Read Koonzime Luc 19 Bible Online

Luc 19 - Koonzime bible

Luc 19

¹Jɔ̌ʼ Yésʉs á nî ɨ́ Yerikô yɨ́, nye nzě kpâhla ɨ́ nkana yaá.

²Nyʉ́ʉ́ mʉ̂r á be ó tɨ̂, díé lé Zakéyos, mʉr á be lɨ́ ejwɨ́ɨ̌ sɔ́má ónwɨa ó mɔnɨ́ tœ́a bɨ́bɛ̂h nyá. Nye á be ó e bisâ ɨ́ buo buo.

³Nye á be ó lɨ́ edǐ beě Yésʉs, le egʉ́ǎ mbi mʉ̂r nyé á be wɨ́. Nó mpʉ nyé á be ɨ́ gúlwo gúlwo yɨ́, nye á bé abe e nkul ebee nyê, ebě, bʉr, bé á be ɨ́ buú buo.

⁴Nó nyé á tô kám dóló, ntɔ̂ʼ jʉ ɨ́ lɨ́ sycomore kʉ́, ó nye nkʉ̂ bee nyê, ebě, Yésʉs á be ó, nye láŋaa tɨ̂ʼ ɨ́ nzɨ̌ nyaá.

⁵Jɔ̌ʼ Yésʉs á pyâl gúmo yaá yɨ́, nye nzě bɨ̂n mîh kʉ́. Nye e né ó: «Zakéyos, kpáhwá sulo sí, ebě, me ɨ́ jala le edi ɨ́ mbɛ̌r gô mûh!»

⁶Zakéyos ntɔ̂ʼ kpâhwǎ sulo sí, ntɔ̂ʼ nʉa nyé e bisʉhʉʉ.

⁷Bʉr bɨ́bɛ̂h bé á bee syɛ́ɛla yaá bá, bé á si lwib lɔ̌b waá minyimla. Bé ó: «Mʉr nyâ, nyɨ́ tó jâ ɨ́ mbɛ̌r syɛ̂l misyóm!»

⁸Nó ó Zakéyos á nze tyɛ̂b, le elɛ́ɛ e Tî Yésʉs ó: «Dâ ɛ̌, paá bee! Me múo nzě bɛ̂ʼ bísá byâm ɨ́ bipéh bíbá. Me ónʉa yɨ̂ʼ pêh, tó dwe báántéʼenteʼe o bʉ̂r. Yé bé me á bě sí sâ míkóo, nʉǎ mɔnɨ́ kwá nyʉ́ʉ́ mʉ̂r nó, me óbwóolo nyé yǎ, ntɔ̂ʼ kɛ̌l bím mɔnɨ́ yaá nzɔʼ lɛ̂l tɨ̂ʼ kʉ́.»

⁹Nó ó Yésʉs á nze lɛ́ɛ e né ó: «Mbɛ̌r bʉ̂r wɨ̂, wɨ́ tiʼe mûh, ebě, mʉr nyâʼ ntémé, nye ó nta mé Abraham.

¹⁰Ebě, Mwân mé Mʉr á nze ó, nzě sáa baá mû sí dîm bá ó, nye ódwe bé twiʼ.»

¹¹Jɔʼ bʉ̂r baá, bé á be, bé mû sí jóʼo mékǎn ménɨ̌ yɨ́, Yésʉs nzě báʼǎ sâ bé yʉ́ʉ́ kɨkɛna, lɨ́ emveʼle baá bé á jóʼo milɛ́ʼlá myé bá. Mpʉ nyé á be, nye mû bǎʼ e Yerʉ́zalɛm yɨ́, bʉr, bé á jwɨʼ ó, Nzyɛ̌m á be ó, nye mû kúno etyêl Mpóʼo nyé.

¹²Nó nyé á lɛ́ɛ ó: «Yé á be ó e yʉ́ʉ́ mpǎŋ njwɨ́ʼ mʉ̂r. Wé á si mɔa ɨ́ sí yé, tó di ɨ́ sí yé á be ká ká lɨ́ ejaa yɨ́. Nye á tô ó, bé dílɨɨ nye ɨ́ dǐ njwɨ́ɨ. Píe tɨ̂, nyé okǎ búla.

¹³Nye dína apǎ tô, nye á si jébe osyɛ̂l o mésá bé kám, nzě dwe bé mʉr ngwár, nzǎŋ gʉ̂l ngwár, bím mɔnɨ́ syɛ̂l mesâ dí ede lɨ́ ongɔn otɛ̂n yɨ́. Nye e bé ó: “Bulɨɨ gá me mɔnɨ́ yɨ̂, tó pyâl ɨ́ jɔʼ mé óbúla yɨ́.” Nye nzě mɔa, tô.

¹⁴«Náǎ yé ó, bʉr ó sí yé lɨ́ enwim nyê. Nó ó bé á lómo bʉr ó, bé tôʼ dû nyê, lɨ́ etô le elwáŋlě lɔ́ɔ gʉ̂ʼ ó: “Bɨ̌h bé akpɛl ó, mʉr nyâʼ díʼee njwɨ́ɨ wɨ́h!”

¹⁵«Nó nko nyé á tô yɨ́, bʉr o nkɔ́m nyaá nzě tyélɔɔ nyé njwɨ́ɨ. Nye ntɔ̂ʼ báʼǎ nze ɨ́ sí yé, ánta nye. Nó nyé á lɛ́ɛ ó, bé jébaa nye osyɛ̂l o mésá bé, baá nyé á tímle mɔnɨ́ bá. Nye á be ó lɨ́ egwɨ̂m égʉ́ǎ bím mɔnɨ́ yé, yé á byâ yɨ́.

¹⁶Mʉr esôʼ pyâl. Nye ó: “Dâ ɛ̌, me á si baʼa bi minzaŋ mí gʉ̂l miswîh kám, duho ɨ́ nzǎŋ gʉ̂l gó á tímle me wɨ́.”

¹⁷Sɔ́ŋ, nye e né ó: “Yé ɨ́ mbɨa. Go ó mpǎŋ syɛ̂l mesâ. Mpʉ gó á gʉ́a ebaʼle bísâ bi dí tîtííǎ bí yɨ́, mɨ́ tyêl gó njwɨ́ɨ binkana kám!”

¹⁸Waá mbá ntɔ̂ʼ nze. Nye ó: “Dâ ɛ̌, me á si baʼa bi minzaŋ mí gʉ̂l miswîh mitɛ̂n, bâʼra e waá gó á tímle me wɨ́.”

¹⁹Sɔ́ŋ, nye e né ó: “Gua, mɨ́ tyêl gó njwɨ́ɨ binkana bitɛ̂n.”

²⁰Nyʉ́ʉ́ nzě pyâl. Nye ó: “Dâ ɛ̌, beě nzǎŋ gʉ̂l gô? Me á baʼle wé ó, tyeelá lɨ́ eliré é kán,

²¹ebě me á be ó lɨ́ ekpɛ́ɛ gô, ebě, go ɨ́ buú nyan mʉ̂r. Gǒ nʉnʉǎ sá gó á be akomo yɨ́. Gǒ kpɨkpɛm méde ó, ɨ́ gúmó gó á be abe mempeʼ yɨ́.”

²²Sɔ́ŋ, nye e né ó: “Sá bɨ́bla syɛ̂l mesâ yɨ̂! Me ótíʼe gó lɔ̌b ɨ́ mekǎn me dí eduho ɨ́ num gô má. Go á be lɨ́ egʉ́a ó, me ɨ́ buú nyan mʉ̂r. Mě nʉa ó, sá mé á be akomo yɨ́. Go á si gʉ́a ntémé ó, mě kpɛ̌m méde ó, ɨ́ gúmó mé á be amyam mempeʼ yɨ́.

²³Go á bé ató gbâ mé mɔnɨ́ yâm ɨ́ bâŋ ɨ́ yé? Ɨ́ mpúla nyǎm, me gwá nzě nʉǎ mɔnɨ́ yâm yaá, le eběr kʉ́.”

²⁴Nye e bʉr o b'á be tɨ̂ʼ bá ó: “Pɛʼɛɛ gá nye nzǎŋ gʉ̂l wé, bɨ̌n e tímlé wé mʉr dí e minzaŋ mi gʉ̂l kám nyá.”

²⁵[Nó bé á lɛ́ɛ e né ó: “Dâ ɛ̌, nye mû ó, boó be e minzaŋ mí gʉ̂l kám!”]

²⁶Nye ó: “Mě lɛ́ɛ́ bɨ́n ó: mʉr nyɨnyɛ̂h dí e sɔ̂ʼ nyá, ódweŋɔɔ yʉ́ʉ́. Waá nyɨnyɛ̂h dí tʉ̂toʼó nyá, bé ópɛʼ nyé damá jóʼo ó, mâ bím nyé dí e tɨ̂ʼ nyá.

²⁷Nó ontɨ̂m le obɨn bâm bé á bene ó, me díʼee njwɨ́ɨ wɔ́ɔ́ bá, ntáʼ gá me e bǎ kâ. Bɨ̌n e jʉ́ bé wâʼ ɨ́ míh mâm.”»

²⁸Jɔʼ nyé á sil elwib nó yɨ́, Yésʉs ntɔ̂ʼ nʉa ésóʼ é sɔ́má bʉ̂r, lɨ́ etô Yerʉ́zalɛm.

²⁹Jɔʼ nyé á be, nye mû le ekúnwo e Bɛtfagée ndu e Bétanî, nko écwɨ̂ʼ bé jɨ́jébé ó, “Ecwɨ́ʼ lé ólivier” yɨ́, nye ntɔ̂ʼ lómo ómpʉ́n bé obá dóló.

³⁰Nye ó: «Tóʼ gá ɨ́ kwár dí ɨ́ bɨ̌n dóló nɨ̌. Jɔʼ bɨ́n ngá pyâl gʉ̂ʼ yɨ́, bɨ̌n bé ókœb mâ kamntʉl tyeelá, nye dína, mʉr apǎ kalwo ɨ́ koo kʉ́. Tiyɨɨ gá yê. Bɨ̌n e nzé e yé wâ.

³¹Mʉ̂r dí e bɨ̌n ó: “Bɨ̌n bé lɨ́ etiǐ kamntʉ̌l nɨ̌ ɨ́ yé?” nó, bɨ̌n e lɛ́ɛ́ e mʉr waá ó: “Ebě, Dâ, nye lɨ́ egwɨ̂m yê.”»

³²Nó bʉ̂r o nyé á lómo bá, bé á nze tô, tó kœbɔɔ bísâ bíbyɛ̂h mpʉ̌ Yésʉs á boo lɛ́ɛ bé yɨ́.

³³Jɔʼ bé á be lɨ́ etiǐ kamntʉl yɨ́, bʉr o tɨ̂ʼ ntɔ̂ʼ dî e bé ó: «Bɨ̌n bé lɨ́ etiǐ kamntʉ̌l nɨ̌ ɨ́ yé?»

³⁴Bé ntɔ̂ʼ yala ó: «Dâ, nye lɨ́ egwɨ̂m yê.»

³⁵Nó bé á tô e mâ kamntʉl waá kwá mé Yésʉs. Bé ntɔ̂ʼ janɔɔ míkán myɔ́ɔ́ ɨ́ koǒ kamntʉl, dilɔɔ̌ Yésʉs tɨ̂ʼ kʉ́.

³⁶Nyɨɛ lɨ́ etô, bʉr lɨ́ etô le ejan nyé mikán myɔ́ɔ́ dóló nkpǎʼ e nkpǎʼ.

³⁷Mpʉ nyé á be, nye mû le ekúnwo e Yerʉ́zalɛm, lɨ́ esulo Écwɨ́ʼ lé ólivier yɨ́, nó ó sɔ́má ómpʉ́n, yé á taare esoho ɨ́ buo buo le egúmlǒ Nzyɛ̌m e metyêl kʉ́kʉ́, ɨ́ mesimá ménɨ́nɨ́ɨ́ mɨ́mɛ̂h bé á bee má.

³⁸Bé á lɨlɛ́ɛ ó: “Mɨná gúmlaa gá njwɨ́ɨ dí enze e díé mé Dâ Nzyɛ̌m nyá. Kwár mé Nzyɛ̌m, nye lónaa ɨ́ mepyɛbla. Bʉr o dí ɨ́ jʉ́o kʉ́ bá, bé dwêʼ Nzyɛ̌m kûm.”

³⁹Bʉ́ʉ́ óFarizyɛ̂n á be tɨ̂ʼ ɨ́ sɔ́má bʉ̂r yaá bá, bé á lɛ́ɛ e né ó: «Lɛ̂ʼla, nkáŋláá le ompʉ́n bô.»

⁴⁰Nó ó Yésʉs á yala e bé ó: «Mě lɛ́ɛ́ bɨ́n ó: bé sí dible mínum myɔ́ɔ́ nɛ́ɛ: mekóʼ, mé óbɨ̂n métwíí mɔ́ɔ́ kʉ́ lɨ́ egúmlo mê.»

⁴¹Jɔ̌ʼ Yésʉs á pyâl bǎʼ e Yerʉ́zalɛm, ntɔ̂ʼ bee yé yɨ́, nye ntɔ̂ʼ jɨ édwê ɨ́ lɔ̌b wé.

⁴²Nó nyé á lɛ́ɛ ó: «Yé bé go bé ɨ́ gʉ́a ɨ́ dʉ́ó lɨ̂ʼ mûh, sâ gwa gbá gó mepyɛbla ɨ́ léme yɨ́ nó, mpa gʉ́ tiʼe. Ɨ́ báánâ, yê go ó solá. Gó abe e nkul béé yê.

⁴³Ebě, mimóhó, myé lɨ́ enze, jɔʼ bʉ̂r o dɔ̂m bɨ́n, bé ókɛb bɨ́n ɨ́ nká, sumǒ kôʼ dí ɨ́ lele lele wɨ́. Bé ómân bɨ́n, le enyêhle bɨ́n ɨ́ mipáʼ mímyɛ̂h.

⁴⁴Bé ógbɛ́ɛ gó, Yerʉ́zalɛm, le egbah bwán bô bɨ́bɛ̂h dí go tʉ́ŋlʉ̌ bá. Bé ólíʼe gó ó, abe le ekóʼ kɛlá ɨ́ lʉ́ʉ́ kʉ́, ebě, go bé adweʼě jɔ̌ʼ Nzyɛ̌m á nze go ɨ́ menɔɔlʉ yɨ́.»

⁴⁵Nó ó Yésʉs á nze nî ɨ́ mpáh Nzyɛ̌m, ntɔ̂ʼ táare éso bʉ̂r o b'á bɨbɛ́ma bisɔ̂ʼ tɨ̂ʼ bá.

⁴⁶Nye ó: «Yê cɛmá ɨ́ Mekaná mé Nzyɛ̌m ó: Mbɛ̌r wâm, wé óbe ó mbɛ̌r mínjɨʼla. Tó kœb ó, bɨ̌n bɨɛ̌ dwir wé ó, ekul e bínzilngǎn!»

⁴⁷Yésʉs á lɨlɛ̂ʼle bʉr ɨ́ mpáh Nzyɛ̌m tʉ́ŋlʉ̌ ó, dʉ́ó lɨ́lɛ̂h. Ojwɨ́ɨ o tɨ̂, bé le olɛ̂ʼla o métié ndu e minjwɨ́ʼ mí bʉ̂r, bé á be ó lɨ́ esáa nzɨ́ ejʉ̂ nyê.

⁴⁸Bé á bé agʉ́ǎ mpʉ bé sâʼ nó yɨ́, ebě, minzɨnzɨ mi bʉ̂r mímyɛ̂h, myé á be lɨ́ ekʉ́ gwá jôʼlo nyê.