Read Koonzime Luc 16 Bible Online

Luc 16 - Koonzime bible

Luc 16

¹Yésʉs á lɛ́ɛ ntémé le ompʉ́n bé ó: «Nyʉ́ʉ́ kúmá á be ó e mbɔʼlʉ ekúró wé. Nó bʉ́ʉ́ bʉ̂r, bé á si dwe mbɔʼlʉ ekúró waá mebě, le elɛ́ɛ ó, nye á si sam nye bisâ.

²Nye ntɔ̂ʼ jébe nyê. Nye e né ó: “Wáǎ mbǐ lɔ̌b mé dí ejóʼo, dumo e go wɨ̂? Lɛ́ʼláá mé mpʉ gô bibi bísá byâm yɨ́, ebě, gó abe e nkul ekǎ di mbɔ̂ʼlʉ ekúró lâm.”

³Nó mbɔ̂ʼlʉ ekúró waá á nze lɛ́ɛ ɨ́ lémé wé tʉ́ŋlʉ̌ ó: “Mpʉ sɔ́ŋ wǎm lɛ́ɛ́ ó, nyě pɛ̌ʼ ó me ɨ́ dǐ mbɔ̂ʼlʉ ekúró yɨ́, me ókǎ sâ nyá ɨ́ jɔʼ yɨ̂? Mɛm apʉgʉ́ be e nkul lí bípemé. Nó yé óbuú sâ mé sôn lɨ́ etô le engʉl méde.

⁴Mɨ́ gʉ́ǎ sá mé dí e nkul esâ yɨ́! Jɔʼ mé ngá dímlě dǐ yâm yɨ́, bʉr, bé óbaʼle mé ɨ́ mimbɛ̌r myɔ́ɔ́!”

⁵Nye ntɔ̂ʼ jébe bʉ̂r bɨ́bɛ̂h, bé á be e bisá bí njwɨ́ɨ wé bá ngúngwár. Nye e mʉr esôʼ ó: “Gó e njwɨ́ɨ wǎm yáǎ bím?”

⁶Nye ó: “Mě le otonô o múlo nter.” Mbɔʼlʉ, nye e né ó: “Mekaná mémpʉ́lá mô bê! Kpáhwá di sí. Go e cɛ́má mékám métɛ̂n.”

⁷Nye e nyʉ́ʉ́ ó: “Gua, gó e yáǎ bím?” Nyɨ́haá, nye ó: “Mě e minkura méde minter mitɛ̂n.” Mbɔʼlʉ ekúró, nye e né ó: “Mekaná mémpʉ́lá mô bê. Cɛmaa mínter minâ.”

⁸Sɔ́ŋ waá nzě sêʼlě bɨ́bla mbɔ̂ʼlʉ ekúró waá, ebě, nye á si kûhlo mepɨʼ nó, ebě, bʉr ó sí yɨ̂, bé lɨ́ ekʉ́ gwá kûhlo mépɨʼ páʼ nyɔ́ɔ́, laa bʉ̂r o mé Nzyɛ̌m.»

⁹Yésʉs ntɔ̂ʼ lɛ́ɛ ó: «Mě lɛ́ɛ́ bɨ́n ó: nʉaa gá bibɨ́bla bí ókúm le ogbaa ó sí yɨ̂. Jwɛ́náá gá byê, lɨ́ esú ó, bɨ̌n tíaa esó e bʉr. Jɔʼ ókúm le ogbaa waá, wé ósíe yɨ́, bé odil bɨ́n ɨ́ bisaʼ ngá dǐ njʉ̌m dǐ e njʉ̌m dǐ bí.

¹⁰Mʉr dí egwá kʉ́ baʼle bísâ bi dí tîtííǎ bí nyá, nye ntémé ókʉ́ gwá baʼle bísâ bi dí ɨ́ buo buo bí. Mʉr dí esâ syóm lɨ́ ebi bísâ bi dí abuo bí nyá, nye ntémé ósâ syóm ntémé nó ɨ́ jɔʼ nyé ngá bi bísâ ɨ́ buo buo yɨ́.

¹¹Bɨ́n óbe, agʉ́a ébaʼle bíbɨ́bla bí ókúm le ogbaa ó sí yɨ̂ʼ nó, onzé ngá láa ó, bɨ̌n bé ó bʉr o bé ébûʼlɔɔ? Onzé ókomo mímpǎŋ bisá byɔ́ɔ́ kwá nyɨ́n, ó bɨ̌n bâʼlaa bé byǎ?

¹²Bɨ́n óbe, agʉ́a ébaʼle bísá byé onkán nó, nzé ódwe bɨ́n bisá bín, bɨ̌n bʉr o tɨ̂?

¹³«Kâr tɔʼ e syɛ̂l mesâ ngwár dí e nkul eséa le ojwɨ́ɨ obá jɔʼ gwár, ebě, nye ónwim nyʉ́ʉ́, kpɛl nyʉ́ʉ́; nkʉ̂ ntɔ̂ʼ ó, nye ódwe nyʉ́ʉ́ dúu; pyêh nyʉ́ʉ́. Nó, bɨ̌n bé abe e nkul eséǎ Nzyɛ̌m syɛ́ɛ́, séa Ókúm-le-Ogbaa syɛ́ɛ́ ɨ́ jɔʼ gwár.»

¹⁴OFarizyɛ̂n, bé á be ó lɨ́ ejóʼo mílɔ̌b myaá mímyɛ̂h, ntɔ̂ʼ táare épya nyê, ebě, bé á be ɨ́ buú kpɛ̌l mɔnɨ́, ntaa sʉ́ŋa.

¹⁵Yésʉs ntɔ̂ʼ lɛ́ɛ e bé ó: «Bɨ̌n bé lɨ́ elɨlɛ̂ʼle bʉ̂r ó, bɨ̌n ó dí otîtyěl. Sâ gwár, Nzyɛ̌m, nye lɨ́ egʉ́a mílémé mín, ebě, sá bʉ̂r dí ebuú sêʼle yɨ́, Nzyɛ̌m, nye lɨ́ ebene yé mpene-numó.

¹⁶«Metié mé Moyɨ̂z le mekaná mé ógwíha o mílɔ̌b, mé á di ó, ɨ́ bea bea, tó pyâl ɨ́ jɔʼ mé Yʉánɛs Ndubʉr. Táare ɨ́ jɔʼ yaá, tô dóló, bé mû ó lɨ́ etúnǒ Mbɨambɨa Lɔ́ɔ dí edumo e Mpóʼo mé Nzyɛ̌m wɨ́. Mʉr nyɨnyɛ̂h, nye mû ó lɨ́ enî tɨ̂ʼ e nkul.

¹⁷Kʉ́ e sí, byé e nkul edîm kám e kám. Sâ gwár, yé ɨ́ buú lele ó, kaŋá gwár dí ɨ́ buú twâʼwo ɨ́ metié mé Nzyɛ̌m yɨ́ dímɨɨ.»

¹⁸«Mʉ̂r bwóóló mʉ́má wé, bâ waá swîh nó, nyɨ́ sâ médyɛ̂n. Mʉ̂r bá mʉ́má á pa bwóolɔɔ nyá nó, nyɨ́ sâ ntémé medyɛ̂n.»

¹⁹«Yé á be ó e nyʉ́ʉ́ mʉ̂r á be e bisâ ɨ́ buo buo nyá. Melú mɨ́mɛ̂h, nye á bwâr ó, mikán myé á be ɨ́ lele tâŋ mí. Nye á titiʼe dʉ́ó lɨ́lɛ̂h ó ɨ́ mepwaʼ.

²⁰Gúú ndwe-ntuʼ, díé lé Lazare, nyʉ̂l mikɔɔ e mikɔɔ e mebor, á jɨjâ ó, lɨ́ ebé é mbɛ̌r wé sí.

²¹Nye á be ó lɨ́ egwɨ̂m éde bítwǐʼ méde byé á kukur ɨ́ téble kúmá waá bí. Ompyê bɨ́ɛ kǎ nzě gwɨ̂gwɨh nyé mepɨ́ɨ́.

²²Nye nzě dwe. Beéngeles nzě nkɛ́ɛ nyê, tó dilɔɔ nyé ɨ́ mbó éjʉ́m mé Abraham ɨ́ jʉ́o kʉ́. Kúmá ntémé dwe, ntɔ̂ʼ debe ɨ́ soo.

²³Nó nye dína témé bintɨ́ʼá ɨ́ bɨ́ siʼe, nye ntɔ̂ʼ dwɛ̂ʼ kʉ́. Nyé ká bee nɛ́ɛ: Abraham ká ká lɨ́ ejaa; Lazare nyɨɛ, ɨ́ mbó éjʉ́m wé.

²⁴Nye ntɔ̂ʼ bʉ̂ édwê. Nye ó: “Dâ Abraham ɔ́, jɨ́ʼɨ́ɨ́ mé nkoó ɔ̌! Lómláá mé Lazare, nye dúbaa odumo ó diné yé ɨ́ medíbé, nye e nzé dwě jɨ́m yâm metala ɔ̌, ebě, me lɨ́ ebuú jaʼra e siʼe ɨ́ minjʉl mî.”

²⁵Nó ó Abraham á lɛ́ɛ e né ó: “Mwân wǎm ɔ́, símsáá ó, go á di ó ɨ́ diá mépwaʼ ɨ́ jɔʼ gó á be ɨ́ twiʼ yɨ́ ɔ̌! Lazare nyɨɛ á jaa didi ó, njɨ ɨ́ diá éntéʼe. Ɨ́ báánâ, nye mû ó sí póblɔɔ kâ; gua, go lɨ́ ejóʼo mégunwa.

²⁶Yʉ́ʉ́ sɔ̂ʼ ntémé ó yɨ̂: ntabantaba bɨ́ dí ká sí ɨ́ kœ́ʼlɛ́ yɨ́, yé ó páʼ nyɨ́ná. Nó, bʉr o dí ekpɛl émɔa kâ, tô gʉ̂ʼ nko bɨ́n dí yɨ́ bá, bé abe e nkul entaa. Bʉr bé abe e nkul eduho ntémé nko bɨ́n dí nɨ̌, nze kâ, nko bɨ́h dí yɨ́.”

²⁷Nó ó kúmá á lɛ́ɛ e né ó: “Dâ ɔ́, yé bé nó wá, me lɨ́ ejɨʼla e go ó, go lómaa Lazare ɨ́ mbɛ̌r sɔ́ŋ wǎm ɔ̌!

²⁸Ebě, mé e bɨ́ɔɔ́ otɛ̂n. Nye tô cɨ̂l bê, ebě, bé ntémé ámû jaá nze kâʼ ɨ́ gúmó dí ɨ́ buú gunwa yɨ̂ʼ ɔ̌!”

²⁹Abraham ntɔ̂ʼ yala ó: “Bɨ́ɔɔ́ bô, bé e lɔ́ɔ́ Moyɨ̂z bé le ogwíha o mílɔ̌b, bé á cɛma wɨ́. Bé páa jóʼo bé ɔ̌!”

³⁰Kúmá, nye ó: “Dâ Abraham ɔ́, bím yaá, yé ajala. Sâ gwár, mʉ̂r óduho lɨ́ odwe, tó kœb bé nó, bé ótúmo míkoo e mebébe mɔ́ɔ́, le edwira mílémé ɔ́ɔ̀ɔ́.”

³¹Nó Abraham á lɛ́ɛ e né ó: “Bé óbe, akpɛl éjóʼǒ Moyɨ̂z, nkʉ̂ ogwíha o mílɔ̌b nó, lɛ́ɛ́, bé abe e nkul ejóʼo ntémé mʉr á pah, duho lɨ́ odwe nyá ɔ́ɔ̀ɔ́.”»