Read Koonzime Luc 10 Bible Online

Luc 10 - Koonzime bible

Luc 10

¹Píe tɨ̂, Tî Yésʉs nzě twâr bʉ́ʉ́ bʉ̂r, tâŋ mekám nzaangbá le obá, ntɔ̂ʼ lómo bé dóló, bʉr obá óbá. Bé ntɔ̂ʼ tô bínkana e bínkana byɛ̂h, ɨ́ bisúm bíbyɛ̂h nyé á be ó, nye kúmaa bí.

²Nó nyé á lɛ́ɛ e bé ó: «Yé ɨ́ buo méde mû sí tɨ̂ ɨ́ pemé má. Sâ gwár, bʉr o tó kpɛm méde maá bá, bé abuo. Nó, jɨʼlaa gá e Kúm pemé ó, nye lómaa bilóbila ɨ́ buo buo. Bé tô kpɛm méde ɨ́ pemé.

³Tóʼ gâ. Paá bee: mě lómó bɨ́n ó mpʉ bwá bínteme páʼ onkœœ!

⁴Anʉa gá mimpɨ́ʼ, myaá mí mɔnɨ́, nkʉ̂ myah, nkʉ̂ osípah. Abára gá e mʉr téme-nzɨ̌.

⁵Jɔʼ bɨ́n ní ɨ́ mbɛ̌r yɨ́, lɛ́yɨ́ɨ́ gá bʉr ó mbɛ̌r ó: “Mepyɛbla, mé díʼee bɨ̌n ɨ́ miléme!”

⁶Mʉ̂r mbɛ̌r waá bé mʉ̂r mepyɛbla nó, meswɨhlɨ mɨ́n, mé ókœ̌b já ɨ́ lémé wé. Nyé obáʼǎ nʉa mépyɛbla me dí eduho ɨ́ meswɨhlɨ maá má. Nyé bé abe mʉ̂r mepyɛbla nó, mepyɛbla maá, mé óbúla, báʼǎ kumo ɨ́ bɨ̌n.

⁷Mbɛ̌r bɨ́n ngá di wɨ́, diʼee gá tɨ̂. Déʼ gá sá bʉ̂r o tɨ̂, bé ódwe bɨ́n yɨ́, ebě, syɛ̂l mesâ jala ó, dweŋɔɔ myɛ́na mé. Atô le ede gá mímbɛ̌r e mímbɛ̌r myɛ̂h.

⁸Bɨ́n ní ɨ́ nkana, kœb ó, bé lɨ́ egwá baʼle bɨ́n nó, bɨ̌n e dé sá yɨ́yɛ̂h ngá dweŋɔɔ bɨ́n yɨ́.

⁹Tiʼɨɨ gá mimbél mí nkana yaá. Bɨ̌n e lɛ́ɛ́ e bʉr ó nkana yaá ó: “Nzyɛ̌m mû ó kúno etyêl Mpóʼo nyé ɨ́ bɨ̌n.”

¹⁰Bɨ́n pyál ɨ́ yʉ́ʉ́ nkana, bʉr o tɨ̂ʼ abaʼle bɨ́n nó, tóʼ gá ɨ́ minkpǎʼ mi tɨ̂. Bɨ̌n e tútúnó nkpǎʼ e nkpǎʼ ó:

¹¹“Bɨ̌h bɨ́ kuro pím nkana yɨ́n dí enara bɨ́h ɨ́ mekʉ̌ nyɨ́. Gʉ́ŋáá gá ó, Mpóʼo mé Nzyɛ̌m mû ó lɨ́ ekúnwo e bɨ̌n!”

¹²Mě lɛ́ɛ́ bɨ́n ó, dʉ́ó Nzyɛ̌m ótíʼe bʉ̂r milɔ̌b, dwe bé mebě yɨ́, bintɨ́ʼá byɔ́ɔ́, byé óbuú bwaʼ, laa byaá bi bʉ̂r ó Sodôm.»

¹³«Nkoó, nye ó e bɨ̌n, bʉr ó Korazîn! Nkoó, nye ó e bɨ̌n, bʉr ó Bétsɛ́da! Yé bé mesimá mé á sâ kwá nyɨ́n má, mé á syɛ́ɛ ó Tîr e Sidɔ̂n nó, lɛ́ɛ́, bʉr o tɨ̂, bé á si di ɨ́ bwǎh, kʉ́ba mínkura, le elɔma méswií lɨ́ elɛ̂ʼle ó, bɨ́ túmo míkoo e mebébe mɔ́ɔ́, le edwira míléme.

¹⁴Sɨ́ǎ yaá ó, dʉ́ó Nzyɛ̌m ngá tíʼe bʉ̂r milɔ̌b yɨ́, Tîr, bé e Sidɔ̂n ngá be, abuú dweŋɔɔ bíntɨ́ʼá mpʉ bɨ́n yɨ́.

¹⁵Á gua, Kapernáʉm, nzê go óbɨ́nɔɔ, tó pyâl ɨ́ jʉ́o kʉ́ ɛ̌? Tʉ̂toʼó! Go ósulɔɔ sí, tó pyâl ɨ́ bɨ́ siʼe.»

¹⁶Nye nzě lɛ́ɛ le ompʉ́n bé ó: «Waá sá bɨ́n mejóʼo nyá, nyɨ́ jóʼo mê. Waá ntémé béné bɨ́n nyá, nyɨ́ bene ntémé me. Ntémé, waá béné mé nyá, nyɨ́ bene mʉ̂r á ntɨh me nyá.»

¹⁷Bʉr mekám nzaangbá le obá baá, mpúla bé á búla nyɨ́, bisʉhʉʉ, byé á be bé ɨ́ miléme ó lwɨ́ŋlá. Bé ó: «Dâ ɛ̌, meleme, mé lɨ́ esâ bɨ́h mejóʼo ɨ́ jɔʼ bɨ́h dí eso mé e nzɨ̌ díé lô yɨ́!»

¹⁸Yésʉs ntɔ̂ʼ lɛ́ɛ e bé ó: «Me á si bee Sátan lɨ́ eduho ɨ́ jʉ́o kʉ́ mpʉ̌ ndweh mpíé.

¹⁹Jóʼláá gâ: me á si dwe bɨ̌n nkul etíbe ónyʉ́a ndu e bibámlwál. Mɨ́ dwe bɨ́n nkul entaa ménkul mɨ́mɛ̂h me ntɨ̂m e mbɨn gá wɨ́ná. Sá ébébe, yé abe e nkul epyâl ɨ́ bɨ̌n.

²⁰Sâ gwár, ayɨ́ buú soho gá ɨ́ lɔ̌b mímbɨ́a mísísǐm, byé lɨ́ esâ bɨ́n mejóʼo. Sohaa gá ebe míé mɨ́n dí micɛmá ɨ́ jʉ́o kʉ́.»

²¹Ɨ́ jɔʼ yaá, Sísǐm mé Nzyɛ̌m nzě lóŋlǒ lémé mé Yésʉs e bisʉhʉʉ. Nó nyé á lɛ́ɛ ó: «Dâ, me lɨ́ edwe gó kûm, gua, Njwɨ́ɨ kʉ́ e sí, ebě, go á si lɛ̂ʼle bʉr o dí mpʉ bwá ó ntwǒm bá, bisá gó á sol ocwóó ndu e l'ogwɨ́a ó sí yɨ̂ʼ bí. Dâ ɛ̌, yé ó nó! Ebě, go á boo bi bísʉhʉʉ ɨ́ lémé gô ó, yé sáŋɔɔ nó.

²²«Sɔ́ŋ wǎm á si dwe me bisá bíbyɛ̂h. Abe e mʉr dí egʉ́a Mwân, pɛ̌ʼ njɨ Nzyɛ̌m Sɔ́ŋ nye omér. Abe e mʉr dí egʉ́ǎ Nzyɛ̌m Sɔ́ŋ, pɛ̌ʼ njɨ Mwân ndu e waá Mwân kpɛ́l élɛ̂ʼle nyá.»

²³Yésʉs ntɔ̂ʼ lɛ́ɛ le ompʉ́n bé, bé mû bé omér ó: «Bɨ̌n bɨɛ, metyɛʼ me mpóm, mé díʼee e bɨ̌n, ebě, míh mɨ́n, mé lɨ́ ebee bísá bínɨ̌.

²⁴Mě lɛ́ɛ́ bɨ́n lɨ́ otyeetye ó, ogwíha o mílɔ̌b le ojwɨ́ɨ ɨ́ buo buo, bé á gwɨ̂gwɨm ó, bé béyɨɨ sá bɨ́n dí ebee yɨ̂, sâ gwár, abee, le ejóʼǒ sá bɨ́n dí ejóʼo yɨ́, sâ gwár, ajóʼo yê.»

²⁵Nyʉ́ʉ́ lɛ̂ʼla metié nzě mɔa sí, nzě bóblǒ Yésʉs. Nye e né ó: «Lɛ̂ʼla, me sâʼ wáǎ mbi sɔ̂ʼ dí ó, me nʉ́aa twǐʼ njʉ̌m dǐ, jala e nkɔb líʼe nyǎm?»

²⁶Yésʉs nzě yala ó: «Metié gá mɨ́ná, mé lɨ́ elɛ́ɛ yé? Go lɨ́ eláa yé tɨ̂?»

²⁷Mʉr waá ntɔ̂ʼ yala ó: «Mé lɛ́ɛ́ ó: “Kpɛlɨɨ̌ Dâ, dí Nzyɛ̌m gǒ nyá, le lémé gô wɨ́wɛ̂h, le sísǐm gô wɨ́wɛ̂h, le nkul nyǒ nyɨnyɛ̂h, le pɨʼ nyǒ nyɨnyɛ̂h.” Mé lɨ́ ebáʼǎ lɛ́ɛ ó: “Kpɛlɨɨ mɨ́ɔɔ́ gǒ mʉr mpʉ gó dí ekpɛl gó mʉr tɨ̂ʼ yɨ́.”»

²⁸Yésʉs ntɔ̂ʼ lɛ́ɛ ó: «Gʉ́ kʉ́ gwá yala. Sáʼ nó, go nkʉ̂ tiʼe.»

²⁹Tó kœb ó, lɛ̂ʼla waá á be lɨ́ edǐ lɛ̂ʼle ótîtyěl wé. Nye ntɔ̂ʼ dî e Yésʉs ó: «Á mɨ́ɔɔ́ wǎm mʉr, nye nzé?»

³⁰Yésʉs ntɔ̂ʼ lɛ́ɛ ó: «Nyʉ́ʉ́ mʉ̂r á be ɨ́ duhǒ Yerʉ́zalɛm ó, nyě tó ó Yerikô. Nyé dína téme-nzɨ̌ nɛ́ɛ: binzilngǎn nzě duho lɨ́ eboʼo bé á la lɨ́, nyába nyé ɨ́ nyʉ̂l, pɛʼɔɔ nyé mikán, bíŋɔɔ nyê, ɨ́ bíŋɔɔ bíŋɔɔ, líʼɔɔ nyé múu ɨ́ séhé.

³¹Nó nyʉ́ʉ́ pára á be lɨ́ elaa ɨ́ nzɨ̌ nyaá. Mbeá nyé á bee mʉ̌r nɨ̌ yɨ́, nye ntɔ̂ʼ syɛ̂hle, ntaa ɨ́ lʉ́ʉ́ émpah e nzɨ́, tô yé.

³²Jwɨʼ gwár e gwár yaá, ɨ́ jɔʼ mʉ̂r onzweh mé Levî á pyâl tɨ̂, dwɛ̂ʼ mʉ̂r waá yɨ́, nye á jaa kpâh ó kpáháa ɨ́ gúú páʼ nzɨ́.

³³Nó yé á ka sâ ó, nyʉ́ʉ́ mʉ̂r Samarî á be lɨ́ elaa ɨ́ nzɨ̌ mpwár nyaá nyá, á nze kumǒ gúmo yaá. Mbeá nyɨ́ɛ á bee mʉr waá yɨ́, nye kʉ́ nzě jɨ̂ʼ nyé nkoó,

³⁴sîhlě bǎʼ e né, sʉ nyé menyoʼ le múlo ɨ́ mepɨ́ɨ́, dyɛl mé e mimyɔʼ. Nye nzě byɛɛle mʉ̂r waá, kɛl nyé kʉ́ tír nyé mʉr tɨ̂ʼ á kɨkalwo tɨ̂ʼ nyá, ntɔ̂ʼ tô e né, tó dyêʼ nyé ɨ́ joó ɨ́ gúú mbɛ̌r ójwóo. Bé e nɔ́ɔ́ ntɔ̂ʼ bá dǐ sɔ́má, mʉr Samarî lɨ́ esúʼo nyê.

³⁵Jáŋɔɔ sí. Ɨ́ mɛ́n, nye ntɔ̂ʼ nʉa mínzaŋ mí mɔnɨ́ mimbá, dwe mʉ̂r mbɛ̌r. Nye e né ó: “Gwá baʼle mé nyǎ. Jɔʼ mé óbúla yɨ́, me óbwóolo gó sá yɨ́yɛ̂h gó ngá dímle lɨ́ ebaʼle nyé yɨ́.”»

³⁶Yésʉs ntɔ̂ʼ dî e lɛ̂ʼla metié waá ó: «Ɨ́ bʉr olɛ̂l bé á bee mʉr á bíŋɔɔ nyá bá, waá wáa á lɛ̂ʼle ó, nye ó mɨ́ɔɔ́ wé mʉr nyá? Gǒ bee nyá?»

³⁷Lɛ̂ʼla metié ntɔ̂ʼ lɛ́ɛ ó: «Waá á cwɨ́a e né nyá.» Yésʉs ntɔ̂ʼ lɛ́ɛ e né ó: «Tóʼ. Go e tó sâ jwɨʼ gwár yaá.»

³⁸Mpʉ̌ Yésʉs, bé le ompʉ́n bé, bé á be lɨ́ etô ɨ́ nzɨ̌ nyaá yɨ́, bê nzě pyâl ɨ́ nyʉ́ʉ́ kwár. Mʉmá kwár nyaá, díé lé Mááta, ntɔ̂ʼ soho nyê, tira nyé ntɔ́ɔ ɨ́ mbɛ̌r wé.

³⁹Nó Mááta á be ó e mɨ́ɔɔ́ wé, Maria. Tî Yésʉs á be ó lɨ́ elwib e Maria, Maria waá ndîndǐl bǎʼ e mekʉ̌ mé lɨ́ ejôʼlǒ sá nyé á lɨlɛ́ɛ yɨ́.

⁴⁰Mááta nyɨɛ á be ó lɨ́ elûhwa e bisyɛ́ɛ́ ɨ́ buo buo. Nye nzě pyâl gúmó Yésʉs á be yɨ́, le elɛ́ɛ e né ó: «Dâ ɛ̌, nzê yé abá lɛ́ɛ gó sɔ̂ʼ ɨ́ jɔ̌ʼ Maria dí entúŋlo mɛ̂m me omér e bisyɛ́ɛ́ nó yɨ́ ɛ́? Lɛ́yɨ́ɨ́ nyé ó, nye kœ́bɨɨ me ɨ́ syɛ́ɛ́!»

⁴¹Tî Yésʉs ntɔ̂ʼ yala e né ó: «Mááta, Mááta, gua, gǒ yéʼwó ó bisɔ̂ʼ ɨ́ buo buo.

⁴²Tó kœb ó, sá dí ɨ́ buú buǒ nyɔm yɨ́, yé ó njɨ gwár. Sâ yaá, yé ó mbɨambɨa nkɔ̌b Maria nyɨɛ pɛ́h nyɨ́. Abe e mʉr ópɛʼ nyé nyǎ.»