Read Koonzime Luc 20 Bible Online

Luc 20 - Koonzime bible

Luc 20

¹Ɨ́ gúú móhó, Yésʉs dína lɨ́ elɛ́ɛ mínzɨnzɨ mi bʉ̂r Mbɨambɨa Lɔ́ɔ ɨ́ mpáh Nzyɛ̌m nɛ́ɛ: ojwɨ́ɨ o tɨ̂ʼ le olɛ̂ʼla o métié, le otɔ́má bʉ̂r, ntɔ̂ʼ pyâl tɨ̂ʼ ɨ́ sulûm.

²Bê nzě lɛ́ɔɔ ó: «Twóóláá díé é mʉ̂r á lómo go ó, go sâʼ bisá bîʼ nyá. Go ntémé pʉgʉ́ sâ byé e nkul mé nzé?»

³Yésʉs ntɔ̂ʼ yala e bé ó: «Mɛm ntémé múo nzě dî bɨ́n tíá. Yalaa gá me!

⁴Ndubó mé Yʉánɛs, wé á duho wó? Nzê kwá mé Nzyɛ̌m, nzê kwá bʉr?»

⁵Nó ó bé á nze díila páʼ nyɔ́ɔ́. Bé ó: «Mɨ́ná yálá gá ó: “Nzyɛ̌m ó b'á lómo nye” nó, nye óbáʼǎ dî ó: “Yé bé nó wá, bɨ̌n á bé abûʼla nyé ɨ́ yé?”

⁶Mɨ́ná yálá gá ó: “Bʉr ó b'á lómo nye” nó, minzɨnzɨ mi bʉ̂r mímyɛ̂h, myé ólúmo gá mɨná mekóʼ.» (Ebě, myé á be lɨ́ ebúʼla ó, Yʉánɛs á kʉ be tyeetye ó ngwíha milɔ̌b mé Nzyɛ̌m.)

⁷Nó ó bé á ka yala e né ó: «Bɨ̌h bɨɛ, bé agʉ́a yɨ́h bé nkǒ ndubó wé waá, wé á pʉgʉ duho yɨ́!»

⁸Nó ó Yésʉs á lɛ́ɛ e bé ó: «Yé bé nó wá, me ntémé, me ákóʼó lɛ́ɛ bɨ́n mʉr dí edwe mé nkul ó, me sâʼ bisyɛ́ɛla bínɨ̌ nyá.»

⁹Yésʉs nzě lwib e kúl óYúden ɨ́ nzɨ̌ kɨkɛna yɨ̂. Nye e né ó: «Mʉr á be ó, nzě lî pemé, be métín mé óraisin tɨ̂. Píe tɨ̂, nzě líʼe bílóbila e pemé yaá, ó byé jɨ̂jana nye ɨ́ swɨɨ ékpɛm. Nye nzě ja nzɨ́, tô ɨ́ tyen, tó di ɨ́ gúú pâʼ mimbû mimbû, miswɨɨ miswɨɨ.

¹⁰Jɔ̌ʼ swɨɨ ékpɛm, yé á pyâl yɨ́, nye nzě lómo syɛ̂l mesâ wé ó, nye tôʼ nʉa nyé nkɔ̂b mpumó. Bilóbila byaá nzě bî nyê, bwóolɔɔ nyé mebô e mebô.

¹¹Nó nyé á baʼa lómo syɛ̂l mesâ swîh. Byê nzě bî ntémé nye, sáŋɔɔ nyé bisá bí ésɔ́m, bwóolɔɔ nyé mebô e mebô.

¹²Nye nzě báʼǎ lómo waá lɛ̂l. Nyɨ́haá ó, byé á bɛ́ble mepɨ́ɨ́, ntɔ̂ʼ soŋɔɔ nyê.

¹³Kúm pemé óraisin nzě lɛ́ɛ ó: “Á me káa sâ wâʼ nyá? Me múo kǎ lómo mwân wǎm mé dí ɨ́ buú kpɛl nyá. Jáŋá, byé ódwáawo nyê.”

¹⁴Jɔʼ bílóbila byé á bee mwân yɨ́, byê nzě lɛ́ɛla páʼ nyɔ́ɔ́ ó: “Beyɨɨ gá, medilá me kúm pemé ó mâ! Mɨná jʉ́ʼoo gá nye. Bilíʼé byé, byé nkʉ̂ sûʼla byaá gá bíná.”

¹⁵Byê nzě pɛʼ nyé ɨ́ pemé tʉ́ŋlʉ̌, tó jʉ́ŋɔɔ nyé mpómo pemé. «Nó kúm pemé ókǎ sâ bé nyá?

¹⁶Mɛ̌m bee ó, nye ónzě jʉ̂ bílóbila byaá bíbyɛ̂h, nzě pɛ̂h bʉ̂r oswîh, nzě kǎ tímle bé pemé yaá.» Jɔʼ bʉ̂r bé á jóʼo nó yɨ́, bé ó: «Heʼé, yʉ́ʉ́ sɔ̂ʼ, yé ákóʼó syɛ́ɛ bá nó!»

¹⁷Yésʉs nzě dwɛ̂ʼ bê. Nye e né ó: «Wáǎ lɔ̌b dí cɛmá ó? “Ekóʼ óswim ó mbɛ̌r, bé á bene lɨ́, lé ó b'á ka sûʼla ekóʼ e dí esúʼo médwii me sɔ́ŋ lɨ́.”

¹⁸Mʉr nyɨnyɛ̂h ócwe lɨ́ ekóʼ laá nyá, óbîʼ. Waá ékóʼ ngá bíla nyá, ósiǐ noʼ.»

¹⁹Olɛ̂ʼla o métié le ojwɨ́ɨ o mpáh Nzyɛ̌m á be ó lɨ́ esáa émɛ̂r Yésʉs ɨ́ jɔʼ yaá, ebě, bé á be ɨ́ gʉ́a ó, nye á lwib ɨ́ nzɨ̌ bikɨkɛna byaá ó, dumo e bê. Sâ gwár, bé á be lɨ́ ekpɛ́ɛ mínzɨnzɨ mi bʉ̂r.

²⁰Bê nzě táare étô le ebaʼɔɔ nyê. Nzě lómɔɔ bʉ̂r o b'á nwɨɨla le otîtyěl o bʉ̂r bá ó, bé tôʼ lâm nyé lâm dí ó, bé nkʉ̂ mɛ̂r nyé ɨ́ lɔ̌b yalá yé. Jɔʼ yaá ó bé á be e nkul ebɛ́ma nyé ɨ́ mebó mé njwɨ́ɨ, ó nye kúrɨɨ ɨ́ nkul jwɨ́ɨ mé ngóvina yɨ́.

²¹Nó ó bé á nze lɛ́ɛ e né ó: «Lɛ̂ʼla, bɨ̌h bé lɨ́ ekʉ́ gʉ́a ó, sá gó dí elɛ́ɛ le elɛ̂ʼle yɨ́, gǒ lɛ́ɛ́ yé ó, njɨ tîtyěl. Gó abe lɨ́ edwáawo bʉ̂r mempǒm. Gǒ jaá dwidwe bʉ̂r milɛ́ʼlá ó, njɨ lɨ́ otyeetye, ɨ́ mpʉ̌ Nzyɛ̌m dí ekpɛl yɨ́.

²²Nzê metié gá mɨ́ná, mé kam ó, mɨná jánaa gá Kɛ́ɛza tœ́a ɛ̌? Nzê yê mpéné ó, mʉ̌r sá ajána nyé yǎ ɛ̌?»

²³Mpʉ̌ Yésʉs á be ɨ́ kʉ́ gwá gʉ́a mépɨʼ mɔ́ɔ́ yɨ́, nó ó nyé á lɛ́ɛ e bé ó:

²⁴«Paá lɛ̂ʼle gá me nzǎŋ mɔnɨ́. Mpǒm mé nzé le díé mé nzé dí lúlá ɨ́ nzaŋ wɨ̂?» Nó ó bé á lɛ́ɛ ó: «Byaá mé Kɛ́ɛza.»

²⁵Nó ó Yésʉs á nze lɛ́ɛ e bé ó: «Bwóóláá gá bé Kɛ́ɛza bisá mé Kɛ́ɛza; le Nzyɛ̌m, bisá mé Nzyɛ̌m!»

²⁶Bé á bé abe e nkul ká dwe nyé mebě ɨ́ mekǎn nyé á lwib ɨ́ míh mínzɨnzɨ mi bʉ̂r má. Bé á si kâm yalá yé. Bɨ́bɛ̂h di ɨ́ jolaaa.

²⁷Nó bʉ́ʉ́ óSadwisyɛ̂n, bʉr o dí elɛ́ɛ ó, odwe, bé ákóʼó pah ɨ́ mesoo bá, bé á nze kwá mé Yésʉs. Bê nzě dî e né ó:

²⁸«Lɛ̂ʼla, Moyɨ̂z á be ɨ́ tyêl mɨ́ná gá etié lɨ̂. Lê cɛmá ó: “Mbɛ́á mʉ́rʉ̂m ódwe, alíʼe mwân nó, yé jala ó, mɨ́ɔɔ́ wé bâʼ mʉmá wé, bé e mʉmá waá nkʉ̂ byâ bwân lɨ́ esú é mɨ́ɔɔ́.”

²⁹Nó ó, yé á be ó bʉr nzaangbá, bɨ́ɔɔ́ e bɨ́ɔɔ́. Medwéʼe á si bâ mʉmá. Di ɨ́ di di di, nye nzě dwe, alíʼe mwân.

³⁰Waá mbá ntɔ̂ʼ bâ kúho waá, dwe, alíʼe mwân.

³¹Waá lɛ̂l ntémé. Tó pyâl ɨ́ bɨ́bɛ̂h nzaangbá, bé á dwe ó, alíʼe bwân.

³²Píe tɨ̂, mʉmá ntémé kǎ dwe.

³³Nó ɨ́ móhó bʉ̂r, bé ópah ɨ́ mesoo wɨ́, nye ókǎ sûʼla myáá mé nzé? Ebě, bɨ́bɛ̂h nzaangbá á si bâ nye.»

³⁴Nó ó Yésʉs á yala e bé ó: «Bʉr ó jɔʼ yɨ̂, bé lɨ́ ebɛ́a.

³⁵Sâ gwár, odwe ó Nzyɛ̌m dí ebee ó, bé ɨ́ jala le epah, tó di e né ɨ́ mpóʼo ngá tyélɔɔ nyɨ́ bá, bé ákóʼó kǎ bɛ́a.

³⁶Ebě, bé ákǎ báʼǎ dwe. Bé óbe ó mpʉ bééngeles. Bé ó bwán mé Nzyɛ̌m, ebě, bɨ́ boó pah.

³⁷Moyɨ̂z á si boo lɛ́ɛ ɨ́ hwɨ́m ó, bʉr, bé ópah ɨ́ mesoo. Nye á lɛ́ɛ nó ó, gúmó nyé á lwib ɨ́ lɔ̌b njʉl nyé á kœb lɨ́ edúo ɨ́ kpâʼ tʉ́ŋlʉ̌ wɨ́ yɨ́. Nye á jébe Dâ Nzyɛ̌m ó: “waá Abraham, Isaac, ndu e Yákɔb dí edwe kûm nyɔ́ɔ́ nyá.”

³⁸Nó ó yé lɨ́ elɛ̂ʼle ó, Nzyɛ̌m, nyé abe waá odwe. Nye ó Nzyɛ̌m mikublakúbla mi bʉ̂r, ebě, bʉr bɨ́bɛ̂h, bé ó le twiʼ ɨ́ mpǒm nyé.»

³⁹Bʉ́ʉ́ ólɛ̂ʼla o métié, bé á lɛ́ɛ ó: «Lɛ̂ʼla, gʉ́ kʉ́ gʉ́a élwib!»

⁴⁰Bé á bé akǎ dûhwo ó, bé díʼee nye mʉ́ʉ́ métíá.

⁴¹Nó ó Yésʉs á nze lɛ́ɛ e bé ó: «Bʉr, bé lɨ́ elɛ́ɛ ó, Mʉ̌r Nzyɛ̌m á lœm múló mé jwɨ́ɨ nyá, nye ó “Mwân mé David” ɨ́ yé?

⁴²Ebě, David mʉr tɨ̂, nye lɨ́ elɛ́ɛ lɨ́ oSâm ó:[4]: Dâ Nzyɛ̌m á lɛ́ɛ e Tî wǎm ó: “Diʼee sí wâ, ɨ́ páʼ mbó éjʉ́m wâm. Go e bónó ɨ́ puuu náǎ,:

⁴³tó pyâl ɨ́ jɔʼ mé ósâ óntɨ̂m le obɨn bô ó, bé díʼee tyélátyéla mékʉ̌ yô yɨ́.”

⁴⁴«David nyɨɛ á jébe nye ó: “Tî wǎm”. Á bɨ̌n bɨɛ̌ kǎ lɛ́ɛ ó, Mʉ̌r Nzyɛ̌m á lœm múló mé jwɨ́ɨ nyá, nye ó “Mwân mé David”[5] e nyáa nzɨ́?»

⁴⁵Mpʉ éntumo e bʉ̂r, lé á jʉjôʼlo nye yɨ́, Yésʉs nzě lɛ́ɛ le ompʉ́n bé ó:

⁴⁶«Bɨ̌n e báʼ ólɛ̂ʼla o métié. Bé ɨ́ kpɛl ébwâr míkán mi dí ɨ́ jaa jaa mí. Bé kpɨkpɛl ntémé ó, bʉr sóhaa bê, le edwe bé dúu gúmó bʉ̂r dí eswâl yɨ́. Bé ntémé kpɨkpɛl ó, bidiá bí ésôʼ ɨ́ mempáh mínjɨʼla ti e mpǎŋ bidiá bí dóló, gúmó bé dí edě dína yɨ́.

⁴⁷Bé lɨ́ esa míkúho, nʉnʉa bísá bíbyɛ̂h bé dí e tɨ̂ʼ bí. Bé jɨjɨʼla ntémé e Nzyɛ̌m ó, bul mékǎn, ebě, bé gwɨ́m ó, bʉr béyɨɨ bé mimbɨambɨa mi bʉ̂r. Bé ó ngá buú nʉa mébě le edweŋɔɔ bíntɨ́ʼá bí tɨ̂.»