Read Koonzime Luc 22 Bible Online

Luc 22 - Koonzime bible

Luc 22

¹Nó nzɔɔ biblêr bi dí abe e levure bí, nyaá bé jɨ́jébé Páska nyɨ́, á be ó, nye mû kúno ebwalɔɔ.

²Ojwɨ́ɨ o mpáh Nzyɛ̌m le olɛ̂ʼla o métié, bé á be ó lɨ́ esáa ménzɨ̌ mé éjʉ̂ Yésʉs. Sâ gwár, abee, ebě, bé á be ó lɨ́ ekpɛ́ɛ̌ sá mínzɨnzɨ mi bʉ̂r, myé ámû sâ bé yɨ́.

³Yʉ́das á be ó nyʉ́ʉ́ mʉ̂r ɨ́ sɔ́má ómpʉ́n kám le obá mé Yésʉs. Nye ó b'á jɨjébɔɔ ntémé “Iskariôt” nyá. Nó ó Sátan á nze nî nye ɨ́ léme,

⁴Yʉ́das ntɔ̂ʼ tô, tó bee ójwɨ́ɨ o mpáh Nzyɛ̌m, le ojwɨ́ɨ bé ódwéela o mpáh Nzyɛ̌m. Bé e boo nɔ́ɔ́ nzě tó sáa pɨ̂ʼ ɨ́ lɔ̌b wé ó, nye bɛ́maa bé Yésʉs.

⁵Nó ó bé á nze bu soho. Bé ntɔ̂ʼ di twíí ó, bé ójána nyê, dwe nyé mɔnɨ́.

⁶Yʉ́das ntémé ntɔ̂ʼ kam, nzě tô le esáǎ mpǎŋ jɔʼ ébɛ́ma bé Yésʉs, ebě, nye á kpɛl ó, nye bɛ́maa bé nyǎ, minzɨnzɨ mi bʉ̂r óYúden agʉ́a.

⁷Móhó nzɔ́ɔ bé á de biblêr bi dí abe e levure bí nyɨ́, ɨ́ dʉ́ó bé á jʉjʉ̂ bwá bínteme bí Páska lɨ́, wê nzě pyâl.

⁸Yésʉs nzě lómǒ Pétrus, bé e Yʉánɛs. Nye ó: «Tó jâm gá mɨná mede mé Páska mɨ́ná ngá de gá má.»

⁹Nó ó bé á nze dî e né ó: «Gǒ kpɛl ó, bɨ̌h tô komlo méde maá wó ɛ́?»

¹⁰Yésʉs, nye e bé ó: «Paá bee gâ: bɨ̌n bé e tó nkana. Pyálá bɨ́n ngá pyâl nkana yɨ́, bɨ̌n bé óbɔma e mʉr lɨ́ enkɛ́ɛ̌ káʼ médíbé. Jɔʼ bɨ́n óbɔma e né yɨ́, dúʼóó gá nye, tó kumo ɨ́ mbɛ̌r nyé ngá nî tɨ̂ʼ wɨ́.

¹¹Jɔʼ bɨ́n ngá pyâl ɨ́ mbɛ̌r waá yɨ́, bɨ̌n bé ólɛ́ɛ mʉ̂r mbɛ̌r ó: “Lɛ̂ʼla dí e go ó: Gúmó bɨ́h le ompʉ́n bâm ngá dě Páska yɨ́, yê wó ɛ́?”

¹²Nye ólɛ̂ʼle bɨ́n ntɔ́ɔ ɨ́ bwaʼ bwaʼ ɨ́ tólóm mbɛ̌r wé. Bɨ̌n bé ókœb ó, nye mû le otéble le bidiá. Tɨ̂ʼ ó bɨ́n ngá jâm méde mé Páska yɨ́.»

¹³Bé ntɔ̂ʼ tô, kœ̌b sá yɨ́yɛ̂h mpʉ nyé á lɛ́ɛ bé yɨ́, ntɔ̂ʼ jámɔɔ méde mé Páska.

¹⁴Jɔʼ éwala bé á jala le ede méde maá, lé á pyâl yɨ́, Yésʉs, bé e bʉr o mílʉ́mlʉ́ bé, bê nzě diŋɔɔ sí.

¹⁵Yésʉs ntɔ̂ʼ lɛ́ɛ e bé ó: «Me ɨ́ buú gwɨ̂m ó, mɨná dêʼ gá mede mé Páska mâʼ gúmo gwár jɔʼ mé dína apǎ sia e mitúú yɨ́,

¹⁶ebě, mě lɛ́ɛ́ bɨ́n ó: me ákǎ báʼǎ de mé ndéá swîh, tó pyâl ɨ́ jɔ̌ʼ ndéá mû sí táare ɨ́ móhó wɨ̂, ngá lwɨ́ŋlɨ ɨ́ Mpóʼo mé Nzyɛ̌m yɨ́.»

¹⁷Yésʉs ntɔ̂ʼ nʉǎ bélé ményoʼ, ntɔ̂ʼ dwě Nzyɛ̌m nzyǒo tɨ̂. Jɔʼ nyé á sil ejɨʼla e Nzyɛ̌m yɨ́, nye ntɔ̂ʼ lɛ́ɛ e bé ó: «Nʉaa gá bélé yɨ̂. Bɨ̌n e káblá ményoʼ me tɨ̂, bɨ̌n óbɛ̂h.

¹⁸Ebě, me lɨ́ elɛ́ɛ bɨ́n lɨ́ otyeetye ó, me ákǎ de ményoʼ mâ, tó pyâl ɨ́ jɔ̌ʼ Nzyɛ̌m ngá tyêl Mpóʼo nyé ɨ́ sɨŋ yɨ́.»

¹⁹Nye ntɔ̂ʼ nʉǎ blêr, báʼǎ dwě Nzyɛ̌m nzyǒo, nzě pɛ̂ʼ yé bipêh bipêh, kab bé byǎ. Nye e bé ó: «Blêr yɨ̂, yé ó nyʉ̂l nyǎm mû sí dweŋɔɔ lɨ́ esú lɨ́n nyɨ́. Bɨ̌n bé ótô le esɨ̂sǎ syɛ́ɛla yɨ̂ʼ bijɔʼ bíbyɛ̂h, le esîsimsa mé tɨ̂.»

²⁰Jwɨʼ gwár yaá, ɨ́ jɔʼ bé á sil ede yɨ́, nye ntɔ̂ʼ báʼǎ dwe bé bélé ményoʼ. Nye ó: «Menyoʼ mâ, mé ó edwán é sáá Nzyɛ̌m mû lɨ́ etyêl páʼ nyɔ́ɔ́ e bʉr lɨ́. Nyě tyél nyé ó, ɨ́ nzɨ̌ metié mâm mû lɨ́ eswɨɨ lɨ́ esú lɨ́n má.

²¹Beyɨɨ gá, mʉr bɛ́má mé nyá ó dí waá bɨ́h e nɔ́ɔ́ mû lɨ́ ede wâʼ ɨ́ téble nyâ!

²²Mwân mé Mʉr ódwě mpʉ̌ Nzyɛ̌m á boo tíʼe ɨ́ lɔ̌b wé yɨ́. Sâ gwár, nkoó, nye ó le mʉr ngá bɛ́ma nyé nyá!»

²³Bê nzě tô le edíila métíá páʼ nyɔ́ɔ́, lɨ́ edǐ gʉ́a mʉ̂r á be e nkul esâ mbǐ syɛ́ɛla waá ɨ́ sɔ́má yɔ́ɔ́ nyá.

²⁴Bʉr o mílʉ́mlʉ́ mé Yésʉs ntɔ̂ʼ nyɛl épére mékǎn páʼ nyɔ́ɔ́, lɨ́ edǐ gʉ́a mʉ̂r á laa bʉ́ʉ́ bɨ́bɛ̂h ɨ́ mpwaʼ dǐ nyá.

²⁵Yésʉs ntɔ̂ʼ lɛ́ɛ e bé ó: «Ojwɨ́ɨ o bʉ̂r ó sí yɨ̂ʼ jwɨ́ɨ́ bʉ̂r bɔ́ɔ́ ó e cére. Bʉr baá bɨ́ɛ lɨ́ ekʉ́ sêʼle bê, lɛ́ɔɔ ó, bé ó dí esúʼǒ sí yɨ́yɛ̂h.

²⁶Sâ gwár, páʼ nyɨ́n, yé abe nó. Mʉr láá bɨ́n bɨ́bɛ̂h nyá, nye ɨ́ jala le ebe ó mpʉ mâ ntwǒm. Bʉr o dí ejwɨ́ɨ bɨ́n bá, bé ɨ́ jala le enyɨ̂n mpʉ baá o dí eka bʉ́ʉ́ mede bá.

²⁷Le mʉr dí ede ɨ́ téble nyá, le waá dí eséa e né nyá, nzé láá nyʉ́ʉ́? Tó kœb ó, mɛm, me ɨ́ sɔ́má yɨ́n ó, waá dí eséa e bɨ̌n nyá.

²⁸Bɨ̌n bé á bé abɔ́ʼa e me ɨ́ bijɔʼ mé á jɨjaʼra e mebʉ́blá bí.

²⁹Mpʉ̌ Dâ á dwe me nkul jwɨ́ɨ ɨ́ páʼ Mpóʼo nyé yɨ́, mɛm ntémé, me mû ó lɨ́ ekab bɨ́n nkul jwɨ́ɨ ɨ́ Mpóʼo mpwár nyaá,

³⁰lɨ́ esú ó, bɨ̌n dêʼ mede le menyoʼ ɨ́ téble wǎm, ɨ́ Mpóʼo mé ngá jwɨ́ɨ nyɨ́. Bɨ̌n bé ódi ɨ́ mecwɨ́ɨ́ mé ójwɨ́ɨ mɨ́n tɨ̂, lɨ́ etíʼe ménzweh mé Ɨ́zraɛ̂l kám e mebá milɔ̌b.»

³¹Yésʉs ntɔ̂ʼ lɛ́ɛ̌ Pétrus ó: «Simon, Simon, paá bee: Sátan, nyɨ́ gbân bɨ́n! Nye óbóblo bɨ́n. Nye lɨ́ egwɨ̂m éntyeŋ bɨ́n le esyɛʼre bɨ́n mpʉ mʉ́má dí esyɛʼrě fufú blê yɨ́.

³²Sâ gwár, me á si jɨʼla e Nzyɛ̌m lɨ́ esú lô, ó búʼó yô, yé sá akur. Jɔʼ nyé ósâ nó, go ntémé sí báʼǎ nze kwá nyǎm yɨ́, go e súʼó bɨ́ɔɔ́ bô bibúʼó byɔ́ɔ́!»

³³Pétrus ntɔ̂ʼ lɛ́ɛ e né ó: «Dâ ɛ̌, me ɨ́ cǎr ó, me tôʼ gúmó yɨ́yɛ̂h gó ótô yɨ́, mɨná damá tô ɨ́ mbʉʼ, nkʉ̂ ntémé dwe.»

³⁴Yésʉs, nye e né ó: «Pétrus, mě lɛ́ɛ́ gó ó: mûh, njʉ́m kúo dína apǎ kwâʼ, go ókɛ́la mé bijɔʼ bilɛ̂l ó, gó agʉ́a mê.»

³⁵Nó ó Yésʉs á lɛ́ɛ e bé ó: «Símsáá gá jɔʼ mé á lómo bɨ̌n lɨ́ etô le etúnǒ Mbɨambɨa Lɔ́ɔ́ mé Nzyɛ̌m gúmó yɨ́yɛ̂h yɨ́. Bɨ̌n bé á tô ó, mʉr anʉǎ mpɨ́ʼ mɔnɨ́, nkʉ̂ myah méde, nkʉ̂ osípah. Jɔʼ yaá, nzê yʉ́ʉ́ sɔ̂ʼ, yé á si sâ bɨ̌n sɔ́ɔlʉ ɛ̌?» Bé ntɔ̂ʼ yala e né ó: «Heʼé, bɨ̌h bé á bé asáǎ sɔ̂ʼ.»

³⁶Nó nyé á lɛ́ɛ e bé ó: «Jɔʼ yɨ̂ʼ, mʉr dí e myah nyá, nye nʉ́aa wê. Waá dí e kpɛɛ́ mɔnɨ́ nyá nʉ́aa. Mʉr dí abe e pasoŋ nyá, nye ɨ́ jala le ebɛ́ma kʉ̂r wé, nye e bwám pâsoŋ.

³⁷Ebě, mě lɛ́ɛ́ bɨ́n ó: sá bé á cɛma ɨ́ páʼ wâm yɨ́, yé ɨ́ jala le esyɛ́ɛ. Yê cɛmá ɨ́ Mekaná mé Nzyɛ̌m ó: “Nye á si láŋɔɔ ɨ́ sɔ́má bʉ̂r o b'á gbɔba e Nzyɛ̌m bá.” Milɔ̌b bé á tile ɨ́ páʼ wâm mí, myé ódira.»

³⁸Nó bé á lɛ́ɛ e né ó: «Dâ ɛ̌, paá bee: bɨ̌h bé le opasoŋ obá wâ.» Nó nyé á nze lɛ́ɛ e bé ó: «Bím nɨ̌, yɨ́ jala.»

³⁹Yésʉs nzě mɔa, tô lɨ́ ecwɨ̂ʼ bé jɨ́jébé ó, «Ecwɨ́ʼ lé ólivier» lɨ́, ebě, nye á be lɨ́ eboó sɨsâ nó ó ɨ́ ti ti ti. Ompʉ́n bé, nzě dû nyé gʉ̂.

⁴⁰Jɔʼ nyé á pyâl gúmo yaá yɨ́, nye ntɔ̂ʼ lɛ́ɛ e bé ó: «Jɨʼlaa gá e Nzyɛ̌m, nye ayɨ́ bîr ó, Sátan bóblaa bɨ̌n.»

⁴¹Nó nyé á líʼe bê, nzě bá tô dóló, tyé mʉ̂r dí e nkul eguho ébaalé yɨ́. Nye ntɔ̂ʼ bɨʼ mébóó sí, jɨʼla e Nzyɛ̌m.

⁴²Nye e né ó: «Dâ ɛ̌, gó kam nó, pɛʼɛɛ mé ɨ́ mitúú mî. Damá jóʼo nó, yé díʼee abě mpʉ mɛ̂m dí ekpɛl yɨ́, njɨ mpʉ gúa dí ekpɛl yɨ́.»

⁴³

⁴⁴

⁴⁵Jɔʼ nyé á sil ejɨʼla e Nzyɛ̌m yɨ́, nye nzě gbɔlwa, tô nko ómpʉ́n bé, bé á be yɨ́. Nyě kǎ kœb ó, bɨ́bɛ̂h mû ɨ́ bijô ɨ́ súgúgú ɨ́ lɔ̌b ébúʼ lé á be bé ɨ́ miléme lwɨ́ŋlá lɨ́.

⁴⁶Nye ntɔ̂ʼ jɨm bê, le elɛ́ɛ e bé ó: «Bɨ̌n bé lɨ́ ejâ bíjô ɨ́ yé? Gbɔlwaa gá sí. Jɨʼlaa gâ, bɨ̌n ámû duma ɨ́ mebʉ́blá.»

⁴⁷Yésʉs dína lɨ́ elwib, kǎ saʼ nɛ́ɛ: sɔ́má bʉ̂r, yɨ́ pyâl ɨ́ sulûm. Yʉ́das, mʉr ngwár á be ɨ́ sɔ́má bʉ̂r kám le obá nyá ó b'á tyɛ̂b bé dóló. Nye ntɔ̂ʼ sîhlě nko Yésʉs á be yɨ́, ó nyě dú ó koo ékœ̂h.

⁴⁸Yésʉs ntɔ̂ʼ lɛ́ɛ e Yʉ́das ó: «Nzê ɨ́ ndwíá koo ékœ̂h ó gó bɛ́má Mwân mé Mʉr ɛ̌?»

⁴⁹Jɔʼ ómpʉ́n mé Yésʉs, bé á gʉ́a sá múo pyâl bé yɨ́, bé ntɔ̂ʼ dî e né ó: «Dâ ɛ̌, nzê bɨ̌h sâʼ duʼó le opasoŋ ɛ̌?»

⁵⁰Tyé e tyé yaá, nyʉ́ʉ́ mpʉ́n nzě gœ̂m pâsoŋ lɨ́ ebɔ́m, ntɔ̂ʼ kpar syɛ̂l mesâ njwɨ́ɨ opara, tíʼe nyé egwǎl lé éjʉ̂m ɨ́ pyâ.

⁵¹Yésʉs ntɔ̂ʼ lɛ́ɛ ó: «Tyélɨ́ɨ́ gá duʼó. Yé díʼee bím nɨ̌.» Nye ntɔ̂ʼ mɛ̂r égwǎl e mʉ̂r waá, lé ntɔ̂ʼ sâ mbɨ̂mbɨá.

⁵²Yésʉs ntɔ̂ʼ lɛ́ɛ ójwɨ́ɨ o mpáh Nzyɛ̌m, le ojwɨ́ɨ bé ódwéela o tɨ̂, le otɔ́má bʉ̂r o b'Ɨ́zraɛ̂l, bé á mɛ̂r nye bá ó: «Bɨ̂n nzé le opasoŋ le mimbɨ́ŋ ó, nzê bɨ̂n jóʼó ó, me ó nzilngǎn ɛ́?

⁵³Me á bɨbe dʉ́ó lɨ́lɛ̂h ó, témé sɔ́má yɨ́n ɨ́ mpáh Nzyɛ̌m, bɨ̌n l'akɛl mé mbô ɨ́ nyʉ̂l. Nó bɨ̌n ka mɛ́r mé ɨ́ báánâʼ ó, ebě, lɨ̂ʼ éwala mû ó laá lɨ́n e laá mpóʼo mé Sátan.»

⁵⁴Nó bé ntɔ̂ʼ mɛ̂r Yésʉs, tóŋɔɔ e né ɨ́ mbɛ̌r njwɨ́ɨ opara. Pétrus á be ó lɨ́ edû nyé e ncɛrá.

⁵⁵Bé á be ɨ́ tira dúró témé ebɛhɛɛ. Bʉr nzě bɔma lé ɨ́ nká, lɨ́ edwáblɔɔ̌ siʼe. Pétrus ntémé ntɔ̂ʼ di sí ɨ́ sɔ́má yaá.

⁵⁶Nyʉ́ʉ́ syɛ̂l mesâ nzě bee nyé lɨ́ epem e dúró. Mʉmá waá nzě siŋlě Pétrus ɨ́ tooobó. Nye e né ó: «Mʉr nyâʼ ntémé á be ó ɨ́ sɔ́má yé.»

⁵⁷Pétrus nzě kɛ́la. Nye e mʉmá ó: «Mɛm, mé agʉ́a nyê.»

⁵⁸Yé á si laa mâ jɔʼ. Nyʉ́ʉ́ mʉ̂r nzě bee ntémé nye. Mʉ̌r nɨ̌ ntɔ̂ʼ lɛ́ɛ ó: «Go ntémé, go ó mʉr ngwár ɨ́ sɔ́má yɔ́ɔ́.» Pétrus ntɔ̂ʼ yala e mʉr waá ó: «Wɛɛ, mé abe nyê.»

⁵⁹Ewala egwár, lé osí laa, nyʉ́ʉ́ mʉ̂r ntɔ̂ʼ pyâl, nzě báʼǎ boʼlo nyê. Nye e né ó: «Lɨ́ otyeetye, mʉr nyâʼ á kʉ be ó ɨ́ sɔ́má yé, ebě, nye ntémé, nye ó mʉr Galilê.»

⁶⁰Pétrus ntɔ̂ʼ lɛ́ɛ e né ó: «Mé apʉgʉ́ gʉ́ǎ sá gó dí elɛ́ɛ yɨ́.» Nyé dína lɨ́ elwib nó nɛ́ɛ: njʉ́m kúo nzě kwâʼ.

⁶¹Nó ó Tî Yésʉs á nze dwira, tô le ebála. Bé e Pétrus ntɔ̂ʼ bɔma mîh. Pétrus ntɔ̂ʼ símsa mékǎn Tî Yésʉs á lɛ́ɛ nye má ó: «Mûh, njʉ́m kúo dína apǎ kwâʼ, go ókɛ́la nzɔ̂ʼ lɛ̂l ó, gó agʉ́a mê.»

⁶²Jɔʼ yaá Pétrus ntɔ̂ʼ tô kʉ̌l, nzě tô le ejɨ ɨ́ buo buo.

⁶³Bʉr o b'á dwidwéele nye bá, bé á be ó lɨ́ ebuú nzyɛm nyê. Búblɔɔ nyé mîh e péh kán, ŋmɛ́hɔɔ nyê, lɛ́ɔɔ e né ó: «Yé bé go ó ngwíha milɔ̌b nó, twóóláá mʉ̂r ŋmɛ́h gó nyá díe.»

⁶⁴

⁶⁵Píe tɨ̂, bé ntɔ̂ʼ báʼǎ cɨŋɔɔ nyé mʉ́ʉ́ mékǎn mélwɨ́ɨ ɨ́ buo buo.

⁶⁶Jɔ̌ʼ mɛ́n wé á lɔ́ma yɨ́, otɔ́má bʉ̂r o b'Ɨ́zraɛ̂l, bé le ojwɨ́ɨ o mpáh Nzyɛ̌m, le olɛ̂ʼla o métié, bé ntɔ̂ʼ syɛŋǎ gúmo gwár. Bé ntɔ̂ʼ nzeŋɔɔ e Yésʉs ɨ́ gwɨ́hlá yaá,

⁶⁷nzě díŋɔɔ e né ó: «Lɛ́yɨ́ɨ́ bɨ́h nkʉ̂ go ó dí Mʉ̌r Nzyɛ̌m á lœm múló mé jwɨ́ɨ nyá, nkʉ̂ ó, ntʉ gó dí nye.» Nye ntɔ̂ʼ yala e bé ó: «Mé sí lɛ́ɛ bɨ́n nó, bɨ̌n ábûʼla.

⁶⁸Mé dí bɨ́n tíá nó, bɨ̌n áyala mê.

⁶⁹Damá jóʼo nó, mě lɛ́ɛ́ bɨ́n ó: táare ɨ́ báánâ, Mwân mé Mʉr ódi ndîndǐl ɨ́ mbó éjʉ́m mé Nzyɛ̌m nkul nyɨnyɛ̂h.»[6]

⁷⁰Nó ó bɨ́bɛ̂h bé á nze dî ó: «Go lɛ́ɛ́ yé? Nzê go lɛ́ɛ́ ó, go ó dí Mwân mé Nzyɛ̌m ɛ̌?» Nye ó: «Yé ó mpʉ bɨ́n dí elɛ́ɛ̌ nɨ̌: me ó dí nye.»

⁷¹Bé ntɔ̂ʼ lɛ́ɛ ó: «Mɨná bé akǎ sáa gá bʉ́ʉ́ óboʼlo oswîh. Mɨná bʉr o tɨ̂ʼ bɨ́ jóʼo gá mekǎn mé nye mʉr tɨ̂.»