Read Koonzime Luc 3 Bible Online

Luc 3 - Koonzime bible

Luc 3

¹Yé á be ó ɨ́ mbû kám e tɛ̂n Kɛ́ɛza Tibɛ́rios á tyɛ̂b njwɨ́ɨ yɨ́. Pɔ́ŋtus Pilátos á be ó ngóvina ɨ́ sí Yʉ́da; Erôd nyɨɛ, ɨ́ sí Galilê. Mɨ́ɔɔ́ wé Philippe á be lɨ́ ejwɨ́ɨ mésí mé Itwirê ndu e Trakónitos. Lisanías nyɨɛ á jwɨ́ɨ ó, sí Abilên.

²Ánas, bé e Kayɨáfa, bé á be ó ojwɨ́ɨ o mpáh Nzyɛ̌m ɨ́ jɔʼ gwár yaá. Nó ó Nzyɛ̌m á nze lwib e Yʉánɛs, mwân mé Zacharie, ɨ́ jɔʼ nyé á didi ɨ́ lʉá yɨ́.

³Píe tɨ̂, nye nzě ja nzɨ́ lɨ́ etô le etúnǒ lɔ́ɔ́ mé Nzyɛ̌m ɨ́ ngʉ́rá díbé Yɔrdên wɨ́wɛ̂h. Nye á lɨlɛ́ɛ e bʉr ó, bé túmaa mikoo e mebébe mɔ́ɔ́ le edwira míléme. Bé e dúŋɔɔ, Nzyɛ̌m pɛ́ʼɛɛ bibaa bí ébébe byɔ́ɔ́.

⁴Nó syɛ́ɛla yé yaá, yé á si bɔma e lɔ́ɔ́ ngwíha milɔ̌b mé Nzyɛ̌m Ésayie á cɛma yɨ́. Yê cɛmá ɨ́ Mekaná mé Nzyɛ̌m ó: “Mʉr, nye lɨ́ etyɛ̂b le túnó ɨ́ lʉá tʉ́ŋlʉ̌, lɨ́ elɛ́ɛ ó: Komlaa gá nzɨ̌ mé Dâ. Bɨ̌n a tyél ménzɨ̌ mé ɨ́ lîm.

⁵Menó, mé byéelɔɔ. Mecwɨ̂ʼ ménɨ́nɨ́ɨ́ ndu e maá métwáʼwó, mé syéelɔɔ. Mɨmpaʼá dí mɨmbóó mɨmbóó é, myé sɨ́ʼɔ. Bɨgúmó dí monkónó monkónó é, byé díʼee ɨ́ swóoo.

⁶Mʉr nyɨnyɛ̂h óbeě mpʉ̌ Nzyɛ̌m ótiʼ mɨ́ná gá yɨ́.”

⁷Entumo e bʉ̂r nzě nze ó, Yʉánɛs dúʼoo bê. Nó nyé á lɛ́ɛ e bé ó: «Bɨ̌n bwá ó méjwɨ̂l bâ, nzé á pʉgʉ cɨ̂l bɨ̌n ó, bɨ̌n bé e nkul ekɨ̂ŋ nkpáa mé Nzyɛ̌m ɨ́ jɔʼ nyé ngá lɛ̂ʼle bɨ́n lǎ ɛ́?

⁸Gúmáá gá mimpaŋ mi mpúmó mi dí ejala e bʉr o mû sí dwira míléme bá. Atáare gá le elɛ́a páʼ nyɨ́n ó: “Ɨ́ páʼ gá wɨ́ná, mɨná gá bɨɛ, bé e sɔ́ŋ ó, Abraham,” ebě, mě lɛ́ɛ́ bɨ́n ó, Nzyɛ̌m óbɛ̌m liŋ mékóʼ mâʼ bwá mé Abraham!

⁹Num nzwɨ́ɨ, wé mû ó ɨ́ cǎr lɨ́ etíʼe míkaalé bílɨ́ nko ménzuʼ. Nye ócwɛ̌l lɨ́ yɨ́yɛ̂h dí agúmo mímpǎŋ mi mpúmó yɨ́, guho yé lɨ́ ebéʼé é siʼe.»

¹⁰Entumo e bʉ̂r nzě dî e né ó: «Á nó, bɨ̌h bé ɨ́ jala le esâ yé ɛ́?»

¹¹Nye ntɔ̂ʼ lɛ́ɛ e bé ó: «Mʉr dí e mikán mímbá nyá, nye dwíhɨɨ gúú. Nye e dwé mʉ̂r dí abe e kán nyá. Mʉr dí ɨ́ twíha mede nyá, nye pɛ́ʼɛɛ mʉr dí ɨ́ nza nyá!»

¹²Onwɨa ó mɔnɨ́ tœ́a, bé ntémé, bé á si nze, lɨ́ enzě duŋɔɔ. Bê nzě dî e Yʉánɛs ó: «Lɛ̂ʼla, bɨ̌h bé ɨ́ jala le esâ nyá?»

¹³Nye ó: «Ayɨ́ nʉa gá mɔnɨ́ tœ́a, ntaǎ bím njwɨ́ɨ wɨ́n á lɛ́ɛ ó, bɨ̌n nʉ́aa yɨ́!»

¹⁴Bisója ntémé nzě dî e né ó: «Bɨ̌h bɨɛ ntémé, bé ɨ́ jala le esâ nyá?» Nye ó: «Ayɨ́ nʉa gá mɔnɨ́ e nkul, nkʉ̂ e nzɨ̌ bilɛ̌ʼ. Bónáá gá enʉǎ bím myɛ́na bé á be ó, bé ójána bɨ́n má.»

¹⁵Bʉr bɨ́bɛ̂h, bé á be ó lɨ́ ebóno Mʉ̂r Nzyɛ̌m á lœm múló mé jwɨ́ɨ nyá. Bé á be ó lɨ́ elwibla páʼ nyɔ́ɔ́ ó, Yʉánɛs óbɛ̌m be mʉ̂r waá.

¹⁶Yʉánɛs nzě lɛ́ɛ bɨ́bɛ̂h ó: «Mɛ̌m du bɨ́n ó e medíbé. Yé e nyʉ́ʉ́ mʉ̂r dí e nkul jwɨ́ɨ, laa mé nyá. Nye lɨ́ enze. Mɛm, mé abě tyé mʉ̂r dí ó, me tíyɨɨ mikǒl mí ósípah myé nyá. Nyɨɛ ó ngá du bɨ́n e Sísǐm mé Nzyɛ̌m ndu e siʼe.

¹⁷Nyě e pyɛba ɨ́ mebô. Nye ógwámle ébɛhɛɛ lé, lwâl mpúmó. Nye ókomo mílɔ́lá ɨ́ nkuna. Sâ gwár, nyé onʉa mpʉ́n, sʉ ɨ́ siʼe dí adímedime yɨ́.»

¹⁸Nó nyé á nze baʼa tɨ́e bé ɨ́ myúú mílɔ̌b ɨ́ buo buo, le elɛ́ɛ bé Mbɨambɨa Lɔ́ɔ.

¹⁹Nó yé á be náǎ ó, ngóvina Erôd á be ó sí dɛ̌n Erodiâd, myaá tʉ́l wé, di e né. Nye ntémé á be ó sí sâ byúú bísá bí ébébe é buo buo. Jɔʼ yaá yíyɛ̂h, Yʉánɛs á bɨbe ó, lɨ́ elɨlɛ̂ʼle nyé mebébe nyé á be lɨ́ esɨsâ má.

²⁰Nó Erôd á nze kɛl yʉ́ʉ́ syɛ́ɛla ébébe tɨ̂: gbâ Yʉánɛs ɨ́ mbʉʼ.

²¹Mpʉ éntumo e bʉ̂r, lé á be lɨ́ etó duŋɔɔ yɨ́, Yésʉs ntémé á si tô. Jɔʼ nyé á sil eduŋɔɔ yɨ́, le nyé á jɨʼla e Nzyɛ̌m, lě jʉ́o á bɔ́a.

²²Sísǐm mé Nzyɛ̌m nzě sulǒ mpʉ épɨbaa, nzě berwo nyé ɨ́ nyʉ̂l. Etyêl nzě duho ɨ́ jʉ́o kʉ́, lɨ́ elɛ́ɛ ó: «Go ó mwân wǎm mé dí ɨ́ buú kpɛl nyá. Sʉhʉʉ yâm yɨ́yɛ̂h, yé e go.»

²³Yésʉs á táare syɛ́ɛ́ yé ó, nye mû kúnókúno e mimbû mekám mélɛ̂l. Bʉr, bé á jwɨʼ ó, yé ó mwân mé Yóseb, á be mwân mé Éli nyá.

²⁴Éli á be ó mwân mé Matât; Matât, mwân mé Levî; Levî, mwân mé Mɛlkî; Mɛlkî, mwân mé Yanayɨ̂; Yanayɨ̂, mwân mé Yóseb;

²⁵Yóseb, mwân mé Matatías; Matatías, mwân mé Amôs; Amôs, mwân mé Naûm; Naûm, mwân mé Eslî; Eslî, mwân mé Nagaî;

²⁶Nagaî, mwân mé Máat; Máat, mwân mé Matatías; Matatías, mwân mé Semeyɨ̂n; Semeyɨ̂n, mwân mé Yósek; Yósek, mwân mé Yodâ;

²⁷Yodâ, mwân mé Yoánan; Yoánan, mwân mé Resâ; Resâ, mwân mé Zorobabɛ̂l; Zorobabɛ̂l, mwân mé Salátyɛl; Salátyɛl, mwân mé Nɛrî;

²⁸Nɛrî, mwân mé Mɛlkî; Mɛlkî, mwân mé Ádi; Ádi, mwân mé Kosâm; Kosâm, mwân mé Elmádam; Elmádam, mwân mé Ɛ̂r;

²⁹Ɛ̂r, mwân mé Josué; Josué, mwân mé Eliézer; Eliézer, mwân mé Yórim; Yórim, mwân mé Matât; Matât, mwân mé Levî;

³⁰Levî, mwân mé Siméon; Siméon, mwân mé Yʉ́da; Yʉ́da, mwân mé Yóseb; Yóseb, mwân mé Yónam; Yónam, mwân mé Eliakîm;

³¹Eliakîm, mwân mé Meleâ; Meleâ, mwân mé Menâ; Menâ, mwân mé Matatâ; Matatâ, mwân mé Natân; Natân, mwân mé David;

³²David, mwân mé Yesê; Yesê, mwân mé Óbed; Óbed, mwân mé Bôaz; Bôaz, mwân mé Salâ; Salâ, mwân mé Naasɔ̂n;

³³Naasɔ̂n, mwân mé Aminadâb; Aminadâb, mwân mé Ádmîn; Ádmîn, mwân mé Arnî; Arnî, mwân mé Ézrɔm; Ézrɔm, mwân mé Parɛ̂s; Parɛ̂s, mwân mé Yʉ́da;

³⁴Yʉ́da, mwân mé Yákɔb; Yákɔb, mwân mé Isaac; Isaac, mwân mé Abraham; Abraham, mwân mé Tára; Tára, mwân mé Nakɔ̂r;

³⁵Nakɔ̂r, mwân mé Serʉ̂k; Serʉ̂k, mwân mé Ragáos; Ragáos, mwân mé Fálɛk; Fálɛk, mwân mé Ébɛr; Ébɛr, mwân mé Salâ;

³⁶Salâ, mwân mé Kayɨnâm; Kayɨnâm, mwân mé Arpaksâd; Arpaksâd, mwân mé Sɛ̂m; Sɛ̂m, mwân mé Nóe; Nóe, mwân mé Lámɛk;

³⁷Lámɛk, mwân mé Matusála; Matusála, mwân mé Énɔk; Énɔk, mwân mé Yárɛd; Yárɛd, mwân mé Malelɛ̂l; Malelɛ̂l, mwân mé Kayɨnân;

³⁸Kayɨnân, mwân mé Énɔs; Énɔs, mwân mé Sɛ̂t; Sɛ̂t, mwân mé Ádam; Ádam á be ó mwân mé Nzyɛ̌m.