Read Koonzime Luc 13 Bible Online

Luc 13 - Koonzime bible

Luc 13

¹Jɔʼ yaá ó bʉ́ʉ́ bʉ̂r, bé á nze lɛ́ɛ e Yésʉs mpʉ̌ Pilátos á jʉ̂ bʉ́ʉ́ bʉ̂r ó Galilê ɨ́ jɔʼ bé á be lɨ́ edwě Nzyɛ̌m mindwéá yɨ́. Bé ntɔ̂ʼ pûhla métié mɔ́ɔ́ le maá mé ótír bé á pa tíʼe Nzyɛ̌m bá.

²Yésʉs ntɔ̂ʼ dî e bé ó: «Nzê bɨ̌n jwɨʼ ó, bʉr ó Galilê baá, bé á jʉ́ŋɔɔ ó, ebě, bé ó b'á bu sâ misyóm, laa bʉ́ʉ́ bʉ̂r ɛ̌?

³Heʼé, mě lɛ́ɛ́ bɨ́n ó, bɨ́n óbe, atúmo míkoo e misyóm mín le edwira míléme nó, bɨ̌n óbɛ̂h, bé ódîm ɨ́ nkɔb bʉr mpʉ bê.

⁴Nzê bɨ̌n jwɨʼ ó, bʉr kám e mwom tólóm mbɛ̌r mé Siloâm, wé á bíla bá ó b'á bu bébe, laa bʉ̂r ó Yerʉ́zalɛm bɨ́bɛ̂h ɛ̌?

⁵Heʼé, mě lɛ́ɛ́ bɨ́n ó, bɨ́n óbe, atúmo míkoo e mebébe mɨ́n le edwira míléme nó, lɛ́ɛ́, bɨ̌n ntémé, bé ódîm ɨ́ nkɔb bʉr mpʉ bê.»

⁶Yésʉs ntɔ̂ʼ sâ bé kɨkɛna yɨ̂: «Nyʉ́ʉ́ mʉ̂r á si be lɨ́ ɨ́ pemé yé. Nye nzě nɨnaǎ lɨ́ yaá, lɨ́ esáa mpúmó, abee.

⁷Nye nzě lɛ́ɛ e mʉr á bɨbaʼle pemé nyá ó: “Paá bee: yé mû ó mimbú mílɛ̂l gbaa mé lɨ́ enzě naǎ lɨ́ yɨ̂, lɨ́ enzě sáa mpúmó, akœ̌b sɔ̂ʼ. Mě lɛ́ɛ́ gó ó, go twɛ́lɨɨ yê. Yé lɨ́ edě sí, abe mé e nyɔm ɨ́ yé?”

⁸Nó ó mbɔ̂ʼlʉ pemé á nze lɛ́ɛ e né ó: “Dâ ɛ̌, paá bá bîr yê, yé páa báʼǎ di gúú mbû ngwár. Me ópû yé ɨ́ mempah mɨ́mɛ̂h, mé osʉ bíbwǎh bí ékunuu.

⁹Yʉ́ʉ́ jɔʼ, yé e nkul egúmo mpúmó ɨ́ mbú dí enze wɨ́. Yé óbe, agúmo nó, mé ocwɛl gó yǎ.”»

¹⁰Ɨ́ gúú móhó sábat, Yésʉs á be ó lɨ́ elɛ̂ʼle bʉ̂r o b'á be ɨ́ mpáh minjɨʼla bá.

¹¹Gúú mbél mʉ́má, wé á be ó tɨ̂. Nye á be ó e mbɨ́ǎ sísǐm. Wé á sâ nye ó, nyʉ̂l díʼee nye niʼrá. Nye á jaa didi ó, njɨ kûkur, tâŋ mimbû kám e mwom, asɨ́ʼasɨʼa.

¹²Jɔ̌ʼ Yésʉs á bee nye nó yɨ́, nye ntɔ̂ʼ jébe nyê. Nye e né ó: «Mʉmá, ekpaa lô, lɨ́ síe.»

¹³Nye ntɔ̂ʼ kɛl nyé mebô ɨ́ nyʉ̂l. Tyé e tyé yaá, nyʉ̂l ntɔ̂ʼ sɨ́ʼa nyê. Mʉmá waá ntɔ̂ʼ tyɛ̂b tîtyěl, ntɔ̂ʼ dwě Nzyɛ̌m kûm.

¹⁴Njwɨ́ɨ mpáh minjɨʼla ntɔ̂ʼ jóʼo ébébe é léme, duho ɨ́ syɛ́ɛla mé Yésʉs, ebě, nye á si tiʼ mʉr ɨ́ móhó sábat. Njwɨ́ɨ mpáh minjɨʼla waá ntɔ̂ʼ lɛ́ɛ le entumo e bʉ̂r ó: «Ɨ́ sóno nyɨnyɛ̂h, yé e móhó ngwár dí móhó sábat wɨ́. Mimóhó mísaman, myê mɨná gá e nyɔm ó, lɨ́ esú ó, mɨná séaa gâ bisyɛ́ɛ́. Ntaá nzě joma gá ɨ́ mimóhó myaá, abe yɨ́ɛ móhó sábat.»

¹⁵Tî Yésʉs, nye e né ó: «Bɨ̌n baányâ-mikóo bâ, ɨ́ móhó sábat, bɨ̌n óbɛ̂h, bé lɨ́ etii bíntœœ ndu e bitab bín, lɨ́ etô e byé ɨ́ mentíbé. Nzê yé abe nó ɛ̌?

¹⁶Mʉmá nyâ, nye ó nta mé Abraham. Sátan nyɨɛ, nyɨ́ boó kâʼ nyé menkara. Nye mû kɛ́ʼá ó, tâŋ mimbû kám e mwom. Bintœœ pǎ nyɛɛ́ tiɔɔ ɨ́ móhó sábat, á dwɛʼra e mʉr!»

¹⁷Mpʉ̌ Yésʉs á yala e né nó yɨ́, ontɨ̂m le obɨn bé bɨ́bɛ̂h ntɔ̂ʼ jóʼo sôn. Entumo e bʉ̂r lɨ́ɛ, lé á be lɨ́ ekʉ́ soho ɨ́ lɔ̌b mbɨambɨa bísyɛ́ɛla bíbyɛ̂h nyé á sɨsâ bí.

¹⁸Yésʉs á dî ó: «Mpóʼo mé Nzyɛ̌m, nye lɨ́ enwɨɨla e yé? Mé e nkul ejwɨʼ nyé e wáǎ mbǐ sɔ̂ʼ?

¹⁹Nyě nwɨɨlá ó e díh é nzɔ́m nyʉ́ʉ́ mʉ̂r á to myam ɨ́ pemé yé lɨ́. Lê nzě pâh, sâ lɨ́ ɨ́ ntuuu. Binʉ̌n nzě lʉ́o mɔ̂ʼ mɔ́ɔ́ tɨ̂ʼ ɨ́ milɔ́ɔ.»

²⁰Yésʉs ntɔ̂ʼ báʼǎ lɛ́ɛ ó: «Mpóʼo mé Nzyɛ̌m nwɨɨlǎ e wáǎ mbǐ sɔ̂ʼ?

²¹Nyě nwɨɨlá ó e levure. Nyʉ́ʉ́ mʉ́má á si pûhla yé le okílo ó pǔ blêr mekám mébá. Tó kumo ɨ́ jɔ̌ʼ tímé blêr, wé á nkaŋle wɨ́wɛ̂h yɨ́.»

²²Yésʉs á be lɨ́ elaa bínkana e bínkana, le mékwár e mékwár, lɨ́ etô le edwe bʉ̂r milɛ́ʼlá nzɨ́ e nzɨ̌ ɨ́ jɔʼ nyé á be lɨ́ etô Yerʉ́zalɛm yɨ́.

²³Nyʉ́ʉ́ mʉ̂r ntɔ̂ʼ dî e Yésʉs ó: «Dâ ɛ̌, nzê bʉr o ngá bǐ twǐʼ njʉ̌m dǐ bá, bé abuo ɛ̌?» Yésʉs ntɔ̂ʼ yala e né ó:

²⁴«Gbáʼ gá nkul lɨ́ enî lɨ́ ebê dí ɨ́ mána lɨ́. Mě lɛ́ɛ́ bɨ́n ó: bʉr ɨ́ buo buo, bé ógwɨ̂m énî tɨ̂, bɨ́ɛ abe e nkul.

²⁵«Jɔʼ mʉ̂r mbɛ̌r ógbɔlwa, nzě pɨr ébê le engʉŋ yɨ́, bɨ̌n bé ólîʼ kʉ̌l. Bɨ̌n bé ókwâʼle, jébe ó: “Dâ ɛ̌, dibɨɨ bɨ́h ebê ʉ.” Nye óyala ó: “Mé agʉ́ǎ nko bɨ̂n duho yɨ́.”

²⁶Bɨ̌n bé ónyɛl élɛ́ɛ e né ó: “Dâ ɛ̌, mɨná gá ó b'á be lɨ́ edɨde le enyǔl gúmo gwár. Ntʉ bɨ́h gó á dwidwe milɛ́ʼlá ɨ́ minkpǎʼ mí nkana gá yɨ́ná bá ɛ́?”

²⁷Nye óbáʼǎ lɛ́ɛ ó: “Mé agʉ́ǎ nko bɨ́n dí eduho yɨ́. Tó tyɛ̂b gá lɨ́ ejaa, bʉr o dí egbah métié bá!”

²⁸Gúmo yaá ó bɨ́n ngá jóno le epûʼlo médye yɨ́, ɨ́ jɔʼ bɨ́n óbeě Abraham, Isaac, Yákɔb, le ogwíha o mílɔ̌b mé Nzyɛ̌m mû e bidiá ɨ́ Mpóʼo mé Nzyɛ̌m, bɨ̌n bɨɛ guhɔɔ̌ kʉ̌l yɨ́.

²⁹Bʉr, bé óduhǒ nko mejɨma me dʉ́o, ndu e nko mejá mé dʉ́o. Bé óduhǒ nko tín ndu e nko tie. Bé óswâl, ntɔ̂ʼ nʉa bídiá byɔ́ɔ́ ɨ́ dína ɨ́ Mpóʼo mé Nzyɛ̌m.

³⁰Bʉr o dí ɨ́ báánâʼ mepíhe bá, bé ótyɛ̂b mésôʼ. Baá dí báánâʼ mesôʼ bá, bé ókǎ tyɛ̂b mépíhe.»

³¹Jɔʼ yaá ó bʉ́ʉ́ óFarizyɛ̂n, bé á pyâl gúmó Yésʉs á be yɨ́. Bé e né ó: «Duhaa wâ. Go e tó gúmo swîh, ebě, Erôd, nye lɨ́ edǐ jʉ̂ gô!»

³²Yésʉs ntɔ̂ʼ yala e bé ó: «Tó lɛ́ɛ gá pɨpɨ́ʼ tír waá ó: “Me náǎ ó lɨ́ eso méleme le etiʼ mímbêl mûh le ómɛ́n. Ɨ́ móhó lɛ̂l, me ósîl syɛ́ɛ́ yâm.”

³³Sâ gwár, yé jala ó, me tôʼ e tyen yâm dóló mûh, le ómɛ́n, le móhó ká bɔma wɨ́, ebě, yé ajala ó, ngwíha milɔ̌b mé Nzyɛ̌m, nye jʉ́ŋɔɔ yʉ́ʉ́ súm swîh, njɨ̌ Yerʉ́zalɛm.

³⁴«Yerʉ́zalɛm, Yerʉ́zalɛm, gua mʉr dí ejʉ̂ ógwíha o mílɔ̌b le elúmo baá Nzyɛ̌m dí elómlo gó bá mekóʼ nyá! Nzɔʼ ntíá mé á be lɨ́ egwɨ̂m ésyɛŋ bwán bô mpʉ ábyɛɛ́-kúo dí esyɛŋ bwán bé sí mempabaá mé yɨ́, bɨ̌n bɨbené benáa.

³⁵Jwɛ́ʼɛ́ɛ́ gâ, mbɛ̌r wɨ́n, wé ólíʼɔɔ ó gumo. Mě lɛ́ɛ́ bɨ́n ó, bɨ̌n bé ákǎ bee mê, tó pyâl ɨ́ jɔʼ bɨ́n ngá lɛ́ɛ ó: “Mɨná gúmlaa gá waá dí enze e díé mé Dâ nyá.”»