Read Koonzime Luc 4 Bible Online

Luc 4 - Koonzime bible

Luc 4

¹Yésʉs mû lwɨ́ŋlá e Sísǐm mé Nzyɛ̌m nɛ́ɛ: nye ntɔ̂ʼ duhǒ díbé Yɔrdên. Bé e Sísǐm mé Nzyɛ̌m ó b'á be ɨ́ lʉá.

²Sɔ́ŋ meleme ntɔ̂ʼ bóblo nyé gʉ̂, tâŋ melû mekám ménâ. Ɨ́ melû maá, nye á bɨbe ó, ade méde. Nye nzě jóʼo nzâ píe tɨ̂.

³Sɔ́ŋ meleme ntɔ̂ʼ lɛ́ɛ e Yésʉs ó: «Yé bé go ó Mwân mé Nzyɛ̌m nó, lɛ́yɨ́ɨ́ e mekóʼ mâʼ ó, mé líŋaa mede!»

⁴Yésʉs ntɔ̂ʼ lɛ́ɛ e né ó: «Yê cɛmá ɨ́ Mekaná mé Nzyɛ̌m ó: “Mʉr, nyé abe e nkul etiʼě njɨ ɨ́ lɔ̌b méde mé omér.”»

⁵Sɔ́ŋ meleme nzě nʉa nyé náǎ, nzě lɛ̂ʼle nyé mesí mɨ́mɛ̂h jɔʼ gwár.

⁶Nye nzě lɛ́ɛ e né ó: «Me ódwe gó nkul nyɨnyɛ̂h ɨ́ mesí mâʼ mɨ́mɛ̂h, le okúm le ogbaa o tɨ̂. Me á si boo dweŋɔɔ byé ó, me dwêʼ mʉr nyɨnyɛ̂h mé kpɛ̂l nyá.

⁷Gó bɨ́ʼ mébóó sí ɨ́ mpǒm nyǎm nó, bisâ bínɨ̌ bíbyɛ̂h, byê di byaá byô!»

⁸Yésʉs ntɔ̂ʼ yala e né ó: «Heʼé, yê cɛmá ɨ́ Mekaná mé Nzyɛ̌m ó: “Dwéʼ Dâ, dí Nzyɛ̌m gǒ nyá, kûm. Go e dwé dúu, njɨ nye omér.”»

⁹Sɔ́ŋ meleme nzě báʼǎ nʉa nyê, nzě tô e né ɨ́ Yerʉ́zalɛm, nzě tyêl nyé ɨ́ mié mpáh Nzyɛ̌m kʉ́. Nye e né ó: «Yé bé go ó Mwân mé Nzyɛ̌m nó, lyáháa! Ebě, yê cɛmá ó:

¹⁰“Nzyɛ̌m ólómlo gó beéngeles bé, bé ónzě kamle e go.”

¹¹Yê cɛmá ntémé ó: “Bé óbyɛɛle gó ɨ́ mebó mɔ́ɔ́. Sɨ́ǎ yaá ó kʉ̌ ngá be, abɨma gó lɨ́ ekóʼ yɨ́.”»

¹²Yésʉs nzě yala e né ó: «Heʼé, ebě, yê cɛmá ɨ́ Mekaná mé Nzyɛ̌m ó: “Ayɨ́ bóblǒ Dâ, dí Nzyɛ̌m gǒ nyá.”»

¹³Ɨ́ jɔʼ sɔ́ŋ meleme á sil ebóblo nyé mimbi mímyɛ̂h yɨ́, nye ntɔ̂ʼ pʉʼa gúmó Yésʉs á be yɨ́, lɨ́ ebóno lʉ́ʉ́ dʉ́o.

¹⁴Yésʉs ntɔ̂ʼ tô sí yé Galilê, nye mû lwɨ́ŋlá e nkul Sísǐm mé Nzyɛ̌m. Bʉr nzě jʉŋlǎ lɔ́ɔ́ wé á dumo e né wɨ́ ɨ́ sí yaá yɨ́yɛ̂h.

¹⁵Nye nzě lɨlɛ̂ʼle bʉ̂r ɨ́ mempáh mínjɨʼla mɔ́ɔ́. Bʉr bɨ́bɛ̂h bé á jʉjóʼo nye bá, bê nzě sêʼlɔɔ nyê.

¹⁶Yésʉs nzě tô kwár nyé, Nazarɛ̂t, gúmó nyé á bwaʼ mʉr yɨ́. Móhó sábat, wê nzě pyâl. Nye nzě nî ɨ́ mpáh minjɨʼla, ebě, yé á boo be ó ɨ́ metum mé. Nó nyé á nze tyɛ̂b tîtyěl, láǎ péh Mékaná mé Nzyɛ̌m.

¹⁷Bê nzě dwe nyé mekaná ngwíha milɔ̌b Ésayie á cɛma má. Nye nzě bɛ́ɛ mê, kœ̌b gúmó yé á be cɛmá ó:

¹⁸«Bɨ̌h e Sísǐm mé Nzyɛ̌m ó mû. Nzyɛ̌m á lœm me múlo ó, me tôʼ le etúnǒ Mbɨambɨa Lɔ́ɔ́ wé kwá baántéʼenteʼe o bʉ̂r. Nye á lómo me ó, me tôʼ le elɛ́ɛ míkómó ó, mí pɛʼɔɔ. Me lɛ́yɨɨ ntémé baá o dí e ntím bá ó, bé mû ó lɨ́ ebee. Me lɛ́yɨɨ baá o dí ejaʼra e mpêl bá ó, bɨ́ bírɔɔ.

¹⁹Me lɛ́yɨɨ bʉr bɨ́bɛ̂h ó, mbú Dâ Nzyɛ̌m á kɛʼ ó, nye ócwɨ́a e bʉr wɨ́, wɨ́ pyâl!»

²⁰Nó ó Yésʉs á nze dible mekaná maá, dwe mʉ̂r á kʉkomo mekaná maá nyá. Nye ntɔ̂ʼ di sí. Bʉr bɨ́bɛ̂h o b'á be ɨ́ mpáh minjɨʼla bá ntɔ̂ʼ bɨʼɔɔ nyé mejwôʼlʉ ɨ́ nyʉ̂l ɨ́ tooobó.

²¹Nó nyé á nze lɛ́ɛ bé ó: «Mûh, péh Mékaná mé Nzyɛ̌m bɨ̂n jóʼó nɨ̌, yɨ́ dira!»

²²Bʉr bɨ́bɛ̂h, bé á si sêʼle sá nyé á sâ yɨ́, le ekâm Yésʉs ɨ́ mimbɨambɨa mékǎn nyé á cɨ má. Bé ntémé nzě lɛ́ɛ ó: «Ntʉ mwân mé Yóseb nyâʼ ǎ?»

²³Nó nyé á nze lɛ́ɛ e bé ó: «Bɨ̌n dǐ lɛ́ɛ mé yé? Abe e mesónó, bɨ̌n bé ólɛ́ɛ̌ náǎ mûh ó, me sâʼ bɨ̌n sá kɨkɛna dí elɛ́ɛ yɨ́, ó: “Dɔ́bra, paá nyɛɛ́ jomo gó mʉr tɨ̂.” Ntémé, bɨ̌n bé ólɛ́ɛ e me ó: “Sáʼ bɨ́h wâʼ ɨ́ sí gó á byɛ̂l yɨ́ mbi mésimá bɨ́h jʉ́jóʼó ó, gó á sâ ɨ́ Kapernáʉm má.”»

²⁴Yésʉs nzě kɛl mékǎn mâʼ ó: «Mě lɛ́ɛ́ bɨ́n lɨ́ otyeetye ó, abe e ngwíha milɔ̌b ngwár dí enʉŋɔɔ̌ mbɨ̂mbɨá ɨ́ sí yé.

²⁵Mě lɛ́ɛ́ bɨ́n lɨ́ otyeetye ó, yé á be ó e mikúhó mí bʉ́bá ɨ́ buo buo ɨ́ sí Ɨ́zraɛ̂l ɨ́ melû mé Elie, jɔʼ mpíé á be akǎ nwɨ́ɨ tâŋ mimbú mílɛ̂l e pêh yɨ́. Nza á si nyaŋla ɨ́ sí yɨ́yɛ̂h.

²⁶Sâ gwár, Nzyɛ̌m á bé atyěn Elie kwá gúú kúhó Ɨ́zraɛ̂l. Nye á jaa lómo nye ó, njɨ kwá bʉr ó Sidɔ̂n bé omér, ɨ́ kwár Sárɛpta, gúmó kúhó mʉ́má, wé á didi yɨ́.

²⁷Minzɨ̂nzǎm, myé á be ɨ́ buo ɨ́ sí Ɨ́zraɛ̂l ɨ́ jɔ̌ʼ Élisée á be ngwíha milɔ̌b mé Nzyɛ̌m yɨ́. Sâ gwár, nye á bé atiʼ myaá myé á be gʉ̂ʼ mí, njɨ Naamân, mʉr Sirî.»

²⁸Bʉr o b'á be ɨ́ mpáh minjɨʼla bá, bɨ́bɛ̂h, bé á be ó, bé mû le ebúʼ ɨ́ miléme lɨ́ ejóʼo mékǎn ménɨ̌.

²⁹Bê nzě so nyé ɨ́ nkana, tínɔɔ nyé lɨ́ odumo o kwár, gúmó mbéʼé, wé á be yɨ́, lɨ́ esú lé énzéŋle nyé tɨ̂ʼ sí.

³⁰Sâ gwár, Yésʉs á si laa témé entumo e bʉ̂r laá, tô.

³¹Yésʉs á si baʼa tô Kapernáʉm, nyʉ́ʉ́ kwár ɨ́ sí Galilê. Nye nzě báʼǎ dwe bʉ̂r milɛ́ʼlá ɨ́ móhó sábat.

³²Bé á be ɨ́ buú kâm mbi mílɛ́ʼlá nyé á dwidwe bé mí, ebě, nye á dwe myé ó e nkul jwɨ́ɨ.

³³Ɨ́ sɔ́má bʉ̂r o b'á be ɨ́ mpáh minjɨʼla bá, nyʉ́ʉ́ á be ó le eleme, mbɨ́ǎ sísǐm. Eleme, lê nzě tíne nyé ó, nye tímaa kʉ́kʉ́ le elɛ́ɛ ó:

³⁴«Ywííí, Yésʉs, mʉr Nazarɛ̂t, mɨná e go bé e wáǎ lɔ̌b ɛ̌? Nzê go nzé ó, nzě sîl bɨ́h ɛ̌? Mɨ́ gʉ́a gô. Go ó Mʉr mé Nzyɛ̌m dí ti nyá!»

³⁵Yésʉs ntɔ̂ʼ nkáŋla le eleme. Nye e lé ó: «Diblaǎ num náǎ. Duhaa mʉ̂r nɨ̌ ɨ́ nyʉ̂l.» Eleme laá nzě nkɛŋ mʉ̂r nɨ̌ sí témé bʉr baá bɨ́bɛ̂h, ntɔ̂ʼ duho nyé ɨ́ nyʉ̂l, asâ nyé ebébe.

³⁶Bʉr bɨ́bɛ̂h nzě kâm, nzě gɔ́na le elwibla páʼ nyɔ́ɔ́ ó: «Wɨ̂ʼ mbi mékǎn duho wó? Nyě e nkul jwɨ́ɨ dí ó, nye lɨ́ ejwɨ́ɨ mímbɨ́a mísísǐm, myê bánǎ duho!»

³⁷Kûm nyé nzě myaŋla ɨ́ sí yaá yɨ́yɛ̂h.

³⁸Yésʉs nzě duho ɨ́ mpáh minjɨʼla nyaá, nzě tô mbɛ̌r mé Simon. Tǐ mʉmá mé Simon á be ó náǎ lɨ́ ebíle, nyʉ̂l lɨ́ edúo ɨ́ bɨl bɨl. Nó bé á nze dî e Yésʉs ó, nye tíʼɨɨ nye.

³⁹Yésʉs ntɔ̂ʼ tyɛ̂b bǎʼ e né, nzě nkáŋla le ekpaa. Ekpaa laá ntɔ̂ʼ síe. Mʉmá nɨ̌ ntɔ̂ʼ gbɔlwa sí, nzě táare éséa e bê.

⁴⁰Yé á be ó, yé mû bíí kʉ̌ʼ, bʉr bɨ́bɛ̂h bé á be e mimbêl mimbi mimbi bá, bé ntɔ̂ʼ nkɛ́ɛ myê, tóŋɔɔ e myé kwá mé Yésʉs. Nye á jaa kɛl bé ó, njɨ mebô, bé ntɔ̂ʼ tiʼe!

⁴¹Meleme ɨ́ buo buo, mé á be ó lɨ́ eduho bʉ̂r ɨ́ menyʉ̂l. Mé á si bʉ̂ bítím, lɛ́ɔɔ ó: “Go ó Mwân mé Nzyɛ̌m!” Nó ó Yésʉs á nze nkáŋla e meleme maá, pɨr mé lwǐb, ebě, meleme maá, mé á si kʉ gʉ́a ó, nye ó dí Mʉ̌r Nzyɛ̌m á lœm múló mé jwɨ́ɨ nyá.

⁴²Mɛ́n wé á lɔ́ma nó, Yésʉs nzě pɔhwa, tô kʉ̌l, tô ɨ́ mâ lʉ̌n, súm nyé á be nye omér yɨ́. Entumo e bʉ̂r nzě sáa nyê. Mpʉ bé á bee nye yɨ́, bê nzě bii nyé ó, nye díʼee, akǎ líʼe bê.

⁴³Nó ó Yésʉs á nze lɛ́ɛ e bé ó: «Yé jɨ ó, me tôʼ ɨ́ byúú bínkana biswîh. Me túnaa Mbɨambɨa Lɔ́ɔ dí edumo e Mpóʼo mé Nzyɛ̌m wɨ́, ebě, Nzyɛ̌m á lómo me ó, me sâʼ nó.»

⁴⁴Nó nyé á nze tô le elɛ́ɛ̌ lɔ́ɔ waá ɨ́ mempáh mínjɨʼla mé á bě sí Yʉ́da má.