Read Koonzime Luc 11 Bible Online

Luc 11 - Koonzime bible

Luc 11

¹Ɨ́ lʉ́ʉ́ dʉ́o, Yésʉs á be ó yʉ́ʉ́ gúmo lɨ́ ejɨʼla. Jɔʼ nyé á sil ejɨʼla yɨ́, nyʉ́ʉ́ mpʉ́n wé ntɔ̂ʼ lɛ́ɛ e né ó: «Dâ ɛ̌, lɛ́ʼláá bɨ́h esâ mínjɨʼla mpʉ̌ Yʉánɛs Ndubʉr nyɨɛ á lɛ̂ʼle bé ómpʉ́n myaá myɔ́ɔ́ yɨ́.»

²Yésʉs ntɔ̂ʼ lɛ́ɛ e bé ó: «Jɔʼ bɨ́n dí ejɨʼla yɨ́, lɛ́yɨ́ɨ́ gá ó: “Sɔ́ŋ wɨ́h, lɛ́ʼláá bʉ̂r bɨ́bɛ̂h ó, go ó Nzyɛ̌m dí ti nyá. Jwɨ́ɨ́ yô, yé ntâʼ.

³Jwǐdwéʼ bɨ́h mede me jálá e bɨ̌h ɨ́ dʉ́ó lɨ́lɛ̂h má.

⁴Pɛʼɛɛ bíbaa gó á niʼe bɨ̌h ɨ́ lɔ̌b mébébe mɨ́h bí, ebě, bɨ̌h ntémé bé lɨ́ epɛʼ bíbaa bɨ́h dí eniʼe bʉ̂r bɨ́bɛ̂h ɨ́ lɔ̌b ébébe bé dí esâ bɨ́h lɨ́. Ayɨ́ bîr ó, bɨ̌h níʼee ɨ́ mebʉ́blá.”»

⁵Nye ó: «Mʉ̂r ɨ́ sɔ́má yɨ́n bé e só nó, nye óbánǎ tó kœb nyé témé pum, le elɛ́ɛ e só waá ó: “Mɨ́ɔɔ́ wǎm, paá kʉl mé biblêr bilɛ̂l.

⁶Nyʉ́ʉ́ só wǎm, nyɨ́ búla ɨ́ tyen, pyâl kwá nyǎm. Mé abe e sá mé dwé nyê.”

⁷Só wé nyé á to bee nyá, sí kǎ yala e né tʉ́ŋlʉ̌ mbɛ̌r ó: “Ayɨ́ kǎ ntɨ̂ʼ mê. Ebê, lɨ́ boó pɨrɔɔ le sab. Bɨ̌h e bwán bâm mû ó minjáʼ mí sí. Mé abe e nkul ekǎ gbɔlwa sí, dwe gó sɔ̂ʼ.”

⁸Mě lɛ́ɛ́ bɨ́n ó, damá jóʼo bé e nɔ́ɔ́ bé ó osó, nye óbánǎ yala ɨ́ mbi waá, le ebene égbɔlwa sí. Sâ gwár yɨ́ɛ, nye ónzoó gbɔlwa sí, dwe só wé sá yɨ́yɛ̂h nyê bé lɨ́ edî yɨ́ ó, ebe nyé dí ejaʼ, atyɛʼ nkûl.

⁹«Mɛ̌m lɛ́ɛ́ e bɨ̌n ó, gwámáá gâ, bɨ̌n nkʉ̂ bi. Sáŋáá gâ, bɨ̌n nkʉ̂ bee. Kwáʼláá gá ebê, lé nkʉ̂ dibɔɔ bɨ́n.

¹⁰Ebě, mʉr nyɨnyɛ̂h dí egwâm nyá, óbi. Mʉr dí esáa nyá, óbee. Ebê, lé ódibɔɔ lɨ́ esú é mʉ̂r dí ekwâʼle nyá.

¹¹Wáa mʉ̂r ɨ́ sɔ́má yɨ́n dí ó, mwân wé gwám nyé sû nɛ́ɛ: nyě kǎ dwe nyé nyʉ́a ɨ́ dilá sû nyê gwám nyá?

¹²Nzê nyě e nkul edwe nyé bámlwál ɨ́ jɔʼ nyé jáʼ nyé ecɨ́ é kúo yɨ́ ɛ́?

¹³Bibɨ́bla bi bʉ̂r bɨ́n dí nɨ̌, bɨ̌n pǎ nyɛɛ́ dwe bwán bɨ́n bisá bímpâ, á dwɛʼra e Sɔ́ŋ wɨ́n! Nye óntɨ̌h Sísǐm wé, duho ɨ́ jʉ́o kʉ́, dwe wé bʉr o dí egwâm nyé wǎ bá.»

¹⁴Ɨ́ lʉ́ʉ́ dʉ́o, Yésʉs á be ó lɨ́ edwih mʉ̂r eleme. Mʉr waá á be ó ányâ-emúmó, duho lɨ́ eleme nyé á jaʼra e lé lɨ́. Jɔʼ éleme, lé á duho ɨ́ nyʉ̂l nyé yɨ́, mʉr á be ányâ-emúmó nyá, ntɔ̂ʼ báʼǎ táare élwib. Entumo e bʉ̂r nzě twɨra.

¹⁵Nó bʉ́ʉ́ bʉ̂r, bé á nze lɛ́ɛ ó: «Yé ó Béelzébul, njwɨ́ɨ meleme, ó dí edwe nyé nkul ó, nye sôʼ meleme ménɨ̌.»

¹⁶Bʉ́ʉ́, bé á si sáa ebóblo nyê. Bé ó, nye sâʼ bé esimá e nkul dí eduho ɨ́ jʉ́o kʉ́ nyɨ́.

¹⁷Nó mpʉ nyé á gʉ́a bijwɨʼ byɔ́ɔ́ yɨ́, nye e bé ó: «Kúl yɨ́yɛ̂h bʉ̂r o tɨ̂ʼ dí elwímla páʼ nyɔ́ɔ́ yɨ́, yé lɨ́ esûʼla ó ɨ́ twíilɨ̌, akǎ be e bʉr. Wɨ̂ʼ mbɛ̌r, wé ónkaŋa é gúú.

¹⁸Yé bé bʉr mé Sátan, bɨ́ bɔ́ʼa, sâ ménkɔ̌m mebá nó, lɛ́ɛ́, mpóʼo nyé, nyé abe e nkul ebyéa le ejah ó tɨ̂ʼ yɨ́. Ebě, bɨ̌n lɛ́ɛ́ ó, mě dwidwǐh bʉ̂r meleme ó e nkul dí eduho kwá mé Béelzébul nyɨ́.

¹⁹Bɨ́n lɛ́ɛ́ ó, mě sǒ méleme ó e nzɨ̌ nkul Béelzébul dí edwe mé nyɨ́ nó, á nzé nyɨɛ dí edwě dyɛɛ́ yɨ́n nyɔ́ɔ́ nkûl eso mê? Bé bʉr o tɨ̂, bé ó dí elɛ̂ʼle ɨ́ kpɛŋlɛm ó, bɨ̌n bé e mebě.

²⁰Yé bé mě sǒ méleme ɨ́ bʉr e nkul diné mé Nzyɛ̌m nó, lɛ́ɛ́, Mpóʼo mé Nzyɛ̌m mû ó, lɨ́ ekúnwo e bɨ̌n.

²¹«Jɔ̌ʼ nkɔ́ɔ́ mʉ̂r mû sí komlo dɔ̂m yɨ́, yé lɨ́ ebaʼle mébi mé ɨ́ puuu, akpɛ́ɛ̌ sɔ̂ʼ.

²²Damá jóʼo nó, jɔʼ nyʉ́ʉ́ ánkul-bituma láá nyé nyá, ntáá nyé ɨ́ dɔm yɨ́, nye ópar nyé bisá bí dɔ̂m nyé á bûbuʼla bí. Nyé onʉa byê, kab bʉ̂r oswîh.

²³«Mʉr nyɨnyɛ̂h dí abe ɨ́ nkɔ̌m nyǎm nyá, nye me ó ɨ́ nkɔ̌m kɔ́m nkɛ́ɛ́. Mʉr dí akœb mé lɨ́ esyɛŋ nyá, nye lɨ́ egbah ó gbaháa.»

²⁴«Jɔ̌ʼ mbɨ́ǎ sísǐm wé mû sí duho mʉ̂r ɨ́ nyʉ̂l yɨ́, wé sɨ́sá ó, tô le epómo, lɨ́ esáǎ gúmó égbala. Tó kœ̌b njɨ bigúmo bi dí ɨ́ swáh swáh bí. Mpʉ wé dí abeě gúmó égbala yɨ́, wé lɨ́ elɛ́ɛ ɨ́ wé mʉr tɨ̂ʼ ó: “Mě búlá ó, tô mbɛ̌r wâm, gúmó mé á pa duho yɨ́.”

²⁵Wé ntɔ̂ʼ búla, kœ̌b mbɛ̌r ngwámlá, mbɨambɨa kʉmsá.

²⁶Wê nzě tó nʉa mísísǐm miswîh, myaá myé á be ɨ́ buú bébe, laa wé mí, nzaangbá. Myé ntɔ̂ʼ búlǎ sɔ́má, nzě diŋɔɔ sí ɨ́ mbɛ̌r waá. Ɨ́ jɔ̌ʼ nɨ̌, ntɨ́ʼá mʉ̂r waá ókǎ sia e yé yɨ́, yé ólaa yaá ésôʼ lɨ́ ebébe.»

²⁷Yésʉs dína lɨ́ ekʉ́ lwib nó nɛ́ɛ: nyʉ́ʉ́ mʉ́má ntɔ̂ʼ pâm lɨ́ entumo e bʉ̂r laá. Nye e Yésʉs ó: «Metyɛʼ me mpóm, mé díʼee e mʉmá á nkɛ́ɛ go ɨ́ mo wé, le edêhle gó ebél lé nyá!»

²⁸Nó ó Yésʉs á yala e né ó: «Metyɛʼ me mpóm, mé buú buo ó e baá o dí ejóʼo mílɔ̌b mé Nzyɛ̌m ndu e l'ebaʼle myé bá.»

²⁹Ɨ́ jɔʼ bʉ̂r, bé á be lɨ́ emâʼlǎ gúmó Yésʉs á be yɨ́, nye e bé ó: «Á bébe bʉ̂r ó myǎ wɨ̂ʼ ɛ̌! Bé lɨ́ edǐ bee mésimá. Bé ákóʼó bee ésimá egwár, alaa ó laá lé á syɛ́ɛ ɨ́ twiʼ mé Yʉ́nas lɨ́.

³⁰Ebě, jwɨʼ gwár e gwár e mpʉ bʉ̂r ó Ninevâ, bé á bee esimá lɨ́ esyɛ́ɛ ɨ́ twiʼ mé Yʉ́nas, jwɨʼ gwár yaá ntémé ó bʉ̂r ó myǎ wɨ̂ʼ ngá bee ésimá lɨ́ esyɛ́ɛ ɨ́ twiʼ Mwân mé Mʉr yɨ́.

³¹Ɨ́ dʉ́ó lé étíʼ é mílɔ̌b, njwɨ́ɨ mʉmá á duhǒ díbé tie nyá, ótyɛ̂b, nwâhle bʉ́rʉ̂m ó myǎ wɨ̂, ebě, nye á si duho médumo me ntwíʼ, lɨ́ enzě jóʼo métwɨ́ɨ́ mé ócwóó mé Salomɔ̂ŋ. Paá bee gâ: sá láá Salomɔ̂ŋ yɨ́, yé ó wâ.

³²Ɨ́ dʉ́ó lé étíʼ é mílɔ̌b, bʉrʉ̂m ó Ninevâ, bé ógbɔlwa, nwâhle bʉ̂r ó myǎ wɨ̂, ebě, bé á be ó sí túmo míkoo le edwira míléme lɨ́ ejóʼo mpáŋla mé Yʉ́nas. Nó, paá bee gâ: sá láá Yʉ́nas yɨ́, yé ó wâ.»

³³«Mʉr, nyé abe lɨ́ etumo éláma lɨ́ esú lé égbâ lé lɨ́ esǒ. Yé jala ó, bé tyélɨɨ lé ɨ́ tyélátyéla éláma kʉ́, ó bʉr nkʉ̂ kœ̌b mbɛ̌r e myɛ́n ɨ́ jɔʼ yɨ́yɛ̂h bé nî yɨ́.

³⁴Díh lô, lé ó eláma e nyʉ̂l nyǒ. Yé bé díh lô, lé ó mbɨ̂mbɨá nó, lɛ́ɛ́, nyʉ̂l nyǒ nyɨnyɛ̂h, nye ó ɨ́ myɛ́n tʉ́ŋlʉ̌. Lé bé abě mbɨ̂mbɨá nó, lɛ́ɛ́, nyʉ̂l nyǒ nyɨnyɛ̂h, nye ó lɨ́ edúrʉ́ʉ́.

³⁵Gwá di gá ocwóó, lɨ́ ekpɛ́ɛ ó, dwé bɨ́n dí e yé yɨ́, yé ayɨ́ liŋa édúrʉ́ʉ́!

³⁶Nyʉ̂l nyǒ nyɨnyɛ̂h bé ɨ́ myɛ́n, yʉ́ʉ́ tîl l'akǎ lîʼ lɨ́ edúrʉ́ʉ́ nó, lɛ́ɛ́, go mʉr tɨ̂ʼ ntinɨ̂ mû ó ɨ́ myɛ́n tʉ́ŋlʉ̌. Yé ó mpʉ éláma e dí epan gó myɛ́n lɨ́.»

³⁷Jɔ̌ʼ Yésʉs á be lɨ́ elwib yɨ́, nyʉ́ʉ́ Farizyɛ̂n ntɔ̂ʼ jébe nyê. Nye e né ó: bé e nɔ́ɔ́ tô dě mbɛ̌r wé. Bé ntɔ̂ʼ tô, níŋɔɔ̌ mbɛ̌r, diŋɔɔ sí ɨ́ téble.

³⁸Farizyɛ̂n waá á be ɨ́ kâm ɨ́ jɔʼ nyé á bee ó, Yésʉs á bana nze lɨ́ edɨ́ɨ́ ó, apǎ jwɨɨ mébô yɨ́.

³⁹Nó ó Tî Yésʉs á nze lɛ́ɛ e né ó: «Paá bee gá mpʉ bɨ́n oFarizyɛ̂n dí yɨ́: bɨ̌n sʉsohlo bísʉ́á le bikɔ̂b ó ɨ́ páʼ kʉ̌l. Sâ gwár, bɨ̌n bɨ́ lóno ɨ́ bisá bɨ́n á pa dɛn bí, le sá bɨ́n á sâ e jélé yɨ́.

⁴⁰Bɨ̌n bisá bígʉ́ʼ bî: Nzyɛ̌m, mʉr á komlo mʉr nyʉ̂l páʼ kʉ̌l nyá, ntʉ nyé ntémé á komlo nye páʼ tʉ́ŋlʉ̌ ɛ̌?

⁴¹Dwéʼ gá baántéʼenteʼe o bʉ̂r sá dí ɨ́ bisʉ́á bín tʉ́ŋlʉ̌ yɨ́. Bɨ̌n bé óbee ó, bisʉ́á bín bíbyɛ̂h, byé ó mbɨ̂mbɨá ɨ́ míh mé Nzyɛ̌m.

⁴²«Nkoó, nye ó e bɨ̌n, oFarizyɛ̂n, ebě, bɨ̌n damá bi bísâ bi dí ɨ́ twâʼwo bí mpʉ bíká ménumó, biká bí dʉ̂m ti e byaá mépulo, bɨ̌n bé lɨ́ ebánǎ dwě Nzyɛ̌m nkɔb mpwár ɨ́ menkɔb kám tɨ̂. Tó kœb ó, bisyɛ́ɛla bi mpâm le byaá bí ótîtyěl Nzyɛ̌m dí ɨ́ buú beě mbɨ̂mbɨá bí, bɨ̌n bé lɨ́ epyêh byê. Yé jala ó, bɨ̌n dwêʼ nye nkɔb bisá bín dí nyaá nyé nyɨ́. Sâ gwár, ajɨha ntémé bisyɛ́ɛla bi mpâm le byaá ótîtyěl.

⁴³«Nkoó, nye ó e bɨ̌n, oFarizyɛ̂n! Bɨ̌n bʉr o dí esâ: jɔʼ yɨ́yɛ̂h bɨ́n dí etô ɨ́ mpáh minjɨʼla yɨ́, susuɔɔ̌ njɨ bidiá bí ésôʼ. Jɔʼ bɨ́n tó lɨ́ ebɨ̌m é pátele yɨ́, bɨ̌n kpɛl ó, bʉr sɨ̂seʼlaa bɨ̌n ɨ́ jɔʼ bé dí ebára e bɨ̌n yɨ́.

⁴⁴Nkoó, nye ó e bɨ̌n! Ebě, bɨ̌n bé ó mpʉ mésoo dí akǎ nyɨ̂n kʉ̌l má. Bʉr, bé lɨ́ etíbe mésoo maá, bɨ́ɛ l'agʉ́a ó, bé lɨ́ ekúna e sá mélwaʼwo.»

⁴⁵Nó nyʉ́ʉ́ lɛ̂ʼla metié á nze lɛ́ɛ e né ó: «Lɛ̂ʼla, jɔʼ gó dí elwib le oFarizyɛ̂n nó yɨ́, go lɨ́ esámle ntémé bɨ̌h le onɔ́ɔ́ bɨ́bɛ̂h.»

⁴⁶Yésʉs, nye e né ó: «Nkoó, nye ó e bɨ̌n ntémé, olɛ̂ʼla o métié! Bɨ̌n bé lɨ́ egbâ bʉ̂r mimbeʼ médile ɨ́ mikoo ɨ́ nzɨʼrɨ, ó bé nkɛ́yɨɨ myê. Bɨ̌n bɨɛ l'akɛm bé lɨ́ enkɛ́ɛ myê, damá jóʼo ó e diné gwár.

⁴⁷Nkoó, nye ó e bɨ̌n! Bɨ̌n bé lɨ́ ekɔ̂n mésoo mé ógwíha o mílɔ̌b. Tó kœb ó, bimpám bín ó b'á jʉ̂ bê.

⁴⁸Mpʉ bɨ́n dí ekɔ̂n mésoo mɔ́ɔ́ nó yɨ́, bɨ̌n bé lɨ́ eboʼlo tɨ̂ʼ lɨ́ otyeetye ó, osɔ́ŋ bɨ́n ó dí e mpono meswie mɔ́ɔ́. Osɔ́ŋ bɨ́n ó b'á jʉ̂ ogwíha o mílɔ̌b; bɨ̌n bɨɛ kǎ kɔ̂n mésoo mɔ́ɔ́.

⁴⁹Sɨ́ǎ yaá ó, Nzyɛ̌m dí elɛ́ɛ lɨ́ ocwóó wé ó: “Me ólómlo bé ogwíha o mílɔ̌b ndu e bʉr o mílʉ́mlʉ́ bâm. Bé ójʉ̂ bâʼ ó jʉ́ʼóo, tíble bʉ́ʉ́ tíbláa” yɨ́.

⁵⁰Ɨ́ tɨ̂, yé lɛ́ʼlé ó, bʉr ó myǎ wɨ̂, bé óbi bíntɨ́ʼá ɨ́ buo buo. Bé ótáa métié mé ógwíha o mílɔ̌b mé Nzyɛ̌m bɨ́bɛ̂h, táare ɨ́ jɔ̌ʼ kʉ́ e sí, byé á be apǎ bě kuhá yɨ́.

⁵¹Bɨ̌n bé ótáa méswie mɔ́ɔ́, táare lɨ́ eswie mé Ábɛl, tó pyâl ɨ́ laá mé Zacharie, mʉr á jʉ́ŋɔɔ páʼ alatâr ndu e mpáh Nzyɛ̌m nyá. Mě lɛ́ɛ́ bɨ́n lɨ́ otyeetye ó, bʉr ó myǎ wɨ̂, bé ótáa méswie mɔ́ɔ́ mɨ́mɛ̂h!

⁵²«Nkoó, nye ó e bɨ̌n, olɛ̂ʼla o métié! Bɨ̌n bɨ́ la nzɨ́ dí edwe ócwóó nyɨ́. Bɨ̌n bʉr o tɨ̂ʼ adyɛ̂l ɨ́ nzɨ̌ nyaá. Bɨ̌n bɨ́ bánǎ kamle bʉ̂r o kpɛ́l édyɛ̂l tɨ̂ʼ bá lɨ́ edû nyê.»

⁵³Jɔ̌ʼ Yésʉs á duhǒ gúmo yaá yɨ́, olɛ̂ʼla o métié le oFarizyɛ̂n ntɔ̂ʼ sáŋɔɔ nyé otié, le esweŋɔɔ nyé e milɔ̌b ɨ́ buo buo.

⁵⁴Bé á sâ nó ó, lɨ́ elámɔɔ nyé bilâm ɨ́ nzɨ̌, lɨ́ esâ ó, nye lɛ́yɨɨ lʉ́ʉ́ ékǎn bé ngá pur nyé e tɨ̂ʼ lɨ́.