Read Koonzime Luc 2 Bible Online

Luc 2 - Koonzime bible

Luc 2

¹Njwɨ́ɨ̌ nɨ́nɨ́ɨ́ Kɛ́ɛza Agûst nzě tyêl bʉ̂r o b'á didi ɨ́ mesí mé bá etié ó, bé tôʼ láŋɔɔ, bɨ́bɛ̂h.

²Nó yé á be ó jɔʼ ésôʼ ó bé láŋaa bʉr mbi waá yɨ́. Yé á be ó, ɨ́ jɔ̌ʼ Kirínios á be ngóvina ɨ́ sí Sirî yɨ́.

³Nó bʉ̂r bɨ́bɛ̂h, bé á nze ka tô, tó cɛmɔɔ míe, mʉr nyɨnyɛ̂h ɨ́ nkanǎ kúl yé, yé á sisyɛŋa tɨ̂ʼ yɨ́.

⁴Nó ntémé ó Yóseb á nze duhǒ Nazarɛ̂t ɨ́ sí Galilê, nzě nkɛ́ɛ, lɨ́ etô sí Yʉ́da. Tɨ̂ʼ ó nyé á tô, nkǒ nkana yé, Bétɛlɛhɛm, gúmó njwɨ́ɨ David á byɛ̂l yɨ́. Nye á tô gʉ̂ʼ ó, ebě, nye á be ó mʉr mbɛ̌r bʉ̂r mé David.

⁵Nó nyé á to cɛmɔɔ díe, bé e Maria, mʉmá bé e nɔ́ɔ́ bé á be le etié lé ébâ nyá. Maria á be ó, nye mû le ebum.

⁶Jɔʼ bé á be gʉ̂ʼ yɨ́, jɔʼ ébyâ, yê nzě pyâl.

⁷Nye ntɔ̂ʼ byâ mâ mʉrʉ̂m, mwân medwéʼe wé. Nye nzě díble nyé ɨ́ kán, dyêʼ nyé ɨ́ gúmó bítab byé á dɨde mede mɔ́ɔ́ yɨ́, ebě, yé á bé akǎ be e já ɨ́ mbɛ̌r ójwóo.

⁸Yé á be ó e bʉ́ʉ́ bʉ̂r o b'á pɨpála binteme byɔ́ɔ́ bá, gúmó dáá dí yɨ́ ɨ́ Bétɛlɛhɛm. Yé á be ó, yé mû témé pum.

⁹Nó éngeles mé Dâ ntɔ̂ʼ pyâl bê. Mentyɛnwa mé Nzyɛ̌m ntɔ̂ʼ pan ɨ́ gúmó bé á be yɨ́. Bé ntɔ̂ʼ táare ésâʼ ɨ́ bʉ́á.

¹⁰Nó ó éngeles á nze lɛ́ɛ e bé ó: «Ayɨ́ kpɛ́ɛ gâ. Paá bee gâ: mɨ́ nze bɨ́n e Mbɨambɨa Lɔ́ɔ! Bʉr ó kúl bʉ̂r yɨ́n, bɨ́bɛ̂h, bé óbuú soho wê.

¹¹Ɨ́ pum wɨ̂ʼ ɨ́ nkana mé David, Tiʼbʉr wɨ́n, nyɨ́ byɛ̂l! Nye ó Mʉ̌r Nzyɛ̌m á lœm múló mé jwɨ́ɨ nyá. Nye ó dí ntémé Tî gá wɨ́ná! [1]

¹²Paá bee gâ: bɨ̌n bé ódweʼe nyé ó ɨ́ jwɨʼ yɨ̂: bɨ̌n bé ókœb mwân, nyé osí díblɔɔ ɨ́ kán, ndyéʼá gúmó bítab dí ede méde yɨ́.»

¹³Tyé e tyé yaá, sɔ́má bééngeles, yê nzě duho ɨ́ jʉ́o kʉ́, nzě kœb éngeles waá. Bé e nɔ́ɔ́ bɨ́bɛ̂h ntɔ̂ʼ gúmlǒ Nzyɛ̌m. Bé ó:

¹⁴«Kûm mé Nzyɛ̌m, nye lɨ́ elóŋlǒ jʉ́ó dí elaǎ jʉ́o le ejwoo le baántɛ́n yɨ́. Bʉr ó sí, bé díʼee e mepyɛbla páʼ nyɔ́ɔ́, ebě, Nzyɛ̌m, nyɨ́ bee bé mbɨ̂mbɨá.»

¹⁵Jɔʼ bééngeles, bé á líʼe bê, ntɔ̂ʼ báʼǎ bérɔɔ ɨ́ jʉ́o kʉ́ yɨ́, nó ó ópála o bínteme, bé á nze lɛ́ɛla páʼ nyɔ́ɔ́ ó: «Ncʉ̂ʼ gá Bétɛlɛhɛm. Mɨná tô bee gá sâ syɛ́ɛ́ gʉ̂ʼ yɨ́, mpʉ̌ Dâ Nzyɛ̌m tɨ́é mɨ́ná gá yɨ́.»

¹⁶Bê nzě tô e mikám, tó beɔɔ̌ Maria, bé e Yóseb ndu e mâ tyéé, ndyéʼá gúmó bítab dí ede méde yɨ́.

¹⁷Jɔʼ ópála o bínteme, bé á nze bee bé yɨ́, bê nzě lɛ́ɛ bé lɔ́ɔ́ wɨ́wɛ̂h, lɨ́ ebáʼǎ lɛ́ɛ mékǎn bééngeles bé á lɛ́ɛ bé, dumo e mwân waá má.

¹⁸Bʉr bɨ́bɛ̂h o b'á jóʼo lɔ́ɔ waá bá, bê nzě buú kámɔɔ̌ sá ópála o bínteme bé á lɛ́ɛ, dumo e milɔ̌b myaá yɨ́. [2]

¹⁹Maria nyɨɛ nzě baʼle mílɛ́á myaá mímyɛ̂h ɨ́ lémé wé, nzě gɔ́na le epahle myé ɨ́ puuu.

²⁰Píe tɨ̂, opála o bínteme nzě mɔa, swíʼɔɔ. Bê nzě tô le edwě Nzyɛ̌m kûm ɨ́ buo buo ɨ́ lɔ̌b bísá bé á jóʼo le ebee bí. Bisyɛ́ɛla byaá bíbyɛ̂h, byé á kʉ be ó mpʉ bééngeles bé á pa lɛ́ɛ bé yɨ́.

²¹Píe jɔ̌ʼ Yésʉs á byɛ̂l yɨ́, lɨ́ elú é mwôm, yé ntɔ̂ʼ pyâl ɨ́ jɔʼ bé á jala le etíʼe nyé mpʉ́n yɨ́. Bé ntɔ̂ʼ tíʼe nyé nyǎ, le ejwɨr nyé díe ó, “Yésʉs”, ebě, díe laá ó éngeles á lɛ́ɛ bê, Maria dína apǎ nʉa ébum yɨ́.

²²Píe tɨ̂, jɔ̌ʼ Maria, bé e Yóseb, bé á jala le elóŋlo métié mé Moyɨ̂z yɨ́, yê nzě pyâl. Moyɨ̂z á tyêl baábyɛɛ́ etié ó, ábyɛɛ́ nyɨnyɛ̂h nyɛ́ɛ tó pubɔɔ píe byɛɛ́ ɨ́ mpáh Nzyɛ̌m. Bê nzě tô e mwân wɔ́ɔ́ Yerʉ́zalɛm, tó lɛ̂ʼlɔɔ̌ Dâ Nzyɛ̌m nyǎ.

²³Yé ó mpʉ yé dí cɛmá ɨ́ Mekaná mé Nzyɛ̌m yɨ́. Yê cɛmá ó: “Mwân esôʼ ótáare ébyɛ̂l mâ mʉrʉ̂m nyá, nye ɨ́ jala le edweŋɔɔ̌ Dâ Nzyɛ̌m.”

²⁴Bé ntémé, bé á si to dwe mindwéá Mékaná mé Nzyɛ̌m, mé á lɛ́ɛ ó, bé dwêʼ mí. Yê cɛmá ɨ́ Mekaná mé Nzyɛ̌m ó: “Dwéʼ gá Nzyɛ̌m mindwéá, nkʉ̂ bidúdúó bíbá, nkʉ̂ mepɨbaa mebá.”

²⁵Ɨ́ Yerʉ́zalɛm, yé á be ó e nyʉ́ʉ́ mʉ̂r, díé lé Siméon. Nye á be ó tîtyěl mʉr le ebuú dwáawǒ Nzyɛ̌m. Nye á didi ó, lɨ́ ebóno mʉ̂r ngá báʼǎ gbâ bʉ̂r o b'Ɨ́zraɛ̂l nkul ɨ́ miléme nyá. Sísǐm mé Nzyɛ̌m, wé á be ó e né.

²⁶Sísǐm mé Nzyɛ̌m, wé á si boo lɛ́ɛ e né ó, nye apǎ dwe, nye óbee mʉ̂r Nzyɛ̌m á lœm múló mé jwɨ́ɨ nyá.

²⁷Jɔʼ yaá, nye ntɔ̂ʼ tô mpáh Nzyɛ̌m, mpʉ̌ Sísǐm mé Nzyɛ̌m wé á tɨ́e nye yɨ́. Nó ɨ́ jɔʼ óbyɛ̂l mé Yésʉs bé á pyâl e mwân wɔ́ɔ́ lɨ́ enzě lóŋlo étié Mékaná mé Nzyɛ̌m mé á tyêl obyɛ̂l o bwá ó bʉrʉ̂m lɨ́ yɨ́,

²⁸Siméon nzě nkɛ́ɛ mwân waá ɨ́ mebó mé, nzě dwě Nzyɛ̌m kûm. Nye ó:

²⁹«Dâ ɛ̌, gʉ́ kʉ́ sâ mpʉ gó á pa kɛʼ me yɨ́. Gʉ́ sâ ó, me láŋaa ɨ́ twiʼ yɨ̂ le mepyɛbla ɨ́ léme.

³⁰Ebě, míh mâm, mɨ́ beě twiʼ yô,

³¹twiʼ gó á komlo ɨ́ míh bíkúl bí bʉ̂r bíbyɛ̂h yɨ́.

³²Mwân nyâ, nye óbe ó njʉl ngá kʉn bíkúl bíswîh ó, byé gʉ́ŋaa go wɨ́. Bʉr bô, bʉr o b'Ɨ́zraɛ̂l, bé óbuú sêʼlɔɔ ɨ́ nye.»

³³Sɔ́ŋ, bé e nyɔ̌ŋ mé Yésʉs á be ó lɨ́ ebuú kâm mékǎn Siméon á cɨ, dumo e Yésʉs má.

³⁴Píe tɨ̂, Siméon nzě syɛɛ bé metyéelé, lɨ́ elɛ́ɛ e Maria, nyɔ̌ŋ mé Yésʉs ó: «Mwán nyâ, nye ó waá Nzyɛ̌m á ntɨh ó, nye twêhlaa baá o dí ebeně Nzyɛ̌m bá, le egbɛl bʉ́ʉ́ sí, baá o dí ekpɛl nyé bá. Nye óbe ó le jwɨ̌ʼ, lɨ́ elɛ̂ʼle nkûl mé Nzyɛ̌m. Bʉ́ʉ́ bʉ̂r bɨ́ɛ, bé ósóŋlo nyê.

³⁵Nye ó sá ngá lɛ̂ʼlě mbi bíjwɨʼ bʉ̂r dí esʉsol ɨ́ milémé myɔ́ɔ́ bí. Gua mʉmá nyâ, ebúʼ, lé ókpâhla gó ɨ́ léme mpʉ pâsoŋ ɨ́ jɔʼ gó óbee bé lɨ́ esâ nyé nó yɨ́.»

³⁶Yé á be ntémé ó e nyʉ́ʉ́ mʉ́má ngwíha milɔ̌b mé Nzyɛ̌m, díé lé Ane. Nye á be ó mwân mé Fanuɛ̂l, ɨ́ mpóʼo mé Áser. Nye á be ó, nye mû sí buú jwɨm. Nye á si bâ nyʉ́ʉ́ mʉ́rʉ̂m, bé e njʉ̂m wé waá jaá dǐ njɨ mimbû nzaangbá,

³⁷njʉ̂m wé ntɔ̂ʼ dwe, nyɨɛ ntɔ̂ʼ lîʼ kúho. Nye á didi ó nó, tótôʼ, tó kumo mímbû mekám mwom e mimbú mínâ. Nye á bé abɔ́ʼa e mpáh Nzyɛ̌m. Nye á sɨséa tɨ̂ʼ ó, móhó e pum. Nye á bɨbe ó, lɨ́ eti méde e bijɔʼ, lɨ́ esú lé éjɨʼla e Nzyɛ̌m.

³⁸Nó mpʉ̌ Siméon á be lɨ́ elwib nó yɨ́, Ane ntɔ̂ʼ sîhle, nzě dwě Nzyɛ̌m kûm, nzě lwib e bʉr o bé e boo nɔ́ɔ́ nyé á didi bá. Bé ntémé, bé á si bóno mʉr ngá táǎ góo, le edwǐh kúl bʉ̂r o b'Ɨ́zraɛ̂l ɨ́ mpila ébébe nyá. Nye nzě lɛ́ɛ bʉ̂r ónɨ̌ bɨ́bɛ̂h sá yé á dumo e mwân waá yɨ́.

³⁹Jɔʼ óbyɛ́l mé Yésʉs, bé á sil elóŋlo metié mé Dâ yɨ́, nó bé á nze swîʼ e né ɨ́ sí Galilê, tóŋɔɔ e né kwár nyɔ́ɔ́ Nazarɛ̂t.

⁴⁰Mwân nzě gwɨ́e le elele. Nye á be ó lwɨ́ŋlá le ocwóó. Nye á be ó e metyɛʼ me mpóm mé Nzyɛ̌m.

⁴¹Mimbú mímyɛ̂h, obyɛ̂l mé Yésʉs, bé á be lɨ́ etʉ̂tǒ Yerʉ́zalɛm, lɨ́ etó bwal nzɔ́ɔ Páska gʉ̂.

⁴²Mpʉ̌ Yésʉs á be, nye mû e mimbû kám e mimbá yɨ́, nó ó bé á nze ka tô, bɨ́bɛ̂h, mpʉ tûm nyɔ́ɔ́, nyé á be yɨ́.

⁴³Mpʉ nzɔ́ɔ á be, nyé osí síe yɨ́, nye nzě gbɛha, ojwóo bɨ́bɛ̂h lɨ́ eswîʼ, tóŋɔɔ ɨ́ mekwár mɔ́ɔ́. Obyɛ̂l mé Yésʉs, bé á be ntémé lɨ́ eswîʼ yɔ́ɔ́, Yésʉs nyɨɛ lɨ́ elîʼ bé píhe ɨ́ Yerʉ́zalɛm, bé l'agʉ́a.

⁴⁴Bé á gʉgʉ́a nzɨ́ e nzɨ̌ ó, bé e boo nɔ́ɔ́ ó dí sɔ́má. Nó bé á nze tye móhó ntinɨ̂. Píe tɨ̂, bê nzě san nyê, ntɔ̂ʼ sáŋɔɔ nyé kwá mimbyɛ́l myɔ́ɔ́ le osó bɔ́ɔ́, ɨ́ sáa, sáa, abeɔɔ.

⁴⁵Bé ntɔ̂ʼ tó swîʼ, tó sáa nyé ɨ́ Yerʉ́zalɛm.

⁴⁶Bé á ka to bee nye ó, lɨ́ elú élɛ̂l, ɨ́ mpáh Nzyɛ̌m. Nye á be ó témé olɛ̂ʼla o métié. Nyɨɛ lɨ́ ejôʼlo bê, le edî bé metíá.

⁴⁷Sá yɨ́yɛ̂h bé á jóʼo nye lɨ́ elɛ́ɛ yɨ́, bé á si kâm yê, ɨ́ wɨ́haá mbi ócwóó wé, le mimbi bíyalá nyé á yala mɔ́ɔ́ métíá bí.

⁴⁸Jɔʼ óbyɛ́l bé, bé á bee nye yɨ́, bé ntɔ̂ʼ kâm nyê. Nyɔ̌ŋ wé nzě dî e né ó: «Mwánǎm, go ka sá bɨ́h mpʉʼ ɨ́ yé ɛ́? Paá bee: bɨ̌h e sʉ́ŋ, bɨ́ buú sáa gó, le esyɛ̌l bá.»

⁴⁹Nó nyé á nze lɛ́ɛ e bé ó: «Bɨ̌n sáá mé ɨ́ yé ɛ́? Nzê bɨ̌n bé agʉ́a ó, yé jala ó, me díʼee ɨ́ mbɛ̌r mé Dâ ɛ̌?»

⁵⁰Bɨ́ɛ l'agwá jóʼǒ sá nyé á pʉgʉ kpɛl elɛ́ɛ bé yɨ́.

⁵¹Nó bé e boo nɔ́ɔ́, bé á swîʼ, tô Nazarɛ̂t. Nye á si sâ bé mejóʼo. Nyɔ̌ŋ á be lɨ́ ebɨbaʼle mílɔ̌b myaá mímyɛ̂h ɨ́ lémé wé tʉ́ŋlʉ̌.

⁵²Yésʉs nzě gwɨ́e ɨ́ páʼ nyʉ̂l, le etɔ́ma ɨ́ páʼ ócwóó. Nó ó, táare e Nzyɛ̌m, kumo e bʉr bɨ́bɛ̂h, bé á bee ó, nye ó dí mwân ebeɔɔ.