Read Koonzime Luc 14 Bible Online

Luc 14 - Koonzime bible

Luc 14

¹Ɨ́ gúú móhó sábat, Yésʉs á be ɨ́ tó de méde ɨ́ mbɛ̌r mé lʉ́ mʉ̂r ɨ́ sɔ́má óFarizyɛ̂n. Bʉr o b'á be tɨ̂ʼ bá, bé á be ó lɨ́ edwɛ̂ʼ nyé ɨ́ tooobó.

²Mbêl ntɔ̂ʼ nzě nkǒ Yésʉs á be yɨ́, e nyʉ̂l sí nkaŋle ɨ́ túnúnú.

³Yésʉs ntɔ̂ʼ dî le olɛ̂ʼla o métié, bé le oFarizyɛ̂n ó: «Nzê yê mpéné ó, mʉr atǐʼ mbêl ɨ́ móhó sábat ɛ̌?»

⁴Bɨ́bɛ̂h ɨ́ jwɨ́m. Yésʉs ntɔ̂ʼ jébě mbêl, tiʼ wê, ntɔ̂ʼ bîr ó, wé swíʼɨɨ.

⁵Nye ntɔ̂ʼ dî e bé ó: «Mwân wɨ́n, nkʉ̂ ntœœ yɨ́n, óbe, yé mû sí lʉ́ŋa ɨ́ bɨ́ ɨ́ móhó sábat nó, onzé óbîr yé gʉ̂, akpâhwǎ tó pɛʼ yé tɨ̂?»

⁶Bé á bé agʉ́a éyala e né ɨ́ tíá nyaá.

⁷Yésʉs á si bee mpʉ bʉ̂r o b'á báŋlɔɔ ɨ́ dína bá, bé á gbɨgbân bidiá bí ésôʼ yɨ́. Nó ó Yésʉs á nze sâ bé kɨkɛna yɨ̂ʼ ó:

⁸«Jɔʼ mʉ̂r báŋlé gó lɨ́ ede méde mé ébâ kwá nyé yɨ́, ayɨ́ pɛ̂h mpǎŋ diá. Yʉ́ʉ́ jɔʼ, nyʉ́ʉ́ mʉ̂r dí elaa gó ɨ́ mpwaʼ dǐ nyá, ónze ɨ́ njɨ́blɨ́ wé.

⁹Mʉr á jébe bɨ̌n e nɔ́ɔ́ nyá, ólɛ́ɛ gó ó: “Gbɔlwaa náǎ. Dwéʼ tɔ́má mʉr diá nɨ̌.” Go ótó di ɨ́ diá dí ɨ́ buú pyéhɔɔ yɨ́ ó, gô sí bɛb sôn.

¹⁰Nó ɨ́ jɔʼ gó ótó de méde me nzɔ́ɔ yɨ́, go e nʉ́á diá dí ká píhe yɨ́, ebě, yé e nkul epyâl gó ó, mʉr nzɔɔ ónzě lɛ́ɛ e go ó: “Só wǎm, ayɨ́ di wâ. Laŋaǎ tó di ɨ́ mpǎŋ diá kâʼ dóló.” Yé ósâ ó, go bíʼee kûm mpâ páʼ bʉr o bɨ́n le onɔ́ɔ́ dí ede méde maá bá.

¹¹Ebě, mʉr dí enkɛ́ɛ nyʉ̂l nyá, ósulɔɔ sí. Mʉr waá dí ejɔr nyʉ̂l nyé nyá, óbɨ́nɔɔ kʉ́.»

¹²Yésʉs ntɔ̂ʼ lɛ́ɛ e mʉr nzɔɔ ó: «Jɔʼ gó jámlé bʉ̂r mede, nkʉ̂ sâ dína yɨ́, abáŋle ósó bô, nkʉ̂ bɨ́ʉ̌, nkʉ̂ mimbyɛ́l myô, nkʉ̂ bʉr o bímɔnɨ́ dí ekúnwo e go bá, lɨ́ ekpɛ́ɛ ó, bé ámû jaá báŋle gó ó, go tô de ɨ́ myɔ́ɔ́ mímbɛ̌r. Gó sá nó wá, go óbi myɛ́na mô, lɨ́ etó de méde mɔ́ɔ́.

¹³Sáʼ njɨ ó, ɨ́ jɔʼ gó mû lɨ́ etyêl nzɔ́ɔ yɨ́, báŋláá míndyêbndyéb, bʉr o dí e bidyɛ̂m bá, bʉr o dí etɨ́a bá, ti e baántím.

¹⁴Gó sá nó wá, go óbi métyɛʼ me mpóm, ebě, bé abe e nkul ebwóolo gó embɨa lô. Embɨa laá, lé óbwóolɔɔ gó ó, ɨ́ móhó ótîtyěl o bʉ̂r, bé ópah wɨ́.»

¹⁵Mpʉ nyʉ́ʉ́ mʉ̂r á jóʼo Yésʉs lɨ́ elwib nó yɨ́, nye e né ó: «Metyɛʼ me mpóm, mé díʼee e mʉr óde méde ɨ́ Mpóʼo mé Nzyɛ̌m nyá.»

¹⁶Yésʉs ntɔ̂ʼ lɛ́ɛ e né ó: «Yé á be ó e nyʉ́ʉ́ mʉ̂r á tyêl dínǎ nɨ́nɨ́ɨ́ nyá. Nye á si báŋle bʉr ɨ́ buo buo, ó bé tôʼ de.

¹⁷Nye nzě lómo syɛ̂l mesâ wé ɨ́ jɔʼ nzɔ́ɔ á jala le enyɛl yɨ́, ó nye lɛ́yɨɨ bʉr o nyé á boo báŋle bá ó: “Ntáʼ gâ, ebě, dína, yé mû ó kʉmsá.”

¹⁸Bɨ́bɛ̂h, ntɔ̂ʼ táare ékar. Waá esôʼ á lɛ́ɛ e syɛ̂l mesâ ó: “Me sí bwâm pemé. Yé jɨ ó, me tô bee yê. Me lɨ́ ejɨʼla e go ó, go dûhwaa me.”

¹⁹Waá mbá á lɛ́ɛ ó: “Me sí bwâm bíntœœ kám, bê lɛ́ɛ́ ó, byé lɨ́ egwá séa bí. Nó me páa tó bóblo byê. Mě jɨʼlá e go ó, go dûhwaa me.”

²⁰Waá lɛ̂l, nye ó: “Mɛm alúno bâ mʉ́má. Sá tɨ̂ʼ ó mé dí abe e nkul enze yɨ́.”

²¹Syɛ̂l mesâ waá ntɔ̂ʼ swîʼ, tó lɛ́ɛ sɔ́ŋ wé minkar myɔ́ɔ́ mímyɛ̂h. Lémé mʉ̂r mbɛ̌r ntɔ̂ʼ lóno ɨ́ nkpaa. Nye ó: “Kpáhwá tô ɨ́ minkpǎʼ ndu e menzɨ̌ mé nkana, lɨ́ etô le ebáŋle míndyêbndyéb, bé e bʉr o dí e bidyɛ̂m bá, baántím ndu e baá o dí etɨ́a bá. Go e nzé e bɨ́bɛ̂h wâ.”

²²Píe tɨ̂, syɛ̂l mesâ wé ntɔ̂ʼ báʼǎ lɛ́ɛ e né ó: “Dâ ɛ̌, mɨ́ sâ mpʉ gô lɛ́ɛ́ ó, me sâʼ yɨ́. Mɨ́ tó kœb ó, byúú bídiá, byé dína ó tʉ̂toʼó.”

²³Nye e né ó: “Duhaǎ nkana bé. Tóʼ ɨ́ bwá ménzɨ̌ le ɨ́ nkpâh mikôʼ, bigúmó gó ngá bee bʉ̂r bí. Tínáá bê, bé níʼee ɨ́ mbɛ̌r wâm. Wé lónaa ɨ́ bʉr.

²⁴Ebě, mě lɛ́ɛ́ bɨ́n ó: kâr mʉ̂r ngwár ɨ́ sɔ́má bʉ̂r mé á nyɛɛ báŋle bá, ngá kǎ bóblo méde mé dína yâm!”»

²⁵Ɨ́ mpʉ̌ sɔ́má bʉ̂r, yé á tʉtô le edû Yésʉs yɨ́, nye nzě dwira, le elɛ́ɛ e bé ó:

²⁶«Mʉr ónze kwá nyǎm le edi mpʉ́n wǎm ó, nyé osí pǎ kpɛl mê, laǎ mpʉ nyé dí ekpɛl sɔ́ŋ wé le nyɔ̌ŋ wé, mʉmá wé, le bwán bé, bɨ́ɔɔ́ bé le okɛ́l bé, le twiʼ yé nye mʉr tɨ̂ʼ yɨ́.

²⁷Mʉ̂r bé akpɛl énkɛ́ɛ̌ kolôs yé, dû mé nó, nye ákóʼó di mpʉ́n wǎm.

²⁸«Wáa mʉ̂r dí enyɛl nkân tólóm mbɛ̌r, nye l'apǎ láǎ bím mɔnɨ́ nyé óbɛ̌m dímle tɨ̂ʼ yɨ́, le egʉ́ǎ nkʉ̂ mɔnɨ́ yé, yé ójala e syɛ́ɛ́ súmó yaá yɨ́yɛ̂h?

²⁹Nkûl gwíí nyé, nkan lîʼ ɨ́ ntúbúm nó, bʉr o ngá bee nkân e nkan bá, bé ópipya nyé tɨ̂.

³⁰Bé ólɛ́ɛ ó: “Mʉr nyâʼ á si nyɛl sumó. Nó nyé akǎ be e nkul eswâhle.”

³¹Gúú njwɨ́ɨbʉr sí kpɛl ó, wé tó ó, tó lwímla e gúú nó, wé nyɛɛ́ di ó sí, pahle nkʉ̂ bisója otɔ́ɔ́sin kám byé, byé e nkul entaa bísója ótɔ́ɔ́sin mekám mébá ɨ́ dɔm gúú njwɨ́ɨbʉr dí etyen bí.

³²Yé bé yé ajala nó, wé ólómo bʉ̂r nko ntɨ̂m e mbɨn wé ó, nye dína lɨ́ ejaa, le ekolo nyé ó, bé díʼee mbɨ̂mbɨá.

³³Jwɨʼ gwár yaá, ɨ́ sɔ́má yɨ́n bɨ̌n óbɛ̂h, kâr mʉ̂r dí e nkul edi mpʉ́n wǎm, nyé bé abene bísá bíbyɛ̂h nó.»

³⁴«Ekpa, lé ó sá dí ɨ́ mbɨa yɨ́. Sâ gwár, ékpa, lé óbe, akǎ jómo nó, yé ngá báʼǎ sâ ó, lé bíʼee ejómo lé?

³⁵Ekpa laá, lé akǎ be e nyɔm, damá jóʼo ó, lɨ́ esʉŋɔɔ ɨ́ bibwǎh, damá jóʼo ó, lɨ́ emyahɔɔ lɨ́ ekunuu. Lé ójaá sʉŋɔɔ ó, njɨ̌ kʉ̌l. Mʉr dí e megwǎl mé éjóʼo nyá, nye jóʼaa náǎ.»