Read Koonzime Luc 23 Bible Online

Luc 23 - Koonzime bible

Luc 23

¹Nó bʉ̂r ó gwɨ́hlá yaá á mɔa sí, ntɔ̂ʼ tóŋɔɔ e Yésʉs kwá mé Pilátos.

²Bê nzě táare épurɔɔ nyê. Bé ó: «Bɨ̌h bé á si bee mʉr nyâʼ lɨ́ endámǎ kúl bʉ̂r yɨ́h lɨ́ elɛ̂ʼle yé ó, yé ajala le ejánǎ Kɛ́ɛza tœ́a. Nye á si kʉ lɛ́ɛ ntémé ó, nye ó dí Njwɨ́ɨbʉr, waá Nzyɛ̌m á lœm múló mé jwɨ́ɨ wɨ́.»

³Pilátos nzě dî e né ó: «Nzê go ó njwɨ́ɨ oYúden ɛ̌?» Yésʉs ntɔ̂ʼ yala e né ó: «Yé ó gó dí sí lɛ́ɛ̌ nɨ̌.»

⁴Ɨ́ mekǎn maá, Pilátos ntɔ̂ʼ lɛ́ɛ ójwɨ́ɨ o mpáh Nzyɛ̌m, bé le entumo e bʉ̂r laá ó: «Mɨ́ pahle nyê. Nó mɛm, mé abee mʉ̂r nyâʼ e sá ébébe nyé nʉ́á mébě e tɨ̂ʼ yɨ́.»

⁵Bé ntɔ̂ʼ nyémle métwíí ó: «Lɛ́ʼlá nyé dí edwe bɨ́h wɨ́, wé lɨ́ etô le ebyâ bíntʉ̌ mékwár e mékwár mɛ̂h ɨ́ sí Yʉ́da. Nye á taare esâ nó ó ɨ́ sí Galilê. Nye nzě kumǒ gúmó mɨ́ná dí gá yɨ̂.»

⁶Njóʼá Pilátos á jóʼo milɔ̌b myaá yɨ́, nye nzě dî ó: «Nzê mʉr nyâ, nye ó mʉr Galilê ɛ̌?»

⁷Jɔʼ nyé á gʉ́a ó, Yésʉs á duhǒ sí Erôd á be lɨ́ ejwɨ́ɨ yɨ́, nye ntɔ̂ʼ tyen nyé kwá mé Erôd. Erôd ntémé á be ó ɨ́ Yerʉ́zalɛm ɨ́ melû maá.

⁸Jɔʼ bé á pyâl e Yésʉs kwá mé Erôd yɨ́, Erôd nzě soho, ntaa sʉ́ŋa, ebě, nye á si boo jóʼo milɔ́ɔ dumo e mesimá Yésʉs á sɨsâ má. Sá tɨ̂ʼ ó nyé á be lɨ́ egwɨ̂m ébee mésimá mé Yésʉs yɨ́.

⁹Nye ntɔ̂ʼ dî nyé metíá ɨ́ buo buo, Yésʉs nyɨɛ l'ayala nyé mǎ.

¹⁰Ojwɨ́ɨ o mpáh Nzyɛ̌m, le olɛ̂ʼla o métié, bé á be ó tɨ̂ʼ lɨ́ elúmo nyé mekǎn ɨ́ buo buo, le epurɔɔ nyê.

¹¹Erôd, bé e bisója byé nzě lwɨ́ɔɔ nyé le epyéhɔɔ nyê. Bé ntɔ̂ʼ bôr nyé kán ɨ́ nyʉ̂l ɨ́ nkaaá. Erôd ntɔ̂ʼ báʼǎ tyen nyé kwá mé Pilátos.

¹²Erôd bé e Pilátos, bé á nyɛɛ bɨbe ó, lɨ́ enwimla páʼ nyɔ́ɔ́. Nó ó, ɨ́ dʉ́o laá ó bé á ka tia esó yɨ́.

¹³Jɔ̌ʼ Yésʉs á baʼa pyâl kwá mé Pilátos yɨ́, Pilátos nzě syɛŋ ójwɨ́ɨ o mpáh Nzyɛ̌m, le otɔ́má bʉ̂r o b'Ɨ́zraɛ̂l, bé e minzɨnzɨ mi bʉ̂r.

¹⁴Nye ó: «Bɨ̂n nzé mé e mʉr nyâʼ ó, nye lɨ́ ebêhle mínzɨnzɨ mi bʉ̂r ó, myé gbɔ́baa e njwɨ́ɨ. Paá bee gâ: mɨ́ pahle nyé ɨ́ míh mɨ́n, kœb ó, nyé abe e sá ébébe ɨ́ bisá bíbyɛ̂h bɨ́n dí epur nyé e tɨ̂ʼ bí.

¹⁵Erôd ntémé á bé abee nyé e mebě, ebě, nye á si baʼa bwóolo nye. Nó ó, mʉr nyâ, nyé abe e sá ébébe gwár nyê sá dí ejala ó, nye dwêʼ yɨ́!

¹⁶Nó, me óŋmɛ̂h nyé mingáhá, mé obîr nyê.»

¹⁷

¹⁸Bʉr bɨ́bɛ̂h ntɔ̂ʼ bɨ̂n métwíí ó: «Jʉ́ʼóó mʉ̂r nyâ. Go e bír bɨ́h Barábas.»

¹⁹(Barábas waá á tyenɔɔ ɨ́ mbʉʼ ó, ebě, bé e bʉ́ʉ́ bʉ̂r, bé á si sâ bintʉ̌ ɨ́ nkana. Nye ntémé á si jʉ̂ mʉr.)

²⁰Nó mpʉ̌ Pilátos á be lɨ́ edǐ bîr Yésʉs yɨ́, nye nzě báʼǎ lɛ́ɛ bé ó, ó nyě bír ó nye.

²¹Nó ó, bé ntɔ̂ʼ nyémle métwíí, lɨ́ elɛ́ɛ ó: «Bomlaa nyé ɨ́ kolôs kʉ́. Bomlaa nyé ɨ́ kolôs kʉ́.»

²²Pilátos ntɔ̂ʼ báʼǎ dî bé tíá ɨ́ jɔʼ lɛ̂l ó: «Ɨ́ lɔ̌b yé? Ebě, yáǎ sá ébébe nyê pa sá? Mɛm, mé abee ó, nyě e mebě ó, nye ɨ́ jala le edwe. Nó, me óŋmɛ̂h nyé mingáhá, mé obîr nyê.»

²³Bé ntɔ̂ʼ jámle nyé le egbâ nkûl lɨ́ ebɨ́nɔɔ métyêl kʉ́kʉ́ ó: «Bomlaa nyé njɨ ɨ́ kolôs kʉ́.» Nó ó lɔ́ɔ́ wɔ́ɔ́ ó b'á ka ntaa.

²⁴Pilátos nzě kam ó, nyě sá ó mpʉ bé á lɛ́ɛ yɨ́.

²⁵Nye nzě bîr Barábas, mʉr á gbáŋɔɔ ɨ́ mbʉʼ ebe nyé á gbɔba e njwɨ́ɨ lal le ejʉ̂ mʉ̂r nyá. Nó nyé á ka nze kam esâ Yésʉs mbi bé á kpɛl wɨ́.

²⁶Jɔʼ bísója byé á be lɨ́ etô e Yésʉs yɨ́, byê nzě bɔma e Simon, mʉr Sirénia, lɨ́ ebúlǎ pemé. Bisója nzě mɛ̂r nyê, tínɔɔ nyé ó, nye nkɛ́yɨɨ kolôs mé Yésʉs, nye e dú Yésʉs píe koo wé.

²⁷Ánɨ̂nɨ̂n entumo e bʉ̂r, bé á be ó lɨ́ edû nyê. Yé á be ntémé ó e bʉbá, bɨ́ɛ lɨ́ ejɨ médwê ɨ́ lɔ̌b wé, mebô kʉ́ milʉ̂.

²⁸Yésʉs ntɔ̂ʼ dwira, dwɛ̂ʼ bê. Nye ó: «Bʉbá ó Yerʉ́zalɛm, mʉr ajɨ gá lɨ́ esú lâm. Jɨʼee gá lɨ́ esú lɨ́n, le bɨ̌n bʉr o tɨ̂, ti e bwán bɨ́n.

²⁹Melú mé ébébe, mé lɨ́ enze. Jɔʼ yaá ó bé ngá lɛ́ɛ ó: “Metyɛʼ me mpóm, mé ódi e mikǔn mi bʉ́bá, le baá bé á be abyâ bwân bá le baá dína apǎ dêhle mwân ebêl bá!”

³⁰Jɔʼ yaá ó bʉ̂r ngá lɛ́ɛ le mecwɨ́ʼ ménɨ́nɨ́ɨ́ ó: “Dumaa gá bɨ̌h ɨ́ menyʉ̂l.” Bé ólɛ́ɛ le maá métwáʼwó ó: “Solɨɨ gá bɨ̌h.”

³¹Nkúná bê pa sâ mɛ̂m, bɨ́h lɨ́ nó, á dwɛʼra e bɨ̌n, bidwédwé!»

³²Jɔʼ bísója byé á tô e Yésʉs, tó jʉ̂ nyé yɨ́, byé á si tô ntémé le osyɛ̂l bé ébébe obá.

³³Bê nzě pyâl gúmó bé jɨ́jébé ó, “Bʉ̌n Lʉ̂” yɨ́. Bé ntɔ̂ʼ bomlǒ Yésʉs e binzâŋ, bɨ́nɔɔ nyé ɨ́ kolôs kʉ́, bomlɔɔ ntémé osyɛ̂l bé ébébe obá baá: nyâ, ɨ́ yé kolôs ɨ́ páʼ mbó éjʉ́m mé Yésʉs; nyʉ́ʉ́, ɨ́ mbó émyɛ̌l.

³⁴[Yésʉs ntɔ̂ʼ lɛ́ɛ ó: «Dâ ɛ̌, pɛʼɛɛ̌ baa gô pa láá bé ɨ́ syɛ́ɛla yɨ̂ʼ yɨ́, ebě, bé agʉ́ǎ sá bé dí esâ yɨ́.»] Bisója ntɔ̂ʼ kabla míkán myé, doŋɔɔ myé ebya.

³⁵Bʉ́ʉ́ bʉ̂r ó sí yaá, bé á be ɨ́ tyɛ̂b tɨ̂ʼ ɨ́ gúmo yaá, lɨ́ edwɛ́ʼɔɔ. Otɔ́má ó bʉ̂r, bê nzě pya nyê. Bé ó: «Nye á si tiʼ bʉr oswîh. Nye káa tiʼ nyé mʉr tɨ̂, yé bé nye ó dí Mʉ̌r Nzyɛ̌m á lœm múló mé jwɨ́ɨ, waá Nzyɛ̌m á pɛ̂h nyá nó!»

³⁶Bisója ntémé á be lɨ́ epya nyê. Byê nzě sîhle, dweŋɔɔ nyé bíkɛ̌ʼla ményoʼ. Bé ó:

³⁷«Yé bé go ó njwɨ́ɨ oYúden nó, tiʼɨɨ gó mʉr tɨ̂!»

³⁸Kʉ́ lʉ́ wé, bé á be ɨ́ tyel ébɔ́m le micɛmá ó: Njwɨ́ɨ oYúden ó nyâ.

³⁹Lɨ́ osyɛ̂l bé ébébe obá bé á pa bómlo ɨ́ kolôs kʉ́ bá, nyʉ́ʉ́ mʉ̂r ngwár tɨ̂ nzě pyǎ Yésʉs. Nye e né ó: «Ntʉ gó dí Mʉ̂r Nzyɛ̌m á lœm múló mé jwɨ́ɨ nyá ɛ́? Kaá tiʼ gó mʉr tɨ̂ʼ bé. Go e tíʼ ntémé bɨ̌h.»

⁴⁰Syɛ̂l ebébe, waá nyʉ́ʉ́, ntɔ̂ʼ dwe nyé mebě. Nye e né ó: «Nzê gó abá kpɛ́ɛ̌ Nzyɛ̌m ɛ̌? Bɨ̌n bɨɛ lɨ́ esia e mitúú mimpwár?

⁴¹Mɨná ó dí ejala le esia e mbǐ túú wɨ̂, ebě, mɨná ó b'á sɨsâ bisyɛ́ɛla bi dí ɨ́ bébe bí. Nyɨɛ á bé asâ syɛ́ɛla ébébe gwár.»

⁴²Nó ó, nye ntɔ̂ʼ lɛ́ɛ e Yésʉs ó: «Yésʉs, mwánǎ, símsáá mé ɨ́ jɔʼ gó ngá tyêl Mpóʼo nyǒ yɨ́!»

⁴³Yésʉs, nye e né ó: «Me lɨ́ elɛ́ɛ gó lɨ́ otyeetye ó, mûh, mɨná e go bé ódǐ diá gwár ɨ́ Paradîs!»

⁴⁴Jɔ̌ʼ témé móhó, yé á pyâl yɨ́, edúrʉ́ʉ́ ntɔ̂ʼ sula ɨ́ sí yɨ́yɛ̂h ntinɨ̂, tó pyâl ɨ́ mewala melɛ̂l mé bíí kʉ̌ʼ.

⁴⁵Jɔʼ édúrʉ́ʉ́, lé á sâ yɨ́, kán ébê, wé á bɨbe tyelá ɨ́ mpáh Nzyɛ̌m wɨ́, wé ntɔ̂ʼ nyɨɛ ɨ́ kwiií bipéh bíbá.

⁴⁶Yésʉs ntɔ̂ʼ tíme kʉ́kʉ́. Nye ó: «Dâ ɛ̌, mɨ́ tímlě sísǐm wâm ɨ́ mebó mô!» Le nyé á sil elwib, le nyé ntɔ̂ʼ á sula swɨ̂h.

⁴⁷Kapitɛ̂n á be tɨ̂ʼ nyá, mbeá nyé á bee sá yɨ́yɛ̂h yé á syɛ́ɛ yɨ́, nye ntɔ̂ʼ dwě Nzyɛ̌m kûm. Nye ó: «Lɨ́ otyeetye, mʉr nyâʼ á kʉ be ó mpǎŋ tîtyěl mʉr!»

⁴⁸Nó ntémé ó méntumo me bʉ̂r mé á nze, lɨ́ enzě beě sá yé á syɛ́ɛ yɨ́. Mbeá bé á bee yé yɨ́, bê nzě gɔ́na le ebúla ɨ́ twíaaa, mebô kʉ́ milʉ̂.

⁴⁹Bʉr bɨ́bɛ̂h bé á gʉ́a Yésʉs bá, bé á tyɛ̂b ó e bá e ncɛrá, lɨ́ ebeɔɔ bísá byaá bíbyɛ̂h. Bʉbá bé á be ɨ́ sɔ́má tyen yé, táare ɨ́ sí Galilê bá, bé ntémé á tyɛ̂b ó nó.

⁵⁰Nó ó, tɨ̂ʼ ɨ́ sɔ́má yaá, yé á be ó e nyʉ́ʉ́ mʉ̂r, díé lé Yóseb. Nye á be ó mʉr Arimatê, nkana óYúden. Nye á be ó tîtyěl mʉr lɨ́ esɨsâ bʉ̂r bisyɛ́ɛla bimpâ. Nye á be lɨ́ ejóʼǒ dwéh ébeě Nzyɛ̌m lɨ́ etyêl Mpóʼo nyé ɨ́ píʼi. Nye ntémé á be ó mʉr ngwár ɨ́ mpáh milɔ̌b oYúden. Sâ gwár, nye á bé akǎm sá bʉ́ʉ́ bé á tíʼe le esâ yɨ́.

⁵¹

⁵²Mʉ̌r nɨ̌ ntɔ̂ʼ mɔa, tô kwá mé Pilátos, tó dî nyé múú mé Yésʉs. Mpʉ̌ Pilátos á kam yɨ́, Yóseb nzě báʼǎ pyâl gúmó múú mé Yésʉs á be yɨ́.

⁵³Nye nzě sul wé sí, díble wé e kán ɨ́ pumo pumo, ntɔ̂ʼ tó dɨl wé ɨ́ soo bé á túbo ngʉ̌ʼ lɨ́ ekóʼ nyɨ́. Mʉr á bé apǎ debe tɨ̂.

⁵⁴Yé á be ó ɨ́ móhó bé á jɨjâm mede bé ngá de ɨ́ sábat má. Móhó sábat, wé á be ó, wé mû ɨ́ nɨ́rɨ́nɨ́rɨ.

⁵⁵Ɨ́ jɔ̌ʼ Yóseb á to dɨl múú mé Yésʉs yɨ́, bʉ́ʉ́ bʉ́bá ntɔ̂ʼ bee, nzě dúŋɔɔ nyê, lɨ́ etó beɔɔ sóo, beɔɔ ntémé mpʉ̌ múu á dɨlɔɔ tɨ̂ʼ yɨ́. Bʉbá baá ó b'á be ɨ́ sɔ́má mé Yésʉs, táare ɨ́ sí Galilê.

⁵⁶Mpʉ bé á sil ebee yɨ́, bê nzě swîʼ, tóŋɔɔ̌ nkana, tó komlɔɔ múló mé élɔma ndu e lɔbína. Mpʉ̌ móhó sábat á pyâl yɨ́, bê nzě dǐ gúmo gwár, atɨ́la, mpʉ étié lɔ́ɔ́, lé á lɨlɛ́ɛ yɨ́.