉa mé e me; nyě nʉá ntémé ó, mʉr á ntɨh me nyá.»

³⁸Nó Yʉánɛs á lɛ́ɛ e Yésʉs ó: «Lɛ̂ʼla ɛ̌, bɨ̌h bé á si bee nyʉ́ʉ́ mʉ̂r lɨ́ eso méleme ɨ́ bʉr e nzɨ̌ díé lô. Bɨ̌h ntɔ̂ʼ kamle nyé lɨ́ ebáʼǎ sâ syɛ́ɛla yaá, ebě, nyé abe mʉ̂r sɔ́má gá yɨ́ná.»

³⁹Nó ó Yésʉs á yala e né ó: «Akamle gá nye, ebě, mʉr, nyé abe e nkul esâ mésimá ɨ́ díé lâm, nye ntɔ̂ʼ swêʼ mé ɨ́ tyé e tyé gwár yaá.

⁴⁰Ebě, waá dí abe mɨ́ná gá ɨ́ nkɔ̌m kɔ́m nkɛ́ɛ́ nyá, nye ɨ́ nkɔ̌m gá nyɨ́ná.

⁴¹Nó ntémé, mʉr ngá dwe bɨ́n bélé médíbé ɨ́ lɔ̌b bɨ́n dí ɨ́ sɔ́má mé Mʉ̂r Nzyɛ̌m á lœm múló mé jwɨ́ɨ nyá, me lɨ́ elɛ́ɛ bɨ́n lɨ́ otyeetye ó, nye óbi myɛ́na mé.»

⁴²«Ɨ́ nkǒ páʼ bwán ó dí edyɛ̂ʼwo e me bá, mʉr nyɨnyɛ̂h ngá gbâ ébɔ̌ʼ lé óbɨma ngwár tɨ̂ʼ ɨ́ léme lɨ́ nyá, yé bá bě mbɨ̂mbɨá ɨ́ páʼ wé ó, bé tyéelaa nye nkǒʼ nɨ́nɨ́ɨ́ ɨ́ twíí, guho nyé ɨ́ mâŋ.

⁴³Yé bé mbó gô ngwár ó dí etíne gó ó, go sâʼ syóm nó, tíʼáá wê, ebě, yé mbɨa ɨ́ páʼ gô ó, go díʼee e dyɛ̂m tyé twiʼ, ntɔ̂ʼ dwe, kǎ tó beě twiʼ mpâ, laa ó, go díʼee e mebó mébá mô, ntɔ̂ʼ tô ɨ́ bɨ́ siʼe dí adímedime yɨ́.

⁴⁴

⁴⁵Yé bé kʉ̌ gô, wé ó dí etíne gó ó, go sâʼ syóm nó, tíʼáá wê, ebě, yé mbɨa ɨ́ páʼ gô ó, go tô beě twiʼ mpâ, go dína e tîʼlǎ kʉ̌, laa ó, go díʼee e mekʉ̌ mebá mô, ntɔ̂ʼ tó guhɔɔ ɨ́ bɨ́ siʼe.

⁴⁶

⁴⁷Yé bé díh lô ó dí etíne gó ó, go sâʼ syóm nó, pɛʼɛɛ lê. Yé mbɨa ɨ́ páʼ gô ó, go kúmaa ɨ́ kwár mé Nzyɛ̌m e dîh egwár, laa ó, go díʼee e míh mébá mô, tó guhɔɔ ɨ́ bɨ́ siʼe.

⁴⁸Ɨ́ tɨ̂ʼ, “bilúmó bi dí epoʼlo nyʉ̂l bí, byé abe lɨ́ edwe. Siʼe ntémé adímedime.”

⁴⁹Ebě, mʉr nyɨnyɛ̂h óbe tɨ̂ʼ ó, siʼe nî nyé ɨ́ nyʉ̂l ɨ́ dwíííá mpʉ ékpa.»

⁵⁰«Ekpa, lé ó sá dí ɨ́ mbɨa yɨ́. Sâ gwár, ékpa bé akǎ jómo nó, yáǎ sɔ̂ʼ ngá báʼǎ sâ ó, lé bíʼee ejómo lé? Diʼee gá le ekpa ɨ́ menyʉ́l mɨ́n. Bɨ̌n a tíʼé gá ɨ́ mepyɛbla.»