Read Koonzime Luc 12 Bible Online

Luc 12 - Koonzime bible

Luc 12

¹Lɛŋ bá jɔʼ, entumo e bʉ̂r ntɔ̂ʼ báʼǎ swâl. Bé á be ó otɔ́ɔ́sin otɔ́ɔ́sin. Bʉr tîtibe bʉ́ʉ́ mekʉ̌. Yésʉs, nye le ompʉ́n bé ó: «Gwá baʼ gá oFarizyɛ̂n ɨ́ lɔ̌b levure bé dí e yé yɨ́. Yé ó mikóo.

²Sá yɨ́yɛ̂h dí lɨ́ esǒ yɨ́, yé ógwíha. Sá yɨ́yɛ̂h dí solá yɨ́, yé ógʉ́ŋɔɔ.

³Sɨ́ǎ yaá ó dí ó, sá bɨ́n ngá lɛ́ɛla lɨ́ edúrʉ́ʉ́ yɨ́, yé óbáʼǎ lɛ́ɔɔ ɨ́ móhó ɨ́ kpɛŋlɛm. Sá bɨ́n ngá nyimla lɨ́ egwǎl e nyʉ́ʉ́ mʉ̂r ɨ́ ntɔ́ɔ yɨ́, yé ótúnɔɔ kʉ́ mié.

⁴«Osó bâm, mě lɛ́ɛ́ bɨ́n ó, bɨ̌n sá akpɛ́ɛ bʉ̂r. Bé damá jʉ̂ bɨ́n ɨ́ nkǒ páʼ bípúno, bɨ́ɛ, bé abe e nkul esâ bɨ́n yʉ́ʉ́ sá ébébe swîh.

⁵Me múo tɨ́e bɨ́n waá bɨ́n jálá le ekpɛ́ɛ nyá: kpɛ́yɨ́ɨ́ gá Nzyɛ̌m, mʉr dí e nkul enʉa bɨ́n, jʉ̂, kǎ guho ɨ́ bɨ́ siʼe nyá. Mě lɛ́ɛ́ bɨ́n ó: kpɛ́yɨ́ɨ́ gá nye!

⁶«Bé bɛ́má báátɔlɔɔ otɛ̂n ó bipára bibá. Damá jóʼo nó, kâr átɔlɔɔ ngwár dí ejɨhɔɔ ɨ́ míh mé Nzyɛ̌m.

⁷Nzyɛ̌m ntémé, nyɨ́ gʉ́a mpúo nyɨnyɛ̂h dí bɨ̌n ɨ́ milʉ̂ nyɨ́ tâŋ. Ayɨ́ kǎ jóʼo gá bʉ́á. Bɨ̌n bê le odimé, laa báátɔlɔɔ ɨ́ buo buo.»

⁸«Nó me lɨ́ elɛ́ɛ e bɨ̌n ó, mʉ̂r sí tɨ̂ʼ bɨr, gbân mé témé bʉr nó, Mwân mé Mʉr ógbân nyé ntémé ɨ́ mpǒm beéngeles mé Nzyɛ̌m.

⁹Sâ gwár, mʉ̂r ókɛ́la ɨ́ míh mé bʉ̂r ó, nyé agʉ́a mé nó, Mwân mé Mʉr ókɛ́la nyé ntémé ɨ́ míh bééngeles mé Nzyɛ̌m.

¹⁰«Mʉr nyɨnyɛ̂h dí elwib e Mwân mé Mʉr ebébe nyá, baa ébébě Nzyɛ̌m ngá láa tɨ̂ʼ yɨ́, yé óbɛ̌m pɛʼɔɔ. Sâ gwár, mʉr ngá sâ Sísǐm mé Nzyɛ̌m nkěh nyá, baa ébébe yaá, yé ákóʼó pɛʼɔɔ.

¹¹«Jɔʼ bé ódâʼre bɨ́n ɨ́ mempáh mínjɨʼla nkʉ̂ ɨ́ mempáh mílɔ̌b, tó pur bɨ́n yɨ́, mʉr asyɛl gá bá. Ayêʼwo gá sá bɨ́n ngá lɛ́ɛ bʉ̂r ó jwɨ́ɨ ɨ́ nkar wɨ́n yɨ́!

¹²Ebě, Sísǐm mé Nzyɛ̌m ólɛ̂ʼle bɨ́n sá bɨ́n ngá jala le elɛ́ɛ bé ɨ́ jɔʼ yaá yɨ́.»

¹³Nyʉ́ʉ́ mʉ̂r á be lɨ́ entumo e bʉ̂r nyá, nye e Yésʉs ó: «Lɛ̂ʼla, lɛ́yɨ́ɨ́ mɨ́ɔɔ́ wǎm ó, nye kábaa bɨ̌h bilíʼé mé sɔ́ŋ wɨ́h!»

¹⁴Yésʉs, nye e né ó: «Mɨ́ɔɔ́, nzé á tyêl me tîʼ milɔ̌b ɨ́ milɔ̌b mín ɛ̌? Nzé á lɛ́ɛ ó, me kábaa bilíʼé bín?»

¹⁵Nye ó: «Gwá di gá le ocwóó. Syɛ́hláá gá nzɔ́ɔ́ bísâ, mimbi mímyɛ̂h, ebě, twiʼ mʉ̂r, yé aduho ɨ́ bisá mʉ̂r waá dí e byé bí, byé damá buo.»

¹⁶Yésʉs ntɔ̂ʼ sâ bé kɨkɛna ó: «Nyʉ́ʉ́ mʉ̂r á be ó, le okúm le ogbaa le ombeʼ o nyʉ̂l ti e bipemé. Byé á si bu gúmo.

¹⁷Nó nyé á dî ɨ́ lémé wé ó: “Me e sá nyá? Mé akǎ be e gúmó mé káalaa mpumó nyǎm.”

¹⁸Nye ó: “Me páa sâ mpʉ: me ógbɛ́ɛ ménkuna mâm. Mé okǎ lʉ́o ménkuna meswîh me dí ɨ́ buú bwaʼ má. Mé okomo méde mâm ndu e mebi mâm ɨ́ menkuna maá.

¹⁹Jɔʼ yaá ó mé ólɛ́ɛ e lémé wâm ó: Lémé wâm, gó e mebi lwɨ́ŋlá. Mé ójala e go tâŋ mimbû ɨ́ buo buo. Gbalaa ɨ́ jɔʼ yɨ̂. Déʼ méde ndu e menyoʼ. Soháa.”

²⁰Nzyɛ̌m, nye e mʉr waá ó: “Gʉʼlʉgʉ́! Mûh ɨ́ pum wɨ̂, me ópɛ̌ʼ sísǐm gô. Nzé ókǎ lîʼ lɨ́ ede méde gó á kʉkomo má ɛ́?”»

²¹Yésʉs, nye e bé ó: «Mʉr dí ekomo mébi mé lɨ́ esú lé, nye mʉr tɨ̂, nyɨɛ yɨ́ɛ ántéʼenteʼe mʉr ɨ́ míh mé Nzyɛ̌m nyá, nye ó mpʉ mʉ̂r waá.»

²²Yésʉs, nye le ompʉ́n bé ó: «Mě lɛ́ɛ́ bɨ́n ó: asyɛl gá bá ɨ́ lɔ̌b twiʼ, lɨ́ eyêʼwǒ sá bɨ́n ngá de yɨ́. Asyɛl gá bá ɨ́ lɔ̌b ményʉ́l mɨ́n, lɨ́ eyêʼwǒ kán bɨ́n ngá bwâr wɨ́.

²³Ebě, twiʼ mʉ̂r, yé ɨ́ buǒ nyɔm, laa méde. Nyʉ̂l ntémé, nye ɨ́ buǒ nyɔm, laa míkán.

²⁴Paá bee gá bikpáŋ bî: byé abe mémpeʼ, akpɛm méde. Byé abe e mentɔ́ɔ, abe e menkuna. Tó kœb ó, Sɔ́ŋ wɨ́n ó dí edwe byé mede. Mʉr, nye ɨ́ buo ódimé, laa bínʉ̌n.

²⁵Nzé ɨ́ sɔ́má yɨ́n dí e nkul ekɛl élû egwár ɨ́ melú mé twiʼ yé ɨ́ lɔ̌b bá nyé dí esisyɛl ɨ́ léme yɨ́?

²⁶Bɨ̌n pǎ nyɛɛ́ kâr ésâ sá dí ɨ́ buú twâʼwo yɨ́, á dwɛʼra e byaá byúú bíbyɛ̂h! Ayêʼwo gá byê.

²⁷Paá gwá dwɛ̂ʼ gá mpʉ ménzɔ̌m dí etô le ebuʼwa yɨ́: mé abe lɨ́ eséǎ syɛ́ɛ́, nkʉ̂ lar míkán. Mě lɛ́ɛ́ bɨ́n ó: damá bě Salomɔ̂ŋ ɨ́ jɔʼ nyé á be le okúm le ogbaa wé yɨ́, á bé abwâr míkán mi di ɨ́ nkaaá mí mpʉ nzɔ́m mpwár ɨ́ menzɔ̌m mâ.

²⁸Nzyɛ̌m pǎ nyɛɛ́ toŋlo ménzɔ̌m nó, á dwɛʼra e bɨ̌n! Menzɔ̌m ntémé, adi. Mûh, mé lɨ́ epâh pemé e pemé. Ɨ́ mɛ́n, mé akǎ be. Mé mû ó lɨ́ eguhɔɔ ɨ́ duró. Nzyɛ̌m ókʉ́ bôr bɨ́n mikán, bʉr o dí abûʼla bá!

²⁹Ayɨ́ dudû gá njɨ mede le menyoʼ bɨ́n ngá de má. Ayɨ́ yêʼwo gá bisɨ́ǎ byaá.

³⁰Ohááden ó sí yɨ́yɛ̂h, bé jaá dû ó, njɨ bisɨ́ǎ byaá. Sɔ́ŋ wɨ́n, nye lɨ́ eboó gʉ́a ó, bɨ̌n ntémé bé lɨ́ ejɨ byê.

³¹Tááráá ésáa gá ó, bɨ̌n níʼee ɨ́ Mpóʼo mé Nzyɛ̌m. Byaá byúú bɨ́n ká jɨ̌ nɨ̌, Nzyɛ̌m ólóŋlo bɨ́n byǎ.

³²«Bɨ̌n bʉr o dí mâ daa e bínteme byâm bá, ayɨ́ kpɛ́ɛ gá sɔ̂ʼ. Sɔ́ŋ wɨ́n, nye lɨ́ ebee émbɨa lɨ́ eníŋle bɨ́n ɨ́ Mpóʼo nyé.

³³Bɛ́máá gá mebi mɨ́n. Súʼáá gá baántéʼenteʼe o bʉ̂r. Laraa gá mimpɨ́ʼ bímɔnɨ́ mi dí aswɨ́ɨ mí. Máʼáá gá okúm le ogbaa wɨ́n ɨ́ jʉ́o kʉ́, gúmó byé ngá be, adîm yɨ́, ebě, mindíblʉ̌, myé abe e nkul ekúnwo e tɨ̂. Oswôʼ ntémé, ajʉ́a byê.

³⁴Komaa gá okúm le ogbaa wɨ́n gʉ̂, ebě, gúmó ókúm wɨ́n dí yɨ́, tɨ̂ʼ ntémé ó milémé mín ngá be yɨ́.»

³⁵«Píláá gá menkwán. Bɨ̌n e túmó méláma mɨ́n.

³⁶Nó bɨ̌n bɨɛ, diʼee gá mpʉ ósyɛ̂l o mésâ dí ɨ́ mpʉ̂n sɔ́ŋ wɔ́ɔ́ bá. Mpʉ bé dí egʉ́a ó, nyɨ́ tó bêm mʉ́má yɨ́, bé lɨ́ ebóno mpúla nyé, lɨ́ ekpɛl ó, nyé ókwâʼle ébê nó, bé ókpâhwǎ dib nyé lǎ.

³⁷Metyɛʼ me mpóm, mé óswɨɨ lɨ́ osyɛ̂l o mésá nyé ngá kœb ɨ́ doho bá. Mě lɛ́ɛ́ bɨ́n lɨ́ otyeetye ó, nye ótyeele káná wé, dil bé ɨ́ téble, ka bé mede.

³⁸Nyé pyál ɨ́ menî, nkʉ̂ ɨ́ jó mɛ́n nó, baá nyé ngá kœb ɨ́ mpʉ̂n nyé bá, bé óbě e metyɛʼ me mpóm.

³⁹Ebě, bɨ̌n bé lɨ́ egʉ́a ó, yé bé mʉr mbɛ̌r á be ɨ́ gʉ́a éwalǎ ndíblʉ̌ á be ó, wé ópyâl lɨ́ nó, mpa nye á bé abîr ó, wé túbaa nye mbɛ̌r.

⁴⁰Bɨ̌n ntémé, diʼee gá ɨ́ cǎr. Mwân mé Mʉr ámû jaá pyâl bɨ́n metwɨrâ, lɨ́ ewala bɨ́n ngá be, abóno nyé lɨ́.»

⁴¹Pétrus ntɔ̂ʼ dî e né ó: «Dâ ɛ̌, nzê gǒ sá kɨkɛnǎ nɨ̌ ó, lɨ́ esú lɨ́h ɛ̌? Nzê lɨ́ esú é bʉ̂r bɨ́bɛ̂h?»

⁴²Tî Yésʉs ntɔ̂ʼ yala e né ó: «Nzé dí twóó mbɔʼlʉ ekúró dí mʉr ebúʼlɔɔ nyá, waá sɔ́ŋ á tyêl ó, nye díʼee lʉ́ ósyɛ̂l o mésá bé, le ekab bé menkɔb méde mɔ́ɔ́ ɨ́ bijɔʼ bi dí ejala bí nyá?

⁴³Metyɛʼ me mpóm, mé díʼee e mbi syɛ̂l mesâ wɨ̂: waá njwɨ́ɨ wé ngá pyâl, kœb nyé lɨ́ eséǎ syɛ́ɛ́ yaá nyá.

⁴⁴Mě lɛ́ɛ́ bɨ́n lɨ́ otyeetye ó, nye ódwe nyé nkul jwɨ́ɨ ɨ́ bisá bí mbɛ̌r bíbyɛ̂h.

⁴⁵Syɛ̂l mesâ waá sí jwɨʼ ɨ́ lémé wé tʉ́ŋlʉ̌ ó: “Yé ó go ó, Sɔ́ŋ wǎm álɨ̌ búla” nɛ́ɛ: nye óbɛ̌m táare ébî bʉ́ʉ́ ósyɛ̂l o mésâ, bʉbá e bʉrʉ̂m. Nye bɛ̌m táare ntémé ede méde le menyoʼ, le epuro ményoʼ.

⁴⁶Sɔ́ŋ syɛ̂l mesâ waá ópyâl ó, dʉ́ó nyé ngá be, abûʼla ó, nyě e nkul epyâl lɨ́, le ewala nyé ngá be, agʉ́a lɨ́. Nye ódwe syɛ̂l mesâ waá bintɨ́ʼá ó, mpʉ nyé ngá dwe bʉ̂r o dí adyɛ̂ʼwo e nye bá yɨ́. Nye ókpáa nyé mimyál mímbá.

⁴⁷«Syɛ̂l mesâ mû sí boó gʉ́a bígwɨ́má bí sɔ́ŋ wé, nyɨɛ yɨ́ɛ akomlo nyé mʉr tɨ̂, nkʉ̂ lóŋlo bígwɨ́má byaá nyá, óŋmɛ́hɔɔ míngáhá ɨ́ buo buo.

⁴⁸Syɛ̂l mesâ swîh, waá á be agʉ́a bigwɨ́má bí sɔ́ŋ wé nyá, damá jóʼo ó mpʉ nyé dí esâ sá dí ejala e ntɨ́ʼá yɨ́, nye ábuú bíŋɔɔ. Mʉr á pa bu dweŋɔɔ nyá, ódíŋɔɔ ó, nye dwêʼ ntémé. Nye ódíŋɔɔ ó, nye dwêʼ ɨ́ buo buo. Mʉr á pa bu bi nyá, ódíŋɔɔ ó, nye dwêʼ, laǎ bím nyé á pa bi yɨ́.»

⁴⁹«Me á nze ó, me tíraa siʼe ɨ́ sí yɨ̂. Á dǐ beě sí yɨ̂ʼ mû ó sí bumǎ njʉl!

⁵⁰Me á nze ó, me dúŋɔɔ ndubó wâm. Lémé wâm, wé ó kʉ́ ɨ́ tyěl tî tyěl, tó pyâl ɨ́ jɔ̌ʼ ndubó waá, wé óbe, wé mû sí syɛ́ɛ yɨ́.

⁵¹Nzê bɨ̌n jwɨʼ ó, me á nze ó, lɨ́ enzě sâ ó, bʉr ó sí yɨ̂ʼ díʼee ɨ́ mepyɛbla ɛ́? Mě lɛ́ɛ́ bɨ́n ó: me á nze gbâ ó, mpɔ́ʼá menkɔ̌m páʼ bʉ̂r e bʉr.

⁵²Táare ɨ́ báánâ, bʉr ó mbɛ̌r ngwár, bé óbɔ́ʼa ménkɔ̌m. Ɨ́ bʉr otɛ̂n, olɛ̂l, bé óbene obá; obá bene olɛ̂l.

⁵³Sɔ́ŋ ónwǐm sohó wé; sohó nwim sɔ́ŋ. Nyɔ̌ŋ ónwim éséhé lé; eséhe nwim nyɔ́ŋ. Mpɔ́mlʉ́ mʉmá ónwǐm ndyɛl wé; ndyɛl nwim mpɔ́mlʉ́.»

⁵⁴Yésʉs nzě báʼǎ lɛ́ɛ le entumo e bʉ̂r ó: «Jɔʼ bɨ́n béé médwíne me mpíé lɨ́ eduhǒ nko dʉ́o dí ejâ yɨ́, bɨ̌n bé lɨ́ elɛ́ɛ ó: “Mpíé múo nzě nwɨ́ɨ.” Mpíé ntémé, bánǎ nwɨ́ɨ nó.

⁵⁵Bɨ́n jʉ́ʼrá pubó lɨ́ eduhǒ díbé tie nɛ́ɛ: bɨ̌n bé lɨ́ egʉ́a tɨ̂ʼ ó, dwéhé, yé ókah. Yé ntémé, yé lɨ́ ebánǎ sâ nó.

⁵⁶Bɨ̌n baányâ-mikóo bâ, bɨ̌n bé lɨ́ ekʉ́ dweʼe bísâ bi dí epyâl lɨ́ ejwoo bí ndu e byaá bí sí yɨ̂. Á nó, bɨ̌n bé lɨ́ ekâr édweʼe yɨ̂ʼ jɔʼ ɨ́ yé?»

⁵⁷«Bɨ̌n bé lɨ́ ekâr étíʼe mílɔ̌b lɨ́ otîtyěl páʼ nyɨ́n ɨ́ yé?

⁵⁸Mʉ̂r tó pur gô, bɨ̌n e nɔ́ɔ́ dína téme-nzɨ̌ lɨ́ etô mpáh milɔ̌b nó, boó komlǒ lɔ̌b dí páʼ nyɨ́n wɨ́. Wé kwɨ́mlɨɨ ɨ́ jɔʼ yaá, ebě, nye ámû jaá dâʼre gó, tyen gó kwá tîʼ milɔ̌b; tîʼ milɔ̌b tyen gó kwá mé sója. Sója, yé ogbâ gó ɨ́ mbʉʼ.

⁵⁹Mě lɛ́ɛ́ gó ó, go ódi ó náǎ, tó pyâl ɨ́ jɔʼ gó ójána mpʉ́lá nyaá, pára gwár alîʼ yɨ́.»