Read Koonzime Luc 18 Bible Online

Luc 18 - Koonzime bible

Luc 18

¹Yésʉs ntɔ̂ʼ báʼǎ sâ bé kɨkɛna yɨ̂ʼ lɨ́ elɛ̂ʼle bé ó, bé ɨ́ jala le ejɨʼla e Nzyɛ̌m jɔʼ yɨ́yɛ̂h, akâr túú.

²Nye á lɛ́ɛ e bé ó: «Yé á be ɨ́ yʉ́ʉ́ nkana ó e nyʉ́ʉ́ tîʼ milɔ̌b á be abe lɨ́ edwáawǒ Nzyɛ̌m, nkʉ̂ ntémé mʉr nyá.

³Tɨ̂ʼ ntémé, yé á be ó e gúú kúhó mʉ́má. Wé á be lɨ́ enzɨnzě jɔʼ yɨ́yɛ̂h kwá nyé, lɨ́ elɛ́ɛ ó: “Lwibɨɨ mé lɔ̌b páʼ nyɨ́h e mʉr dɔm wǎm!”

⁴Nye á si nyɛɛ bene. Sâ gwár, nye á ka lɛ́ɛ ɨ́ lémé wé ó: “Damá jóʼǒ mpʉ mé dí adwáawǒ Nzyɛ̌m, nkʉ̂ dwe mʉ̂r dúu yɨ́,

⁵me ótíʼe yɨ́ɛ kúhó mʉ́má wɨ̂ʼ lɔ̌b wé, ebě, wé lɨ́ enzě ntɨntɨ̂ʼ mê. Lɔ̌b wé, wé lɨ́ ebʉ̂ mé lʉ̂, ebě, nye ɨ́ buo nála.”»

⁶Nó ó Tî Yésʉs á lɛ́ɛ ó: «Tîʼ milɔ̌b á dwidwe bʉr mebě me mpéne nyá, paá jôʼlo gá sá nyé dí elɛ́ɛ yɨ́.

⁷Nó ó, mbeá wɨ́n, wê nyá? Nzê Nzyɛ̌m ódi l'akamle e bʉr bé nyé á twâr bá ɛ́? Bé lɨ́ ejɨʼla e né móhó e pum. Nzê nye ósâ táb lɨ́ enzě kɛm bé ɛ̌?

⁸Mě lɛ́ɛ́ bɨ́n ó: nye ókpâhwǎ dwe bé nkam ɨ́ milɔ̌b myɔ́ɔ́. Sâ gwár, ɨ́ jɔʼ Mwân mé Mʉr ónze yɨ́, nzê nye ókǎ kœb ó, bʉr ó sí yɨ̂, bé dína lɨ́ edyêʼ koo e né ɛ́?»

⁹Yésʉs ntɔ̂ʼ kɛ̌n kɨkɛna yɨ̂, lɨ́ emveʼle bʉ́ʉ́ bʉ̂r. Bʉr baá, bé á bubûʼla ó, bé ó dí otîtyěl o bʉ̂r ɨ́ míh mé Nzyɛ̌m. Bé ntémé lɨ́ epyêh bʉ́ʉ́ bʉ̂r.

¹⁰Nye á lɛ́ɛ ó: «Bʉr obá, bé á be ó ɨ́ mpáh Nzyɛ̌m lɨ́ esâ mínjɨʼla. Nyâʼ, Farizyɛ̂n; nyʉ́ʉ́, nwɨa mɔnɨ́ tœ́a.

¹¹Farizyɛ̂n waá ntɔ̂ʼ tyɛ̂b, nzě jɨʼlǎ mbi wɨ̂: “Dâ Nzyɛ̌m, me lɨ́ edwe gó nzyǒo, ebě, mé abě mpʉ bʉ́ʉ́ bʉ̂r. Bâʼ, bé lɨ́ edɛn bímɔnɨ́ byé onkán; bʉ́ʉ́, bé ó osyɛ̂l o mísyóm; bʉ́ʉ́ ntémé, osyɛ̂l o médyɛ̂n. Me lɨ́ edwe gó nzyǒo, ebě, mé abě mpʉ nwɨ́a mɔnɨ́ tœ́a nyâ.

¹²Me lɨ́ eti méde ɨ́ sóno ngwár bijɔʼ bibá. Me lɨ́ edwe gó yô pêh ɨ́ mebi mâm mɨ́mɛ̂h mé dí ebi má, jala e nkɔb mpwár ɨ́ menkɔb kám.”

¹³Sâ gwár, nwɨa mɔnɨ́ tœ́a, nye á tîtyɛb sá yé ó ɨ́ pɨ́nʉ́ʉ́. Nye á bé akpɛl ébá bɨ̂n mîh kʉ́. Nye á gbâ ó, njɨ mebô kʉ́ lʉ̂, le elɛ́ɛ ó: “Dâ Nzyɛ̌m, Dâ Zyɛ̌m, sáʼ ó, ebúʼ lô, lé tálaa lɨ́ esú lâm, ebě, me ó syɛ̂l misyóm.”» [3]

¹⁴Yésʉs ntɔ̂ʼ lɛ́ɛ e bé ó: «Mě lɛ́ɛ́ bɨ́n ó: nwɨa mɔnɨ́ tœ́a waá á ka tô mbɛ̌r wé ó, nyé osí bi nkâm ɨ́ míh mé Nzyɛ̌m, abě mpʉ̌ Farizyɛ̂n, ebě, mʉr nyɨnyɛ̂h dí ebɨ̂r nyé mʉr tɨ̂ʼ kʉ́ nyá, ósulɔɔ sí. Waá nyɨnyɛ̂h dí ejɔr nyʉ̂l nyé nyá, óbɨ́nɔɔ kʉ́.»

¹⁵Bʉr, bé á si nze kwá mé Yésʉs le bwá bítyéé, ó nye kúnaa e bê. Jɔʼ ómpʉ́n bé, bé á bee nó yɨ́, bê nzě dwe bé mebě.

¹⁶Nó ó Yésʉs á nze jébe bê, nzě lɛ́ɛ ó: «Bírɨ́ɨ́ gá bwá ó ntwǒm, bé ntâʼ kwá nyǎm. Ayɨ́ so gá bê, ebě, Mpóʼo mé Nzyɛ̌m, nye tyélá ó, lɨ́ esú é bʉ̂r o dí mpʉ bé bá.

¹⁷Mě lɛ́ɛ́ bɨ́n lɨ́ otyeetye ó, mʉr dí aja Mpóʼo mé Nzyɛ̌m mpʉ mâ ntwǒm nyá, nye ákóʼó nî tɨ̂.»

¹⁸Nyʉ́ʉ́ njwɨ́ɨ oYúden á be ɨ́ dî e Yésʉs ó: «Mbɨambɨa lɛ̂ʼla, me sâʼ wáǎ mbǐ sɔ̂ʼ dí ó, me nʉ́aa twǐʼ njʉ̌m dǐ, jala e nkɔb líʼe nyǎm?»

¹⁹Yésʉs nzě yala e né ó: «Go lɨ́ ejébe mé mbɨambɨa mʉr ɨ́ yé? Yé abe e mʉr dí ɨ́ mbɨa, njɨ̌ Nzyɛ̌m nye omér.

²⁰Gʉ́ gʉ́a métié mé Nzyɛ̌m. Mé lɛ́ɛ́ ó: “Asâ médyɛ̂n. Ajʉ̂ mʉ̂r. Adíbe. Ayala ɨ́ lɔ̌b mɨ́ɔɔ́ gǒ mʉr lɨ́ onzyɛ́h ónzyɛ́h. Dwéʼ sʉ́ŋ e nyʉ̌ŋ dúu.”»

²¹Mʉ̌r nɨ̌ nzě lɛ́ɛ e né ó: «Mɨ́ baʼle métié ménɨ̌ mɨ́mɛ̂h, táare lɨ́ ontwǒm, kumo mûh.»

²²Jɔ̌ʼ Yésʉs á jóʼo nó yɨ́, nye nzě lɛ́ɛ e né ó: «Yé lɨ́ esáa gó sâ gwár. Tóʼ, tó bɛ́ma bísá bíbyɛ̂h gó dí e byé bí. Go e dwé míndyêbndyéb mɔnɨ́ yaá. Jɔʼ yaá ó gó ngá bi ókúm le ogbaa ɨ́ buo buo ɨ́ jʉ́o kʉ́ kwá mé Nzyɛ̌m yɨ́. Píe tɨ̂, go e nzé dû mê.»

²³Njóʼá mʉ̂r waá á jóʼo yalá yaá yɨ́, nye kʉ́ nzě tyɛʼ nyʉ̂l, ntɔ̂ʼ búla ɨ́ twíaaa, ebě, nye á be ó le okúm le ogbaa le ombeʼ o nyʉ̂l.

²⁴Jɔ̌ʼ Yésʉs á bee nó yɨ́, nye ó: «Bʉr o dí le okúm le ogbaa bá, bé lɨ́ enî ɨ́ Mpóʼo mé Nzyɛ̌m e mekɔbla ɨ́ buo buo.

²⁵Mpʉ yé dí ɨ́ kɔbla ó, chameau láŋaa lɨ́ egʉ́á é ntʉ́á yɨ́, jwɨʼ gwár e gwár yaá ntémé ó dí ɨ́ buú kɔbla ó, kúmá mʉr níʼee ɨ́ Mpóʼo mé Nzyɛ̌m.»

²⁶Nó ó bʉ̂r o b'á jʉjóʼo nye bá, bé á nze díila páʼ nyɔ́ɔ́ ó: «Yé bé nó wá, nzé nyɨɛ ngá koʼo lɨ́ enî ɨ́ twǐʼ njʉ̌m dǐ ɛ̌?»

²⁷Yésʉs ntɔ̂ʼ yala e bé ó: «Bisá bʉ̂r dí akoʼo bí, Nzyɛ̌m ó dí e nkul esâ byê.»

²⁸Pétrus ntɔ̂ʼ lɛ́ɛ ó: «Paá bee: bɨ̌h bɨɛ bɨ́ líʼe bíh bísâ, njɨ lɨ́ edû gô.»

²⁹Nó ó Yésʉs á lɛ́ɛ e bé ó: «Mě lɛ́ɛ́ bɨ́n lɨ́ otyeetye ó, yé abe e mʉr dí elíʼě mbɛ̌r wé, mʉmá wé, bɨ́ɔɔ́ bé, obyɛ́l bé, le bwán bé, ebě, Mpóʼo mé Nzyɛ̌m,

³⁰dí abáʼǎ bi byé nzɔʼ ɨ́ buo buo ɨ́ báánâ. Nó ɨ́ jɔʼ éswéhlɨ́ é sí yɨ̂ʼ ngá pyâl yɨ́, mʉr waá óbǐ twǐʼ njʉ̌m dǐ.»

³¹Yésʉs nzě nʉa ómpʉ́n bé kám le obá, nye e bé ó: «Jóʼláá gâ: mɨná múo nzě bére gá ɨ́ Yerʉ́zalɛm. Bisá bíbyɛ̂h ógwíha o mílɔ̌b bé á cɛma ɨ́ lɔ̌b mé Mwân mé Mʉr bí, byé ódira.

³²Nye óbɛ́mɔɔ kwá bʉr o bíkûl e biloo. Bé ópya nyê, sáŋɔɔ nyé cére, syɛɛ nyé metyéelé ɨ́ mîh,

³³ŋmɛ̂h nyé mingáhá, ntɔ̂ʼ jʉ́ŋɔɔ nyê. Ɨ́ móhó lɛ̂l, nye ópah.»

³⁴Nó ompʉ́n bé, bé á bé ajóʼǒ sâ gwár ɨ́ milɔ̌b myaá. Ekǎn laá, lé á be bé ó, mpʉ̌ lwǐb ódîm. Bé á bé ajóʼǒ sɔ̂ʼ ɨ́ lɔ́ɔ waá wɨ́wɛ̂h.

³⁵Jɔ̌ʼ Yésʉs á be, nye mû lɨ́ ekúnwo e Yerikô yɨ́, nyʉ́ʉ́ ántím á be ó ɨ́ nkpâh nkpǎʼ, lɨ́ egwâm bísâ e bʉr o b'á lɨlaa bá.

³⁶Jɔʼ nyé á jóʼo sɔ́má bʉ̂r lɨ́ elaa yɨ́, nó ó nyé á dî sâ yé á be lɨ́ esyɛ́ɛ yɨ́.

³⁷Nó bé á lɛ́ɛ e né ó: «Yésʉs, mʉr Nazarɛ̂t, ó dí elaǎ nɨ̌.»

³⁸Nye nzě bʉ̂ tím. Nye e né ó: «Yésʉs, Mwâ mé David ɔ́, jɨ́ʼɨ́ɨ́ mé ekpaa nkóó ɔ̌!»

³⁹Lɨ́ entumo e bʉ̂r laá, bʉr o b'á be dóló bá, bê nzě nkáŋla e nye. Bé e né ó, nye díblaa num. Nyɨɛ jaá báʼǎ bʉ́lwǎ bʉ́lwáa, ó: «Mwâ mé David ɔ́, jɨ́ʼɨ́ɨ́ mé ekpaa nkóó ɔ̌!»

⁴⁰Yésʉs nzě tyɛ̂b, ntɔ̂ʼ lɛ́ɛ ó, bé tôʼ e né. Jɔʼ bé á pyâl e né yɨ́, Yésʉs ntɔ̂ʼ dî e né ó:

⁴¹«Gǒ gwɨ́m ó, me sâʼ go yé?» Nye ntɔ̂ʼ yala ó: «Dâ ɛ̌, pʉgʉ́ sâ ó, me báʼa bee ʉ!»

⁴²Yésʉs ntɔ̂ʼ lɛ́ɛ e né ó: «Beyɨ́ɨ. Búʼó yô, yɨ́ tiʼ gô!»

⁴³Tyé e tyé yaá, nye ntɔ̂ʼ bánǎ bee, nzě nî ɨ́ sɔ́má mé Yésʉs, le egúmlǒ Nzyɛ̌m. Bʉr baá bɨ́bɛ̂h, ɨ́ jɔʼ bé á bee syɛ́ɛla yaá yɨ́, bé ntɔ̂ʼ gúmlǒ Nzyɛ̌m.